Pramāṇa · Search · About · API

Devirahasya 60

Devīrahasya 60

Language
Sanskrit

Contents

60.1

atha
aṣṭāpañcāśattamaḥ paṭalaḥ
śrībhairava uvāca
adhunā cakrapūjāṃ te vakṣyāmi naganandini
yena durgā kalau śīghraṃ varadā bhavati priye

60.2

ekādaśāvadhi devi sādhakāḥ paramārthadāḥ
ekādaśāpi cakre tu varṇitāḥ sādhakāḥ śubhāḥ

60.3

uttamā nava deveśi madhyamāḥ pañca sādhakāḥ
adhamāstu trayo devi na pūjyāścakramadhyagāḥ

60.4

vinā cakrārcanaṃ naiva nityapūjājapādayaḥ
phaladā yoginīśāpāt tasmāccakraṃ prapūjayet

60.5

kuhūpūrṇendusaṃkrānti-caturdaśayaṣṭamīṣu ca
navamyāṃ maṅgale mande cakrapūjā śubhapradā

60.6

sādhakāśca sutīrthyāśca militāḥ śivamandire
devatāyatane vāpi śūnye śṛṅgāṭake5tha vā

60.7

digbhūtabhairavān devi vicārya purasādhakaḥ
upaviśyāsane devi saṃśodhya vīramaṇḍale

60.8

sādhakānupaviśyātra kuryāt saṃkalpamādarāt
nyāsaṃ vidhāya sarvāṅge bhūtaśuddhyādikaṃ caret

60.6-2

tatra prāṇān pratiṣṭhāpya śrīcakraṃ pūjayecchive
ātmaśrīcakrayormadhye kumbhasthāpanamācaret

60.10

gauḍī mādhvī tathā paiṣṭī cāsavaṃ pūjayecchive
eteṣāṃ rasamādāya tattvato bhairavārcane

60.11

ānandarasapūjāyāṃ tuṣyate parameśvarī
viprāśca kṣatriyā vaiśyāḥ śūdrāḥ pūjyāśca pārvati

60.12

gauḍī vipreṣu śubhadā mādhvī kṣatreṣu cottamā
vaiśyeṣu śubhadā paiṣṭī śūdreṣu śubhamāsavam

60.13

brahmakṣatriyavaiśyānāmānandastu śubhāvahaḥ
āsavaṃ dūratastyājyaṃ sādhakaistu mumujubhiḥ

60.14

abhāve tu surānandarasānāṃ parameśvari
madhunā pūjayed devi devamānandabhairavam

60.15

dravyaṃ saṃśodhya deveśi makārān pañca śodhayet
śrīcakrāgre'rcayet tatra sādhakān bhairavāgame

60.16

tatra saṃpūjya yantreśaṃ devamāvāhya bhairavam
yoginīḥ pūjayet tatra vaṭukaṃ pūjayet tataḥ

60.17

gaṇeśaṃ kṣetrapālāṃśca pūjayeccakranāyikām
santarpya devān pitṝṃśca munīn vedān maheśvari

60.18

śrīcakrāgre japenmūlaṃ paṭhet kavacamīśvari
mantranāmasahasraṃ ca stotraṃ puṇyaṃ paṭhettataḥ

60.19

tato devyai baliṃ dattvā sādhakāṃstarpayecchive
bhairavāṃstarpayecāṣṭau dīkṣitāṃstarpayet tataḥ

60.20

uttamaṃ nava pātrāṇi pañca pātrāṇi madhyamam
adhamaṃ trīṇi pātrāṇi caikapātraṃ na pūjayet

60.21

pravṛtte bhairave tantre sarve varṇā dvijātayaḥ
nivṛtte bhairave tantre sarve varṇāḥ pṛthak pṛthak

60.22

nava kanyāḥ samabhyarcya vīreśo bhairavārcane
retasā tarpayed devīṃ kulakoṭiṃ samuddharet

60.23

śaktyucchiṣṭaṃ pibed dravyaṃ vīrocchiṣṭaṃ tu carvaṇam
makārapañcasaṃyuktaṃ kuryācchrīcakramaṇḍalam

60.24

svaguruṃ pūjayet tatra tarpayecchaktiḥ param
toṣayitvā guruṃ devi dakṣiṇābhiśca vandanaiḥ

60.25

tadājñāṃ śirasādāya kuryādānandamātmanaḥ
vāme rāmā ramaṇakuśalā dakṣiṇe cālipātraagre mudrā caṇakavaṭukau sūkarasyoṣyāśuddhiḥ
tantrī vīṇā sarasamadhurā sadguroḥ satkathāyāṃ
vāmācāraḥ paramagahano yogināmapyagamyaḥ

60.26

itīdaṃ cakrasarvasvaṃ guhyaṃ tattvātmakaṃ param
tava bhaktyā mayākhyātaṃ gopanīyaṃ mumukṣubhiḥ

60.26.p1

iti śrīrudrayāmale tantre śrīdevīrahasye cakrapūjānirūpaṇamaṣṭāpañcāśattamaḥ paṭalaḥ || 58

Linked texts (6)