Devirahasya 68
Devīrahasya 68
- Language
- Sanskrit
68.1
itthaṃ pātrapraśaṃsāṃ kṛtvā, tataḥ svasāmayikān yathāśāstraṃ gurūpadiṣṭavidhinā saṃpūjya saṃtarpya, pūrvasthāpitabalipātrasthamantrādikamekasmin
pātre kṛtvā tadgṛhādutthāya sodakapātrahasto bahirgatvā, jalena śucau
deśe caturaśravṛttatrikoṇātmakaṃ maṇḍalaṃ kṛtvā, tatra "gadātriśūlaḍamarupātrahastaṃ trilocanam | kṛṣṇābhaṃ bhairavaṃ devaṃ sarvavighnavināśanam ' "
ityucchiṣṭabhairavaṃ dhyātvā, gandhādinā saṃpūjya, "oṃ ucchiṣṭabhairava ehyehi
baliṃ gṛhṇa 2 huṃ phaṭ svāhā" iti pātrasthaṃ balidravyaṃ tatra maṇḍale
visṛjya, tatpātre hastau pādau ca prakṣālyācamya, tatpātraṃ jalenāpūrya
pūjāgṛhadvāraṃ gatvā praviśya svāsane samupaviśya tatpātrasthajale śrīpātrajalabinduṃ dattvā tena jalena svātmānamabhiṣiñcan śāntistotraṃ paṭhet
taduktaṃ śrīdevīrahasye (2150) | yathā—
devi vakṣyāmi pūjānte śāntistotramanuttamam
vīrā yena parānandapadaṃ prāpsyantyanāmayam
68.2
yoginīcakramadhyasthaṃ mātṛmaṇḍalaveṣṭitam
namāmi śirasā nāthaṃ bhairavaṃ bhairavīpriyam
68.3
anādighorasaṃsāravyādhirghvaṃsaikahetave
namaḥ śrīnāthavaidyāya kulauṣadhipradāyine
68.4
āpado duritaṃ rogāḥ samayācāralaṅghanāt
te sarve'tra vyapohantu divyacakrasya melanāt
68.5
āyurārogyamaiśvaryaṃ kīrtirlābhaḥ sukhaṃ jayaḥ
kāntirmanorathaścāstu pāntu sarvāśca devatāḥ
68.6
saṃpūjakānāṃ paripālakānāṃ yatīndrayogīndratapodhanānām
deśasya rāṣṭrasya kulasya rājñāṃ karotu śāntiṃ bhagavān kuleśaḥ
68.7
nandantu sādhakakulānvayadarśakā ye
sṛṣṭyādyanākhyacaturukkamahānvayā ye
nandatu sarvakulakaularatāḥ pare ye'pyanye viśeṣapadabhedakaśāmbhavā ye
68.8
nandantu siddhaguravaḥ svagurukramaughā
jyeṣṭhānugāḥ samayino vaṭukāḥ kumāryaḥ
ṣaḍyoginīpravaravīrakulaprasūtā
nandantu bhūmipatigodvijasādhulokāḥ
68.9
nandantu nītinipuṇā niravadyaniṣṭhā
nirmatsarā nirupamā nirupadravāśca
nityā nirañjanaratā guravo nirīhāḥ
śāktāśca śāntamanaso hṛtaśokaśaṅkāḥ
68.10
nandantu yoganiratāḥ kulayogayuktā
ācāryasāmayikasādhakaputrakāśca
gāvo dvijā yuvatayo yatayaḥ kumāryo
dharme bhavantu niratā gurubhaktiyuktāḥ
68.11
nandantu sādhakakulā aṇimādiniṣṭhāḥ
śāpāḥ patantu samayadviṣi yoginīnām
sā śāmbhavī sphuratu kāpi mamādhyavasthā
yasyāṃ guroścaraṇapaṅkajameva labhyam
68.12
yāścakrakramabhūmikāvasatayo nāḍīṣu yā saṃsthitā
yāḥ kāyadrumaromakūpanilayā yāḥ saṃsthitā dhātuṣu
ucchvāsormimaruttaraṅganilayā niḥśvāsavāsāśca yāstā devyo ripupakṣabhakṣaṇaparāstṛpyantu kaulārcitāḥ
68.13
yā divyakramapālikāḥ dvitigatā yā devatāstoyagā
yā nityaṃ prathitaprabhāḥ śikhigatā yā mātariśvāśrayāḥ
yā vyomāmṛtamayaiḍalāmṛtamayā yāḥ sarvagāḥ sarvadāstāḥ sarvāḥ kulamārgapālanaparāḥ śānti prayacchantu me
68.14
ūrdhvaṃ brahmāṇḍato vā divi gaganatale bhūtale nistale vā
pātāle vā tale vā salilapavanayoryatra kutra sthitā vā
kṣetre pīṭhopapīṭhādiṣu ca kṛtapadā bhūpadīpādikena
prītā devyaḥ sadā naḥ śubhabalividhinā pāntu vīrendravandyāḥ
68.15
brahmāṃśeṣeśadurgāguhavaṭukagaṇā bhairavāḥ kṣetrapālāḥ
vetālādityarudragrahabhumanusiddhāpsaroguhyakādyāḥ
bhūtā gandharvavidyādhararṣipitṛyakṣāsurāhiprabhūtāḥ
yogīśāśvāraṇāḥ kiṃpuruṣamunivarāścakragāḥ pāntu sarve
68.16
dehasthākhiladevatā gajamukhāḥ kṣetrādhipā bhairavā
yoginyo vaṭukāśca yaccapitaro bhūtāḥ piśācā grahāḥ
anye bhūcaradikcarāśca khacarā vetālakāśceṭakāḥ
tṛptāḥ syuḥ kulaputrakasya pibataḥ pānaṃ sadīpaṃ carum
68.17
satyaṃ cedguruvākyameva pitaro devāśca cedyoginīprītiścet paradevatā ca yadi ceddedāḥ pramāṇaṃ ca cet
śākteyaṃ yadi darśanaṃ bhavati cedājñeyameṣāsti cet
santyatrāpi ca kaulikāśca yadi cet syānme jayaḥ sarvadā
68.18
tṛpyantu mātaraḥ sarvāḥ samudrāḥ sagaṇādhipāḥ
yoginyaḥ kṣetrapālāśca mama dehe vyavasthitāḥ
68.16-2
śivādyavaniparyantaṃ brahmādistambasaṃyutam
kālābhyādiśivāntaṃ ca jagadyajñena tṛpyatu
68.20
paṭhitvedaṃ namedvīrān vīravandanamācaret
stuvedvīrānnamedvīrān mantrasiddhiḥ prajāyate
Linked texts (4)
- Devīrahasya — Sanskrit
- Pūrvārddhadevirahasya — Sanskrit
- Devīrahasyapurāṇa — Sanskrit
- Mantramahārṇava (ed. Ram Kumar Rai) — Sanskrit