Pramāṇa · Search · About · API

Devirahasyatantra 22

Devīrahasyatantra 22

Language
Sanskrit

Contents

22.1

devi vakṣyāmi pūjānte śāntistotramanuttamam
vīrā yena parānandapadaṃ prāpsyanti niḥspṛhāḥ

22.2

yoginīcakramadhyasthaṃ mātṛmaṇḍalaveṣṭitam
namāmi śirasā nāthaṃ bhairavaṃ bhairavīpriyam

22.3

anādighorasaṃsāra-vyādhidhvaṃsaikahetave
namaḥ śrīnāthavaidyāya kulauṣadhapradāyine

22.4

āpado duritaṃ rogāḥ samayācāralaṅghanāt
te sarve'tra vyapohantu divyacakrasya melanāt

22.5

āyurārogyamaiśvaryaṃ kīrtilābhaḥ sukhaṃ jayaḥ
kāntirmanorathaścāstu pāntu sarvāśca devatāḥ

22.6

sampūjakānāṃ pratipālakānāṃ
yatīndrayogīndratapodhanānām
deśasya rāṣṭrasya kulasya rājñaḥ
karotu śāntiṃ bhagavān kuleśaḥ

22.7

nandantu sādhakakulānvayadarśakā ye
sṛṣṭyādyanākhyacaturuktamahānvayā ye
nandantu sarvakulakaularatāḥ pare ye'pyanye viśeṣapadabhedakaśāmbhavā ye

22.8

nandantu siddhaguravaḥ svagurukramaughā
jyeṣṭhānugāḥ samayino vaṭukāḥ kumāryaḥ
ṣaḍyoginīpravaravīrakulaprasūtā
nandantu bhūmipatigodvijasādhulokāḥ

22.9

nandantu nītinipuṇā niravadyaniṣṭhā
nirmatsarā nirupamā nirupadravāśca
nityā nirantararatā guravo nirīhāḥ
śāktāśca śāntamanaso hataśokaśaṅkāḥ

22.10

nandantu yoganiratāḥ kulayogayuktā
ācāryasāmayikasādhakaputrakāśca
gāvo dvijā yuvatayo yatayaḥ kumāryo
dharme bhavantu niratā gurubhaktiyuktāḥ

22.11

nandantu sādhakakulā hyaṇimādiniṣṭhāḥ
śāpāḥ patantu dviṣataḥ kulayoginīnām
sā śāmbhavī sphuratu kāpi mamābhyavasthā
yasyāṃ guroścaraṇapaṅkajameva labhyam

22.12

yāścakrakramabhūmikāvasatayo nāḍīṣu yā: saṃsthitā
yā: kāyadruromakūpanilayā yā: saṃsthito dhātuṣu
ucchvāsormimaruttaraṅganilayā ni:śvāsavāsāśca yāstā devyo ripubhakṣaṇodyamaparāstṛpyantu kaulārcitā:

22.13

yā divyakramapālikā: kṣitigatā yā devatāstoyagā
yā nityaṃ prathitaprabhā: śikhigatā yā mātariśvāśrayā:
yā vyomāmṛtamaṇḍalāmṛtamayā yā: sarvadā sarvagāstā: sarvā: kulamārgapālanaparā: śāntiṃ prayacchantu me

22.14

ūrdhvaṃ brahmāṇḍato vā divi bhuvanatale bhūtale nistale vā
pātāle vā tale vā pavanasalilayoryatra kutra sthitā vā
kṣetre pīṭhopapīṭhādiṣu ca kṛtapadā dhūpadīpādimāṃsai:
prītyā devya: sadā va: śubhabalividhinā pāntu vīrendravandyā:

22.15

brahmā śrīśeṣadurgāguhavaṭukagaṇā bhairavā: kṣetrapālā
vetālādityarudragrahavasumanusiddhāpsaroguhyakādyā:
bhūtā gandharvavidyādharaṛṣipitṛyakṣāsurāhiprabhūtā
yogīśāścāraṇāḥ kiṃpuruṣamunisurāścakragāḥ pāntu sarve

22.16

satyaṃ cedguruvākyameva pitaro devāśca cedyoginīprītiścet paradevatā ca yadi cedvedāḥ pramāṇāśca cet
śākteyaṃ yadi darśanaṃ bhavati cedājñeyameṣā(māśā)sti cet
santyatrāpi ca kaulikāśca yadi cet syānme jayaḥ sarvadā

22.17

tṛpyantu mātaraḥ sarvāḥ samudrāḥ sagaṇādhipāḥ
yoginyaḥ kṣetrapālāśca mama dehe vyavasthitāḥ

22.18

śivādyavaniparyantaṃ brahmādistambasaṃyutam
kālāgnyādiśivāntaṃ ca jagadyajñena tṛpyatu

22.19

paṭhitvedaṃ named vīrān vīravandanamācaret
staved vīrānnamed vīrān mantrasiddhiḥ prajāyate

22.20

iti śāntistotram
atha vīravandanastotram
jagattrayābhyarcitaśāsanebhyaḥ parārthasampādanakovidebhyaḥ
samuddhṛtakleśamahoragebhyo namo namaḥ sādhakanāyakebhyaḥ

22.21

prahīṇasarvāsravavāsanebhyaḥ sarvārthatattvoditasādhanebhyaḥ
sarvaprajābhyuddharaṇodyatebhyo namo namaḥ sādhakanāyakebhyaḥ

22.22

nistīrṇasaṃsāramahārṇavebhyastṛṣṇālatonmūlanatatparebhyaḥ
jarārujāmṛtyunivārakebhyo namo namaḥ sādhakanāyakebhyaḥ

22.23

saddharmaratnākarabhājanebhyo nirvāṇamārgottamadeśikebhyaḥ
sarvatra sampūrṇamanorathebhyo namo namaḥ sādhakanāyakebhyaḥ

22.24

lokānukampābhyuditādarebhyaḥ kāruṇyamaitrīparibhāviතebhyaḥ
sarvārthacaryāparipūrakebhyo namo namaḥ sādhakanāyakebhyaḥ

22.25

vidhvastaniḥśeṣakuvāsanebhyo jñānāgninā dagdhamalendhanebhyaḥ
prajñāpratijñāparipūrakebhyo namo namaḥ sādhakanāyakebhyaḥ

22.26

sarvārthitāśāparipūrakebhyo vaineyapadmākarabodhakebhyaḥ
vistīrṇasarvārthaguṇākarebhyo namo namaḥ sādhakanāyakebhyaḥ

22.27

anantakarmārjitaśāsanebhyo brahmendrarudrādinamaskṛtebhyaḥ
parasparānugrahakārakebhyo namo namaḥ sādhakanāyakebhyaḥ

22.28

vibhagnabhūtādimahābhayebhyo mapañcakācāraparāyaṇebhyaḥ
samastasaubhāgyakalākarebhyo namo namaḥ kāraṇanāyakebhyaḥ

22.29

vibhaktaduṣkarmajavāsanebhyaḥ samantato juṣṭamahāyaśobhyaḥ
labdhyāmalajñānakṛtāspadebhyo namo namaḥ śāmbhavaviśāmbhavebhyaḥ

22.30

sarvāgamāmbhodhimahāplavebhyaḥ śrīcakrapūjārthaparāyaṇebhyaḥ
śrīvīracaryācaraṇakṣamebhyo namo namaḥ śāmbhavaviśāmbhavebhyaḥ

22.31

śrīmantrakoṭidyutibhūṣaṇebhyo dvāviṃśadullāsadaśātigebhyaḥ
advaitatattvāmṛtabhājanebhyo namo namaḥ śāmbhavaviśāmbhavebhyaḥ

22.32

ṣaṭtriṃśatālakṣaṇabhūṣitebhyaḥ protphullapadmākaralocanebhyaḥ
prataptacāmīkaravigrahebhyo namo namaḥ śāmbhavaviśāmbhavebhyaḥ

22.33

sambodhasambhārasusaṃsthitebhyaḥ saṃsāranirvāṇanidarśanibhyaḥ
mahākṛpāveṣṭitamānasebhyo namo namaḥ śāmbhaviśāmbhavebhyaḥ

22.34

paraikyavijñānarasākulebhyo vāmāśritācārabhayānakebhyaḥ
svātantryavidhvastajagattamobhyo namo namaḥ śāmbhaviśāmbhavebhyaḥ

22.35

śmaśānacaryāptamahāphalebhyo mohāndhakārāpahṛtikṣamebhyaḥ
parasparājñāparipālakebhyo namo namaḥ śāmbhaviśāmbhavebhyaḥ

22.36

vidhūtakeśālikapālakebhyaḥ surāsavāraktavilocanebhyaḥ
navīnakāntāratatatparebhyo namo namaḥ śāmbhaviśāmbhavebhyaḥ

22.37

vibhūtiliptāṅgadigambarebhyaścitāgnidhūmālibhayānakebhyaḥ
kapālasāndrāmṛtapānakebhyo namo namo bhairavibhairavebhyaḥ

22.38

siddhyaṣṭakādhānamahāmunibhyaḥ śrībhairavācārakṛtādarebhyaḥ
svādhīnatānyakkṛtanijaribhyo namo namo bhairavibhairavebhyaḥ

22.39

praśāntaśāstrārthavicārakebhyo nivṛttanānārasakāvyakebhyaḥ
nirastaniḥśeṣavikalpanebhyo namo namo bhairavibhairavebhyaḥ

22.40

svātmaikyabhāvāntaritāśayebhyaḥ sāyujyasāmrājyasukhākarebhyaḥ
śrīsaccidānanditavigrahebhyo namo namo bhairavibhairavebhyaḥ

22.41

parāprasādāspadamānasebhyo brahmādvayajñānarasākulebhyaḥ
śivo'hamityāśritacetanebhyo namo namo bhairavibhairavebhyaḥ

22.42

sarvathā sarvadānandaṃ sarvaṃ ghaṭapaṭādisat
jagajjanitavistāraṃ brahmedamiti vedyaham

22.43

ahameva paro haṃsaḥ śivaḥ paramakāraṇam
matprāṇe sa tu maccātmā līnaḥ samarasīgataḥ

22.44

saccidānandanilayaṃ parāparamakāraṇam
śivādvayaprakāśāḍhyaṃ śyāmalaṃ dhāma dhīmahi

22.45

anena vīrastavakīrtanena samuddhṛtakleśasuvāsano'ham
saṃsārakāntāramahārṇave'smin nimajjamānaṃ jagaduddhareyam

22.45.p1

iti śrīrudrayāmale tantre śrīdevīrahasye śāntistotravīravandananirūpaṇaṃ nāmaikaviṃśa: paṭalaḥ||21

Linked texts (9)