Pramāṇa · Search · About · API

Devirahasya 63

Devīrahasya 63

Language
Sanskrit

63.1

śrībhairava uvāca
śṛṇu devi pravakṣyāmi bhairavi prāṇavallabhe
jvālāmukhyāstu sarvasvaṃ paṭalaṃ devadurlabham

63.2

śrīdevyuvāca
bhagavaṃstvaṃ hi sarvasya jñātā śāstrasya dhūrjaṭe
śrutāni tvanmukhāmbhojād granthāni vividhāni ca

63.3

jvālāmukhyā mahāmantraṃ yantraṃ pūjā vidhānataḥ
tvayāṅgaṃ vada me nātha yadyahaṃ preyasī tava

63.4

śrībhairava uvāca
śṛṇu devi manuṃ yantraṃ tvayāṅgaṃ bhairaveśvari
prayogasādhanaṃ vakṣye gopyād gopyataraṃ mama

63.5

idaṃ viśvamaho krūraṃ bhaktihīnaṃ maheśvari
ekadā haṃsarūpeṇa manunāhaṃ jagatparam

63.6

deveśi sraṣṭumaniśaṃ jvālāmukhyāḥ prasādataḥ
jvālāmukhyā tayā mantro varṇito nāmamātrataḥ

63.7

tadā prabhṛti tanmantrājjagatsthāvarajaṅgamam
sṛjāmi saṃhariṣyāmi racāmi ca divāniśam

63.8

yasyā mantraprabhāveṇa prāptamaiśvaryamuttamam
jvālāmukhī jaganmātā saiva syāt triguṇātmikā

63.6-2

sattvena sṛjyate viśvaṃ rajasā caiva pālyate
tamasā jīryate yasyā guṇatrayaprabhāvataḥ

63.10

trilokajananī mātā saiva me'pīṣṭadevatā
tasyā yantraṃ ca mantraṃ ca dhyānaṃ layāṅgasaṃyutam

63.11

prayogān parameśāni śṛṇu tvaṃ sāvadhānataḥ
tatrādau tu manūddhāraṃ sarvāgamaviniścitam

63.12

pravakṣyāmi mahādevi na prakāśayaṃ mumucchubhiḥ
ādau praṇavamuddhṛtya māyāṃ ca kamalāṃ tathā

63.13

jvālāmukhi mametyatra sarvaśatrūn samuccaret
bhaccaya-dvayamuddhṛtya kūrcaṃ turagasaṃyutam

63.14

ṭhadvayena samāyukko jvālāmurūyā hyayaṃ manuḥ
mantro'yaṃ parameśāni kalāvīpsitadāyakaḥ

63.15

brahmahatyā gurorhatyā strīhatyābhaccayabhaccaṇam
agamyagamanaṃ pāpaṃ mātṛ-svasṛgamodbhavam

63.16

tat cālayati mantro'yaṃ devi satyaṃ na saṃśayaḥ
adhunā śṛṇu deveśi yantroddhāraṃ parātparam

63.17

muktidaṃ muktidaṃ gopyaṃ gītavāditratoṣitam
ānandasundaraṃ stutyaṃ yantroddhāraṃ bravīmyaham

63.18

matsarvasvaṃ na deṣṭavyaṃ sārātsārottamottamam
ādau ṣaṭkoṇamuddhṛtya cordhvarekhāṃ nikarṣayet

63.19

adhorekhāṃ samākṛṣya pārśvābhyāṃ ca nikarṣayet
adhorekhāṃ kṣipedūrdhvamūrdhvarekhāṃ kṣipedadhaḥ

63.20

madhye kuryāt trikoṇaikaṃ nyasodbhinduṃ śivālayam
madhye yat tu trikoṇaṃ syāt sundarībhavanaṃ smṛtam

63.21

ūrdhvetrikoṇamanyat syād dakṣiṇākālikālayam
madhye trikoṇābindau śrījvālāmukhyā mahālayam

63.22

tato vṛttaikamālikhya likhedaṣṭāramuttamam
ṣoḍaśāraṃ samuddṛtya vṛttaikopari pārvati

63.23

vṛttatrayaṃ punarnyasya likhed bhūpurakaṃ punaḥ
jvālāmukhyā idaṃ yantraṃ trailokyoddharaṇakṣamam

63.24

na deṣṭavyo'nyaśiṣyebhyo diṣṭvā tu brahmahā bhavet
layāṅgaṃ śṛṇu deveśi brahmaviṣṇusamarcitam

63.25

yantrarājasya deveśi samāsena yathārthataḥ
gaṇeśo dharmarājaśca vāsukirnarasiṃhakaḥ

63.26

caturdvāreṣu saṃpūjyāścatvāro dvārapālakāḥ
pūrve ca gaṇanāthastu dakṣiṇe dharmarājakaḥ

63.27

paścime vāsukiḥ pūjya uttare narasiṃhakaḥ
tato'ṣṭadvayapatreṣu pūjyā jvālāśca ṣoḍaśa

63.28

vāmāvartakramād devi nānāpūjāphalaṃ labhet
vāruṇī caiva vātyālī vārāhī kulasundarī

63.29

kūrcerī kulikā kueṭhī kutsitā kuṭilā kuhūḥ
kuntī kumbheśvarī kuntā kūcarī kāruṇī kṛtiḥ

63.30

iti ṣoḍaśa jvālāḥ syustasyāstu sakalāṅgagāḥ
tato'ṣṭadalapatreṣu pūjyā hyaṣṭau tu kanyakāḥ

63.31

māyā ca mohinī caiva bālā ca bhagarūpiṇī
bhagāvāsā ca bhīruṇḍā mṛḍānī baindveśvarī

63.32

aṣṭau kanyāḥ samākhyātāḥ saṃpūjyāścāṣṭapatrake
tatastu jvālāmukhyāstu sukhadā daśa pārvati

63.33

vāmāvartakrameṇaiva pūjāsiddhirbhaved dhruvam
brāhmī ca śāmbhavī durgā vārāhī kulakāminī

63.34

nārasiṃhī ca kaumārī mātaṅgī bhadrakālikā
ugratārā samākhyātā jvālādaśakalā imāḥ

63.35

saṃpūjyā daśapatreṣu sādhakaiśca susiddhaye
tata ūrdhve samabhyarcya devīṃ tripurasundarīm

63.36

tanmadhye'dhaḥ sthitā pūjyā devī dākṣiṇakālikā
tanmadhye pūjanīyā ca devī jvālāmukhī tathā

63.37

jvalinī jaṭinī caiva jātī jālandharī tathā
bindau trikoṇamadhyasthe yantrasya parameśvarī

63.38

devyāścāyudhapūjāṃ ca kuryācca caturaśrake
yantramadhyasthite devi caturaśre vidiggate

63.39

abhayaṃ varadaṃ padmaṃ pāśaṃ (śaraṃ) saṃpūjayet sudhīḥ
īśānānukrameṇaiva pūjayedāyudhāṃstathā

63.40

layāṅgamiti te proktaṃ dhyānaṃ śṛṇu maheśvari
dhyātvā devīṃ mahādevi mantrī syād bhairavopamaḥ

63.41

jvālāparvatasaṃsthitāṃ trinayanāṃ pīṭhatrayādhiṣṭhitāṃ
jvālāḍambarabhūṣitāṃ suvadanāṃ nityāmadṛśyāṃ janaiḥ
ṣaṭcakrāmbujamadhyagāṃ varaśarāmbhojābhayān bibhratīṃ
cidrūpāṃ sakalārthadīpanakarīṃ jvālāmukhīṃ naumyaham

63.42

udyacchītakarāṃśusaṃnibhamukhīmāpīnatuṅgastanīṃ
sadyaḥ phullasarojapāśamamalaṃ vāme kare bibhratīm
dacce'bhītivarau trivarṇavilasadgātrāṅghrayaṣṭiṃ parāṃ
rudrāñjasthatrikoṇamadhyavigatāṃ jvālāmukhīmāśraye

63.43

śītāṃśudyutisannibhāṃ śaśikalācūḍāṃ trinetrāṃ śivāṃ
dviḥṣaṭkārasarojapīṭhavigatāṃ mādhvīrasāghūrṇitam
tryarṇodbhāsitasarvagātralatikāṃ jvālādikanyākulāṃ
rajyatpādayugāṃ trilokajananīṃ jvālāmukhīṃ naumyaham

63.44

iti dhyānatrayaṃ proktaṃ tantramantraviniścitam
prayogān śṛṇu deveśi śrutvā gopyatamān kuru

63.45

stambhanaṃ mohanaṃ caiva māraṇākarṣaṇe tathā
vidveṣaṇaṃ vaśīkāramuccāṭanamataḥ param

63.46

mauktikaṃ śāntikaṃ caiva pauṣṭikaṃ paramādbhutam
śṛṇuṣvāvahitā bhūtvā yena jvālā prasīdati

63.47

(1) ravāvutthāya muhūrte brāhme vā cārdharātrake
gatvā nadītaṭaṃ kuryādyathā naimittikīṃ kriyām

63.48

snānasandhyāvidhiṃ kuryājjapamaṣṭottaraṃ caret
jvālādevyā manuṃ japtvā vrajet pretālayaṃ tataḥ

63.49

tata ānīya deveśi bhasmamuṣṭiṃ ca sādhakaḥ
nikhanet kuṇḍamekaṃ tu trikoṇaṃ sādhakottamaḥ

63.50

bhasmamuṣṭiṃ ca tatkuṇḍe kṣiptvā homaṃ samācaret
ghṛtena tilatailena pāyasena sureśvari

63.51

mūlena cācareddhomaṃ yāvanmādhyāhnikaṃ bhavet
tasyopari pated draeḍamaiṣikaṃ parameśvari

63.52

homaṃ saṃpādya deveśi kuryāt karma paraṃ sudhīḥ
(2) ardharātre samutthāya bhasmānīya ca lepayet

63.53

aṅgeṣu sādhako dhīmāṃllalāṭe tilakaṃ caret
prabhāte tu trajenmantrī sabhāmadhye sureśvari

63.54

tasya darśanamātreṇa indro jīvaḥ pitāmahaḥ
stambhavāgbhagavān viṣṇurbhaviṣyati na saṃśayaḥ

63.55

(3) maṅgale'hni samutthāya madhyāhne vārdharātrake
ānīya nūtanaṃ kumbhaṃ pūrayet payasā priye

63.56

tasminmadhye caret pūjāṃ jvālāmukhyā maheśvari
mantrī dināṣṭakaṃ tāvad gandhārghyakusumaistathā

63.57

prāpte'nyamaṅgaladine dadyānmantrī baliṃ śubham
kukkuṭaṃ ca maheśāni tadraktaṃ ca ghaṭe kṣipet

63.58

tato mūlena naivedyaṃ dattvā snānaṃ samācaret
tena kumbhasya nīreṇa sādhako mantrasādhakaḥ

63.59

karmaṇā manasā vācā mohayed bhuvanatrayam
sarvajñasya mamāpyepa kariṣyatyanyathā dhruvam

63.60

(4) anyadā śanivāre tu gatvā pretālayaṃ śive
sāśivāṃ devatāṃ dhyātvā kuryāt snānamanuttamam

63.61

tato'ṣṭottaravāraikaśatamāvartya mālayā
yoṣinmūrtiṃ vidhāyaiva tyajedretaḥ prayatnataḥ

63.62

retasaścopari caudraṃ kṣitvā madyaṃ kṣipet sudhīḥ
stanyaṃ saṃkṣipya viśveśi gomūtramupari kṣipet

63.63

naramūtraṃ ca saṃkṣipya kharamūtraṃ ca niḥkṣipet
gajamūtraṃ tathā madhye mīnamāṃsaṃ maheśvari

63.64

tilatailaṃ ca lavaṇamārakhyālasamanvitam
ghaṭaṃ saṃpūrya vidhivat sādhakaḥ pretamandire

63.65

bhūmau kṣiptvā cirekṣityaṃ japedaṣṭottaraṃ śatam
māsamekaṃ samullaṅghya dattvā māhiṣikaṃ balim

63.66

tato viracayeddhomaṃ pāyasena ca sarpiṣā
tathā virīphalaṃ hutvā juhuyācca harītakīm

63.67

tato māse gate devi sādhako mantrasādhakaḥ
ghaṭaṃ niṣkarṣayedbhūmau praṇamya śirasā punaḥ

63.68

japedekasahasraṃ tu mūlamantraṃ yathārthataḥ
ardharātre ripornāma gṛhītvā tu catuṣpathe

63.69

kumbhaṃ ca sādhako bhindyāt sadyaḥ śatrurbhariṣyati
(5) athākarṣaṇakaṃ vakṣye prabhāte guruvāsare

63.70

gatvā rahaḥsthalaṃ devi kuryānnaimittikīṃ kriyām
tataḥ cīraṃ samānīya māhiṣyastanyameva ca

63.71

ekīkṛtya careddhomaṃ sarpiṣā pāyasena ca
kṛtvā caitra priyābhogaṃ retaḥ cīre viniḥkṣipet

63.72

homayet puṣpasaṅghātaṃ pītaṃ raktaṃ ca pāṇḍuram
anyedyuratha deveśi śītalaṃ bhasma coddharet

63.73

yojayedretasā sākaṃ kṣipenmantrī catuṣpathe
urvaśī svargasaṃsthāpi prātaḥ prādurbhaviṣyati

63.74

(6) candravāre samutthāya gatvā pretālayaṃ sudhīḥ
madhyāhne nūtane kumbhe kṣiped bhasmāsthisañcayam

63.75

ghaṭamācchādya vastreṇa kṣiped bhūmau ca māntrikaḥ
japed dināṣṭakaṃ yāvad mūlamantramanusmaran

63.76

aṣṭame divase prāpte kumbhamākṛṣya māntrikaḥ
ardharātre ripordvāri ghaṭaṃ tu sphoṭayecchanaiḥ

63.77

pādaprahāradaśabhiḥ śatrorvidveṣaṇaṃ bhavet
(7) budhavāre sunakṣatre paścimagryaṃ samānayet

63.78

likhitvā bhūmiṃ trikoṇaṃ tu kuṇḍaṃ likhya mahāmanum
tanmadhye pūrayedyatraṃ homayenmūlajācaraiḥ

63.79

baliṃ dattvā biḍālaṃ ca sādhako mūlamantrataḥ
japet saptasahasraṃ tu sāṅgaṃ ca vidhivannaraḥ

63.80

yasya nāma ca saṅgṛhya striyo vā puruṣasya ca
saptavāraṃ surendro'pi vaśībhavati nānyathā

63.81

brahmādyā nirjarāḥ sarve rambhādyā hyapsarogaṇāḥ
vaśamāyānti deveśi mantrasyāsya prasādataḥ

63.82

(8) śanivāre kharaṃ kṛṣṇaṃ vanaṃ gatvā niśīthake
yatraṃ saṃpūjya tasyāgre baliṃ dadyāt svamūlataḥ

63.83

japaṃ ca daśasāhasraṃ kṛtvā kuṇḍaṃ khanet pathi
tadraktaṃ homayet sarpiḥ śatrornāma samuccaret

63.84

tenaiva sarvaripavaḥ saṃkṣayaṃ yāntyasaṃśayaḥ
(9) śubhe'hni śubhanakṣatre gatvā sindhutaṭe śubhe

63.85

mūlenaivācareddhomaṃ śamīpatraistu sādhakaḥ
stanyādicīrakhaṇḍādyaiḥ sarpiṣā taddaśāṃśataḥ

63.86

homaṃ saṃpādya deveśi dadyāt pūrṇāhuti tataḥ
tasmācca jāyate puṣṭirdevānāmapi durlabhā

63.87

idaṃ paṭalamākhyātaṃ jvālāyā huttamaṃ mayā
rahasyaṃ paramaṃ devi sarvasvaṃ sāramuttamam

63.88

durlabhaṃ tridive devi na dātavyaṃ hi kasyacit
nindakāya ca duṣṭāya dveṣiṇe bhaktivarjite
gopyaṃ guptatamaṃ bhūmau kalāviṣṭaphalapradam

Linked texts (3)