Devirahasya 40
Devīrahasya 40
- Language
- Sanskrit
40.1
śrībhairava uvāca
adhunā kathayiṣyāmi vidyāṃ sāhasranāmikīm
bhogadāṃ mokṣadāṃ loke lakṣmīnārāyaṇasya te
40.2
śrībhairavī
bhagavan karuṇāmbhodhe lakṣmīnārāyaṇasya me
bhogāpavargadaṃ divyaṃ vada nāmasahasrakam
40.3
sarvamantramayaṃ tattvaṃ sarvapūjāphalapradam
sarvāgamarahasyāḍhyaṃ sarvadevaikavanditam
40.4
śrībhairava uvāca
etadrahasyaṃ paramaṃ mantranāmasahasrakam
lakṣmīnārāyaṇasyeṣṭaṃ sarvasvaṃ tattvato mama
40.5
guhyaṃ gopyatamaṃ devi sukhadaṃ dharmavardhanam
lakṣmīsaṃvardhanaṃ loke paratra paramārthadam
40.6
mahācīnapadasthānāṃ kaulikānāmabhīṣṭadam
upapātakapāpānāṃ śamanaṃ damakārakam
40.7
sarvatīrthaphalodriktaṃ sarvayajñaphalapradam
sarvadevastutaṃ sādhyaṃ caturvargaphalapradam
40.8
avācyaṃ mārgahīnānāmaśravyaṃ duṣṭacetasām
vaiṣṇavaḥ kaulikaśreṣṭhaḥ paṭhennāmasahasrakam
gurūpadeśato devi sarvasiddhimavāpnuyāt
Linked texts (4)
- Devīrahasya — Sanskrit
- Pūrvārddhadevirahasya — Sanskrit
- Devīrahasyapurāṇa — Sanskrit
- Devīrahasyatantra — Sanskrit