Pramāṇa · Search · About · API

Devirahasya 5

Devīrahasya 5

Language
Sanskrit

Contents

5.1

atha
pañcamaḥ paṭalaḥ
śrībhairava uvāca
atha vakṣye mahattattvaṃ mantrāṇāṃ paramārthadam
yena vijñātamātreṇa vidyā sidhyati sattvaram

5.2

utkīlanavidhiṃ vakṣye sarvamantrarahasyakam
adātavyamabhaktebhyo nākhyeyaṃ yasya kasyacit

5.3

śāktānāṃ devi mantrāṇāṃ śaivānāṃ ca viśeṣataḥ
vaiṣṇavānāṃ manūnāṃ tu vakṣyāmyutkīlanaṃ param

5.4

prathamaṃ devi bālāyā astyacaryāṃ śṛṇu pārvati
vāṇīmante triruccārya bhavedutkīlanaṃ manoḥ

5.5

antyakūṭaṃ vadedādau dvirdevi japasiddhaye
bhavet tripurabhairavyā manorutkīlanaṃ param

5.6

kūṭatrayāṇāṃ prathamaṃ varṇaṃ varṇaṃ samuddharet
japecchrīṣoḍaśāccaryā bhavedutkīlanaṃ manoḥ

5.7

atha vakṣye rahasyaṃ te kālikāyā maheśvari
niṣkīlitā syādvidyeyaṃ dvāviṃśatyakṣarī parā

5.8

bhadrikāṃ prathamaṃ dadyādante kālītrayaṃ vadet
bhadrakālīmanordevi bhavedutkīlanaṃ tathā

5.6-2

ṭhadvayānte parāṃ dadyāt japet sādhakasattamaḥ
bhavedutkīlanaṃ devi rājamātaṅginīmanoḥ

5.10

viśvānte sakalāṃ dadyājjapet pārvati jāpakaḥ
manoḥ śrībhuvaneśvaryāḥ syādutkīlanamuttamam

5.11

vadhūmādau paṭhedante tāraṃ japtvā ca pārvati
ayamutkīlano mantrastārāyāḥ samudāhṛtaḥ

5.12

mātrāṃ dvādaśikīmādau japenmantrasya pārvati
chinnaśīrṣāmanoreṣa syādutkīlanakaḥ paraḥ

5.13

māyāmādau vanānte ca vāgbhavaṃ sādhako japet
sumukhyā mantrarājasya bhavedutkīlanaṃ tathā

5.14

vāgbhavaṃ prathamaṃ dadyādiśvānte praṇavaṃ japet
sarasvatīmanordevi mantro'styutkīlanābhidhaḥ

5.15

viśvamādau japed devi vanānte madanaṃ paṭhet
annapūrṇāmanoreṣa syādutkīlanako manuḥ

5.16

ramāmādau manordadyāt padmatrayamathāścale
mahālakṣmīmanordevi mantro'styutkīlanābhidhaḥ

5.17

sindhuraṃ sañjapedādau māyāmante maheśvari
śārikāmantrarājasya syādutkīlanako manuḥ

5.18

vanamādau ca nāmāgre tāraṃ dattvā japecchive
śāradāmantrarājasya mantro'styutkīlanābhidhaḥ

5.19

śaktibījaṃ paṭhedādau ṭhadvayānte ca manmatham
indrākṣīmantrarājasya syādutkīlanako manuḥ

5.20

mṛdvījaṃ ca manorādau vanānte praṇavaṃ japet
mantro'yaṃ bagalāmukhyā mantrotkīlanasiddhidaḥ

5.21

triḥ paṭhedaśamarīprānte praṇavaṃ sādhakottamaḥ
turīmantrasya mantro'yamutkīlanaphalapradaḥ

5.22

vahnimādau tathā cānte tāraṃ dattvā maheśvari
japenmatraṃ mahārājñīmanūtkīlanasiddhaye

5.23

ramāmādau japed devi mantrānte sakalāṃ japet
jvālāmukhīmanoreṣa mantro'styutkīlanakramaḥ

5.24

vedībījaṃ paṭhedādau nāmānte praṇavaṃ japet
bhīḍāmantrasya mantro'yamutkīlanaphalapradaḥ

5.25

viśvānte vāgbhavaṃ dadyāt kāmamādau japet priye
kālarātrimanordevi syādutkīlanako¹ manuḥ

5.26

tāratrayaṃ paṭhedante mā-trayaṃ prathamaṃ japet
bhavānīmantrarājasya mantro'yaṃ kīladoṣanut

5.27

parāmante japed devi vajrayogeśvarīmanoḥ
utkīlanākhyo mantro'yaṃ mantrasiddhiphalapradaḥ

5.28

maṭhamādau japed devi ṭhadvayānte haraṃ tathā
vārāhīmantrarājasya mantro'styutkīlanābhidhaḥ

5.29

haritaṃ prathamaṃ devi viśvānte vāgbhavaṃ japet
siddhalakṣmīrmanordevi mantro'styutkīlanābhidhaḥ

5.30

veśyāmādau vanānte ca ḍimbabījaṃ japecchive
utkīlanākhyo mantro'yaṃ kulavāgīśvarīmanoḥ

5.31

vīcivījaṃ japedādau ṭhadvayānte ca tārakam
padmāvatīmanordevi mantro'styutkīlanābhidhaḥ

5.32

vāgurāṃ sañjapedādau vanānte sakalāṃ japet
kubjikāmantrarājasya mantro'yaṃ kīladoṣahṛt

5.33

maṭhamādau manordevi praṇavaṃ ṭhadvayāścale
mantraṃ japedayaṃ mantro gaurīmantrasya kīlahṛt

5.34

śaktimante japedviśvaṃ prathamaṃ parameśvari
khecarīmantrarājasya syādutkīlanako manuḥ

5.35

kūrcamādau manorante vyoṣaṃ dattvā japecchive
manornīlasarasvatyāḥ syādutkīlanako manuḥ

5.36

śaktimādau manordevi vāsanāmaścale japet
parāśaktermanordevi kīladoṣāpaho manuḥ

5.37

śrībhairava uvāca
adhunā śaivamantrāṇāṃ kecid devi manūttamāḥ
niṣkīlitā mayā khyātāḥ kecit pārvati kīlitāḥ

5.38

maheśvaraḥ śivo rudro mahādevaḥ karālakaḥ
vikarālaḥ śivo śarvo mṛḍaḥ paśupatistathā

5.39

pinākī giriśo bhīmaḥ kumāraḥ pramathādhipaḥ
krodheśa īśa īśāni kapālī krūrabhairavaḥ

5.40

saṃhāra īśvaro bhargo ruruḥ kālāgnibhairavaḥ
ete mantrā mahādevi kīladoṣavivarjitāḥ

5.41

puraścaraṇamātreṇa phalaṃ dāsyanti satvaram
athavā devadeveśi vakṣye tattvaṃ parāt param

5.42

eteṣāṃ śaivamantrāṇāṃ śrutvā gopyatamaṃ kuru
mantrādibījaṃ deveśi pratimantraṃ japet sudhīḥ

5.43

trivāraṃ sādhako yena bhavedutkīlanaṃ manoḥ
mṛtyuñjayo'mṛteśāno vaṭuko nīlakaṇṭhakaḥ

5.44

sadyojāto gaṇeśaśca deveśo'ghorabhairavaḥ
mahākālo mahādevi kāmeśvara iti priye

5.45

ete mantrā mayā devi kīlitā mantrasiddhaye
eteṣāṃ śṛṇu mantrāṇāṃ deveśayutkīlanaṃ param

5.46

yenoccāraṇamātreṇa mantrasiddhiḥ prajāyate
hṛjjabījaṃ japedādau ante śaktiṃ japet priye

5.47

śrīmṛtyuñjayamantrasya mantro'styutkīlanābhidhaḥ
tāramante japedādau śaktiṃ mantrasya pārvati

5.48

amṛteśvaramantrasya syādayaṃ kīladoṣahṛt
(parāmādau japedante praṇavaṃ sādhakottamaḥ

5.49

mantro vaṭukamantrasya syādayaṃ kīlanāśakaḥ|)
haritaṃ prathamaṃ dattvā mantrānte ca śivaṃ japet

5.50

durgāśivasya mantro'yaṃ nīlakaṇṭhasya kīlanut
śivamādau japedante tāraṃ pārvati sādhakaḥ

5.51

ugratārāśivasyāyaṃ mantro mantrasya kīlahṛt
māyāmante japed devi śivamādau ca sādhakaḥ

5.52

mahāgaṇapatermantro manorutkīlanābhidhaḥ
viśvamādau manordevi mātrādi cāśvale japet

5.53

aghorabhairavasyāyaṃ manorutkīlano manuḥ
eṣāmapi mahākālo niṣkīlita iti smṛtaḥ

5.54

asya mantraprasādena sarve niṣkīlitāḥ śive
kāmeśakūṭatrayataḥ prathamārṇatrayaṃ japet

5.55

śrīvidyāśivamantrasya syādutkīlanako manuḥ
arthāhaṃ vaiṣṇavānāṃ te mantrāṇāṃ vacmi pārvati

5.56

utkīlanamanūn yeṣāṃ japamātrācchivaṃ bhajet
haritaṃ prathamaṃ dyādante praṇavamīśvari

5.57

lakṣmīnārāyaṇasyāyaṃ syādutkīlanako manuḥ
śaktimādau manorante vāgbhavaṃ sādhako japet

5.58

śrīrādhākṛṣṇamantrasya mantro'yaṃ kīladoṣahṛt
parāyugaṃ japedante viśvamādau japenmanoḥ

5.59

viṣṇumantrasya mantro'yaṃ syādutkīlanakābhidhaḥ
smaramādau japedante nṛbījaṃ sādhakottamaḥ

5.60

lakṣmīnṛsiṃhamantrasya mantro'yaṃ kīladoṣahṛt
tāramante ramāmādau japet sādhakasattamaḥ

5.61

lakṣmīvarāhamantrasya bhavedutkīlanaṃ param
kucabījaṃ japedādau mantrānte padmayugmakam

5.62

manorbhārgavarāmasya bhavedutkīlanaṃ śive
parāmante ramāmādau japet pārvati siddhaye

5.63

śrīsītārāmabhadrasya manormantro'sti kīlahṛt
māmante prathamaṃ māṃ ca japet pārvati sādhakaḥ

5.64

janārdanamanormantraḥ syādutkīlanakābhidhaḥ
lakṣmīmādau parāmante sakṛduccārayet sudhīḥ

5.65

viśvakasenamanordevi syādutkīlanako manuḥ
kāmamādau ca mantrānte tāraṃ devi japet sudhīḥ

5.66

vāsudevamanormantraḥ syādutkīlanakābhidhaḥ
iti tattvaṃ mahādevi mantrāṇāṃ paramārthadam
tava snehena kathitaṃ nākhyeyaṃ brahmavādibhiḥ

5.66.p1

iti śrīrudrayāmale tantre śrīdevīrahasye mantrotkīlanavidhinirūpaṇaṃ pañcamaḥ paṭalaḥ || 5

Linked texts (4)