Pramāṇa · Search · About · API

Devirahasya 62

Devīrahasya 62

Language
Sanskrit

Contents

62.1

ṣaṣṭitamaḥ paṭalaḥ
śrībhairava uvāca
adhunā kathayiṣyāmi śrīdurgāyārahasyakam
tattvaṃ mantrasya deveśi daśamīpūjanaṃ param

62.2

dīkṣāguruḥ śive yastu daśamī sa prakīrtitaḥ
pūjanaṃ tasya vakṣyāmi sarvatantreṣu gopitam

62.3

dīkṣāṃ gṛhītvā vidhivad guroḥ kulavicakṣaṇāt
tadājñāṃ śirasādāya sādhayet svamanuṃ tataḥ

62.4

ekadā puṇyadivase muhūrte śubhade tathā
gurumānīya deveśi śūnyagehe catuṣpathe

62.5

śmaśāne vā vane vāpi svagṛhe vāpi pārvati
tatra bhūmau likhedyantraṃ yathāvad vakṣyate mayā

62.6

bindutrikoṇaṃ vasukoṇavimbaṃ
vṛttāṣṭapatraṃ śikhivṛttayuktam
dharāgṛhaṃ vahnituṭībhirīḍyaṃ
yantraṃ gurordevi mayā pradiṣṭam

62.7

sindūreṇa vilikhyātaḥ pūjayeccakramīśvari
gaṇeśadharmavaruṇāḥ kuberasahitāḥ śive

62.8

pūjyā dvāḥsthāḥ supuṣpaiśca gandhākṣatapuraḥsaraiḥ
asitāṅgo ruruścaṇḍo krodheśonmattabhairavau

62.8-2

kapālī bhīṣaṇo devi saṃhāro'rdhvo'ṣṭapatrake
paramānandanāthaṃ ca prakāśānandanāthakam

62.10

śrībhogānandanāthaṃ ca samayānandanāthakam
bhuvanānandanāthaṃ ca sumanānandanāthakam

62.11

gaganānandanāthaṃ ca śrīviśvānandanāthakam
aṣṭau kulagurūn devi pūjayed vasupatrake

62.12

madanānandanāthaṃ ca śrīlīlānandanāthakam
maheśvarānandanāthaṃ pūjayedvai trikoṇake

62.13

bindau guruṃ ca saṃpūjya gandhādyataprasūnakaiḥ
tatra bindau guruṃ devi sthāpayed bhaktipūrvakam

62.14

saṃpūjayet svamūlena dakṣiṇāṃ kālikāṃ yajet
mahākālaṃ yajet tatra kāmaṃ kāmeśvarīṃ tathā

62.15

guruṃ ca paramaṃ devi parāparaguruṃ tathā
parameṣṭhiguruṃ caiva svagurormūrdhni pūjayet

62.16

saṃpūjya vividhaiḥ puṣpairmālyairābharaṇottamaiḥ
dakṣiṇābhimuheśāni bhaktyairbhojyaiśca lehyakaiḥ

62.17

coṣyaiḥ peyaiśca khādyaiśca baliṃ dattvā ca tarpayet
ānandarasasaṃpūrṇaṃ guruṃ dṛṣṭvā maheśvari

62.18

tato devi guruṃ natvā prārthayet svamanoratham
ya evaṃ pūjayed devi svaguruṃ puṇyavāsare

62.19

sa eva bhairavaḥ sākṣādvicared bhuvanatraye
gurureva paro mantro gurureva paro japaḥ

62.20

gurureva parā vidyā nāsti kiṃcidaguruṃ vinā
yasya tuṣṭo gururdevi tasya tuṣṭā maheśvarī

62.21

yena saṃtoṣito devi guruḥ sa hi sadāśivaḥ
yannekṣadṛṣṭyāpi vai bryādurutantraṃ samācaret

62.22

pueyaṃ vāpueyamīśāni tyājyaṃ grāhyaṃ kulārcite
gururvadati yat sadyastat kuryāt sādhakottamaḥ

62.23

vinā gurūpadeśena na siddhyati kalau manuḥ
tasmād guruṃ bhajed bhaktyā toṣayet satataṃ gurum

62.24

guroryatra parīvādo nindā yatra pravartate
karṇau tatra pidhātavyau no vā dūraṃ palāyanam

62.25

gururdevi paro dharmo gurureva parā gatiḥ
gurumabhyarcayennityaṃ yena devī prasīdati

62.26

itīdaṃ daśamītattvaṃ sarvāgamarahasyakam
sārātsārataraṃ devi gopanīyaṃ mumukṣubhiḥ

62.27

itīdaṃ paramaṃ tattvaṃ tattvaṃ sarvasvamuttamam
durgārahasyasārāḍhyaṃ guhyaṃ gopyaṃ ca sādhakaiḥ

62.28

iti devīrahasyākhyastantro'yaṃ tantrasāgaraḥ
sarvesvaṃ me rahasyaṃ me sarvāgamanidhiḥ paraḥ

62.29

śrīdurgāyāstattvabhūto mantrarājamayo dhruvaḥ
siddhiprado mahādevi pūjanīyo'sti sādhakaiḥ

62.30

śrīdevyuvāca
bhagavan bhavatā bhaktyā prasādo'yaṃ mayi kṛtaḥ
yattvayā varṇitastantraḥ śrīdurgāyāḥ kuleśvara

62.31

jñātāsi tava dāsyasi bhaktāsi tripurāntaka
sarvathā rahaṇīyāsi kimanyat kathayāmi te

62.32

śrībhairava uvāca
idaṃ devīrahasyākhyaṃ tantrarājaṃ maheśvari
adātavyamabhaktebhyo durātmabhyo maheśvari

62.33

svaputrebhyo'nyaśiṣyebhyo na deyaṃ tu mumukṣubhiḥ
idaṃ hi sāraṃ tantrāṇāṃ tattvaṃ sarvasvamuttamam

62.33.p1

rahasyaṃ devi durgāyā gopanīyaṃ svayonivat

62.33.p2

iti śrīrudrayāmalatantrāntargata-śrīdevīrahasye daśamīvidhinirūpaṇaṃ ṣaṣṭhitamaḥ paṭalaḥ || 60

Linked texts (6)