Pramāṇa · Search · About · API

Devirahasya 48

Devīrahasya 48

Language
Sanskrit

Contents

48.1

atha
śrīdevyuvāca
bhagavan sarvatattvajña sādhakānāṃ jayāvaha
yat purā sūcitaṃ deva durgāpaścāṅgamuttamam

48.2

sarvasvaṃ sarvadevānāṃ rahasyaṃ sarvamantriṇām
tadadya kṛpayā brūhi yadyasti mayi te dayā

48.3

śrībhairava uvāca
etad guhyatamaṃ devi paścāṅgaṃ tattvalakṣaṇam
durgāyāḥ sārasarvasvaṃ na kasya kathitaṃ mayā

48.4

tava snehāt pravakṣyāmi durgāpaścāṅgamīśvari
guhyaṃ gopyatamaṃ divyaṃ na deyaṃ brahmavādibhiḥ

48.5

yā devī daityadamanī durgetyaṣṭākṣarā śivā
devairārādhitā pūrvaṃ brahmācyutapuraḥsaraiḥ

48.6

purandarahitārthāya vadhārthāya suradviṣām
saivaṃ sṛjati bhūtāni rājasī parameśvarī

48.7

sāttvikī rakṣati prānte saṃhariṣyati tāmasī
itthaṃ guṇatrayīrūpā sṛṣṭisthitilayātmikā

48.8

aṣṭākṣarī mahāvidyā saṃkhyātītā parātmikā
tasyāḥ paścāṅgamadhunā rahasyaṃ tridivaukasām

48.9

vakṣyāmi paramaprītyā na cākhyeyaṃ durātmane
paṭalaṃ tava vakṣyāmi durgāyāstattvamuttamam

48.10

yena śravaṇamātreṇa koṭipūjāphalaṃ labhet
durgāyā devi vakṣyāmi mantroddhāraṃ parāśrayam
sarvatantreṣuvikhyātaṃ sarvakāmaphalapradam

48.11

tāraṃ māyā cākrikaṃ cakridūrvā
vāyavyārṇaṃ viśvamante bhavāni
durgāyāste varṇito mūlavidyāmantroddhāro gopito'ṣṭācaro'yam

48.12

nāmnāntarāyacāhulyaṃ nāpyamitrādidūṣaṇam
no vā prayāsasaṃyogo nācārayugavibhravaḥ

48.13

sākṣāt siddhiprado mantro durgāyāḥ kalināśanaḥ
aṣṭācaro'ṣṭasiddhīśo gopanīyo digambaraiḥ

48.14

mahācīnakramasthānāṃ sādhakānāṃ jayāvahaḥ
mantrarājo mahādevi sadyo bhogāpavargadaḥ

48.15

varṇalakṣaṃ puraścaryā tadardhaṃ vā maheśvari
ekalakṣāvadhi kuryānnāto nyūnaṃ kadācana

48.16

mūlotkīlanasiddhaṃ tu sañjīvanamusaṃskṛtam
puraścaryāṃ caret paścāt saṃpuṭāḍhyaṃ carenmanum

48.17

tato mantraṃ japennityaṃ durgāyāstvaṣṭasiddhidam
yaṃ japtvā sādhako bhūmau vicaredbhairavo yathā

48.18

ṛṣirasya smṛto devi mantrasyādyo maheśvaraḥ
chando'nuṣṭub devatā ca śrīdurgāṣṭācarā smṛtā

48.16-2

cākrikaṃ bījamīśāni māyā śaktiriti smṛtā
tāraṃ kīlakamāśānāṃ viśvaṃ bandhanamīśvari

48.20

dharmārthakāmamokṣārthe viniyogaḥ prakīrtitaḥ
tāramāyācarairdevi nyāsaṃ ṣaḍdīrghabhāgibhiḥ

48.21

nihatya ṣaḍripūn devi dhyāyed durgāṃ kuleśvarīm
dūrvānibhāṃ trinayanāṃ vilasatkirīṭāṃ
śaṅkhābjakhaḍgaśarakheṭakaśūlacāpān
saṃtarjanīṃ ca dadhatīṃ mahiṣāsanasthāṃ
durgāṃ navārakulapīṭhagatāṃ bhaje'ham

48.22

yantroddhāraṃ pravakṣyāmi durgāyāḥ kulamandiram
sarvasiddhipradaṃ cakraṃ sarvāśāparipūrakam

48.23

bindutrikoṇaṃ rasakoṇavimbaṃ
vṛttāṣṭapatrāśritavahnivṛttam
dharāgṛhodbhāsitaminducūḍe
durgāśrayaṃ yantramidaṃ pradiṣṭam

48.24

layāṅgamasya yatrasthaṃ sarvatantreṣu gopitam
yenoccāraṇamātreṇa koṭiyajñaphalaṃ labhet

48.25

gaṇeśaṃ ca kumāraṃ ca puṣpadantaṃ vikartanam
caturdvāreṣu deveśi pūjayet sādhakeśvaraḥ

48.26

brāhmī nārāyaṇī devi cāmuṇḍāpyaparājitā
māheśvarī ca kaumārī vārāhī nārasiṃhikā

48.27

pūjyā vasudale devi bhairavāṃścāṣṭa pārvati
asitāṅgo ruruścaṇḍaḥ krodhonmattakapālikāḥ

48.28

bhīṣaṇaścaiva saṃhāro vāmāvartena sādhakaiḥ
pūjyāḥ pṛthak pṛthag devi gandhapuṣpākṣataiḥ śive

48.29

dattvā puṣpāñjaliṃ cakre mūlamucārya sādhakaḥ
pūjayet padmakiñjalkaiḥ ṣaḍaśre ṣaṭ kulāmbikāḥ

48.30

śailaputrīṃ svanāmāgrāt pūjayed brahmacāriṇīm
candraghaṇṭāṃ ca kūṣmāṇḍāṃ skandamātaramīśvari

48.31

kātyāyanīṃ ca saṃpūjya dūrvāgandhākṣataiḥ param
punaḥ puṣpāñjaliṃ dattvā śrīcakre paramārthade

48.32

pūjayed devatāstisraḥ kulasthāścipurāmbikāḥ
kālarātrī mahāgaurī devadūtīti pārvati

48.33

trikoṇāgrācchive pūjyāḥ sindūrākṣatapuṣpakaiḥ
dūrvādalāñjaliṃ dattvā yantrarāje'ṣṭasiddhide

48.34

pūjayedambikāṃ durgāmaṣṭācaravibhūṣaṇām
cindau devīmaṣṭabhujāṃ vidyāmaṣṭākṣarīṃ śive

48.35

nīlakaṇṭhaṃ śivaṃ cindau pūjayejjagadambikām
tatrāyudhāni deveśi pūjayedaṣṭa sādhakaḥ

48.36

śaṅkhaṃ padmamasiṃ bāṇān dhanuḥ kheṭakamīśvari
śūlaṃ saṃtarjanīṃ divyāṃ nānāpuṣpaiḥ samarcayet

48.37

devadevyau cindupīṭhe pūjayet sarvasiddhaye
atha vakṣye mahādevi prayogānaṣṭa siddhaye

48.38

yān vidhāya kalau mantrī bhavet kalpadrupopamaḥ
stambhanaṃ mohanaṃ caiva māraṇākarṣaṇe tataḥ

48.39

vaśīkāraṃ tathoccāṭaṃ śāntikaṃ pauṣṭikaṃ tathā
eṣāṃ sādhanamācakṣva prayogāṇāṃ maheśvari

48.40

mahācīnakramasthānāṃ sādhakānāṃ hitāya ca
(1) ayutaṃ prajapenmūlaṃ śmaśāne niśi sādhakaḥ

48.41

huned daśāṃśataḥ sarpiryavānmāṃsāmṛgacyutān
stambhanaṃ jāyate kṣipraṃ vādikāmijanāmbhasām

48.42

(2) ayutaṃ prajaped devi vaṭe rudrākṣamālayā
homo daśāṃśataḥ kāryo ghṛtapadmākṣapaṅkajaiḥ

48.43

āragvadhaiḥ sudhāmūlairmohanaṃ jāyate kṣaṇāt
devānāṃ dānavānāṃ ca kā kathālpadhiyāṃ nṛṇām

48.44

(3) ayutaṃ prajapenmūlaṃ vane sādhakasattamaḥ
vetasīmūlago vāpi hunet tatra daśāṃśataḥ

48.45

ghṛtapāyasaśambūkān ripurmṛtyumukhaṃ vrajet
(4) ayutaṃ prajapedrātrau śūnyāgāre kuleśvari

48.46

homo daśāṃśataḥ kāryo ghṛtavyoṣaśaṭīśaraiḥ
kapibījairapi prātarbhavedākarṣaṇaṃ striyām

48.47

(5) ayutaṃ prajapenmūlaṃ catvare tvaritaṃ hunet
ājyābjacurapāpāeḍa-raktapuṣpāṇi pārvati

48.48

śakro'pi vaśatāmeti kiṃ punaḥ kṣudrabhūmipaḥ
(6) ayutaṃ prajapenmūlaṃ sādhako'śvatthamūlagaḥ

48.49

hunedājyaṃ daśāṃśena keśaṃ strīṇāṃ tvacaṃ kaṇāḥ
ripumuccāṭayet śīghraṃ yadi śakrasamo bhavet

48.50

(7) ayutaṃ prajapenmūlaṃ suradrumatale hunet
ghṛtāktaṃkukkuṭāṅgāni nānāpuṣpāṇi sādhakaḥ

48.51

rogopadravakālasya sadyaḥ śāntirbhaviṣyati
(8) ayutaṃ prajapenmūlaṃ līlopavanamaṇḍale

48.52

homo daśāṃśataḥ kāryo ghṛtamīnājamastakaiḥ
pādairaṣṭabhirīśāni sadyaḥ puṣṭiḥ prajāyate

48.53

ityeṣa paṭalo divyo mantrasarvasvarūpavān
durgārahasyabhūto'pi gopanīyo mumukṣubhiḥ

48.53.p1

iti śrīrudrayāmale tantre śrīdevīrahasye durgāpaṭalanirūpaṇaṃ ṣaṭcatvāriṃśaḥ paṭalaḥ || 46

Linked texts (5)