Pramāṇa · Search · About · API

Devirahasya 56

Devīrahasya 56

Language
Sanskrit

Contents

56.1

catuṣpañcāśattamaḥ paṭalaḥ
śrībhairava uvāca
dīkṣāvidhiṃ pravakṣyāmi sādhakānāṃ hitecchayā
vidhāya vidhivad dīkṣāṃ paśutvāt sa vimucyate

56.2

dīyate paramā siddhiḥ kṣīyate karmavāsanā
āpyate paramaṃ dhāma tena dīkṣā smṛtā śive

56.3

brahmādikīṭaparyantaṃ jagat sarvaṃ maheśvari
paśutvānmohitaṃ devyā tasmād dīkṣāṃ caret kalau

56.4

śrīdevyāḥ sevayā devi cakrārcanapuraḥsaram
sādhakaḥ paśubhāvena mukto jñānaṃ bhajet tataḥ

56.5

dīkṣito yāti caraṇaṃ dīkṣāhīno bhavet paśuḥ
dīkṣitastu bhavejjñānī paśubhāvojjhito vibhuḥ

56.6

sarvapātakamukto hi labhet sa paramāṃ gatim
yasya dīkṣā śive nāsti jīvanāntaṃ ca janminaḥ

56.7

sa jātu nottared devi nirayāmbunidheḥ kvacit
dīkṣāhīnasya deveśi paśoḥ kutsitajanmanaḥ

56.8

pāpaugho'ntikamāyāti puṇyaṃ dūraṃ palāyate
tasmādyena dīkṣaiṣā grāhyā kṛtibhiruttamaiḥ

56.9

bālye vā yauvane vāpi vārdhakaye'pi sureśvari
anyayā nirayī pāpī pitṝn svānnirayaṃ nayet

56.10

ante paśumanuṣyaḥ san paśuyoniṃ vrajecchive
pūrvapuṇyārjitāṃ prāpya vāsanāṃ paramārthadām

56.11

guruṃ kulīnaṃ tantrajñaṃ sarvāṅgaiḥ sumanoharam
labdhvā bhaktyā praṇamyādau toṣayitvā viśeṣataḥ

56.12

praṇāmairvandanairdevi dakṣiṇāmbarapūrvakam
siddhasādhyārinirṇītāṃ dīkṣāṃ devyā yathāvidhi

56.13

gṛhṇīyāt parayā bhaktyā sādhako yena jāyate
guruśca śiṣyaṃ ramyāṅgaṃ sarvāṅgaiḥ sumanoharam

56.14

gurubhaktirataṃ bālaṃ kulīnaṃ garbhadīkṣitam
devībhaktirataṃ bhaktaṃ pāpabhītaṃ kṛtātmakam

56.15

dṛṣṭvā dīkṣāṃ parāṃ dadyāt kṛtabhāgī bhavet tataḥ
śrīdevyuvāca
bhagavan karuṇāmbhodhe sādhakānāṃ hitecchayā
kadā dīkṣā parā grāhyā sādhakaistadvadasva me

56.16

śrībhairava uvāca
sudine śubhanakṣatre saṅkrāntāvayanadvaye
navarātridine pitroḥ śrāddhe svajanivāsare

56.17

navavarṣadine devi candrasūryoparāgake
śivarātryāṃ svajanmarkṣe dīkṣāṃ kuryādvicakṣaṇaḥ

56.18

tatrādau śubhanakṣatre snātvā saṃpūjya bhairavam
gatvā nadītaṭaṃ devi tathā devālayaṃ kacit

56.19

devatāgre guruṃ natvā natvā santoṣahetave
dvīpaṃ vopavanaṃ puṇyaṃ devānāmapi durlabham

56.20

devatāyatanaṃ vāpi prāpyāśu praṇamet tataḥ
tatrādātrāsanaṃ devi saṃśodhya gurumarcayet

56.21

bhūtāgniḥ sārya deveśi svāṅganyāsaṃ caret tataḥ
prāṅmukho gururāsīnaścottarābhimukhaṃ śiśum

56.22

saṃsthāpya vidhivad devi devīṃ smṛtvā parāmayaḥ
devatāgre parāprītyai dīkṣāṃ dadyādyathāvidhi

56.23

karṇamūle mahāvidyāṃ śrīvidyāṃ sādhakeśvaraḥ
ānandasaṅgahṛdayaḥ śanaistristriḥ samarpayet

56.24

gaṇeśasya ca gāyatryāstato mṛtyuñjayasya ca
iṣṭadevyāḥ śivasyāpi tato vidyāṃ samarpayet

56.25

śiṣyo dīkṣāṃ tu saṃprāpya gurumabhyarcya śaktitaḥ
toṣayitvā praṇāmaiśca dakṣiṇābhiḥ śubhāmbaraiḥ

56.26

tadājñāṃ sahasādāya pūjāyai parameśvari
yantraṃ mantraṃ ca mālāṃ ca paścāṅgaṃ parameśvari

56.27

punarjātu śive śiṣyo gurave'pi na darśayet
iti dīkṣāvidheḥ sārabhūtaṃ guhyaṃ rahasyakam
guhyātiguhyaguptaṃ tu na prakāśyaṃ mumukṣubhiḥ

56.27.p1

iti śrīrudrayāmale tantre śrīdevīrahasye dīkṣānirūpaṇaṃ catuṣpañcāśattamaḥ paṭalaḥ || 54

Linked texts (6)