Pramāṇa · Search · About · API

Devirahasya 45

Devīrahasya 45

Language
Sanskrit

45.1

atha
trayaścatvāriṃśaḥ paṭalaḥ
śrībhairava uvāca
śrṛṇuṣva parameśāni kavacaṃ manmukhoditam
mahāmṛtyuñjayasyāsya na deyaṃ paramādbhutam

45.2

yaṃ dhṛtvā yaṃ paṭhitvā ca śrutvā ca kavacottamam
trailokyādhipatirbhūtvā sukhito'smi maheśvari

45.3

tadeva varṇayiṣyāmi tava prītyā varānane
tathāpi paramaṃ tattvaṃ na dātavyaṃ durātmane

45.1-2

candramaṇḍalamadhyasthaṃ rudraṃ bhāle vicintya tam
tatrasthaṃ cintayet sādhyaṃ mṛtyuṃ prāpno'pi jīvati

45.2-2

oṃjuṃsaḥ hauṃ śiraḥ pātu devo mṛtyuñjayo mama
oṃśrīṃ śivo lalāṭaṃ me oṃhrīṃ bhruvau sadāśivaḥ

45.3-2

nīlakaṇṭho'vatānnetre kapardī me'vatācchrutī
trilocano'vatād gaṇḍau nāsāṃ me tripurāntakaḥ

45.4

mukhaṃ pīyūṣaghaṭabhṛdoṣṭhau me kṛttikāmbaraḥ
hanuṃ me hāṭakeśāno mukhaṃ baṭukabhairavaḥ

45.5

kandharāṃ kālamathano galaṃ gaṇapriyo'vatu
skandhau skandapitā pātu hastau me giriśo'vatu

45.6

nakhān me girijānāthaḥ pāyādaṅgulisaṃyutān
stanau tārāpatiḥ pātu vakṣaḥ paśupatirmama

45.7

kukṣiṃ kuberavaradaḥ pārśvau me māraśāsanaḥ
śarvaḥ pātu tathā nābhiṃ śūlī pṛṣṭhaṃ mamāvatu

45.8

śiśnaṃ me śaṅkaraḥ pātu guhyaṃ guhyakavallabhaḥ
kaṭiṃ kālāntakaḥ pāyādūrū me'ndhakaghātakaḥ

45.9

jāgarūko'vatājjānū jaṅghe me kālabhairavaḥ
gulphau pāyājjaṭādhārī pādau mṛtyuñjayo'vatu

45.10

pādādimūrdhaparyantamaghoraḥ pātu me sadā
śirasaḥ pādaparyantaṃ sadyojāto mamāvatu

45.11

ratnāhīnaṃ nāmahīnaṃ vapuḥ pātvamṛteśvaraḥ
pūrve balavikaraṇo dakṣiṇe kālaśāsanaḥ

45.12

paścime pārvatīnātho hyuttare māṃ manonmanaḥ
aiśānyāmīśvaraḥ pāyādāgneyyāmagnilocanaḥ

45.13

nairṛtyāṃ śambhuravyānmāṃ vāyavyāṃ vāyuvāhanaḥ
ūrdhve balapramathanaḥ pātāle parameśvaraḥ

45.14

daśādikṣu sadā pātu mahāmṛtyuñjayaśca mām
raṇe rājakule dyūte viṣame prāṇasaṃśaye

45.15

pāyād oṃ juṃ mahārudro devadevo daśācaraḥ
prabhāte pātu māṃ brahmā madhyāhne bhairavo'vatu

45.16

sāyaṃ balapramathano niśāyāṃ nityacetanaḥ
ardharātre mahādevo niśānte māṃ mahomayaḥ

45.17

sarvadā sarvataḥ pātu oṃjuṃsaḥ hrauṃ mṛtyuñjayaḥ
itīdaṃ kavacaṃ puṇyaṃ triṣu lokeṣu durlabham

45.18

sarvamantramayaṃ guhyaṃ sarvatantreṣu gopitam
puṇyaṃ puṇyapradaṃ divyaṃ devadevādhidaivatam

45.19

ya idaṃ ca paṭhenmantrī kavacaṃ vārcayet tataḥ
tasya haste mahādevi tryambakasyāṣṭa siddhayaḥ

45.20

raṇe dhṛtvā caredyuddhaṃ hatvā śatrūñjayaṃ labhet
jayaṃ kṛtvā gṛhaṃ devi saṃprāpsyati sukhī punaḥ

45.21

mahābhaye mahāroge mahāmārībhaye tathā
durbhikṣe śatrusaṃhāre paṭhet kavacamādarāt

45.22

sarvaṃ tat praśamaṃ yāti mṛtyuñjayaprasādataḥ
dhanaṃ putrān sukhaṃ lakṣmīmārogyaṃ sarvasaṃpadaḥ

45.23

prāpnoti sādhakaḥ sadyo devi satyaṃ na saṃśayaḥ
itīdaṃ kavacaṃ puṇyaṃ mahāmṛtyuñjayasya tu
gopyaṃ siddhipradaṃ guhyaṃ gopanīyaṃ svayonivat

Linked texts (7)