Devirahasyatantra 15: atha caturdaśaḥ paṭalaḥ
Devīrahasyatantra 15
- Language
- Sanskrit
Contents
- 15.19 — 1 part
atha caturdaśaḥ paṭalaḥ
15.1
ṛṣyādivinirṇayaḥ
mantreṣu ṛṣyādivinirṇayaprastāvaḥ
śrīdevyuvāca
bhagavan śrotumicchāmi cchandomunivinirṇayam
tathā devīśvarādīnāṃ devatābījanirṇayam
15.2
śaktikīlakadigbanthanirṇayaṃ parameśvara
vaktumarhasi me deva yadyasti mayi te dayā
15.3
ṛṣivinirṇayaḥ
śrībhairava uvāca
etad guhyatamaṃ devi devānāṃ sāramuttamam
devīnāmādidevānāṃ mantrāṇāṃ me rahasyakam
15.4
vakṣyāmi tava bhaktyāhamṛṣicchandovinirṇayam
devānāṃ mantrarājasya devīnāṃ vā tathaiva ca
15.5
ṣaṣṭikalpasahastrāṇi yenaiva vihito japaḥ
tathābdaṣaṣṭilakṣāṇi ṣaṣṭijanmāntareṣu ca
15.6
puraścaryākaro devi sarṣirityabhidhīyate
ṛṣihīno bhavenmantro japto janmāntareṣu ca
15.7
pratyavāyakaro loke sādhakānāṃ maheśvari
yadā mantro mayā vaktrānmahādevi bahiṣkṛtaḥ
15.8
chandovinirṇayaḥ
veṣṭito yena tejasvī tacchanda iti gīyate
chandāṃsi vividhānyeṣāṃ mantrāṇāṃ parameśvari
15.9
chandohīno bhavenmantro nagno martya iva priye
devatāvinirṇayaḥ
yadā japto manurdevi mayā paramabhaktitaḥ
15.10
prādurbabhūva me sadyo yā sā prokteti devatā
bījavinirṇayaḥ
mantrarājasya devīnāṃ yenotpattirmayā kṛtā
15.11
tadbījamiti mantrāṇāṃ varṇyate parameśvari
bījahīno bhavenmantraḥ siddhihānikaraḥ śive
15.12
bījahīnaṃ jagaddhīnaṃ jalahīno nado yathā
śaktivinirṇayaḥ
japānte jagadutpattisthitisaṃhārikī matiḥ
15.13
jātā me yena deveśi sā śaktiriti gīyate
śaktihīno mahādevi mantro vighnakaro mataḥ
15.14
kīlakavinirṇayaḥ
mahāmāṅgalyado mantro devīnāṃ śaktibījataḥ
japtvā stutvā mahādevi punaryena sa gopitaḥ
15.15
nistejaskaḥ punarjātaḥ kīlakaṃ tadudāhṛtam
digbandhanavinirṇayaḥ
niṣkīlitaṃ japānte ca manumaśraddhayā śive
15.16
tyaktvā sādhakarājasya siddhiṃ harati bhairavaḥ
japakāle mahādevi rākṣasā bhūtapretakāḥ
15.17
diśo daśa palāyante yena digbandhanaṃ ca tat
digbandhena vinā devi japaḥ pāṭho'pi vā tathā
15.18
niṣphalo vighnakṛnnityaṃ tena digbandhanaṃ caret
etairvihīno mantro'sti niṣphalo vighnakārakaḥ
15.19
mamāpi devi kiṃ vakṣye punaḥ kṣudreṣu jantuṣu
ityeṣa paṭalo guhyaśchandasāṃ parameśvari
gopanīyo mahāvīrairityājñā pārameśvarī
15.19.p1
iti śrīrudrayāmale tantre śrīdevīrahasye ṛṣyādi-nirūpaṇaṃ nāma caturdaśaḥ paṭalaḥ ||14
Linked texts (4)
- Devīrahasya — Sanskrit
- Pūrvārddhadevirahasya — Sanskrit
- Devīrahasya — Sanskrit
- Devīrahasyapurāṇa — Sanskrit