Pramāṇa · Search · About · API

Devirahasya 8

Devīrahasya 8

Language
Sanskrit

Contents

8.1

śrībhairava uvāca
adhunā kathayiṣyāmi japasādhanamuttamam
yena sādhitamātreṇa mantrasiddhiḥ prajāyate

8.2

gurupādaprasādena śrīvidyā yadi labhyate
puraskriyājapenaiva cettāṃ sādhayituṃ kṣamaḥ

8.3

vāgmī dhanī jayī śūra iha bhogī sa bhūpatiḥ
paratra sādhako devi bhaved bhairavasannibhaḥ

8.4

sudine śubhanakṣatre prātaḥkṛtyaṃ vidhāya ca
svagṛhaṃ svaguruṃ nītvā natvā pādau maheśvari

8.5

prakṣālya pūjāyatane śrīcakraṃ pūjayecchive
sindūreṇa likhet tryasraṃ guruṃ tatra niveśayet

8.6

tāraṃ śivatrayaṃ devi gurave padamuccaret
viśvamante mahādevi gurumantro'yamuttamaḥ

8.7

anena mūlamantreṇa guruṃ saṃpūjayet sudhīḥ
mātṛkābhiḥ samaṃ devi yathāsthāneṣu pārvati

8.8

gandhādyataprasūnādyairdravyairdevi śubhāmbaraiḥ
guruṃ santoṣayet tatra dakṣiṇābhiḥ kulāmṛtaiḥ

8.9

tadājñāṃ śirasādāya japāya sādhakottamaḥ
ravau prātarmahādevi guruṃ natvā ca sādhakaḥ

8.10

prāṅmukhaḥ praṇato bhūtvā japedaṣṭottaraṃ śatam
śivaśaktyoḥ pṛthag devi japaṃ saṃpādya sādhakaḥ

8.11

ṣaḍaṅgaṃ mūlamantrasya daśāṃśena japet tataḥ
tato devi japenmantrī chandomunimanuṃ tataḥ

8.12

tato devi jayī juhvā homaṃ kuryād daśāṃśataḥ
tarpayitvā daśāṃśena mārjayet taddaśāṃśataḥ

8.13

bhojayitvā daśāṃśena japasiddhirbhavet tataḥ
japāt siddhirjapāt siddhirjapāt siddhirmaheśvari

8.14

na stavānnārcanād dhyānāt siddhirbhavati tādṛśī
pārāyaṇajapenāsti yādṛśī mantriṇāṃ śive

8.15

śrīdevyuvāca
bhagavan parameśāna sādhakānāṃ hitecchayā
pārāyaṇajapaṃ brūhi yadyahaṃ tava vallabhā

8.16

śrībhairava uvāca
devi pārāyaṇaṃ vakṣye vidyājapaphalāptaye
yena siddhiyuto mantrī bhavedbhairavasannibhaḥ

8.17

asaṃkhyātāśca vikhyātāḥ pārāyaṇajapāḥ priye
teṣāṃ tattvaṃ paraṃ vakṣye yena brahmamayo bhavet

8.18

pārāyaṇastu sa japaḥ samyag yad brahmacintanam
tasyaiva saguṇasyātra cintanaṃ ghaṭikājapaḥ

8.19

dvividho'yaṃ japo devi saguṇo nirguṇastathā
siddhaḥ sādhya iti smṛtvā japet pārāyaṇaṃ manum

8.20

kaleryugārambhadine dineśo hallekhabīje'bhyudito babhūva
tadādi nityaṃ ghaṭikaikamānāt pratyacaraṃ yāti dine dinerkaḥ

8.21

navārṇamantrāvalimeti sūryo madhyandine sāyamatha prabhāte
tribhāgamādyantarayostathānte vidhāya mantrasya japenmumukṣuḥ

8.22

ekādipañcāśativarṇapaṅktyā saṃyojya mantrasya navākṣarāṇi
ghaṭīpramāṇāḥ kulamātṛkāyā bhavanti varṇā manurājasiddhyai

8.23

āī-vibhūṣitāṃ kṛtvā mātṛkāṃ haṃsabhūṣitām
mūlavidyāṃ japenmantrī śivaśaktimayīṃ śive

8.24

pañcanādān parityajya yo japet ṣoḍaśākṣarīm
pañcaṣaṣṭyakṣarīmūlān pañcanādātmako bhavet

8.25

ādito devi vidyādau vidyāmadhye tadagrataḥ
vidyānte'pi tyajedvidyāṃ śivarūpāṃ śivo bhavet

8.26

śahake viśvarūpo'pi sūryo'kāre tadoditaḥ
tadā prabhṛti loke'smin mātṛkāsu caredviḥ

8.27

vāsanāvaśatastyaktvo vahnitejomayo bhavet
lakṣmīṃ prāpya śivo mantrī saubhāgyāntāṃ yathākramam

8.28

payodavidyayā vidyāmāī-padmavitāṃ kramāt
haṃsāntāṃ sañjaped devi mantrī mātṛkayā sadā

8.29

ayaṃ pārāyaṇo nāma japaḥ siddhipradaḥ kalau
mahāśrīṣoḍaśīvidyāmaṣṭabhūtimayīṃ parām

8.30

vedādibhūtāṃ prajapenmātṛkābhiḥ kulāśrayaḥ
idaṃ rahasyaṃ paramaṃ pārāyaṇajapātmakam
brahmavidyālayotthānaṃ nākhyeyaṃ brahmavādibhiḥ

8.30.p1

iti śrīrudrayāmale tantre śrīdevīrahasye pārāyaṇajapavidhinirūpaṇamaṣṭamaḥ paṭalaḥ || 8

Linked texts (4)