Pramāṇa · Search · About · API

Devirahasyatantra 2: atha dvitīyaḥ paṭalaḥ

Devīrahasyatantra 2

Language
Sanskrit

Contents

atha dvitīyaḥ paṭalaḥ

2.1

śāktamantroddhāraḥ
devī-vaiṣṇava-śāktamantranirūpaṇaprastāvaḥ
śrībhairava uvāca
adhunā kathayiṣyāmi mantrān sāṅgān maheśvari
devīnāṃ vaiṣṇavāñchāktāñchaivāṃstvaṃ śṛṇu pārvati

2.2

śākta mantra-devatā
tripurā tryakṣarī bālā tathā tripurabhairavī
kālikā bhadrakālī ca mātaṅgī bhuvaneśvarī

2.3

ugratārā chinnaśīrṣā sumukhī ca sarasvatī
annapūrṇā mahālakṣmīḥ śārikā śāradā tataḥ

2.4

indrākṣī bagalā turyā rājñī jvālāmukhī tathā
bhīḍā ca kālarātriśca bhavānī vajrayoginī

2.5

vārāhī siddhalakṣmīśca kulavāgīśvarī tataḥ
padmāvatī kubjikā ca gaurī śrīkhecarī tataḥ

2.6

nīlasarasvatī devi parāśaktistataḥ smṛtā
etāsāṃ devi sāṅgānāṃ śaktīnāṃ vacmyahaṃ manūn

2.7

śaivān mantrāṃstato vakṣye yathāvacchṛṇu pārvati
mṛtyuñjayo'mṛteśāno vaṭuko'pi maheśvaraḥ

2.8

śivaḥ sadāśivo rudro mahādevaḥ karālakaḥ
vikarālo nīlakaṇṭhaḥ śarvaḥ paśupatirmṛḍaḥ

2.9

pinākī giriśo bhīmo gaṇeśaḥ pramathādhipaḥ
kumāraḥ krodhanaśceśaḥ kapālī krūrabhairavaḥ

2.10

saṃhāra īśvaro bhargo ruruḥ kālāgniravyayaḥ
aghoraśca mahākālaḥ kāmeśvara iti smṛtaḥ

2.11

vaiṣṇavāñchṛṇu deveśi mantrāṃstantreṣu gopitān
yena śravaṇamātreṇa mantrī viṣṇupadaṃ vrajet

2.12

lakṣmīnārāyaṇo rādhākṛṣṇo viṣṇurnṛsiṃhakaḥ
varāho jāmadagnyaśca sītārāmo janārdanaḥ

2.13

viśvakseno vāsudeva ityevaṃ daśa vaiṣṇavāḥ
mantrā atyuttamā devi japyāḥ sādhakasattamaiḥ

2.14

eteṣāṃ śāktaśaivānāṃ vaiṣṇavānāṃ maheśvari
uddhārān vacmi mantrāṇāṃ śrutvā gopaya yatnataḥ

2.15

bālāmantroddhāraḥ:
vāgbhavaṃ kāmarājaśca śaktirmadhye'bhidhaṃ nyaset
namo'nte devi bālāyā mantro'yaṃ cāṣṭavarṇakaḥ

2.16

pañcadaśākṣarīmantroddhāraḥ:
vedhobījamadho'dhyarṇamadho jiṣṇustamaḥ parā
chaviḥ śaktiḥ śiraḥ kāntistamo māyā śarat śiraḥ

2.17

tamo māyāñjale devyā mantraḥ pañcadaśākṣaraḥ
ṣoḍaśīmantroddhāraḥ:
lakṣmīḥ parā madanavāgbhavaśaktiyuktā
tāraṃ ca bhūtikamale kathitāpi vidyā
śaktyādikaṃ tu viparītatayā ca proktaḥ
śrīṣoḍaśākṣaravidhiḥ śivamastu pūrṇaḥ

2.18

devi vakṣyāmyahaṃ guhyaṃ tripurāyā rahasyakam
nityāyāḥ śaktayaḥ pūjyā vāgbhavīkāmaśaktayaḥ

2.19

tāramāyāramābījairnāma madhye'ñjale'śmarī
mantro'yaṃ sarvaśaktīnāṃ sarvasādhāraṇo mataḥ

2.20

tripurāpūjane devi pṛthag jāpye mṛthaṅmanuḥ
kālītrayaṃ kūrcayugmaṃ lajjāyugmaṃ samuccaret

2.21

dakṣiṇe kālike ceti punarbījāni pūrvavat
ṭhadvayaṃ syānmanorante mantro'yaṃ bhuvaneśvaraḥ

2.22

dvāviṃśatyakṣarī vidyā vidyārājñī prakīrtitā
kālyādyāḥ śaktayaḥ pūjyāḥ kālībījena kevalam
anyathā siddhihāniḥ syāt kālikāpūjane param

2.23

bhadrakālīmantroddhāraḥ:
kālītrayaṃ kūrcayugmaṃ lajjāyugmaṃ ca bhadrikām
bhadrakālipadaṃ brūyād bījāni pratilomataḥ

2.24

ṭhadvayena samāyukto bhadrakālī-mahāmanuḥ
kālīkūrcaparābījaiḥ parivārādiśaktyaḥ
pūjanīyā mahādevi bhadrakālīsamarcane

2.25

mātaṅgīmantroddhāraḥ:
tāraṃ parāṃ samuddhṛtya rājamātaṅginīti ca
mama sarvārthasiddhiṃ ca dehi-yugmaṃ samuddharet

2.26

turagaṃ ṭhadvayaṃ cānte mantro'yaṃ rājavallabhaḥ
tāreṇa pūjyā deveśi śaktayaḥ parivāragāḥ

2.27

bhuvaneśvarīmantroddhāraḥ:
māyābījaṃ nāma madhye namo mantrāṅgale vadet
ekākṣarīyaṃ viditā bhuvane bhuvaneśvarī

2.28

māyābījena sampūjyāḥ pūjākāle'tra śaktayaḥ
tāraṃ parāṃ vadhūṃ kūrcaṃ turagaṃ sakalāñchale

2.29

sārdhapañcākṣarī tārā bhavasāgaratāriṇī
tārakāntataṭaiḥ pūjyāḥ śaktayaścakramadhyagāḥ

2.30

lakṣmīṃ lajjāṃ tathā māyāṃ mātrāṃ dvādaśikīmatha
vajravairocanīye dve māye phaṭsvāhayā yute

2.31

māyāyugmena saṃpūjyāḥ śaktayaḥ parivāragāḥ
vāgbhavaṃ kāmarājaṃ ca tathocchiṣṭapadaṃ vadet

2.32

caṇḍālinīti proccārya sumukhīdevi coddharet
mahāpiśācini ceti māyārṇaṃ paḍjatrayam

2.33

vahnijāyāñcalo mantro gopanīyo maheśvari
vākkāmabījai: sampūjyā: śaktayo'nyā: parasparam

2.34

sarasvatīmantroddhāraḥ:
tāraṃ māyā ca vāgbījaṃ parā tāraṃ maheśvari
sarasvatyai jaganmantraḥ prasiddho'yaṃ śivākṣaraḥ

2.35

tāramāyākṣaraiḥ pūjyā devyo devīsamīpagāḥ
annapūrṇāmantroddhāraḥ:
tāraṃ parāpi kamalā kāmaṃ viśvaṃ tato vadet

2.36

bhagavati māheśvari cānnapūrṇe ca ṭhadvayam
ādibījadvayenaiva pūjyā devyāḥ samīpagāḥ

2.37

tāraṃ parāṃ ramāṃ kāmaṃ vāgbhavaṃ śaktibījakam
mahālakṣmi prasīdeti yugmaṃ mā paḍjatrayam

2.38

svāhānto'yaṃ mahāmantro mahālakṣmīpadapradaḥ
ādibījatrayeṇaiva pūjyāḥ paramaśaktayaḥ

2.39

tāraṃ māyāṃ śriyaṃ kūrcaṃ sindhuraṃ śarma proccaret
nāmāśmarīṃ manorante mantro'yaṃ bhuvi durlabhaḥ

2.40

māyayā pūjayed devīḥ parivāragatāḥ śive
tāraṃ māyā smaraḥ śaktiraśmarī nāma saṃvadet

2.41

bhagavatyai śāradāyai manorante parā vanam
tārakāmaiḥ śive pūjyāḥ śaktayaḥ paramārthadāḥ

2.42

praṇavaṃ kamalāṃ māyāṃ vāgbhavaṃ śaktimanmathau
indrākṣi vajrahaste ca haramante'gnivallabhā

2.43

tāraṃ mṛtsnāṃ ca deveśi bagalāmukhi sarva ca

2.44

duṣṭānāṃ vācaṃ mukhakaṃ padaṃ stambhaya-yugmakam
jihvāṃ kīlaya-yugmaṃ ca mṛttāraṃ ṭhadvayaṃ manuḥ

2.45

praṇavastārakā jyotistārā madhye'bhidhaṃ nyaset

2.46

ante'śmarī mahādevi mantro'yaṃ śatrusūdanaḥ
praṇavenārcayed devi parivārān yathākramam

2.47

tāraṃ parā ramā vahniḥ kāmaḥ śaktiḥ ṣaḍakṣaraḥ
bhagavatyai ca rājyai ca māyā ṭhadvayamañcale

2.48

prakāśam—'oṃ hrīṃ śrīṃ rāṃ klīṃ sauḥ bhagavatyai rājyai hrīṃ svāhā' iti mahārājñī
tārānnibhyāṃ śive devīparivārān samarcayet
tāraṃ lajjāṃ śriyaṃ caiva jvālāmukhi mameti ca

2.49

sarvaśatrūn bhakṣaya dvirante kūrcaṃ haraṃ payaḥ
prakāśam—'oṃ hrīṃ śrīṃ jvālāmukhi mama sarvaśatrūn bhakṣaya bhakṣaya hūṃ phaṭ svāhā' iti jvālāmukhī
tāreṇa pūjayed devi parivāragatāḥ parāḥ

2.50

tāraṃ parā ramā vedī candramanmathaśaktayaḥ
bhīḍābhagavatītyevaṃ haṃsarūpiṇi ṭhadvayam

2.51

parāramārṇediveśi parivārān prapūjayet
kālarātrimantroddhāraḥ
praṇavaṃ vāsanā māyā manmathaḥ kamalā tataḥ

2.52

madhye nāmāṅgale sarvaṃ vaśyaṃ kurudvayaṃ vadet
vīryaṃ dehi punarnāma gaṇeśvaryāśmarī smṛtā

2.53

tāracandreṇaṃ sampūjya parivārāṃstato yajet
bhavānīmantroddhāraḥ
tāraṃ ramā ramā tāraṃ tāraṃ māyā ramā ramā

2.54

hūṃphaḍantaḥ samākhyāto mantraḥ sarvārthasādhakaḥ
mābījaiḥ pūjayed devi parivāragatāḥ parāḥ

2.55

vajrayoginīmantroddhāraḥ
parārṇaṃ vajrayoginyai ṭhadvayaṃ praṇavāditaḥ
mantro'yaṃ sarvasiddhīśaḥ sādhakānāṃ jayapradaḥ

2.56

māyābījena deveśi parivārān samarcayet
candravāhlīkamohārṇacandrā madhye'bhidhaṃ nyaset

2.57

candro maṭhaṃ padmayugmaṃ haraṃ nīramayaṃ manuḥ
vāsanāmohabījena pūjayet parivāragān

2.58

siddhalakṣmīmantroddhāraḥ
tāraṃ ramāyugaṃ māyā haritaṃ candramanmathau
śaktirnamāśmarīmantraḥ siddhalakṣmyā udāhṛtaḥ

2.59

ramayā pūjayedanyāḥ parivāragatāḥ śive
kulavāgīśvarīmantroddhāraḥ:
tāraṃ kāmo ḍimbalakṣmīḥ kūrcaṃ kāṃkṣābhidhaṃ tataḥ

2.60

candraḥ padmaḥ spṛhā padmo veśyā padmo vanaṃ manuḥ
kāmena pūjayed devi parivārān yathākramam

2.61

padmāvatīmantroddhāraḥ:
tāraṃ parā ramā kāmā vīcī padmāvatīti ca
mama varaṃ dehi-yugmaṃ haraṃ nīramayaṃ manuḥ

2.62

parayā pūjayed devīḥ parivāragatāḥ parāḥ
kubjikāmantroddhāraḥ:
tāraṃ ramā vāgurārṇa nāma madhye tataḥ parā

2.63

padmo vanamayaṃ mantraḥ sarvasiddhiphalapradaḥ
vāgurārṇena deveśi pūjayet parivāragāḥ

2.64

gaurīmantroddhāraḥ
praṇavaṃ kamalā māyā vāhīkaṃ ca śivaṃ tataḥ
gauri śarvo vanaṃ devi mantraḥ sarvārthasiddhidaḥ

2.65

ramayā parivārāśca pūjayet sādhakottamaḥ
khecarīmantroddhāraḥ
bhekī tamaḥ parā śaktiḥ khecaryai cāśmarī tataḥ

2.66

mantro'yaṃ khecaro nāma khecaratvapradāyakaḥ
parayā pūjayed devīḥ parivāragatāḥ priye

2.67

nīlasarasvatīmantroddhāraḥ
tāraṃ vyoṣaṃ vāgbhavaṃ ca kūrcaṃ nīlasarasvati
haraṃ nīraṃ manorante mantro'yaṃ vākpradāyakaḥ

2.68

vyoṣeṇa pūjayed devi parivārā yathāvidhi
parāśaktimantroddhāraḥ
tāraṃ ramā parā kāmaḥ śaktirvarṇaṃ tato'bhidham

2.69

vāgbhavaṃ ṭhadvayaṃ devi mantrarājo'yamīritaḥ
mūlena pūjayedanyā devīstatparivāragāḥ

2.70

paṭalopasaṃhāra
ityeṣa śāktamantrāḍhyaḥ paṭalo devadurlabhaḥ
adhunā te manūn śaivān vakṣyāmi śṛṇu pārvati

2.71

idaṃ rahasyaṃ paramaṃ tava bhaktyā prakāśitam
guhyātiguhyaguptaṃ ca gopanīyaṃ svayonivat

2.71.p1

iti śrīrudrayāmale tantre śrīdevīrahasye śāktamantroddhāranirūpaṇaṃ nāma dvitīyaḥ paṭalaḥ ||2

Linked texts (5)