Pramāṇa · Search · About · API

Devirahasya 53

Devīrahasya 53

Language
Sanskrit

Contents

53.1

samāptaṃ śrīdurgāpaścāṅgam
atha
ekapañcāśattamaḥ paṭalaḥ
atha durgarahasyam
śrīśailarājaśikhare nānādrumasamākule
vasantalakṣmī‌nilaye samāsīnamumāpatim

53.2

ekadā devamīśānaṃ śaśiśekharamīśvaram
umāśritārdhavapuṣaṃ devadānavasevitam

53.3

dhyānāsaktākṣitritayaṃ jaṭājūṭalatā‌ruṇam
bhasmāṅgarāgadhavalaṃ nārāyaṇanamaskṛtam

53.4

brahmādidevapraṇataṃ gāndharvajanavanditam
yakṣarākṣasanāgendra-nagendrakulapūjitam

53.5

bhairavaṃ bhairavākāraṃ girīśaṃ parameśvaram
utthāya vinatā bhūtvā paryapṛcchata pārvatī

53.6

bhagavan sarvalokeśa sarvalokanaskṛta
guṇātīta guṇādhyakṣa bhūteśvara maheśvara

53.7

sṛjatyavati nityānte saṃharatyamitaṃ jagat
carācaraṃ bhavāneva kiṃ punarjapasi prabho

53.8

kiṃ dhyāyasi mahādeva satataṃ bhaktavatsala
vada śīghraṃ dayāmbhoghe yadyahaṃ preyasī tava

53.6-2

śrībhairava uvāca
devi kiṃ te pravakṣyāmi rahasyamidamadbhutam
sarvasvaṃ sārabhūtaṃ me sarveṣāṃ taccamuttamam

53.10

lakṣavārasahasrāṇi vāritāsi punaḥ punaḥ
strīsvabhāvānmahādevi punastvaṃ paripṛcchasi

53.11

adya bhaktyā tava snehādvakṣyāmi paramādbhutam
devīrahasyatantrākhyaṃ tantrarājaṃ maheśvari

53.12

sarvāgamaikamukuṭaṃ sarvasāramayaṃ dhruvam
sarvamantramayaṃ divyaṃ paṭalairdaśabhiryutam

53.13

anukramaṇikāṃ divyāṃ śṛṇu tatrasya pārvati
yasyāḥ śravaṇamātreṇa koṭipūjāphalaṃ labhet

53.14

śrīvidyānirṇayo devi mantrasādhanako'paraḥ
śivamantraprakāśākhyo dīkṣāvidhiranuttamaḥ

53.15

puraścaryāvidhirdevi pañcaratneśvarīkramaḥ
homasādhanakaścaiva cakrapūjāvidhiḥ paraḥ

53.16

ācāranirṇayo devi daśamo daśamīvidhiḥ
tatrādau devi vakṣye'haṃ durgābhuvanamadbhutam

53.17

jayaṃ nāma mahādivyaṃ bahuvistāravistṛtam
nānāratnasamākīrṇaṃ sūryakoṭisamaprabham

53.18

indragopakavarṇaṃ ca candrakoṭimanoharam
aprameyamasaṃkhyeyamagamyaṃ sarvavādinām

53.19

idaṃ divyaṃ jayaṃ nāma bhuvanaṃ parameśvari
tatraiva vasate durgā navarūpātmikā parā

53.20

yā devadevī varadā sarvalokaikasundarī
yā durgeti smṛtā loke brahmāṇḍodaravartinī

53.21

viṣṇunā tapasā pūrvamārādhya parameśvarīm
mahiṣasyāsurendrasya vadhārthāyāvatāritā

53.22

yogamāyā mahāmāyā sarvadā parameśvarī
tāmevāharniśaṃ dhyāye śrīvidyāṃ paramāṃ jape

53.23

tāmadyāhaṃ pravakṣyāmi vidyācaraṇadāyinīm
yāṃ śrutvā sa śivo jātaḥ paścanādātmakaḥ śivaḥ

53.24

yadābhūdvarihīnā sā durgā niṣkalarūpiṇī
sākṣādbhuvanarūpāpi mahājyotiḥsvarūpiṇī

53.25

tadā śahakaṃkāle tu jyotīrūpo maheśvari
śivaḥ prabhāmaṇḍalato nirgato'cetano vibhuḥ

53.26

aśrṛṇonnādamādhāraṃ jagatāṃ bījamuttamam
api saṃsara māyāṃ taṃ sṛṣṭo'pramanunāyakaḥ

53.27

iti śrutvā parānādaṃ tāramityabhidhīyate
śivo jajāpa sahasā bījaṃ trijagatāṃ śive

53.28

tena māyetiśabdaṃ sa śuśrāva gaganāttataḥ
duṃmaṃ bhaja maheśāna sadānandālayaṃ param

53.29

bindunādamayo devaḥ śivo'bhūt parameśvaraḥ
tato nādaṃ sa śuśrāva duṣṭavarṇavivarjitam

53.30

durgāṃ bhajeti sa śivaḥ paścanādātmako'bhavat
tato japtvā parāṃ vidyāmasṛjajjagadambike

53.31

ādau vāyuṃ śivaḥ sṛṣṭvā tataḥ sṛṣṭiryathecchayā
icchāmātraṃ śive viśvaṃ viśveśvari carācaram

53.32

sasarja lavamātraṃ sa śitikaṇṭhaḥ śivaḥ śive
itīmāṃ guptavidyāṃ tu labdhvā gurupadārcanāt

53.33

kiṃkiṃ na sādhayelloke sādhako mantrasādhakaḥ
vastraṃ vahniṃ ca kāmaṃ ca dhanaṃ vṛttaṃ ca sādhakaḥ

53.34

vaśīkuryādyathābuddhyā yena turyākulaṃ bhavet
śrīcakramidamādhāraṃ devyā vibhavakāraṇam

53.35

guhyaṃ sarvasvamambāyāḥ pūjyaṃ sādhakasattamaiḥ
cakraṃ likhenmahādevi pūjyamabjārkayordalaiḥ

53.36

yena devī mahāmāyā śrīdurgāṃśu prasīdati
cakre saṃpūjayedyastu nīlābhāṃ dāhanīṃ dyutim

53.37

vahnīndusūryāmbarajaṃ maṇḍalākāramarcayet
lasanmukuṭarociṣṇuḥ sa bhavet sādhakottamaḥ

53.38

tasya śaṅkhanibhā kīrtirbhramate bhuvanatraye
sasurāsuragandharvaṃ vaśaṃ yāti maheśvari

53.39

śarāsavarasānandamayo bhūtvā japenmanum
kheṭakāstasya tuṣyanti sādhakasyāṅgapūjanāt

53.40

tasya rogā vinaśyanti sarve śūlādayo'cirāt
tarjanīṃ tasya vīkṣyāpi ripavo yānti vidrutāḥ

53.41

tasya gehe dhanaṃ gāvo mahiṣyā viṣṭaraṃ gajāḥ
durgā ratnavatī bhūmistasya pīṭhaṃ manoharam

53.42

sādhakasya bhavedevaṃ saṃpattirbahudhārcanāt
evaṃ dhyāyenmahādevīṃ durgāṃ durgatināśinīm

53.43

dhyānena yena devendro bhaviṣyati hi sādhakaḥ
itīdaṃ devi tattvaṃ te kathitaṃ paramādbhutam
avaktavyamadātavyaṃ gopanīyaṃ svayonivat

53.43.p1

iti śrīrudrayāmale tantre śrīdevīrahasye mantravidyānirūpaṇamekapañcāśattamaḥ paṭalaḥ || 51

Linked texts (5)