Devirahasya 55

Devīrahasya 55

atha
tripañcāśattamaḥ paṭalaḥ
śrībhairava uvāca
adhunā śivavidyāṃ te vakṣyāmi paramārthadām
sarvavidyāmayīṃ sādhyāṃ sarvatantreṣu gopitām

kevalaṃ yo japecchāktaṃ manuṃ śaivaṃ tu no japet
janmakoṭiṣu japto'pi na manuḥ siddhibhāgbhavet

yasyā devyāstu yo devaḥ śivastasyāḥ śivo bhavet
tena vidyā mahādevi kalau siddhyati satvaram

kālikāyā mahākālaḥ sumukhyā amṛteśvaraḥ
kāmeśvaraścikūṭāyāḥ śiva ityevamīśvari

chinnāyāḥ kālarudrastu śāradāyāḥ śivaḥ śivaḥ
śrībhairavaḥ kālarātryāḥ śiva ityevamīśvari

jvālāmukhyā mahādevo vāgdevyā vijayeśvaraḥ
īśvaro bhuvaneśvaryāḥ śiva ityevamīśvari

viśvanāthastu pārvatyā rājñyā bhūteśvaraḥ śivaḥ
bhīḍāyāstu virūpākṣaḥ śiva ityevamīśvari

nīlakaṇṭhastu durgāyāḥ śiva ityevamīśvari
śilāyā vāmadevastu śivaḥ proktaḥ sureśvari

sadyojātastu tārāyāḥ śiva ityevamīśvari
atha durgāśivasyādau vakṣye mūlamanuṃ param

yaṃ japtvā parameśāni vidyā sidhyati satvaram
śrīnīlakaṇṭhamantrasya dakṣiṇāmūrtirīśvaraḥ

ṛṣiśchando mayānuṣṭup varṇito vīravandite
durgeśvaro nīlakaṇṭho devatā kathito mayā

haritaṃ bījamīśāni tāraṃ śaktiḥ smṛtā śive
kīlakaṃ viśvamākhyātaṃ niyogo manusiddhaye

tāracandrakaḍimbārdhaiḥ ṣaḍdīrghainyasamācaret
dhyānamasya śivasyādya śrutvā guhyatamaṃ kuru

bandhūkakāñcananibhaṃ rucirākṣamālāṃ
pāśāṅkuśau varamabhītimuṃ dadhānam
hastaiḥ śaśāṅkaśakalābharaṇaṃ trinetraṃ
śrīnīlakaṇṭhamumayā śritamāśrayāmi

mantroddhāraṃ pravakṣyāmi sarvāsiddhimayaṃ param
durgārahasyabhūtaṃ ca śṛṇu pārvati satvaram

praṇavaṃ haritaṃ vyoṣaṃ nīlakaṇṭhāya cāśmarī
durgeśanīlakaṇṭhasya mantroddhāro daśākṣaraḥ

anena mantrarājena japtamātreṇa pārvati
durgāyāḥ paramā vidyā kalau siddhyati satvaram

itīdaṃ guhyaguhyātiguhyaṃ sarvasvamīśvari
rahasyaṃ nīlakaṇṭhasya gopanīyaṃ mumukṣubhiḥ

iti śrīrudrayāmale tantre śrīdevīrahasye śivavidyānirūpaṇaṃ tripañcāśattamaḥ paṭalaḥ || 53

Linked texts (8)