Pramāṇa · Search · About · API

Devirahasyatantra 14

Devīrahasyatantra 14

Language
Sanskrit

Contents

14.1

śrībhairava uvāca
śrṛṇu devi pravakṣyāmi rahasyaṃ sarvakāmikam
yantradhāraṇapūjāyā vidhiṃ sādhāraṇaṃ param

14.2

vinā varma vinā nāmnāṃ sahasrakaṃ maheśvari
na siddhiḥ sādhakasyāsti bhairavasyāpi pārvati

14.3

yaḥ sādhako japed vidyāṃ yantradhāraṇavarjitaḥ
sā vidyā koṭijaptāpi tasya niṣphalatāṃ vrajet

14.4

śubhe'hni śubhanakṣatre śubhavāre maheśvari
brāhme muhūrte utthāya snātvā dhyātvā guruṃ nijam

14.5

saśivāṃ devatāṃ dhyātvā rahaḥsthāne sudhūpite
gandhāṣṭakena vilikhed yantraṃ mūlena veṣṭitam

14.6

tadbāhye kavacaṃ divyaṃ tathā nāmasahasrakam
likhet kanakalekhanyā bhūrjapatre suśobhane

14.7

ganthāṣṭakanirūpaṇam
ganthāṣṭakaṃ pravakṣyāmi rahasyaṃ paramaṃ priye
avācyaṃ devabhaktāya paraśiṣyāya sarvathā

14.8

svayambhūkusumaṃ kuṇḍagolotthaṃ rocanāguru
karpūraṃ mṛganābhiśca madyaṃ ca malayodbhavam

14.9

aparaṃ te pravakṣyāmi siddhidaṃ ganthasādhanam
vaiṣṇāvānāṃ ca śaivānāṃ śāktānāṃ ca śubhāvaham

14.10

kāśmīra-gorocana-pūgakādi-kuraṅganābhīja-sarudra-mūrvāḥ
pūtāsakaṃ candanamiśrametad ganthāṣṭakaṃ bhairavabhairavīṣṭam

14.11

yantralekhanaprakāraḥ
gandhāṣṭakaṃ svamūlena niyojya kulasādhakaḥ
nyāsamṛṣyādikaṃ kṛtvā dhyāyed devīṃ śivāṅkagām

14.12

likhedyantraṃ nijaṃ divyaṃ tadbāhye mūlamantrataḥ
mātṛkāṃ vilikhenmantrī tadbāhye kavacaṃ likhet

14.13

tathā nāmasahasraṃ ca likhitvā bhūrjapatrake
veṣṭayet śvetasūtreṇa pītanīlakrameṇa ca

14.14

nijeṣṭadevīdhyānābha-varṇena parameśvari
lākṣayā pariveṣṭayātha suvarṇenātha veṣṭayet

14.15

tataḥ parāṃ guṭīṃ divyāṃ devīrūpāṃ vicintya ca
yantradhāraṇa-yantrasya bindau saṃsthāpayecchive

14.16

yantradhāraṇa-yantraṃ te vakṣye sādhakapūjite
kaulikānāṃ hitārthāya gopanīyaṃ viśeṣataḥ

14.17

bindutrikoṇaṃ ṣaṭkoṇaṃ ṣaḍdalaṃ vasupatrakam
trivṛttaṃ ca dharāsadma yantradhāraṇa-yantrakam

14.18

yantrapūjanaprakāra:
sindūreṇa likhed devi layāṅgaṃ pūjayecchive
yasya pūjanamātreṇa mantrī bhairavatāṃ vrajet

14.19

gaṇeśaṃ dharmarājaṃ ca varuṇaṃ ca kuberakam
caturdvariṣu sampūjyāścatvāro dvārapālakāḥ

14.20

asitāṅgaṃ ca kālāgniṃ saṃhāraṃ rurubhairavam
karālaṃ vikarālaṃ ca supteśonmattabhairavau

14.21

aṣṭapatreṣu sampūjya bhairavānaṣṭa pārvati
durgāṃ caṇḍīṃ ca sumukhīṃ śivādūtīṃ śivāṃ jayām

14.22

bahiḥ ṣaṭkoṇake pūjyāścaitā mūlena sādhakaiḥ
tārāṃ ca tāriṇīṃ turyāṃ bagalāṃ vijayāṃ tathā

14.23

chinnamastāṃ ṣaḍaśreṣu pūjayet sādhakottamaḥ
bhavānī kubjikā gaurī tryaśre pūjyā maheśvari

14.24

bindau svadevatāmiṣṭāṃ saśivāṃ kaulikottamaḥ
gandhākṣataprasūnaiśca dhūpadīpāditarpaṇaiḥ

14.25

naivedyācamanīyādyaistāmbūlaiśca suvāsitaiḥ
tatra bindau mahādevi yathāvibhavamātmanaḥ

14.26

sauvarṇaṃ rājataṃ muktāmaṇitāmrādipūrvakam
devatāprītaye dadyād dakṣiṇāṃ gurave'pi ca

14.27

tatra svayaṃ guṭīṃ divyāṃ devīrūpāṃ kuleśvari
pañcāmṛtaiḥ pañcagavyaiḥ snāpayet sādhakottamaḥ

14.28

saṃsthāpya guṭikāṃ mantrī bindau saṃsthāpayettataḥ
prāṇān dattvā''vāhanādimudrā mantrī pradarśayet

14.29

pādyārghyamadhuparkādi sarvaṃ tatra nivedayet
cintayed devatārūpāṃ pūjayed yantrarājavat

14.30

sampūjya guṭikāṃ divyāṃ tadagre sādhako japet
mūlamantraṃ yathāśaktyā mālayā karamālayā

14.31

paṭhettatraiva kavacaṃ mantranāmasahasrakam
stotraṃ mantramayaṃ devi mantricakraṃ prapūjayet

14.32

taiḥ samaṃ sādhakaiḥ kuryāt pātravandanamīśvari
tān santarpya sudhīrbhaktyā dhārayed devatāṃ hṛdi

14.33

visṛjya saśivāṃ devīṃ namet saṃhāramudrayā
dhārayenmūrdhni vā bāhau guṭikāṃ varadāyinīm

14.34

yantradhāraṇaphalam
ya evaṃ dhārayed yantraṃ japenmantraṃ sa sādhakaḥ
sākṣād bhavabhayonmukto bhaved bhairavasannibhaḥ

14.35

japasiddhirbhavettasya ya evaṃ dhārayed guṭīm
bahunoktena kiṃ devi sa bhaved bhairavaḥ svayam

14.36

idaṃ tattvatamaṃ divyaṃ sarvasvaṃ paramārthadam
sārāt sārataraṃ gopyaṃ gopanīyaṃ mumukṣubhiḥ

14.36.p1

iti śrīrudrayāmale tantre śrīdevīrahasye yantradhāraṇavidhinirūpaṇaṃ nāma trayodaśaḥ paṭalaḥ||13

Linked texts (6)