Pramāṇa · Search · About · API

Devirahasya 6

Devīrahasya 6

Language
Sanskrit

Contents

6.1

śrībhairava uvāca
atha te varṇayiṣyāmi sañjīvanamanūn priye
eṣāmuccāramātreṇa mantraḥ siddhiprado bhavet

6.2

bālāyā devi tryaccaryāḥ śaktimādau paṭhet sudhīḥ
sañjīvanākhyo mantro'yaṃ divyo mantrasya siddhaye

6.3

parātrayaṃ paṭhedādau jīvanaṃ bhairavīmanoḥ
kūṭatrayāṇāṃ deveśi trikūṭāyā japet sudhīḥ

6.4

dvitīyārṇatrayaṃ devi bhavet sañjīvanaṃ manoḥ
siddhavidyā mahāśyāmā sarvadoṣavivarjitā

6.5

japyā sidhyai sadā saddhirbrahmaviṣṇumumukṣubhiḥ
bhadrikāyugalaṃ devi dadyādante manoḥ śive

6.6

bhadrakālīmanoreṣa syāt sañjīvanako manuḥ
tāraṃ parāṃ paṭhedante japādau sādhakeśvari

6.7

rājamātaṅginīdevyā bhavet sañjīvanaṃ manoḥ
vāratrayaṃ paṭhedādau mūlamantrasya vai parām

6.8

mantrasya bhuvaneśvaryā bhavet sañjīvanaṃ param
kālī tāraṃ paṭhedante mantrasyāsya maheśvari

6.9

ugratārāmanoreṣa syāt sañjīvanako manuḥ
vāsanāṃ mūlamantrasya japedante maheśvari

6.10

chinnamastāmanoreṣa syāt sañjīvanako manuḥ
parāmādau japed devi kāmamante tathaiva ca

6.11

sumukhīmantrarājasya bhavet sañjīvanaṃ priye
tāradvayaṃ japenmantrī mantrānte māntrikeśvari

6.12

sarasvatīmanoreṣa syāt sañjīvanako manuḥ
viśvamante japedādau ṭhadvayaṃ kālikeśvari

6.13

annapūrṇāmanoryena bhavet sañjīvanaṃ param
vārṇīmante japedādau kāmarājaṃ ca sādhakaḥ

6.14

mahālakṣmīmanordevi bhavet sañjīvanaṃ param
kūrcamādau parāmante japet sādhakasattamaḥ

6.15

śārikāmūlamantrasya bhavet sañjīvanaṃ priye
kāmarājaṃ japedādau māyābījaṃ tathāścale

6.16

śāradāmantrarājasya sañjīvanamanuḥ smṛtaḥ
manmathaṃ śaktibījaṃ ca japedādau ca sādhakaḥ

6.17

indrācīmūlamantrasya sañjīvanamanuḥ paraḥ
mṛtsnābījaṃ japed devi praṇavaṃ ca vanāścale

6.18

bagalāmantrarājasya bhavet sañjīvanaṃ param
tārakaṃ mūlamantrānte triruccārya japet priye

6.19

turyāmantrasya nirṇītaḥ sañjīvanamanuḥ paraḥ
vahnibījaṃ japedante śaktimādau maheśvari

6.20

rājñīmantrasya mantro'yaṃ sañjīvanakaraḥ smṛtaḥ
kūrcamādau ca turagaṃ japedante maheśvari

6.21

jvālāmukhīmanoreṣa mantraḥ sañjīvanābhidhaḥ
vāgbhavaṃ praṇavādau ca ṭhadvayānte japet parām

6.22

eṣa sañjīvano mantro bhīṃḍābhagavatīmanoḥ
tāramante ramāmādau japet sādhakasattamaḥ

6.23

gaṇeśvarīkālarājyāḥ syāt sañjīvanako manuḥ
kūrcamādau harānte māṃ japet sādhakasattamaḥ

6.24

bhavānīmūlamantrasya bhavet sañjīvanaṃ param
māyāmuccārya deveśi trirādau tristathāñcale

6.25

sañjīvanamanurdevi syādbhatrayoginīmanoḥ
maṭhamante maṭhaṃ cādau japet pārvati kaulikaḥ

6.26

mantro'yaṃ dhūmravārādyā manoḥ sañjīvanābhidhaḥ
haritaṃ mūlamantrānte japedādau ca manmatham

6.27

siddhalakṣmīmanoreṣa syāt sañjīvanako manuḥ
kāṅcāmādau ramāmante japet sādhakasattamaḥ

6.28

bhavet sañjīvanaṃ devi kulavāgīśvarīmanoḥ
kāmamādau mahādevi japedante ramāṃ śive

6.29

padmāvatīmanoreṣa smṛtaḥ sañjīvano manuḥ
vāgurāṃ paṅkajānte ca praṇavādau parāṃ japet

6.30

kuñjikāmūlamantrasya mantro'yaṃ jīvanābhidhaḥ
vāhīkaṃ praṇavādau ca mūlānte tu śivaṃ japet

6.31

gaurīmantrasya mantro'yaṃ syāt sañjīvanakābhidhaḥ
kūṭamante viśvamādau japet pārvati sādhakaḥ

6.32

khecarīmantrarājasya bhavet sañjīvanaṃ śive
vāṇīmādau parāmante japenmāntrikasattamaḥ

6.33

bhavet sañjīvanaṃ devi nīlāsarasvatīmanoḥ
vāgbhavaṃ praṇavādau ca kāmamante japet śive

6.34

eṣa sañjīvano mantraḥ parāśaktimanoḥ smṛtaḥ
adhunā śaivamantrāṇāṃ niṣkīlānāṃ maheśvari

6.35

vakṣye tattvaṃ rahasyaṃ te sañjīvanakaraṃ param
mūlamantrāñcale mantrī japet tāraṃ pṛthak pṛthak

6.36

sarveṣāṃ śaivamantrāṇāṃ bhavet sañjīvanaṃ priye
tathāpi kīlitānāṃ te sañjīvanamanūn bruve

6.37

yeṣāṃ sādhanamātreṇa mūlavidyāśu sidhyati
sūryanāmākṣaradvandvaṃ japedādau ca sādhakaḥ

6.38

mṛtyuñjayamanoreṣa mantraḥ sañjīvanābhidhaḥ
viśvamādau viśvamante japenmāntrikanāyakaḥ

6.39

amṛteśvaramantrasya bhavet sañjīvanaṃ param
vaṭukāyeti tārādau japet pārvati sādhakaḥ

6.40

sañjīvanamanuḥ prokto vaṭukasyaiṣa durlabhaḥ
śivaṃ ca praṇavādau tu japet sādhakavandite

6.41

śrīnīlakaṇṭhamantrasya mantraḥ sañjīvanābhidhaḥ
parāmādau triruccārya japādau sañjapet sudhīḥ

6.42

sadyojātamanoreṣa smṛtaḥ sañjīvano manuḥ
śivamante dviruccārya japed devi japāditaḥ

6.43

mahāgaṇapatermantro manoḥ sañjīvanābhidhaḥ
vajrabījāni mūlādau japet pārvati sādhakaḥ

6.44

aghoradevamantrasya manuḥ sañjīvanaḥ smṛtaḥ
nirdoṣo mantrarājo'yaṃ mahākālasya pārvati

6.45

asyoccāraṇamātreṇa mantrāḥ sidhyanti sarvadā
kūṭatrayebhyo deveśi dvitīyākṣaramuccaret

6.46

japet kāmeśamantrasya bhavet sañjīvanaṃ śive
athāhaṃ vaiṣṇavānāṃ te manūnāṃ vakṣmi jīvanam

6.47

yāñjaptvā sādhako devi bhavedbhairavasannibhaḥ
haritaṃ mūlamantrānte japet pārvati sādhakaḥ

6.48

lakṣmīnārāyaṇamanorbhavet sañjīvanaṃ param
śaktimante manorādau vāgbhavaṃ sādhako japet

6.49

śrīrādhākṛṣṇamantrasya sañjīvanamanuḥ smṛtaḥ
viśvānte praṇavaṃ devi japet sādhakasattamaḥ

6.50

viṣṇumantrasya mantro'yaṃ smṛtaḥ sañjīvanābhidhaḥ
nṛbījaṃ prathamaṃ devi praṇavaṃ cāśvale japet

6.51

lakṣmīnṛsiṃhamantrasya matraḥ sañjīvanābhidhaḥ
ramāmante triruccārya japedānandanirbhare

6.52

lakṣmīvarāhamantrasya sañjīvanamanuḥ smṛtaḥ
parāyugaṃ japedādau mantrarājasya pārvati

6.53

mantro bhārgavarāmasya manoḥ sañjīvanaḥ smṛtaḥ
mantrānte praṇavaṃ devi tārādau sakalāṃ japet

6.54

śrīsītārāmamantrasya manoḥ sañjīvano manuḥ
viśvamādau parāmante japet pārvati māntrikaḥ

6.55

janārdanamanoreṣa mantraḥ sañjīvanaḥ smṛtaḥ
parāmādau parāmante satārāṃ sādhako japet

6.56

viśvaksenamanoreṣa syāt sañjīvanako manuḥ
ramāmādau ramāmante japādau sañjapet sudhīḥ

6.57

śrīlakṣmīvāsudevasya manoḥ sañjīvano manuḥ
itīdaṃ mantrasarvasvaṃ rahasyaṃ sāramadbhutam
tava bhaktyā mayākhyātaṃ gopanīyaṃ svayonivat

6.57.p1

iti śrīrudrayāmale tantre śrīdevīrahasye mantrasañjīvanavidhinirūpaṇaṃ ṣaṣṭhaḥ paṭalaḥ || 6

Linked texts (4)