Pramāṇa · Search · About · API

Devirahasya 99

Devīrahasya 99

Language
Sanskrit

Contents

99.1

śrīīśvaraḥ
atha vakṣyāmi te devi dhyānānāgamaniścitān
etāsāṃ devatānāṃ tvaṃ śṛṇu pārvati tattvataḥ

99.2

tatrādau daśavidyānāṃ dhyānaṃ vakṣyāmi tvaṃ śṛṇu
vāmakeśvara-tantroktaṃ tripurāyāḥ sureśvari

99.3

divyāmbarāṅkitatatanuṃ mihirāgnicandranetrāṃ sudhāṃśumukuṭāṃ himasannibhābhām
siṃhāsanāṃ paraśukhaḍgadharāṃ bhujābhyāṃ
brahmendraviṣṇunamitāṃ tripurāṃ bhaje'ham

99.4

atha vakṣye śriyo dhyānaṃ bhāṣitaṃ rudrayāmale
munisādhakagīrvāṇa—vipravargaiḥ¹ supūjitam

99.5

lakṣmīṃ padmāsanagatakaṭiṃ sūryaśītāṃśunetrāmudyadbhāsvatkanakarucibhiḥ padmaśaṅkhāsipāṇim
nānāmuktāmaṇisukalaśāṃ bhūṣitāṅgīṃ dvibāhuṃ
nityaṃ lokatritayaphaladāṃ naumyahaṃ bhaktipūrvam

99.6

atha vakṣyāmi vāgdevyā dhyānaṃ vidyāpradaṃ śive
tantramuktāvalau granthe durlabhe tridive'pi ca

99.7

vāṇīṃ pūrṇaniśākarojjvalamukhīṃ karpūrakundaprabhāṃ
candrārdhāṅkitamastakāṃ nijakaraiḥ saṃvibhratīmādarāt
vīṇāmakṣaguṇaṃ sudhāāḍhyakalaśaṃ vidyāṃ ca tuṅgastanīṃ
divyairābharaṇairvibhūṣitatanuṃ siṃhādhirūḍhāṃ bhaje

99.8

atha vakṣyāmi tārāyāṃ dhyānaṃ bhairavatantrake
devyā bhedavihīnāyā munisādhakapūjite

99.9

devīṃ pannagabhūṣitāṃ himaruciṃ śītāṃśuśaṅkhaprabhāṃ
muktāratnaparītakaeṭhavalayāṃ raktāmbaraṃ bibhratīm
śūlābjāsigadādharāṃ suragaṇairvaikuṇṭhamukhyaiḥ stutāṃ
nityaṃ lokatrayaikarakṣaṇaparāṃ tārāṃ trinetrāṃ bhaje

99.10

athāhaṃ bhuvaneśvaryā dhyānaṃ vakṣyāmi tacchṛṇu
sādhakeṣṭaprade granthe niḥsṛtaṃ rudrayāmale

99.11

udyadbhānusahasrasannibhamukhīṃ pīnastanīṃ padmagāṃ
dorbhiraṅkuśapāśapustakajapān saṃvibhratīṃ sādaram
brahmopendramaheśvarendramunibhirnityaṃ stutāṃ vandanaiḥ
stotrādyairbhuvaneśvarīṃ trinayanāṃ hṛtpaṅkeje'haṃ bhaje

99.12

atha vakṣyāmi mātaṅgyā dhyānaṃ parvatanandini
kubjikāsarvasve granthe mamāpyatyantadurlabhe

99.13

candrārdhāṅkitaśekharāṃ trinayanāṃ koṭīndusūryaprabhāṃ
nānāratnasahasrabaddharaśanāṃ pretāsane saṃsthitām
śaṅkhaṃ tomarapaṭṭisāñjayugalān dorbhirvahantīṃ mudā
dhyāye'haṃ hṛdaye sadā bhagavatīṃ mātaṅginīṃ hāriṇīm

99.14

atha vakṣye maheśāni śārikādhyānamuttamam
āgamāmṛtamañjaryāṃ niḥsṛtaṃ durlabhaṃ janaiḥ

99.15

śrīśaṅkhacakramusalāmbujayugmahastāṃ
nāgendrahāravalayāṅkitakaṇṭhamālām
sindūrakuṅkumasahasramarīcidīptāṃ
śrīśārikāṃ trinayanāṃ hṛdaye smarāmi

99.16

atha vakṣyāmi deveśi rājñīdhyānamanuttamam
vāmakeśvaratantroktaṃ parvateśvaranandini

99.17

śītāṃśubālārkakṛśānunetrāṃ
caturbhujāmekhalagāsanasthām
śaṅkhābjaśūlāsidharāṃ maheśīṃ
rājñīṃ bhaje'haṃ tuhinādrirūpām

99.18

atha vakṣyāmi bhīḍāyā dhyānamicchāphalapradam
niḥsṛtamāgamoddyote mayā viracite svayam

99.19

udyacchītāṃśuraśmidyuticayasadṛśīṃ phullapadmopaviṣṭāṃ
vīṇānāgendraśaṅkhāyudhaparaśudharāṃ dorbhirīḍyaiścaturbhiḥ
muktāhārāṃśunānāmaṇiyutahṛdayāṃ śīdhupātraṃ vahantīṃ
vande bhīḍāṃ bhavānīṃ prahasitavadanāṃ sādhakeṣṭapradātrīm

99.20

atha vakṣyāmi deveśi jvālāmukhyā anuttamam
dhyānaṃ mayā viracite granthe jvālāśiromaṇau

99.21

jvālāparītāśyaśiroruhāṃ tāṃ
sarojaśaṅkhāsigadādharāṃ ca
siṃhāsanasthāpitapādayugmāṃ
jvālāmukhīṃ saddhṛdaye smarāmi

99.22

athāhaṃ bhadrakālyāśca dhyānaṃ vakṣyāmi niḥsṛtam
svayaṃ mayā viracite tantre vai vāmakeśvare

99.23

muṇḍaṃ viśvasya kartuḥ karakamalatale dhārayantīṃ hasantīṃ
nāhaṃ tṛṣā vadantīṃ sakalajanamidaṃ bhakṣayantīṃ sadaiva
śyāmāṃ viṣṇuṃ girīśaṃ bhujanivahabalāṛulaprotaṃ vahantīṃ
dhyāye'haṃ bhadrakāḷīṃ navajaladanibhāṃ pretamadhyāsanasthām

99.24

turīdhyānamahaṃ vakṣye niḥsṛtamāgamāmṛte
asminśvarācare khyāte brahmaṇaiva prakāśite

99.25

nānāratnanibaddhacandraśakalāṃ maulau jaṭābhirvṛte
pāśāmbhojadharāṃ himāṃśudhavalāṃ dobhryāṃ dvibāhuṃ śivām
sūryendugnivilocanāṃ smitamukhīṃ pretāsane saṃsthitāṃ
brahmopendramaheśvaraiśca namitāṃ devīṃ bhaje'haṃ turīm

99.26

athāhaṃ³ chinnamastāyā dhyānaṃ vakṣyāmi niḥsṛtam
svakṛte tripurāyāśca granthe devi śiromaṇau

99.27

eṇāṅkāṃśuparītabhālaphalakāṃ bālārkakoṭiprabhāṃ
jvālābaddhamahārgharatnanicayāṃ kandarpadarpojjvalām
śūlā'syakuśapāśaveṇumusalāmbhojābhayān bibhratīṃ
bhakteṣṭāṃ chinnamastakāṃ bhagavatīṃ dhyāye hṛdabje sadā

99.28

dakṣiṇākālikāyāśca dhyānaṃ vakṣyāmi niḥsṛtam
granthe kālīrahasye'smin parvateśvaranandini

99.26-2

brahmopendraśivā'smimuṇḍaraśanāṃ tāmbūlaraktādharāṃ
varṣāmeghanibhāṃ triśūlamusale padmāsipāśāṅkuśān
śaṅkhaṃ sāhiyugaṃ varaṃ daśabhujaiḥ saṃvibhratīṃ pretagāṃ
devīṃ dakṣiṇakālikāṃ bhagavatīṃ raktāmbarāṃ tāṃ smare

99.30

atha vakṣyāmi śyāmāyā dhyānaṃ parvatanandini
śyāmātantre mayākhyātaṃ sakalāgamasāgare

99.31

trailokyapūjitapadāmburuhadvayāṃ tāṃ
kṛṣṇāmbubhṛtsadṛśarūpadharāṃ trinetrām
śūlāsiśaṅkhamahatīśca bhujairvahantīṃ
śyāmāṃ bhaje śavaśarīrakṛtāsanasthām

99.32

athāhaṃ kālarātryāste dhyānaṃ vakṣyāmi niḥsṛtam
mayā viracite devi tantre vai vāmakeśvare

99.33

śūlābjapāśāṅkuśapadmahastāṃ
caturbhujāṃ dhūmranibhāṃ trinetrām
siṃhāsanasthāṃ dhṛtapītavastrāṃ
dhyāye maheśīṃ hṛdi kālarātrīm

99.34

nānābharaṇasaṃyukte devi vakṣyāmi tvaṃ śṛṇu
śrīvajrayoginīdhyānaṃ niḥsṛtaṃ kulikārṇave

99.35

indragnisūryanayanāṃ pāśāṅkuśadharāṃ śivām
dvibhujāṃ siṃhamadhyasthāṃ bhaje'haṃ vajrayoginīm

99.36

atha vakṣyāmi vārāhyā dhyānaṃ tantraviniścitam
yathābhīṣṭapradaṃ devi kulacūḍāmaṇau priye

99.37

candrārdhacūḍāṃ dvibhujāṃ bhujābhyāṃ
śūlāṅkuśau śyāmamukhīṃ vahantīm
sūryāgnicandrīkṛtanetrapadmāṃ
dhyāye hṛdabje vimalāṃ varāhīm

99.38

atha vakṣyāmi deveśi śāradādhyānamuttamam
śāradāpaṭale granthe racite'pi mayā svayam

99.36-2

ṣaḍbhujāṃ trinayanāṃ smitānanāṃ
śāiṣḍalyarṣinutapādapaṅkajām
parvatasthitavatīṃ dhṛtaśūlāṃ
śāradāṃ bhagavatīṃ hṛdi dhyāye

99.40

atha vakṣyāmi deveśi tvaṃ śṛṇu dhyānamuttamam
kāmeśvaryāstripurāyā: sarvasve tantrakottame

99.41

trilocanāṃ sūryasahasraśobhāṃ
siṃhāsanasthāṃ dvibhujāṃ dhṛtāsim
pītāmbarāṃ viṣṇumaheśasevyāṃ
kāmeśvarīṃ tāṃ hṛdaye smarāmi

99.42

atha vakṣyāmi gauryāste dhyānaṃ bhairavatantrake
granthe mayā viracite parvateśvaranandini

99.43

gaurāṅgīṃ dhṛtapaṅkajāṃ trinayanāṃ śvetāmbarāṃ siṃhagāṃ
candrodbhāsitaśekharāṃ smitamukhīṃ dorbhyāṃ vahantīṃ gadām
viṣṇubrahmendracandrāmbujayoniśambhutridaśaiḥ saṃpūjitāṅghridvayāṃ
gaurīṃ mānasapaṅkaje bhagavatīṃ bhakteṣṭadāṃ tāṃ bhaje

99.44

athāhamannapūrṇāyā dhyānaṃ vakṣyāmi tvaṃ śṛṇu
niḥsṛtaṃ bhairavītantre mayā devi prakāśite

99.45

candrārdhamauliṃ dvibhujāṃ trinetrāṃ
śūlābjamāle' dvibhuje vahantīm
eṇāsanasthāṃ bhujagopavītāṃ
tāmannapūrṇāṃ hṛdaye smarāmi

99.46

kulavāgīśvarīdhyānaṃ vakṣyāmi tvaṃ śṛṇu priye
āgamāmṛtamajjyāṃ durlabhāyāṃ mamāpi ca

99.47

triśūlāsidharāṃ dorbhyāṃ raktāṅgāṃ vahnisannibhām
jyatvāṃ siṃhāsanagatāṃ kulatvāgīśvarīṃ bhaje

99.48

atha vakṣye gaṇeśasya dhyānaṃ gīrvāṇapūjite
āgamāmṛtapīyūṣe durlabhe bhuvane'mbike

99.49

dvicaturdaśavarṣabhūṣitāṅgaṃ
musalāmbhojadharoragopavītam
dvimṛgādhipagāminaṃ trinetraṃ
śivaputraṃ dviradānanaṃ bhaje'ham

99.50

atha dhyānaṃ kumārasya vakṣyāmi śṛṇu pārvati
niḥsṛtamāgamoddyote mayā viracite svayam

99.51

himādrigauraṃ dvibhujaṃ bhujaṅgaiḥ
parītagātraṃ śikhiviṣṭarastham
nagendrakanyāpriyaputramādyaṃ
hṛdi smare'bhīṣṭapradaṃ kumāram

99.52

haihayasya bravīmyevaṃ dhyānaṃ tava kutūhalāt
yathābhīṣṭapradaṃ nṛṇāmuḍḍāmaraviniścitam

99.53

sahasrabhujamaṇḍalījitatamīcareśādhipaṃ
himāṃśusadṛśānanaṃ dhṛtasahasratūṇīrakam
sitāmbaradharaṃ sadā turagarājamadhyasthitaṃ
smarāmi bhuvanādhipaṃ hṛdi tu kārtavīryārjunam

99.54

atha vakṣyāmi deveśi dhyānaṃ tasya viniḥsṛtam
mṛtyuñjayasya devasya granthe kuñjāśiromaṇau

99.55

candrodbhāsitamūrdhajaṃ surapatiṃ pīyūṣapātraṃ bṛhad
hastābjena sudhāṃśukoṭivimalaṃ hemasthapaṅkeruham
sūryāgnīnduvilocanaṃ karatalaiḥ pāśācandratrāṅkuśāmbhojānbibhratamadbhayaṃ paśupatiṃ mṛtyuñjayaṃ taṃ smare

99.56

sugrīvasyātha vakṣye'haṃ dhyānaṃ parvatanandini
kulacūḍāmaṇau granthe nirmite mantrasāgare

99.57

bālaṃ ṣoḍaśahāyanaṃ kapipatiṃ vahniprabhābhāsvaraṃ
dorbhirvṛcagadādhanuḥśaracayān saṃbibhrataṃ cādarāt²
sītāmārgaṇasakkavānarabalairārādhyamānaṃ bhaje
kākutsthaṃ bhajamānamarkatanayaṃ sugrīvadevaṃ hṛdi

99.58

athāhaṃ te hanumato dhyānaṃ vakṣyāmi niḥsṛtam
kulacūḍāmaṇau granthe parvateśvaranandini

99.59

rāmeṣṭamitraṃ jagadekavīraṃ
navajvarājendrakṛtapraṇāmam
sumeruśṛṅgābhamacintyamādyaṃ
hṛdi smare'haṃ hanumantamīḍyam

99.60

atha te bhairavasyāhaṃ dhyānaṃ vakṣyāmi pārvati
niḥsṛtaṃ bhairave tantre yathābhīṣṭaphalapradam

99.61

kapālahastaṃ bhujagopavītaṃ
kṛṣṇājinacchaviṃ daṇḍadharaṃ trinetram
acintyamādyaṃ madhupānasaktaṃ
hṛdi smare bhairavamiṣṭadaṃ tam

99.62

atha vakṣyāmi sūryasya dhyānaṃ tatraviniścitam
tripurāsarvasve granthe dakṣiṇāmūrtinā kṛte

99.63

pratyakcadevaṃ viśadaṃ sahasramarīcibhiḥ śobhitabhūmideśam
saptāśvagaṃ saddhvajahastamādyaṃ
devaṃ bhaje'haṃ mihiraṃ hṛdabje

99.64

atha vakṣyāmi saumyasya dhyānaṃ bhairavatantrake
yathābhīṣṭapradaṃ satyaṃ surāsuranamaskṛte

99.65

somātmajaṃ haṃsagataṃ dvibāhuṃ
śaṅkhendurūpaṃ hyasipāśahastam
dayānidhiṃ bhūṣaṇabhūṣitāṅgaṃ
budhaṃ smare mānasapaṅkaje'ham

99.66

atha vakṣyāmi śukrasya dhyānaṃ tantraviniścitam
kubjikāsarvasve granthe brahmaṇaiva prakāśite

99.67

santaptakāścananibhaṃ dvibhujaṃ dayāluṃ
pītāmbaraṃ dhṛtasaroruhadandvaśūlam
kauśvāsanaṃ hyasurasevitapādapadmaṃ
śukraṃ smare dvinayanaṃ hṛdi paṅkaje'ham

99.68

atha vakṣyāmi jīvasya śṛṇu pārvati tattvataḥ
dhyānaṃ bhairavatantroktaṃ sakalārthapradaṃ nṛṇām

99.68-2

tejomayaṃ śaktitriśūlahastaṃ
surendrajyeṣṭhaiḥ stutapādapadmam
medhānidhiṃ hastiṃgataṃ dvibāhuṃ
guruṃ smare mānasapaṅkaje'ham

99.70

atha vakṣyāmi candrasya dhyānaṃ devi śṛṇu priye
niḥsṛtamāgamoddyote nānādhyānasaritpatau

99.71

śaṅkhaprabhameṇapriyaṃ śaśāṅkamīśānamaulisthitamīḍyavṛttam
tamīpatiṃ nīrejayugmahastaṃ
dhyāye hṛdabje śaśinaṃ graheśam

99.72

atha vakṣyāmi bhaumasya dhyānaṃ tatraviniścitam
āgamāmṛtamañjaryāṃ śṛṇuṣvaikamanāḥ priye

99.73

prataptagāṅgeyanibhaṃ graheśaṃ
siṃhāsanasthaṃ kamalāsihastam
surāsuraiḥ pūjitapādapadmaṃ
bhaumaṃ dayāluṃ hṛdaye smarāmi

99.74

atha vakṣye śanerdhyānaṃ yathābhīṣṭaphalapradam
niḥsṛtaṃ ca maheśāni śubhadamāgamāmṛte

99.75

nīlāñjanābhaṃ mihireṣṭaputraṃ
graheśvaraṃ pāśabhujaṅgapāṇim
surāsurāṇāṃ bhayadaṃ dvibāhuṃ
śaniṃ smare mānasapaṅkaje'ham

99.76

athāhaṃ saiṃhikeyasya dhyānaṃ vakṣyāmi tvaṃ śṛṇu
niḥsṛtaṃ phaladaṃ nṝṇāṃ tatra vai vāmakeśvare

99.77

śītāṃśumitrāntakamīḍyarūpaṃ
ghoraṃ ca vaiḍūryanibhaṃ vibāhum
trailokyarakṣāparamiṣṭadaṃ ca
rāhuṃ grahendraṃ hṛdaye smarāmi

99.78

atha vakṣyāmi ketośca dhyānamāgamamaniścitam
niḥsṛtamāgamoddyote granthe vai tantrasāgare

99.79

lāṅgūlayuktaṃ bhayadaṃ janānāṃ
kṛṣṇāmbubhṛtsannibhamekavīram
kṛṣṇāmbaraṃ śaktitriśūlahastaṃ
ketuṃ bhaje mānasapaṅkaje'ham

99.80

atha vakṣyāmi deveśi bhavānīdhyānamuttamam
kulacūḍāmaṇau granthe niḥsṛtaṃ bhuvaneśvari

99.81

ariśaṅkhakṛpāṇakheṭavāṇān
sadhanuḥśūlakatarjanīrdadhānām
bhayadāṃ mahiṣottamāṅgasaṃsthāṃ
navadūrvāsadṛśīṃ bhaje bhavānīm

99.82

athāhaṃ bagalāmukhyā dhyānaṃ vakṣyāmi niḥsṛtam
āgamāmṛtamañjaryāṃ surāsuranamaskṛte

99.83

nānāratnanibaddharamyamukuṭāṃ pītāmbarāṃ bhāgyadām
dharmāṃśavagniśaśāṅkaraśminayanāṃ siṃhāsanasthāṃ śivām
sacaeḍīśaratāṃ³ mahārghamaṇibhirudrāsitāṅgīṃ sadā
devīṃ śrībagalāmukhīṃ hṛdi bhaje bhakteṣṭadāṃ muktidām

99.84

atha vakṣye śṛṇoṣi tvamindrājñīdhyānamuttamam
niḥsṛtaṃ jagadīśāni granthe vai rudrayāmale

99.85

mālāsyaṅkuśapāśayugmakadharāṃ catuḥsahasrāṅkitā'
mattairāvaṇapṛṣṭhagāṃ śaśimukhīṃ trailokyaratnāparām
dorbhirgānaratāṃ sphuṭāmbujanibhāṃ brahmādidevaiḥ stutāmindrādyīṃ janamātaraṃ hṛdi bhaje kāruṇyarūpāṃ parām

99.86

atha vakṣye maheśāni khecarīdhyānamuttamam
yāṃ dhyātvā khecarīṃ yogī jīvanmukto bhavet kalau
granthe bhairavatantrākhye niḥsṛtaṃ tridaśārcite

99.87

vinindrakamalotpalairmunibhirarcitāṅghidvayāṃ
sitāṃ sitakarāmbujāṃ sitakarojjvalacchekharām
ravīnduśikhilocanāmabhayapustakau bibhratīṃ
smarāmi hṛdi khecarīṃ bhuvanamātaraṃ siddhidām

99.88

etāsāṃ devadeveśi mantradhyānacayaṃ smṛtam
yasya kasya na dātavyaṃ granthamudrārakośakam

99.89

ṛṣaya ūcuḥ
dhanyaḥ sa yasya putrastvaṃ sakalāgamapāragaḥ
jaya tvaṃ svagṛhaṃ gantumājñāpayitumarhasi

99.60-2

dakṣiṇāmūrtiḥ
gacchadhvaṃ munayaḥ sarve tvamadhvaṃ kṛpayā mama
ityuktvā munayo jagmuḥ svagṛhaṃ mantralālasāḥ

99.61-2

śrīīśvara uvāca
dakṣiṇāmūrtinā tena dṛṣṭvā tatrānmanoramān
kṛtamudrārakośākhyaṃ granthaṃ gopyatamaṃ kuru

99.62-2

śrīdevyuvāca
krītāsi bhavatānena granthenāhaṃ sureśvara
ityuktvā sumahākuñjaṃ kailāsādreśca jagmatuḥ
ubhau tāvambikā devī devaśca candraśekharaḥ

99.62-2.p1

iti śrīdakṣiṇāmūrtimuniviracite uddhārakośe sarvāgamasāre ṣoḍaśadevī-ṣaṭdevī-ṣaṭkumāra-navagrahatridevī-khecarīdhyānakośanirūpaṇaṃ saptamaḥ kalpaḥ

Linked texts (9)