Devirahasya 61

Devīrahasya 61

śrībhairava uvāca
adhunā devi vakṣyāmi durgāyāstattvamuttamam
ācārāṇāṃ vidhiṃ yena kalau durgā prasīdati

dvau mārgau cāgame khyātāṃ vāmācārastu dakṣiṇaḥ
tayostattvaṃ kulācāraḥ śṛṇu teṣāṃ vidhiṃ śive

sādhako dīkṣito bhūtvā kena siddhimavāpnuyāt
tadvadāmi tava snehānnākhyeyaṃ durātmane

trīṇi bījāni durgāyāstadācārāstrayaḥ smṛtāḥ
prathamo dakṣiṇācāro vāmācāro dvitīyakaḥ

tṛtīyastu kulācāro vidhiṃ teṣāṃ śṛṇu priye
prabhāte snānasandhyādi madhyāhne japamīśvari

aurdhvamāsanamākhyātaṃ bhakṣyaṃ pāyasaśarkarāḥ
mālā rudrākṣasaṃbhūtā pātraṃ pāṣāṇasaṃbhavam

bhogaḥ svakīyakāntābhirdakṣiṇācāra ityayam
dravyeṇa madhunā devi siddhihānikaro mataḥ

vāmācāraṃ pravakṣyāmi śrīdurgāsādhanaṃ param
yaṃ vidhāya kalau śīghraṃ māntrikaḥ siddhibhāgbhavet

mālā nṛdantasaṃbhūtā pātraṃ pāṣāṇamuṇḍakam
āsanaṃ siṃhacarmādi kaṅkaṇaṃ strīkacodbhavam

dravyamāsavatattvāḍhyaṃ bhakṣyaṃ māṃsādikaṃ śive
carvaṇaṃ bālamatsyādi mudrā vīrāravaḥ kathā

maithunaṃ varakāntābhiḥ sarvavarṇasamānataḥ
vāmācāra iti proktaḥ sarvasiddhipradaḥ śive

anyathā siddhihāniḥ syānmatrasyāśca maheśvari
tasmādvāmaṃ bhajennityaṃ vāma eva parā gatiḥ

dakṣiṇaṃ ca kulaṃ caiva vīraiḥ sādhakasattamaiḥ
tyājyaṃ dūrāt kalau devi vāmameva bhajet kalau

kulācāraṃ pravakṣyāmi sevyaṃ yogibhiruttamaiḥ
kulastriyaṃ kulaguruṃ kuladevīṃ maheśvari

nityaṃ yat pūjayeditthaṃ sa kulācāra ucyate
kulastriyaṃ śive jñātvā nutvā nutvā maheśvari

haṭhādānīya saṃpūjya tathā bhogaṃ vidhāya ca
retasā tarpayed devīṃ śrīdurgāṃ cakranāyikām

nīlakaṇṭhaṃ ca vidhinā japaṃ kuryādviśeṣataḥ
tatpūrvakaṃ careddhomaṃ kulakāntāṃ vibhūṣayet

pānaiḥ peyaistathā bhakṣyaiḥ santarpya kulayoṣitam
pratyahaṃ vai caredevaṃ kulācāra iti smṛtaḥ

ityācāraparaḥ śrīmān kulastrīgurupūjakaḥ
vāmācāraparo mantrī muktibhāg bhavitā dhruvam

ityeṣa paṭalo guhyo devyāścācāravallabhaḥ
adātavyo'pyabhaktebhyo na prakāśyo mumukṣubhiḥ

Linked texts (10)