Pramāṇa · Search · About · API

Devirahasya 43

Devīrahasya 43

Language
Sanskrit

Contents

43.1

gopyaṃ guhyaṃ gopanīyaṃ cetyājñā pārameśvarī
śrībhairava uvāca
kailāsaśikhare ramye maṇimālātibhāsvare
nānādrumalatākīrṇe nānāpuṣpopaśobhite

43.2

vicitraratnakhacita-śilāmaṇḍapamaṇḍite
kinnarīmadhurālāpa-mukharīkṛtadiṅmukhe

43.3

bhagavantamumānāthamupaviṣṭamumāśritam
brahmopendrendracandrārka-guruśukrasamanvitam

43.4

brahmarṣivasusiddhaugha-gaṇagandharvasevitam
candrārdhamukuṭopetaṃ śūlakhaḍgāṅkadhāriṇam

43.5

varābhayakaraṃ śāntaṃ kuntabāṇāsisaṃyutam
khaḍgakheṭakahastaṃ ca pāśatomarakāyudham

43.6

bhiṇḍipālakaraṃ prāsaparighāyudhadhāriṇam
gadāḍamaruhastaṃ ca śataghnīcakrasaṃyutam

43.7

aṣṭādaśabhujaṃ devaṃ bhūtibhūṣitavigraham
digambaraṃ viśālākṣaṃ trinetraṃ pañcavaktrakam

43.8

ānandamuditaṃ viśvaṃ viśvanāyakamīśvaram
japantaṃ prahasantaṃ ca gauryāliṅgitavigraham

43.9

pannagābharaṇopetaṃ mahādevaṃ maheśvaram
baddhapadmāsanaṃ śaṃbhuṃ śaraṇāgatavatsalam

43.10

prasannavadanaṃ dṛṣṭvā praṇamyotthāya pārvatī
girā madhurayā devaṃ provāca parameśvaram

43.11

śrīdevyuvāca
bhagavan yaḥ śivo devo mahāmṛtyuñjayaḥ paraḥ
ādinātho jagattrātā dīkṣānāyaka īśvaraḥ

43.12

varṇitaḥ prāṅ mahādevo guṇātītaścidīśvaraḥ
bhavatā tasya devasya parabrahmasvarūpiṇaḥ

43.13

paścāṅgaṃ śrotumicchāmi vaktumarhasi me prabho
śrībhairava uvāca
parameśvaradevasya mahāmṛtyuñjayasya te
bhaktyā vakṣyāmi paścāṅgaṃ nākhyeyaṃ yasya kasyacit

43.14

paṭalaṃ paddhatiṃ varma mantranāmasahasrakam
stotraṃ paścāṅgabhūtaṃ ca gopayedyaḥ sa sādhakaḥ

43.15

tatrādau paṭalaṃ vakṣye dīkṣānāyakavallabham
guhyaṃ paramaguhyaṃ ca gopyaṃ tu mumukṣubhiḥ

43.16

mantroddhāraṃ mahādevi dīkṣāphalavivṛddhaye
divyaṃ sukhakaraṃ sādhyaṃ siddhaṃ vakṣyāmi siddhaye

43.17

tāraṃ hṛdbhavatārtikaṃ śivaśaranmathaikabījaṃ tato
vācyaṃ pālaya pālayeti ca punaḥ śaktiḥ śivaḥ śāktikam
hṛjjaṃ tārakabhūṣaṇaṃ nigaditastadbhaktihetormayā
dīkṣānāyakavallabho manurayaṃ trailokyacintāmaṇiḥ

43.18

nāsyāntarāyabāhulyaṃ siddhasādhyāridūṣaṇam
na kāyakleśadaurbalyaṃ nācāraniyamabhramaḥ

43.19

na paścadoṣaśaṅkāpi nottamarṇādhamarṇakau
kevalaṃ paramānandavardhano ripumardanaḥ

43.20

mantro'yaṃ mantrarājendro dīkṣāphalasuradrumaḥ
vinā puraścikrayāmeṣa mantrarājo na sidhyati

43.21

tasmāt puraścikrayāhetorguruṃ saṃprārthayecchive
guruhastena yaḥ kuryānmantrasyāsya puraścikrayām

43.22

tasyāyaṃ mantrarājendro bhavet kalpadrumopamaḥ
varṇalakṣaṃ puraścaryā tadardhaṃ vā maheśvari

43.23

ekalakṣāvadhi kurvātrāto nyūnaṃ kadācana
japād daśāṃśato homastaddaśāṃśena tarpaṇam

43.24

mārjanaṃ taddaśāṃśena taddaśāṃśena bhojanam
evaṃ vidhāya mantrasya puraścaryāṃ ca sādhakaḥ

43.25

gurave dakṣiṇāṃ dattvā yathāśakti bhavamīśvari
tato japo bhaved devi sarvasiddhipradāyakaḥ

43.26

anyathā na bhavet siddhirdīkṣāyāḥ sumanorapi
yantroddhāravidhiṃ vakṣye devadevasya pārvati

43.27

sarvasaṃmohanaṃ divyaṃ sarvāśāparipūrakam
bindutrikoṇaṣaṭkoṇa-vṛttāṣṭadalamaṇḍitam

43.28

vṛttatrayaṃ dharāsamra śrīcakraṃ śaivamīritam
layāṅgamasya vakṣyāmi yantrarājasya pārvati

43.29

yasya śravaṇamātreṇa dīkṣāphalamavāpnuyāt
indrādyā daśa dikpālāḥ sāyudhā bhūgṛhe śive

43.30

divyasiddhaughamartyaughā guravo'pyāraṇatraye
asitāṅgo ruruścaṇḍakrodheśonmattabhairavāḥ

43.31

kapālīśo bhīṣaṇākhyaḥ saṃhāreśo'ṣṭamaḥ śive
pūjanīyā vasudale sādhakaistu mumukṣubhiḥ

43.32

kālāgnirudraṃ netreśaṃ viśvanāthaṃ maheśvaram
sadyojātaṃ vāmadevaṃ pūjayet kāmayoniṣu

43.33

kāmeśvaraṃ mahākālaṃ devaṃ svacchandabhairavam
trikoṇe pūjayed devi svāgreśānāgnibhāgataḥ

43.34

bindau mṛtyuñjayaṃ devaṃ svaśaktyā sahitaṃ śive
amṛteśvaramīśānamīśvaraṃ bhuvaneśvaram

43.35

trikhaṇḍāṃ pāśamīśāni sudhākalaśamuttamam
muktācchamūtraṃ devāṅge pūjayet sādhakottamaḥ

43.36

saṃpūjya vidhivad devi gandhādyataprasūnakaiḥ
dhūpadīpādinaivedyaistāmbūlaiśchatracāmaraiḥ

43.37

layāṅgamidamākhyātaṃ sarvatantreṣu gopitam
sarvasiddhipradaṃ devi gopanīyaṃ viśeṣataḥ

43.38

mantraśāstrasya mahādevi mahācema-padādikaḥ
sakahola ṛṣiśchando gāyatrī devatā tathā

43.39

mahāmṛtyuñjayo rudro mahādevo'dhidevatā
bījaṃ ca praṇavo devi śaktirhuṃjākhyabījakam

43.40

kīlakaṃ śaradīśāni digbandho'stvastramīśvari
caturvargeṣu vidyāyā viniyogaḥ prakīrtitaḥ

43.41

tārahuṃjaśaradbījaiḥ ṣaḍdīrghaiḥ prāṇa(nyāsa)mācaret
karayorhṛdayādīnāmaṅgānāṃ sādhakottamaḥ

43.42

mūlādibījamātreṇa prāṇāyāmatrayaṃ caret
tattatrayeṇācamanamātmavidyāśivādinā

43.43

atha dhyānaṃ pravakṣyāmi devadeveśvarasya hi
yenaiva dhyānamātreṇa mantrī śaivaṃ padaṃ vrajet

43.44

candrārkāgnivilocanaṃ smitamukhaṃ padmadvayāntaḥsthitaṃ
mudrāpāśasudhāktasūtravilasatpāṇiṃ himāṃśuprabham
koṭīrendugalatsudhāplutatanuṃ hārādibhūṣojjvalaṃ
kāntyā viśvavimohanaṃ paśupatiṃ mṛtyuñjayaṃ bhāvayet

43.45

candramaṇḍalamadhyasthe rudrabhāle'tivistṛte
tatrasthaṃ cintayet sādhyaṃ mṛtyuṃ prāpno'pi jīvati

43.46

iti sādhyaṃ parābījamantrāvayavabhūṣitam
rudrabhālasthamīśāni gopanīyaṃ viśeṣataḥ

43.47

prayogānaṣṭa vakṣyāmi durlabhān paramārthadān
yān vidhāya śive mantrī bhaved bhairavasannibhaḥ

43.48

stambhanaṃ mohanaṃ caiva māraṇākarṣaṇe tataḥ
vaśīkāraṃ tathoccāṭaṃ śāntikaṃ pauṣṭikaṃ tathā

43.49

eteṣāṃ sādhanaṃ vakṣye sarvasaukhyaikakāraṇam
yena sādhanamātreṇa sarvasiddhirbhavet kalau

43.50

(1) ravau snānaṃ śive kṛtvā nityakarma samāpya ca
saṃkalpapūrvaṃ mantraṃ ca japedayutasaṃkhyayā

43.51

homo daśāṃśataḥ sarpiryavākanakabījakaiḥ
stambhanaṃ jāyate vādimukhadasyuvivasvatām

43.52

(2) candre saṃpūjya deveśaṃ japedayutasaṃkhyayā
homo ghṛtayavāllājaśākapatrairdaśāṃśataḥ

43.53

tadvattilakenaiva mohanaṃ jagatāṃ bhavet
(3) maṅgale sādhakaḥ snātvā gatvā śmaśānamaṇḍalam

43.54

ayutaṃ prajapenmantraṃ homo ghṛtaviśālayā
śrīparṇīmadhukonmiśraiḥ śrīphalaiściñcinīphalaiḥ

43.55

mṛtyuṃ yāti ripurdevi daśāhādadhi matsamaḥ
(4) budhe snātvārcayed devaṃ śrīcakrāgre japenmanum

43.56

ayutaṃ taddaśāṃśena hunet sarpiḥ śatāvarīm
trikaṭukaṃ bilvakaṃ ca strīṇāmākarṣaṇaṃ bhavet

43.57

(5) gurau snātvā japedvidyāṃ parāmayutasaṃkhyayā
homo daśāṃśataḥ kāryo ghṛtapakvāccacandanaiḥ

43.58

āragvadhena kaṇayā varayāmṛtayā śive
ripū rājā dhanī vīro jiṣṇurdāsyatyameṣyati

43.59

(6) śukre śmaśāne vīreśo japedayutasaṃkhyayā
citāgre mūlavidyāṃ tu taddaśāṃśaṃ huned ghṛtam

43.60

samaeḍakaṃ śambhūkaṃ ca ripumuccāṭayed dhruvam
(7) śanau snātvā caret pūjāṃ japedvidyāṃ tathāyutam

43.61

hunedājyapayomṛtsnā-vārtākamṛduśādvalān
dhattūrapuṣpasahitān sarvaśāntiḥ prajāyate

43.62

(8) sarvadā sarvavāreṣu japedayutasaṃkhyayā
homo daśāṃśataḥ kāryo ghṛtapāyasapaṅkajaiḥ

43.63

chāgairkūrmavārāhapalayuktaiḥ sabhaktakaiḥ
pitṝṇāṃ devatānāṃ ca bhūbhṛtāṃ rogiṇāṃ tathā

43.64

daśāṃśaṃ vidhivad dattvā mahāpuṣṭiḥ prajāyate
itīdaṃ paramaṃ tattvaṃ mantrasyāsya mayeritam
adātavyamabhaktebhyo gopanīyaṃ svayonivat

43.64.p1

iti śrīrudrayāmale tantre śrīdevīrahasye mṛtyuñjayapaṭalanirūpaṇaṃ ekacatvāriṃśaḥ paṭalaḥ || 41

Linked texts (4)