Pramāṇa · Search · About · API

Devirahasya 64

Devīrahasya 64

Language
Sanskrit

64.1

adhunā devi vakṣyāmi jvālāpaddhatimuttamām
gadyapadyamayīṃ guhyāṃ koṭiyajñaphalapradām

64.2

prātaḥ kṛtyamakṛtvā tu śrījvālāṃ pūjayet tu yaḥ
tasya pūjā ca viphalā śaucahīnā yathā kriyā

64.1-2

tatrādau śrīmānsādhako brāhme muhūrte śayanatalādutthāya karacaraṇamukhāni prakṣālya nijāsane samupaviśya, nijaśirasi śvetavarṇādhomukhasahasradalakamalakarṇikāntargata-candramaṇḍalasiṃhāsanopari niṣaṇṇaṃ, svaguruṃ śuklavarṇaṃ śuklālaṅkārabhūṣitaṃ jñānānandamuditamānasaṃ saccidānandavigrahaṃ caturbhujaṃ jñānamudrāpustakavarābhayakaraṃ trinayanaṃ prasannavadanenduṃ sarvadevadevaṃ paramaśivasvarūpaṃ, vāmāṅke vāmahastadhṛtakamalayā raktavasanābharaṇayā svapriyayā dakṣiṇabhujenāliṅgitaṃ śāntaṃ suprasannaṃ dhyātvā, taccaraṇakamalayugalavigaladamṛtadhārayā svātmānaṃ plutaṃ vibhāvya mānasopacārairārādhayet
yathā— laṃ bhūmyātmakaṃ gandhaṃ samarpayāmi namaḥ | haṃ ākāśātmakaṃ puṣpaṃ | yaṃ vāyvātmakaṃ dhūpaṃ | raṃ vahnyātmakaṃ dīpaṃ | vaṃ amṛtātmakaṃ nānānaivedyaṃ | saṃ sarvātmakāni phalamūlatāmbūlāni samarpa0 | oṃaiṃhrīṃ śrīṃ hasakhaphreṃ hasaraktamalavayaūṃ sahakhaphreṃ sahaktamalavarayaūṃ hasauṃ shauṃ śrīmacchrīśrīamukānandanāthaśrīpādukāṃ śrīamukāmbāśrīpādukāṃ pūjayāmi namaḥ, iti daśadhā vibhṛśya manasā daṇḍavatpraṇāmaṃ kuryāt
sahasradalapaṅkaje sakalaśītaraśmiprabhaṃ
varābhayakarāmbujaṃ trimalagandhapuṣpāmbaram
prasannavadanenduṃ sakaladevatārūpiṇaṃ
smareccirāsi haṃsagaṃ tadabhidhānapūrvaṃ gurum

64.2-2

iti dhyātvā praṇāmamantrān paṭhet
namāmi sadguruṃ śāntaṃ satyajñaṃ śivarūpiṇam
śirasā yogapīṭhasthaṃ muktikāmārthasiddhaye

64.3

śrīguruṃ paramānandaṃ vandāmyānandavigraham
yasya sānnidhyamātreṇa cidānandāyate param

64.4

ajñānatimirāndhasya jñānāñjanaśalākayā
cakṣurunmīlitaṃ yena tasmai śrīgurave namaḥ

64.5

akhaṇḍamaṇḍalākāraṃ vyāptaṃ yena carācaram
tatpadaṃ darśitaṃ yena tasmai śrīgurave namaḥ

64.6

gururbrahmā gururviṣṇurguruḥ sākṣānmaheśvaraḥ
gurureva jagatsarvaṃ tasmai śrīgurave namaḥ

64.7

namaste nātha bhagavanśivāya gururūpiṇe
vidyāvatārasaṃsiddhyai svīkṛtānekavigraha

64.8

navāya navarūpāya paramārthaikarūpiṇe
sarvājñānatamobhedabhānave ciddhanāya te

64.9

svatantrāya dayākalpavigrahāya parātmane
paratantrāya bhaktānāṃ bhavyānāṃ bhavyarūpiṇe

64.10

prakāśināṃ prakāśāya vivekāya vivekinām
jñānināṃ jñānarūpāya vimarśāya vimarśinām

64.11

purastāt pārśvayoḥ pṛṣṭhe namaskuryādguparyadhaḥ
sadā saccittarūpeṇa vidhehi bhavadāsanam

Linked texts (4)