Devirahasyatantra 17: atha ṣoḍaśaḥ paṭalaḥ
Devīrahasyatantra 17
- Language
- Sanskrit
Contents
- 17.37 — 1 part
atha ṣoḍaśaḥ paṭalaḥ
17.1
śmaśānārcanapaddhatiḥ
śmaśānapūjāpaddhatiḥ
śrībhairava uvāca
athāhaṃ pūjanasyāsya vakṣye paddhatimādarāt
gadyapadyamayīṃ devi mantrasiddhipradāyinīm
17.2
rātriśeṣe samutthāya sādhako vihitāhnikaḥ
śmaśānārcanasambharaṃ samādāya ca sānugaḥ
17.3
savīro vīrabhūmiṃ tu vrajedrātrimukhe priye
tatra devi vidhiṃ vakṣye śṛṇu pārvati sādaram
17.4
guhyaṃ sāratamaṃ gopyaṃ nākhyeyaṃ siddhivāñchakaiḥ
tatra rātrimukhe savīraḥ śmaśānaṃ gatvā saptapadāntāṃ bhūmimutsṛjya śmaśānavelāṃ nollaṅghayet| tatra sambhāraṃ saṃsthāpya svahastapādau prakṣālya trirācamya prāṇāyāmatrayaṃ mūlena vidhāyā pūrvavadācamya svamūlaṛṣicchando-nyāsaṃ kṛtvā karāṅganyāsau kṛtvā mūlamaṣṭottaraśataṃ japet| yathāśakti japtvā devīṃ saśivāṃ svaguruṃ dhyātvā, kavaca-sahasranāma-stavān paṭhan velāṃ saptapadamātrāmullaṅghya, śamaśānamaṇḍalaṃ pradakṣiṇīkṛtya praviśya citāṃ praṇamet
jvālākarālavadane kalpāntadahanapriye
prāṇiprāṇālayodbhūte cite me'nugrahaṃ kuru
17.5
iti natvā, yathāvāraṃ praśasതാpraśastān bhūtabhairavān sammukhapṛṣṭhayordhṛtvā pūjāmārabhet
śrīdevī uvāca
bhagavan bhairavān bhūtān śāpānugrahakārakān
kathaṃ sandhārayen mantrī tatra sammukhapṛṣṭhayoḥ
17.6
śrībhairava uvāca
etad devi paraṃ guhyaṃ bhūtabhairavasādhanam
vakṣyāmi tava bhatkyāhaṃ na cākhyeyaṃ durātmane
17.7
vārakrameṇa bhūtabhairavasādhanam
bhūto ravau pūrvagato mahograścitrāṅgado'pyuttarago himāṃśau
caṇḍastatheśānagato mahīje bhāsvān budhe bhairava eva vāyau
17.8
lolākṣako vahnigataḥ surejye bhūteśvaro dakṣiṇago'surejye
karālako nirṛtigo'pimande ravau punaḥ paścimago'pi bhīmaḥ
17.9
evaṃ bhramante satataṃ maheśi digbhairavā bhūtagaṇāḥ śmaśāne
sudhāṃśuvṛddhau śaśihīnapakṣe tadvaiparītyena śive bhramanti
17.10
śrīdevyuvāca
deveśa karuṇāsāndra sādhakeśa jagatpate
jñāyate bhīmakarmedaṃ hadi sādhakasattamāḥ
17.11
mahograbhīmayoḥ pūjāṃ pakṣayorbhīmasaumyayoḥ
kathaṃ deva kariṣyanti dvayorbhāskaravārayoḥ
17.12
śrībhairava uvāca
paurṇamāsyāṃ śive dṛṣṭvā grahavāraṃ tato'ṣṭadhā
ravivāraṃ ca saṅgṛṇya prathamaṃ vā dvitīyakam
17.13
prathame ravivāre tu mahograṃ pūrvagaṃ yajet
dvitīye paścime bhīmaṃ pūjayecchuklapakṣake
17.14
kṛṣṇapakṣe'rcayed bhūtān viparītakrameṇa tu
adhunaiṣāṃ pravakṣyāmi pūjāsāraṃ maheśvari
17.15
śmaśānakālikāpūjāmantraḥ:
avācyaṃ paraśiṣyāya kucailāya durātmane
śmaśānapūjāmantrasya mahākāla ṛṣiḥ smṛtaḥ
17.16
viniyoga:
uṣṇik chanda iti khyātaṃ devī śmaśānakālikā
parā bījaṃ taṭaṃ śaktiḥ kālī kīlakamīritam
17.16-2
dharmārthakāmamokṣeṣu viniyoga: prakīrtita:
asya śrīśmaśānakālikāpūjāmantrasya mahākālabhairava ṛṣiḥ, uṣṇik chandaḥ, śrīśmaśānakālikā devatā, hrīṃ bījaṃ, hūṃ śaktiḥ, krīṃ kīlakaṃ, dharmārthakāmamokṣārthe pūjāyāṃ viniyogaḥ
viniyoga—asya śrīśmaśānakālikāpūjāmantrasya mahākālabhairavaṛṣiḥ uṣṇik chandaḥ śrīśmaśānakālikā devatā hrīṃ bījaṃ hūṃ śaktiḥ krīṃ kīlakaṃ dharmārthakāma mokṣeṣu viniyogaḥ
17.17
śmaśānakālikāpūjākramaḥ
mahākālabhairava ṛṣaye namaḥ śirasi, uṣṇikchandase namo mukhe,
śmaśānakālikādevatāyai namo hṛdi, hrīṃ bījāya namo nābhau, hūṃ śaktyai
namo guhye, krīṃ kīlakāya namaḥ pādayoḥ, viniyogāya namaḥ sarvāṅgeṣu| oṃ
krāṃ hṛdayāya namaḥ| oṃ krīṃ śirase svāhā ityādi karāṅganyāsaḥ| evaṃ ṣaḍaṅgaṃ vidhāyāsanaṃ śodhayet| oṃ āṃ āsanaśodhanamantrasya merupṛṣṭha ṛṣiḥ, sutalaṃ chandaḥ, kūrmo devatā, āsanaśodhane viniyogaḥ| prīṃ pṛthvyai namaḥ
mahi tvayā dhṛtā lokā devi tvaṃ viṣṇunā dhṛtā
tvaṃ ca dhāraya māṃ devi pavitraṃ kuru cāsanam
ṛṣyādi nyāsa—mahākālabhairavāya namaḥ śirasi| uṣṇik chandase namaḥ mukhe| śmaśānakālikā devatāyai namaḥ hṛdi| hīṃ bījāya namaḥ nābhau| hūṃ śaktaye namaḥ guhye| krīṃ kīlakāya namaḥ pādayoḥ| viniyogāya namaḥ sarvāṅgeṣu
hṛdayādi nyāsa—oṃ krīṃ hṛdayāya namaḥ| oṃ krīṃ śirase svāhā| oṃ krūṃ śikhāyai vaṣaṭ| oṃ kraiṃ kavacāya hūṃ| oṃ krauṃ netratrayāya vauṣaṭ| oṃ kraḥ astrāya phaṭ
karanyāsa—oṃ krāṃ aṃguṣṭhābhyāṃ namaḥ| oṃ krīṃ tarjanībhyāṃ svāhā| oṃ krūṃ madhyamābhyāṃ vaṣaṭ| oṃ kraiṃ anāmikābhyāṃ hūṃ| oṃ krauṃ kaniṣṭhābhyāṃ vauṣaṭ| oṃ kraḥ karatalakarapṛṣṭhābhyāṃ phaṭ
mahi tvayā dhṛtā lokā devitvaṃ viṣṇunā dhṛtā
tvaṃ ca dhāraya māṃ devi pavitraṃ kuru cāsanam
oṃ krāṃ ādhāraśaktikamalāsanāya namaḥ| anantāya namaḥ| padmāya namaḥ| padmanālāya namaḥ| tatropaviśya tālatrayaṃ dadyāt| 'apasarpantu te bhūtāḥ' ityādinā tālatrayaṃ dattvā nārācamudrāṃ pradarśayet| ityāsanaśuddhiṃ vidhāya bhūtaśuddhiṃ kuryāt
apasarpantu te bhūtā ye bhūtā bhuvi saṃsthitāḥ
ye bhūtā vighnakartāraḥ te naśyantu śivājñayā
oṃ hūṃ ākuñcena suṣumnāvartmanā pradīpakalikākārāṃ brahmapathāntarnītvā svajīvaṃ tatra sadāśive līnaṃ dhyātvā, ādau yamiti vāyubījena ṣoḍaśadhā japtena pāpapuruṣaṃ vāmakukṣisthaṃ śoṣayet| ramiti vahnibījena catuṣṣaṣṭivārajaptena dāhyet| vamiti varuṇabījena dvātriṃśadvārajaptena plāvayeta
lamiti bhūbījena daśadhā japtena śarīraṃ piṇḍībhūtaṃ vibhāvya svajīvaṃ hṛdi
saṃsthāpya prāṇānarpayet| iti bhūtaśuddhiḥ
oṃ āṃhrīṃ kroṃ yaṃraṃlaṃvaṃ śaṃṣaṃsaṃhaṃ sohaṃ haṃsaḥ mama prāṇā iha prāṇāḥ, evaṃ mama
jīva iha sthitaḥ, evaṃ mama sarvendriyāṇi, mama vāṅmanaścakṣuḥśrotrajihvāghrāṇaprāṇā ihaivāgatya sukhaṃ ciraṃ tiṣṭhantu svāhā| iti prāṇān samarpya,
mātṛkānyāsaṃ vidhāyaṃ pūrvavat karāṅganyāsau kṛtvā, tatra citāyā īśāne
caturasrāṃ vedīṃ vidhāya, tatra śrīcakraṃ vibhāvya yathoktavidhinābhyarcya, tatra
navagrahān sampūjya, pūrve vaṭukaṃ sampūjya bhūtabhairavān sampūjayet| oṃ thrīṃ
mahogrāya namaḥ
oṃ thrīṃ madālasāyai namaḥ pūrve| oṃ śrīṃ citrāṅgadāya namaḥ| oṃ śrīṃ citriṇyai
namaḥ uttare| oṃ hrīṃ caṇḍāya namaḥ| oṃ hrīṃ caṇḍyai namaḥ īśāne| oṃ hauṃ
bhāsvate namaḥ| oṃ hauṃ prabhāyai namaḥ vāyave| oṃ lāṃ lolākṣāya namaḥ| oṃ
lāṃ lolāyai namaḥ āgneye| oṃ bhaiṃ bhūteśāya namaḥ| oṃ bhaiṃ bhūtadhātryai namaḥ
dakṣiṇe| oṃ krīṃ karālāya namaḥ| oṃ krīṃ karālinyai namaḥ nairṛte| oṃ
hrīṃśrīṃ bhīmāya namaḥ| oṃ hrīṃśrīṃ bhīmarūpāya namaḥ paścime| iti
yathāvārakrameṇa gandhākṣatapuṣpairabhyarcya, tatra citāgre śrīcakraṃ navayonicakraṃ
vā vibhāvya yogapīṭhapūjāṃ kṛtvā pātrāṇi saṃsthāpya pātrapūjāṃ kṛtvā, tatra devatāvaraṇapūrvaṃ saśivāṃ devīṃ sampūjya yathāśaktyā japtvā japaṃ devyai samarpya, tataḥ kavaca-sahasranāma-stavapāṭhādi vidhāya tadapi samarpya citāgnau daśāṃśaṃ homaṃ kuryāt, tatra vaṭukādīn santarpya (bhūtabhairavānapi santarpya, navakanyāḥ santarpya) parasparaṃ navapātrāvadhi pānaṃ kuryāt
bhairavapūjana mantra—
1. oṃ hrīṃ mahogrāya namaḥ| oṃ hrīṃ madālasāyai namaḥ—pūrva meṃ
2. oṃ śrīṃ citrāṅgadāya namaḥ| oṃ śrīṃ citriṇyai namaḥ—uttara meṃ
3. oṃ hrīṃ caṇḍāya namaḥ| oṃ hrīṃ caṇḍayai namaḥ—īśāna meṃ
4. oṃ hrauṃ bhāsvatāya namaḥ| oṃ hrauṃ prabhāyai namaḥ—vāyavya meṃ
5. oṃ lāṃ lolākṣāya namaḥ| oṃ lāṃ lolāyaiḥ namaḥ—āgneya meṃ
6. oṃ bhaiṃ bhūteśāya namaḥ| oṃ bhaiṃ bhūtadhātryai namaḥ—dakṣiṇa meṃ
7. oṃ krīṃ karālāya namaḥ| oṃ krīṃ karālinyai namaḥ—nairṛtya meṃ
8. oṃ hrīṃ śrīṃ bhīmarūpāya namaḥ| oṃ hrīṃ śrīṃ bhīmarūpāyai namaḥ—paścima meṃ
śrīdevyuvāca
devadeva mahādeva śaraṇāgatavatsala
surāpānavidhiṃ brūhi yena siddhirbhaved dhruvam
17.18
surāpānavidhānam
śrībhairava uvāca
śṛṇu devi pravakṣyāmi pānapūjāvidhiṃ param
sādhakā yena jāyante kalau bhairavasannibhāḥ
17.19
śmaśāneṣu caret pānaṃ niśīthe vā maheśvari
vinā pānaṃ na siddhiḥ syāt sādhakānāṃ kalau dhruvam
17.20
surā saṃvidvāruṇīti tridhā pānaṃ sadottamam
teṣu brahmādayo devā nilīnā muktaye param
17.21
āsavo madhuraṃ madyaṃ śīdhu ceti trayaṃ param
tatra sarve sthitā devā vāsavādyā aharniśam
17.22
sampūjya saśivāṃ devīṃ pravṛtte bhairavārcane
tatra pānaṃ parādevyā mahānandapradāyakam
17.23
vinā pānaṃ na siddhiḥ syādinā śaktisamarcanam
na siddhyati śive mantraḥ śmaśānārcāṃ vinā tathā
17.24
tasmāt śmaśānaṃ sampūjya śaktimabhyarcya sādhakaḥ
pānaṃ bhajet parādevyāḥ śrīcakrāgre yathāvidhi
17.25
saṃvitpānaṃ caredrātrau divāpānaṃ ca śīdhunā
ahorātre surāpānaṃ bhogadaṃ mokṣadaṃ śive
17.26
saṃvidāsavayormadhye saṃvideva garīyasī
sa vaiṣṇavaḥ sa śāktaśca sa śaivo yaḥ śmaśānagaḥ
17.27
śmaśānabhajanādvīro bhaved bhairavasannibhaḥ
pānaṃ tāvadbhajed devi yāvat saṃvinmanomayī
17.28
yadi tatra vikāraḥ syāt pānaṃ tad brahmaghātavat
yāvanna calate dṛṣṭiryāvanna calate manaḥ
17.29
pūjārahitapañcamakārasevane pratyavāyaḥ
tāvat pānaṃ prakartavyaṃ paśupānamataḥ param
vinā pūjāṃ caredyastu pānaṃ vā carvaṇādikam
17.30
makārān pañca deveśi kulaṭāṃ vā parastriyam
sa rogī nindito loke parapiṇḍopajīvakaḥ
17.31
brahmaghātavadīśāni śīghraṃ mṛtyumukhaṃ vrajet
ātmocchiṣṭaṃ na dātavyaṃ parocchiṣṭaṃ na bhakṣayet
17.32
yadyucchiṣṭaṃ vīracakre kauliko bhakṣayecchive
siddhihānirbhavet sadyo yoginyo bhakṣayanti tam
17.33
pūjākāle niśīthe ca dhyātvā devīṃ śivāṅkagām
abhyarcya vidhinā pānaṃ kṛtvā carvaṇapūrvakam
17.34
makāraiḥ pañcabhirdevi tarpayitvā parastriyam
pānaṃ pānaṃ śive pānaṃ saptavāraṃ samuccaret
17.35
tena devī śivāṅkopaviṣṭā prādurbhaviṣyati
ityeṣā paddhatirguhyā śmaśānārcanasaṃyutā
17.36
gadyapadyamayī divyā tattvasarvasvasaṃyutā
tava snehena vikhyātā na prakāśyā kadācana
17.37
iti guhyatamaṃ devi rahasyaṃ devadurlabham
aprakāśyamadātavyaṃ gopanīyaṃ svayonivat
17.37.p1
iti śrīrudrayāmale tantre śrīdevīrahasye śmaśānārcanapaddhatinirūpaṇaṃ nāma ṣoḍaśaḥ paṭalaḥ ||16
Linked texts (4)
- Devīrahasya — Sanskrit
- Pūrvārddhadevirahasya — Sanskrit
- Devīrahasya — Sanskrit
- Devīrahasyapurāṇa — Sanskrit