Devirahasya 83
Devīrahasya 83
- Language
- Sanskrit
Contents
83.1
bālāpaṭalam
kailāsaśikharāsīnaṃ bhagavantamumāpatim
candrārdhamukuṭaṃ devaṃ somasūryāgnilocanam
83.2
gajacarmaparīdhānaṃ virūpākṣaṃ surārcitam
gaṇagandharvayakṣendra-devāsuranamaskṛtam
83.3
vihasantaṃ japantaṃ ca paṭhantaṃ ca muhurmuhuḥ
utthāya praṇatā bhūtvā cedaṃ pṛcchati bhairavī
83.4
śrībhairavī
bhagavan karuṇāmbhodhe sarvāgamaviśārada
tvatprasādānmayā sarvāḥ śrutā vidyāḥ sureśvara
83.5
idānīṃ śrotumicchāmi bālāṃ tripurasundarīm
deyāsti yadi me deva vada vidyāṃ maheśvara
83.6
śrībhairavaḥ
śṛṇu devi pravakṣyāmi pañcāṅgaṃ sādhakeṣṭadam
paṭalaṃ paddhatiṃ varma tathā nāmnāṃ sahasrakam
83.7
stavarājaṃ mahādevi śṛṇuṣvaikāgramānasā
śrībālā parameśānī bhuktimuktipradāyinī
83.8
rājyaṃ deyaṃ śiro deyaṃ gṛhaṃ lakṣmīyutaṃ tathā
sarvaṃ deyaṃ mahādevi na deyamidamuttamam
83.9
asyā vidyāyāḥ sadṛśī vidyā nānyā kalau yuge
śrībālātripurāvidyā śīghraṃ siddhipradā smṛtā
83.10
deyā śiṣyāya śāntāya gurubhaktiratāya ca
nābhaktāya pradātavyā vidyeyaṃ parameśvari
83.11
mantroddhāraṃ tathā yantraṃ prastāraṃ dhyānameva ca
prayogān saṃpravakṣyāmi devadevyā maheśvari
83.12
prathamaṃ śṛṇu deveśi mantroddhāraṃ phalapradam
gopanīyaṃ prayatnena yena siddhiḥ prajāyate
83.13
vāgbhavaṃ kāmarājaśca śaktimadhye'bhidhaṃ nyaset
namo'nte devi bālāyā mantro'yaṃ cāṣṭavarṇakaḥ
83.14
nāpi vighno na vāśauco na vāraniyamastathā
svayaṃ siddho mahādevi mantrarājaḥ kalau yuge
83.15
dakṣiṇāmūrtipaṅktyau ca muniśchandaḥ kramāt smṛtam
devatā tripurā bālā ādyante bījaśaktike
83.16
klīṃ kīlakaṃ samādiṣṭaṃ dharmakāmārthamuktaye
śirasi vadane devi hṛdaye guhyadeśake
83.17
pādayornābhikamale sarvāṅge ca tathā nyaset
ṛṣyādikaṃ mahādevi kuryānnyāsavikalpanām
83.18
karanyāsaṃ ṣaḍaṅgaṃ ca bījaiḥ kuryānmaheśvari
asyā dhyānaṃ pravakṣyāmi sādhakānāṃ hitapradam
83.16-2
raktāmbarāṃ candrakalāvataṃsāṃ
samudyadādityanibhāṃ trinetrām
vidyāṅkamālābhayadānahastāṃ
dhyāyāmi bālāmaruṇāmbujasthām
83.20
iti dhyātvā mahādevīṃ japenmantraṃ susiddhidam
lakṣatrayaṃ puraścaryāvidhau sādhakasattamaḥ
83.21
atha vakṣyāmi deveśi yantroddhāraṃ sudurlabham
sādhakasya mahādevyā bhuktimuktiphalapradam
83.22
bindutrikoṇāvasukoṇakanāgapatravṛttatrayāśritamahīsadanatrayaṃ ca
bālādicakramidamārtiharaṃ girīśe
brahmendraviṣṇunamitaṃ gaditaṃ mayā te
83.23
evaṃ vilikhite yantre pīṭhaśaktīḥ prapūjayet
icchājñānakriyāścaiva kāminī kāmadāyinī
83.24
ratī ratipriyānandā manonmanyapi vontimā
pīṭhaśaktīrimā iṣṭvā pīṭhaṃ tanmanunā diśet
83.25
vyomaparvatatārtīyaṃ sadāśivamahāpadam
pīṭhapadmāsanāyānte namontaḥ pīṭhamantrakaḥ
83.26
ṣoḍaśārṇastato mūrtau kriyāyāṃ mūlamantrataḥ
āvāhya pūjayed devīmupacāraiḥ pṛthagvidhaiḥ
83.27
devīmiṣṭvā madhyayonau trikoṇe matipūrvakaḥ
vāmakoṇe ratiṃ dattvā prītimagre manobhavām
83.28
yonyāṃ tu vahnikoṇādāvaṅgāni paripūjayet
madhyayonyāṃ bahiḥ pūrvadikṣu cāgre smarānvipi
83.29
vāṇadevīstadvadeva śaktīraṣṭāsu yoniṣu
subhagākhyā bhagā paścāttṛtīyā bhagasarpiṇī
83.30
bhagamālā tathānaṅgādyānaṅgakusumā parā
anaṅgamekhalānaṅgamadanetyaṣṭaśaktayaḥ
83.31
padmakesaragā brāhmīmukhāḥ patreṣu bhairavāḥ
dalāgre'pyaṣṭa pīṭhāni kāmarūpākhyamādimam
83.32
malayaṃ kaulagiryākhyaṃ cauhārākhyaṃ kulāntakam
jālandharaṃ tathauḍyāṇaṃ devakūṭamathāṣṭamam
83.33
bhūgṛhe ca dharādittu herukaṃ tripurāntakam
vetālamagnijihvaṃ ca kālāntakakapālinau
83.34
ekapādaṃ bhīmarūpaṃ malayaṃ hāṭakeśvaram
śakrādyānāyudhaiḥ sarvaiḥ svakhadittu sacarmayet
83.35
tadvahirdiṃttu vaṭukaṃ yoginīḥ cetrapālakam
gaṇeśaṃ vidiśāsu vai vahnan sūryaṃ śivaṃ tathā
83.35.p1
sarvabhūtān samabhyarcya pūjayedāyudhāṃstathā
83.36
bālā madhye vibhāvyādau kāmeśvarāṅgamadhyagām
83.37
makāraiḥ pañcabhiḥ kaulaḥ kaulācāraparāyaṇaḥ
saṃpūjayenmahādevi sādhako matrasādhakaḥ
83.38
bindau gandhākṣataiḥ puṣpairdhūpadīpāditarpaṇaiḥ
layāṅgamidamākhyātaṃ prayogāñ śṛṇu pārvati
83.36-2
yān vidhāya manuḥ śīghraṃ siddhibhāg bhavati dhruvam
stambhanaṃ mohanaṃ caiva māraṇākarṣaṇe tathā
83.40
vaśīkāraṃ tathoccāṭaṃ śāntikaṃ pauṣṭikaṃ tathā
etatsādhanamācakṣva sārabhūtaṃ manoḥ priye
83.41
adeyaṃ devyabhaktāya gopyaṃ guhyatamaṃ paśoḥ
(1) pratipaddivase devi snātvā kṛtvāhnikīṃ kriyām
83.42
madhyāhne nirjanaṃ gatvā yathāvadyutāvadhi
homo daśāṃśataḥ kāryo ghṛtapāyasabarhakaiḥ
83.43
saṃtarpya devatāḥ sadyaḥ stambhanaṃ jāyate dhruvam
rājakṣaryenduvātānāṃ dasyuvādimukheṣu ca
83.44
(2) darśe sāyaṃ śmaśāne tu japedulūkaviṣṭaraḥ
ayutaṃ taddaśāṃśena homaṃ sarpissurānvitaiḥ
83.45
karṇakesarapadmādyairmohanaṃ jagatāṃ bhavet
(3) bhūtākhye vāsare devi gatvā pretālayaṃ niśi
83.46
citāgre saṃjapedvidyāṃ vīrendraḥ ṣoḍaśākṣarīm
ayutaṃ ca hunenmantrī citāgnau ghṛtaguggulam
83.47
caṇḍālakeśasahitaṃ priyate ripurutkaṭaḥ
(4) aṣṭamyāṃ śuklapakṣe tu japedrahasi sādhakaḥ
83.48
ayutaṃ mūlavidyāyāḥ dhyātvā kāntāṃ manogatām
homo daśāṃśataḥ sarpirlājāpuṣpavatīrajaḥ
83.49
karīrapūlagodhūmaiḥ strīṇāmākarṣaṇaṃ bhavet
(5) navamyāṃ sādhakaḥ snātvā kṛtvā karmāhnikaṃ priye
83.50
ayutaṃ ghṛtamatsyāṇḍa-padmamukkeromabhiḥ
homo vidheyo variśai(?)rvāsavo dāsatāṃ vrajet
83.51
(6) caturthyāṃ kṛṣṇapakṣe tu japeccandrodaye śive
nadītīre manuṃ vīro'yutaṃ śīrṣāsanasthitaḥ
83.52
daśāṃśena hunettatra ghṛtanīlotpalatvacaḥ
lavaṅgamaricāmlādīn riporuccāṭanaṃ bhavet
83.53
(7) pañcamyāṃ niśi deveśi japedayutasaṃkhyayā
huned daśāṃśataḥ sarpirmatsyamatsyāṇḍakharparān
83.54
mahāmaya-mahābhīti-mahopadravaśāntaye
(8) mahāṣṭamyāṃ naraḥ snātvā pīṭhe śreṣṭhe daśādhikām
83.55
vīro daśāṅgasāhasrīṃ hunettatra daśāṃśataḥ
ghṛtakharjūramṛdvīkā-nāgavallīdalasajaḥ
83.56
chāgamāṃsaṃ saraktaṃ ca mahāpuṣṭiḥ prajāyate
idaṃ rahasyamākhyātaṃ sarvatattvanirūpaṇam
83.57
sarvasvaṃ mama deveśi rahasyaṃ gopayet kalau
sūryādivāreṣu japeddeśasāhasrasaṃkhyakaiḥ
83.58
sarvasiddhimavāpnoti nātra kāryā vicāraṇā
ityeṣa paṭalo divyaḥ snehāt tava prakāśitaḥ
gopyād gopyo gopyataro gopanīyaḥ svayonivat
83.58.p1
iti śrīrudrayāmale tantre bhairavabhairavīsaṃvāde śrībālātripurasundarīpaṭalaḥ || 1
Linked texts (5)
- Devīrahasya — Sanskrit
- Nāradapurāṇa — Vyāsa, Sanskrit
- Pūrvārddhadevirahasya — Sanskrit
- Devīrahasyapurāṇa — Sanskrit
- Nāradopapurāṇa — Sanskrit