Pramāṇa · Search · About · API

Devirahasya 78

Devīrahasya 78

Language
Sanskrit

Contents

78.1

samāptaṃ cedaṃ śrīśārikāpañcāṅgam
atha
śrīśailaśikharāsīnaṃ bhagavantamumāpatim
candrārdhamukuṭaṃ devaṃ sūryasomāgnilocanam

78.2

gajacarmaparīdhānaṃ virūpākṣaṃ surādhipam
gaṇagandharvayakṣendra-devāsuranamaskṛtam

78.3

vihasantaṃ japantaṃ ca paṭhantaṃ ca muhurmuhuḥ
nāgābharaṇabhūṣāḍhyaṃ brahmācyutanamaskṛtam

78.4

utthāya praṇatā bhūtvā paryapṛcchata bhairavī
śrīdevyuvāca
bhagavaṃstvaṃ paro devaḥ surāsuranamaskṛtaḥ
guṇī vedāntatattrajño guṇātītaścidīśvaraḥ

78.5

satataṃ kiṃjapāsaktastattvaṃ sarvottamaṃ prabho
adyāpyaviditaṃ yanme tattattvaṃ vaktumarhasi

78.6

śrībhairava uvāca
yā devī niṣkalā śyāmā nirābhāsā nirañjanā
mahāśrīṣoḍaśīvidyā sā rājñīti nigadyate

78.7

sakalā rājyadā loke vidyārājñī maheśvarī
devī pañcadaśī saiva parabrahmakuṭumbinī

78.8

nṛṇāṃ dāridryanāśāya pādurbhūtādya bhārate
yasyāḥ pañcadaśīvidyāṃ guhyāmaviditāṃ purā

78.8-2

tāṃ japāmi mahāvidyāṃ tatpaścāṅgaṃ smarāmyaham
śrīdevyuvāca
bhagavan karuṇāmbhodhe śaraṇāgatavatsala
yā devī lokamāteti rājñī rājyapradāyinī

78.10

dāridryahāriṇī tvaya tatpaścāṅgaṃ vadasva me
tattvato veditatrāṅyaṃ yadyahaṃ preyasī tava

78.11

śrībhairava uvāca
śṛṇuṣvāvahitā bhūtvā paṭalaṃ mantravigraham
rājñyāḥ sarvasvabhūtaṃ me rahasyaṃ devadurlabham

78.12

mantroddhāraṃ mahādevi rājyā madvadanoditam
śrutvā gopaya yatnena yena siddhiḥ prajāyate

78.13

tāraṃ māyā mānalaḥ kāmaśaktī
madhye cākhyā bhagavatyai ca rājyai
māyābījaṃ ṣṭhadvayaṃ devi rājyā
mantroddhāro varṇito gopanīyaḥ

78.14

nākhyāntarāyo na kleśo na viparyayabhīḥ śive¹
sarvasiddhiprado devi mantro'yaṃ bhāgyavardhanaḥ

78.15

mantramutkīlayedādau tataḥ sañjīvayenmanum
siddhaṃ mantraṃ japed devi tataḥ saṃpuṭitaṃ caret

78.16

tato mantro'yamīśāni sākṣāt siddhiprado bhavet
yantroddhāraṃ pravakṣyāmi sarvāśāparipūrakam

78.17

sarvasaṃpatpradaṃ caiva sarvārthasādhakaṃ tathā
sarvasiddhipradaṃ cakraṃ sarvānandamayaṃ tathā

78.18

sarvasaṃmohanaṃ cakraṃ pīṭhārcāyāṃ prapūjayet
bindutryaśraṃ ṣaḍasraṃ ca vṛttāṣṭadalamaṇḍitam

78.19

vṛttatrayaṃ dharāsañca rājñīśrīcakramīritam
layāṅgasya deveśi śṛṇu vedāgamoddhṛtam

78.20

yasya śravaṇamātreṇa pūjāyutaphalaṃ labhet
gaṇeśo bhīmarājaśca kumāro jāṅgaleśvaraḥ

78.21

indrādyā lokapālāśca pūjanīyāśca bhūgṛhe
vṛttatraye'bhyarcanīyā gurupaṃktitrayī śive

78.22

divyasiddhaughamartyaughāḥ pūjyā gandhādyaiḥ priye
vāsukirnīlanāgaśca takṣakaḥ padmanāgakaḥ

78.23

pūrvādidikṣu saṃpūjyā vidikṣu śṛṇu pārvati
kārkoṭakaḥ śaṅkhapālaḥ kulikaḥ śeṣa īśvari

78.24

āgneyakramataḥ pūjyā brāhmyādyā mātarastathā
bhairavāstvaṣṭa saṃpūjyā vāmāvartena pārvati

78.25

brāhmī ca vaiṣṇavī caiva rudrāṇī cāparājitā
kaumārī caiva cāmuṇḍā vārāhī nārasiṃhikā

78.26

asitāṅgo ruruścaṇḍaḥ krodheśonmattabhīṣaṇāḥ
kapālīśaśca saṃhāraḥ pūjanīyā yathākramam

78.27

śrīdurgā śārikādevī vaikharī ca śivā śive
kālikā tripurā caiva vāmāvṛttyā ṣaḍaśrake

78.28

lakṣmīḥ sarasvatī bālā pūjanīyāścikoṇake
bindau rājyapradā rājñī vidyā pañcadaśākṣarī

78.29

bhūteśvaraṃ śivaṃ devi khaḍgaṃ padmaṃ samarcayet
kalaśaṃ ca sudhāpātraṃ pūjayedvaṭukaṃ tathā

78.30

yoginīḥ kṣetrapālāṃśca bhūtāṃstatra vināyakam
rāmeśvaraṃ maheśāni layāṅgamidamīritam

78.31

śrīrājñīmūlamantrasya ṛṣirbrahmā samīritaḥ
gāyatrī chanda īśāni rājñīdevī ca devatā

78.32

māyā bījaṃ śaracchaktiḥ kāmaḥ kīlakamīśvari
bhogāpavargasiddhyarthe viniyogaḥ prakīrtitā

78.33

dhyānamasyāḥ pravakṣyāmi sāttvikaṃ kāmanāvaham
sarvasiddhipradaṃ devi mantrakoṭiphalapradam

78.34

udyaddivākarasahasraruciṃ trinetrāṃ
siṃhāsanoparigatāmuragopavītām
khaḍgāmbujāḍhyakalaśāmṛtapātrahastāṃ
rājñīṃ bhajāmi vikasadvadanāravindām

78.35

(caturbhujāṃ candrakalārdhaśekharāṃ
siṃhāsanasthāṃ bhujagopavītinīm
pāśāṅkuśāmbhoruhakhaḍgadhāriṇīṃ
rājñīṃ bhaje cetasi rājyadāyinīm)

78.36

adhunā devi vakṣyāmi prayogānaṣṭa tattvataḥ
yeṣāṃ sādhanamātreṇa mantraḥ kalpadrumo bhavet

78.37

stambhanaṃ mohanaṃ caiva māraṇākarṣaṇe priye
vaśīkāraṃ tathocāṭaṃ śāntikaṃ pauṣṭikaṃ tathā

78.38

eteṣāṃ sādhanaṃ vakṣye prayogāṇāṃ maheśvari
(1) ravau snātvā japenmūlaṃ śamaśāne'yutasaṃkhyayā

78.39

huneccitānale sarpirmālinīkeśasaścayam
stambhanaṃ jāyate vāricandravātārkapāthasām

78.40

(2) candre tathā śmaśānasthaḥ śavaveśadharaḥ sudhīḥ
japenmantrāyutaṃ samyak kuryād homaṃ daśāṃśataḥ

78.41

ghṛtavānīraśākhābhirlavaṅgairmohanaṃ bhavet
(3) bhaume snātvā śmaśāne ca citāgre saṃjapenmanum

78.42

huned daśāṃśataḥ sarpirmīnakaeṭakagomayān
śatruḥ kālasamāno'pi mṛtyumeṣyati pārvati

78.43

(4) budhe śmaśāne deveśi japenmantrāyutaṃ niśi
hunedājyaṃ daśāṃśena sacaeḍālakacaṃ priye

78.44

rambhā tilottamā vāpi prātaḥ prādurbhaviṣyati
(5) gurau japenmanuṃ devi śmaśāne muktakuntalaḥ

78.45

ayutaṃ taddaśāṃśena hunedājyaṃ sapāyasam
saśaraṃ ghanasāraṃ ca bhṛtyatvāṃ yāti vāsavaḥ

78.46

(6) śukre śmaśānadeśe tu japedayutasaṃkhyayā
digambaro muktakeśo hunedājyaṃ ca solmukam

78.47

sadūrvāśarkaraṃ hutvā ripumuccāṭayiṣyati
(7) śanau śmaśānanilaye japedrājñīmanuṃ sudhīḥ

78.48

ayutaṃ taddaśāṃśena hunedājyaṃ saśambukam
sameṣaplīhacāraṃ ca śamayedabhito bhayam

78.49

(8) ravau śmaśāne² sañjapya mūlaṃ cāyutasaṃkhyayā
hunet kapotamāṃsājyamāhiṣaṃ palamadrije

78.50

pitṛṇāṃ devatānāṃ ca puṣṭido'yaṃ prayogakaḥ
ityeṣa paṭalo rājñaḥ sarvāgamarahasyavān

78.51

anyaśiṣyāya na deyo durjanāya viśeṣataḥ
gurubhaktivihīnāya kucailāya durātmane

78.52

abhaktebhyo'pi putrebhyo dattvā nirayamāpnuyāt
deyaṃ śiṣyāya śāntāya gurubhaktyā pārvati

78.53

dīkṣitāya kulīnāya rājñībhaktiratāya ca
idaṃ rahasyaṃ paramaṃ tava bhaktyā mayoditam
guhyaṃ gopyatamaṃ loke gopanīyaṃ svayonivat

78.53.p1

iti śrīrudrayāmale tantre daśavidhārahasye śrīmahārājñīpaṭalam || 1

Linked texts (3)