Devirahasyatantra 23: atha dvāviṃśaḥ paṭalaḥ
Devīrahasyatantra 23
- Language
- Sanskrit
atha dvāviṃśaḥ paṭalaḥ
23.1
surāśodhanavidhiḥ
surāśuddhividhinirṇayaḥ
śrībhairava uvāca
śrṛṇu devi pravakṣyāmi surāśuddhividhiṃ param
yaṃ vidhāya kalau mantrī bhavitā muktibhājanam
23.2
yaireva pātakī devi sādhako dravyasaṅkaraiḥ
śuddhaistaireva pūjāyāṃ bhavedbhogāpavargabhāk
23.3
yadā prabhṛti loke'smin surā khyātimupāgatā
tadā sarve surā devi brahmaviṣṇuharādayaḥ
23.4
tatsaṃsargodbhavānandanirbharāntaramānasāḥ
asurā rākṣasā yakṣā gandharvā mānavādayaḥ
23.5
bhajanti ca surāṃ divyāṃ mantrasaṃskāramantritām
kālena kalaśasthābhūt surādevī sureśvari
23.6
kalinā kālarūpeṇa bādhite jagati priye
śaptā śukreṇa deveśi kacakāraṇahatyayā
23.7
śukraśāpavaśād devā brahmaviṣṇuśivādayaḥ
brahmarṣayaḥ surādevyai daduḥ śāpaṃ yathākramam
23.8
brahmahatyā surāpānaṃ samaṃ jñeyaṃ maheśvari
surā śaptā yadā devaistadā daityā mudaṃ yayuḥ
23.9
surāṃ pītvā tu ditijairdevā balavivarjitāḥ
svargānnirākṛtā devi purandarapuraḥ sarāḥ
23.10
tadā viṣṇuṃ puraskṛtya devā yajñamatanvata
sadāśivādayo devi prādurbhūtā makhottame
23.11
varaṃ vṛṇu yathābhīṣṭaṃ devanāyaka sāmpratam
taṃ tavāśu prayacchāmo gacchāmo nilayaṃ svakam
23.12
tadā śakro'bravīd devi puraskṛtya guraṃ śive
tṛṇāgrabindumātreṇa surāyāḥ prāśitena ca
23.13
yā tṛptirjāyate'smākaṃ na sāmṛtaghaṭīśataiḥ
sā śaptā brahmaṇā devī viṣṇunā śaṅkareṇa ca
23.14
tāṃ vinā nirbalā jātāḥ śatrubhiśca parājitāḥ
devānāṃ śivastutikriyā
tadā sarve surā devaṃ śivamīśvaramavyayam
23.15
tuṣṭuvuḥ parayā bhaktyā praṇipatya punaḥ punaḥ
ekākṣarāya rudrāya akārāyātmarūpiṇe
23.16
ukārāyādidevāya vidyādehāya vai namaḥ
tṛtīyāya makārāya śivāya paramātmane
23.17
sūryāya somavarṇāya yajamānāya vai namaḥ
namaste bhagavan rudra bhāskarāmitatejase
23.18
namo bhavāya devāya śarvāya ca kapardine
śivāya kṣitirūpāya sadāsurabhaye namaḥ
23.19
īśānāya namastubhyaṃ saṃsparśāya namo namaḥ
paśūnāṃ pataye caiva pāvakāmitatejase
23.20
bhīmāya vyomarūpāya śabdamātrāya vai namaḥ
mahādevāya somāya amṛtāya namo namaḥ
23.21
ugrāya yajamānāya namaste karmayogine
iti stutvā paraṃ devaṃ bhairavaṃ śivamīśvaram
23.22
ākāśavāṇīśravaṇam
praṇemuḥ sakalā devā brahmaviṣṇuharādayaḥ
tadā vāgudabhūd vyomnaḥ pañcavyomaśarīriṇām
23.23
sureyaṃ sarvadā sevyā sakalaistu mumukṣubhiḥ
yuttyānayā prasaṅgena yathāvadanupūrvaśaḥ
23.24
caturdhā vedarūpo'hamṛgyajuḥsāmarūpavān
atharvāhaṃ ca mantrātmā paramātmā śivo'vyayaḥ
23.25
vedānāloḍya vedārthaṃ mantrarūpaṃ vidhāya ca
kurukullāṃ mahāvidyāṃ sadāśiva prakāśaya
23.26
āgamaṃ nāma śāstraṃ tu catuṣṣaṣṭyātmakaṃ param
tasmin surādiśuddhiṃ tu prakāśaya manūttamaiḥ
23.27
iti vāṇī śivodbhūtā virarāma yadā parā
sadāśivaṃ maheśānaṃ tuṣṭuvuḥ praṇatāḥ surāḥ
23.28
punaḥ sadāśivastutiḥ
oṃkārarūpiṇe deva namaste viśvarūpiṇe
namo devādidevāya mahādevāya vai namaḥ
23.29
ardhanārīśarīrāya sāṃkhyayogapravartite
vedaśāstrārthagamyāya śāśvatāya namo namaḥ
23.30
dīnārtatrāṇakartre ca namaste divyacakṣuṣe
namaḥ sahasraśīrṣāya namaḥ sāhastrikāṅghraye
23.31
namo mantrāya cidvyomavāsine paramātmane
iti stutvā mahādevo mahātmā śrīsadāśivaḥ
23.32
provācāgamaśāstraṃ tu mokṣamārgaṃ mahātmanām
devadevīti yā devī yā bhavānīti viśrutā
23.33
sadāśivaṃ praṇamyāśu provāca ślakṣṇayā girā
vada devāgamaṃ śāstraṃ rahasyaṃ paramādbhutam
23.34
yasyoccāraṇamātreṇa śāpahīnā bhavet surā
śṛṇu devi pravakṣyāmi surāśuddhiṃ yathākramam
makārāṇāṃ ca sarveṣāṃ śodhanaṃ siddhivardhanam
23.35
vedo niṣkalaśabdo vai vedārtho'styāgamaḥ śive
vedārthagamatattvajñaiḥ surā sevyā mumukṣubhiḥ
23.36
na vedāgamayorbhedaḥ sarvatheti viniścayaḥ
śāstrāṇāṃ parameśāni bhrāntiḥ kāryā na kaulikaiḥ
23.37
maṇḍalanirmāṇaṃ, tatra kalārcā tannāmamantrāśca
adhunā śṛṇu deveśi surāśodhanamuttamam
yena śodhanamātreṇa sarvasiddhiḥ prajāyate
23.38
maṇḍalaṃ vāmataḥ kṛtvā jalena rajasāpi vā
kuṅkumenāṣṭagandhena sarvathā vīrabhasmanā
23.39
trikoṇaṃ bindusaṃyuktaṃ vṛttaṃ ca caturasrakam
sāmānyārdhyodakenāśu samprokṣya kulasundari
23.40
tatrādhāraṃ ca saṃsthāpya vahnimaṇḍalamarcayet
vahneḥ kalāḥ samabhyarcya yathāvadvarṇyate mayā
23.41
rakāraṃ bindusaṃyuktaṃ vahnibimbaṃ ca ḍe'ntikam
daśakalātmane viśvamiti mantreṇa pūjayet
23.42
dhūmrā ca nīlavarṇā ca kapilā visphuliṅginī
jvālā haimavatī kavyavāhanī havyavāhanī
23.43
raudrī saṅkarṣaṇī caiva vaiśvānarakalā daśa
pūjayitvoktavidhinā ganthākṣataprasūnakaiḥ
23.44
kalaśaṃ saṃsthulaṃ divyaṃ puṣpamālādiśobhitam
haimaṃ vā rājataṃ mārdaṃ sthāpayed vīramudrayā
23.45
śambhunā ca yathā devi viṣṇunā ca yathā purā
brahmaṇā ca yathā pūrvaṃ tathā tvāṃ sthāpayāmyaham
23.46
sūryapūjanam
iti saṃsthāpya kalaśaṃ tatra sūryaṃ prapūjayet
sūryanāma samuccārya jīvamantraṃ maheśvari
23.47
sūryamaṇḍalaḍentaṃ ca śrīdvādaśakalātmane
viśvamante prayoktavyaṃ manunānena pūjayet
23.48
kalā dvādaśa sūryasya pūjayeducyate mayā
tapinī tāpinī caiva bodhinī caiva rodhinī
23.49
kalinī śoṣaṇī caiva vareṇyākarṣaṇī tathā
māyā viśvāvatī hemaprabhā saurakalā imā:
23.50
1. hīṃ tapinīkalāyai namaḥ| 7. hīṃ vareṇyākalāyai namaḥ
2. hīṃ tāpinīkalāyai namaḥ| 8. hīṃ ākarṣiṇīkalāyai namaḥ
3. hīṃ bodhinīkalāyai namaḥ| 9. hīṃ māyākalāyai namaḥ
4. hīṃ rodhinīkalāyai namaḥ| 10. hīṃ viśvāvatīkalāyai namaḥ
5. hīṃ kalinīkalāyai namaḥ| 11. hīṃ hemākalāyai namaḥ
6. hīṃ śoṣiṇīkalāyai namaḥ| 12. hīṃ prabhākalāyai namaḥ
candrakalāpūjanam
sampūjya kalaśe devi kaulikaḥ kulasiddhye
surayā pūrayet kumbhaṃ vilomairmātṛkākṣaraiḥ
23.51
tadidaṃ cāmṛtaṃ sākṣāccandrarūpaṃ vicintayet
candramaṇḍalamabhyarcya mantreṇānena pārvati
23.52
śaktimuccārya deveśi somamaṇḍalaḍeyutam
viśvāṅgalāya deveśi śrīṣoḍaśakalātmane
23.53
iti sampūjya candrasya kalāḥ ṣoḍaśa pūjayet
amṛtā mānadā tuṣṭiḥ puṣṭiḥ prītī ratistathā
23.54
śrīśca hrīśca svadhā rātrijyotsnā haimavatī tathā
chāyā ca pūrṇimā nityā cāmāvasyā ca ṣoḍaśī
23.55
etāḥ sampūjya mantraistu yajed devīṃ ca bhairavīm
mūlena tatra kalaśe trikoṇaṃ ca vibhāvayet
23.56
bindubimbe parāṃ dhyātvā pūjayediṣṭadevatām
praṇavenārcayed devi śivaṃ gandhena vāyunā
23.57
tatra tāraṃ ca māyāṃ ca paramasvāminyuddharet
paramākāśaśūnyaṃ ca vāhinīti samuddharet
23.58
candrārkāgnibhakṣaṇīti pātre viśayugaṃ vadet
ṭhadvayāntāmimāṃ vidyāṃ japettu daśadhā ghaṭe
23.59
tatraiva mātṛkānte ca japedṛcamimāṃ priye
ākṛṣṇena rajaseti nāti paramapāvanīm
23.60
daśadhaitāmṛcaṃ devi madhuvātaṛtāyabhidhām
tatrānandeśagāyatrīṃ japetu daśadhā priye
23.61
vāṅmāyāmāḥ samuccārya tathānandeśvarāya ca
vidmahe śrīsurādevyai dhīmahīti tato vadet
23.62
tanno'rdhanārīśvaraśca pracodayāt samuddharet
gāyatrīṃ daśadhā japtvā haṃsaḥ śuciṣadārcayet
23.63
agnimīḷe purohitaṃ triḥ sañjapyeti kaulikaḥ
vakāraṃ dīrghaṣaṭkādyaṃ proccārya tadanantaram
23.64
brahmaśāpamocitāye surādevyai kuṭāntakam
daśadhā prajapedvidyāmiṣe tvorjetyṛcaṃ japet
23.65
ākṛṣṇena rajasā vartamāno niveśayannamṛtaṃ satyañca
hiraṇmayena savitā rathena devo yāti bhuvanāni paśyan
mādhuvātā ṛtāyate madhu kṣaranti sindhavaḥ
mādhvīrnaḥ santvoṣadhīrmadhu naktamutoṣaso
madhumat pārthivaṃ rajaḥ madhu dyaurastu naḥ pitā
madhumānno vanaspatirmadhu mām̐ astu sūryaḥ
mādhvīrgāvo bhavantu naḥ madhu madhu madhu
isake bāda ānandeśa gāyatrī kā japa daśa bāra kare—aiṃ hrīṃ śrī ānandeśvarāya vidmahe surādevyai dhīmahi tanno arddhanārīśvara pracodayāt| isake bāda 'haṃsaḥ śuciṣadā' kā japa kare| pūrī ṛcā yaha hai—
oṃ haṃsaḥ śuciṣat vasurantarikṣa saddhotā vedīṣada tithirduroṇasat
nṛṣadvara sadṛtaḥ sad vyoma sadabjā gojā ṛtajā adrijā ṛtaṃ bṛhat
isake bāda kaulika 'agnimīḷe purohitaṃ' nāma kī ṛcā kā tīna bāra japa kare
brahmaśāpavimocana mantra—oṃ vāṃ vīṃ vūṃ vaiṃ vauṃ vaḥ brahmaśāpavimocitāyai surādevyai namaḥ
isakā japa daśa bāra kare| taba 'tvojeṃ' nāma kī ṛcā kā japa kare||55-64
tāraṃ māyārṇaṣaḍdīrghān proccāryeti sudhe tataḥ
śukraśāpaṃ mocaya dvirvanāntaṃ ca manuṃ japet
23.66
agna āyāhīti ṛcaṃ daśadhā prajapet priye
śukraśāpaharīṃ vidyāṃ prajapeducyate yathā
23.67
sūryamaṇḍalasambhūte varuṇālayasambhave
amābījamaye devi śukraśāpādvimucyatām
23.68
devānāṃ( vedānāṃ )praṇavo bījaṃ brahmānandamayaṃ yadi
tena satyena deveśi brahmahatyāṃ vyāpohatu
23.69
ekameva paraṃ brahma sthūlasūkṣmamayaṃ param
kacodbhavāṃ brahmahatyāṃ tena te nāśayāmyaham
23.70
brahmaśāpavinirmuktā tvaṃ muktā viṣṇuśāpataḥ
vimuktā rudraśāpena pavitrā bhava sāmpratam
23.71
etairmantraiḥ samabhyarcya trivāraṃ kaulikaḥ śive
śanno devīriti ṛcaṃ daśadhā prajaped ghaṭe
23.72
śukraśāpa-vimocana mantra—oṃ hāṃ hīṃ hūṃ haiṃ hauṃ haḥ sudhe śukraśāpaṃ mocaya mocaya namaḥ
oṃ śanno devīrabhīṣṭaye āpo bhavantu pītaye śannorabhisravantu naḥ||65-71
tato māyāṃ ramāṃ devi paṅguṃ ṣaḍdīrghabhājitam
churikākāriṇayuccārya śobhinīti tato vadet
23.73
vikārānasya dravyasya hara-yugmaṃ ca ṭhadvayam
churikākhyāṃ japeddviyāṃ daśadhā kalaśopari
23.74
yo viśvacakṣuriti ca ṛcaṃ vai daśadhā japet
guruṃ dhyātvā sahasrāre hṛtpadme 'pīṣṭadevatām
23.75
praṇamya kauliko dhyāyet śrītiraskaraṇīṃ japet
nīlatoyadasaṅkāśāṃ nīlakuntalaśobhitām
23.76
nīlāmbaradharāṃ devīṃ nīlotpalavilocanām
nīlapuṣpavibhūṣāḍhyāṃ nīlālaṅkārabhūṣitām
23.77
nīlāṅgarāgasañchanāṃ nīlavaiḍūryamālinīm
indranīlanibaddhāṃśumahārghamaṇibhūṣitām
23.78
nīlavājisamārūḍhāṃ nīlakhaḍgāyudhāṃ parām
nidrāpaṭena nīlena bhuvanāni caturdaśa
23.79
mohayantīṃ mahāmāyāṃ dravyanindakabhakṣiṇīm
vīrapānaratān vīrān pālayantīṃ samantataḥ
23.80
saṅketamaṇḍalaṃ divyaṃ chādayantīṃ svavāsasā
paramānandavapuṣīṃ paramānandabhairavīm
23.81
paramānandajananīṃ praṇamāmi parāmbikām
iti dhyātvā japedvidyāṃ yathāvad varṇyate mayā
23.82
vākkāmamaṭhamāyāśca tiraskaraṇi saṃvadet
sakalajanaṃ proccārya vāgvādini tato vadet
23.83
sakalapaśujanaṃ ca vaded vrātamanaḥpadam
cakṣuḥśrotrajihvāghrāṇādīni ceti tiraskuru
23.84
tiraskuru tataḥ padmatrayaṃ ṭhadvayamuddharet
śrītiraskaraṇīṃ vidyāṃ sañjaped daśadhā ghaṭe
23.85
pāvamānī ṛkkathanam
pāvamānyāḥ paraṃ brahma śuddhaṃ jyotiḥ sanātanam
pitṝṃstasyopatiṣṭhati kṣīraṃ sarpirmadhūdakaiḥ
23.86
ṛcametāṃ japedādau trivāraṃ trirjapet tataḥ
pāvamānyaṃ paraṃ brahma pāvamānyaḥ paro rasaḥ
23.87
pāvamānyaṃ paraṃ jñānaṃ tena tvāṃ pāvayāmyaham
iti japtvā guruṃ dhyātvā japed varuṇabījakam
23.88
kuṇḍalinīdhyānanītenāmṛtenāmṛtīkaraṇam
haṃsa ityarkamantraṃ ca devī kuṇḍalinīṃ smaret
prasuptabhujagākārāṃ sārdhatrivalayāṃ śubhām
23.89
sūryakoṭikarālābhāṃ candrakoṭisuśītalām
vahnikoṭidurāda(dha)rṣā bisatantutanīyasīm
23.90
ṣaṭ cakrāṇi vibhidyāśu suṣumnāvartmanā nayet
sahasrārasthitaṃ devaṃ natvā śivapade layet
23.91
śivaśaktyormahajjyotirdhyātvā candrakalāsrutam
amṛtaṃ vāmanāsāgrānniḥsārya kalaśe kṣipet
23.92
amṛtīkṛtya tad dravyaṃ dhenumudrāṃ pradarśayet
amṛtīkaraṇamantrakathanam
māyāṃ ramāṃ kāmakalāmamṛte'pyamṛtodbhave
23.93
amṛtavarṣiṇyuccārya amṛtaṃ srāvaya-dvayam
aṃāṃ viṣṇukalānte ca paṭhet pārvati kaulikaḥ
23.94
viśvāntamamṛteśvaryai manumenaṃ japed ghaṭe
dhyātvāmṛtamayaṃ dravyaṃ karpūrādisuvāsitam
23.95
elālavaṅgakastūrī-candanośīramiśritam
vidhāya mūlamantreṇa tīrthānyāvāhayed ghaṭe
23.96
tāraṃ śivaṃ śivodbhūtiṃ mūlametat samuddharet
gaṅge ca yamune caiva godāvari sarasvati
23.97
narmade sindhukāveri dravye'smin sannidhiṃ kuru
ityāvāhya mahādevi mudrayāṅkuśarūpayā
23.98
sarvatīrthamayaṃ dravyaṃ dhyāyet paramapāvanam
dravyamadhye binduyutaṃ trikoṇaṃ ca vibhāvayet
23.99
yonimudrāṃ nibadhyāśu dhyāyedānandabhairavam
ānandabhairavadhyānakathanam
sūryakoṭipratīkāśaṃ candrakoṭisuśītalam
23.100
aṣṭādaśabhujaṃ devaṃ pañcavaktraṃ trilocanam
amṛtārṇavamadhyasthaṃ brahmapadmoparisthitam
23.101
vṛṣārūḍhaṃ nīlakaṇṭhaṃ sarvā(rpā)bharaṇabhūṣitam
kapālakhaṭvāṅgadharaṃ ghaṇṭāḍamaruvādinam
23.102
pāśāṅkuśadharaṃ devaṃ gadāmusaladhāriṇam
khaḍgakheṭakapaṭṭīśa-mudgarocchūlakuntinam
23.103
vicitrakheṭakaṃ muṇḍavaradābhayapāṇikam
lohitaṃ devadeveśaṃ bhāvayet sādhakottamaḥ
23.104
ānandabhairavamantrakathanam
dattvā puṣpāñjaliṃ kumbhe japedānandabhairavam
hakāraṃ ca bhṛguṃ devaṃ maṇḍūkaṃ dharaṇiṃ tataḥ
23.105
tathā jīmūtabījaṃ ca hutabhugbījamuddharet
vāyuṃ keśaṃ tathānandabhairavāya tato'ñcale
23.106
vikuṭaṃ ca manuṃ japtvā daśadhā bhairavīṃ yajet
ānandabhairavīṃ dhyāyed yathāvad varṇyate śive
23.107
ānandabhairavīdhyānam
samudre mathyamāne tu kṣīrābdhau sāgarottame
tatrotpannā surā devī kumārīrūpadhāriṇī
23.108
bhāvayecca surāṃ devīṃ candrakoṭyayutaprabhām
himakundendudhavalāṃ pañcavaktrāṃ trilocanām
23.109
aṣṭādaśabhujairyuktāṃ sarvānandakarodyatām
prahasantīṃ viśālākṣīṃ devadevasya sammukhīm
23.110
ānandabhairavīmantra: kalaśapūjanañca
śaktiṃ śivaṃ nirjaraṃ ca bhekīṃ bhūbījameva ca
meghaṃ vahniṃ samīrāṇaṃ keśaṃ caiva samuddharet
23.111
surādevyai kuṭaṃ cānte vidyāṃ ca daśadhā japet
bhairavaṃ bhairavīṃ caiva yaṣṭvā pārvati kaulikaḥ
23.112
mahāmudrāṃ dhenumudrāṃ yoniṃ matsyaṃ pradarśayet
baddhvā ca lelihānākhyāṃ mudrāṃ kuṇḍalinīṃ punaḥ
23.113
mūlādhārāt samutthāya suṣumnāvartmanā priye
dvādaśāntaṃ samāsthāpya sohaṃ haṃsa iti smaret
23.114
śivena saha saṃyojya parānandamayo bhavet
tadudbhūtāmṛtavṛṣṭimutsṛjed vāmanāsayā
23.115
praṇavena ca deveśi paradravye niyojayet
sākṣādamṛtatattvāḍhyaṃ dhyāyet kalaśamuttamam
23.116
vāruṇaṃ bījamuccārya mūlamantraṃ samuccaret
daśadhā prajaped devi gandhākṣatapuraḥsaraiḥ
23.117
puṣpairnānāvidhairdivyairmālyairvividhabhūṣaṇaiḥ
sampūjya kalaśaṃ divyaṃ ghaṇṭāniḥsvānapūrvakam
23.118
dhūpairdīpairmahotsāhaiḥ paramairvividhauṣadhaiḥ
prapūjya parayā bhaktyā praṇāmaiḥ stutipūrvakaiḥ
23.119
kalaśe amṛtatattvadhyānam
sarvadevamayaṃ kumbhaṃ dhyāyed deveśi sādhakaḥ
yā surā sā umādevī yo dravyaṃ sa maheśvaraḥ
23.120
yo gandhaḥ sa bhaved brahmā yo mohaḥ sa janārdanaḥ
svāde ca saṃsthitaḥ somaḥ phenāyāmanalaḥ sthitaḥ
23.121
icchāyāṃ manmatho devaśchardyāmucchiṣṭabhairavaḥ
drāve gaṅgā sthitā devi ghaṭasthāḥ sapta sāgarāḥ
23.122
sarvatejomayaṃ dravyaṃ paramānandanirbharam
sarvaśāpavinirmuktaṃ sarvamantrasusaṃskṛtam
23.123
paramāmṛtabhāvena bhairavaṃ bhairavīṃ yajet
māheśvarairmahāvīrairmahācīnapadasthitaiḥ
23.124
mahāśaktimayairmānyaiḥ sevyaṃ dravyamidaṃ priye
santarghya devatāmiṣṭāṃ yoginīgaṇamaiśvaram
23.125
vaṭukaṃ kṣetrapālāṃśca triṃśiśatkoṭidevatāḥ
mātṛmātṛgaṇān sarvān bhūtapretādisaṃyutān
23.126
santarghya vidhivad devi guruṃ guruvarāṃstataḥ
guruṃ dhyātvā parāṃ dhyāyedvīrān sampūjya śaktitaḥ
23.127
śaktiyukto yajet pātramityājñā parameśvarī
śaktihīne vṛthāpānaṃ śivahīne vṛthārcanam
23.128
śivaśaktisamāyoge vīrapūjā vimokṣadā
itīdaṃ śodhanaṃ divyaṃ surāyāḥ suradurlabham
23.129
anyadravyaśodhanaprastāvaḥ
tava snehena nirṇītaṃ śṛṇuṣvānyadapi priye
madyaṃ māṃsaṃ tathā mīno mudrā maithunameva ca
23.130
makārapañcakaṃ pūjyaṃ śivaśaktisamāgame
pūjāyāṃ yadyadānītaṃ bhakṣyaṃ bhojyaṃ ca lehyakam
23.131
peyaṃ coṣyaṃ phalaṃ puṣpaṃ sarvaṃ mantreṇa mantrayet
vinābhimantraṇenaitad yo mohād bhakṣayecchive
23.132
sa māntriko'pi deveśi sahasā nirayī bhavet
caturasraṃ likhedbimbaṃ tatra mīnān nidhāpayet
23.133
śoṣayed dāhayed devi plāvayenmanunā śive
vāyubījena vāhnena vāruṇena yathākramam
23.134
dhenuyonimahāmatsyā mudrāścaiva pradarśayet
daśadhā prajapenmantramānandeśvarabhairavam
23.135
prajapya prapaṭheddvidyāṃ yathoktāṃ kaulikeśvari
kṛtāvatāro hariṇā kalinā pīḍitaṃ jagat
23.136
balinā nigṛhītaṃ ca kaulikānāṃ hitecchayā
bhairavīparitoṣārthaṃ svayaṃ mīno'bhavad hariḥ
23.137
māyāṃ ca haraye viśvaṃ japedṛcamataḥ param
tryambakaṃ yajāmahīti mantraṃ triḥsañjapet sudhīḥ
23.138
prapūjya gandhapuṣpaistu praṇamed devatāṃ parām
tryambakaṃ yajāmahe sugandhiṃ puṣṭivardhanam
urvārukamiva bandhanānmṛtyormukṣīya mā'mṛtāt
caturasre mahādevi māṃsapātraṃ nidhāpayet
23.139
saṃśoṣya sandahya palamāplāvya kulasundari
mudrātrayaṃ pradarśyāśu prapaṭhet kauliko manum
23.140
chāgalājyeṇamartyāntrā(ntaḥ)kṛtarūpāya viṣṇave
balyarthaṃ śivaśaktyostaṃ prapadye viṣṇumavyayam
23.141
pratarpayāmi balyarthaṃ pavitrībhava sāmpratam
triḥ paṭhitvā ṛcaṃ devi japet kaulikasattamaḥ
23.141-2
pratadviṣṇuriti smṛtvā praṇamed yonimudrayā
oṃ pratad viṣṇuḥ paramaṃ padaṃ sadā paśyanti sūrayaḥ
divīva cakṣurātatam tadviprāso vipaṇyavo jāgṛvāṃsaḥ samindhate
viṣṇoryat paramaṃ padam
23.142
mudrāpātraṃ samānīya sthāpayeccaturasrake
23.143
saṃśoṣaṇaṃ dāhanaṃ ca plāvanaṃ pūrvavaccaret
mudrātrayaṃ ca sandarśya prapaṭhed vedavad vidhim
23.144
devatāpūjane yāni saurabheyāni sāmpratam
balyarthaṃ devadevyośca pavitrāṇīha siddhaye
23.145
mūlaṃ ca daśadhā japtvā japedṛcamanuttamām
tadviṣṇoḥ paramaṃ mantraṃ prajapyopari kaulikaḥ
23.146
kuṇḍagolaśodhanam
praṇamya bhaktibhāvena kuṇḍagolaṃ ca śodhayet
caturasre ca saṃsthāpya śoṣayed dāhayet sudhīḥ
23.147
āplāvayet paraibīṃjairmudrābhirabhirakṣet
mūlaṃ ca daśadhā japtvā japedṛcamathopari
23.148
viṣṇuyonimiti smṛtvā prajapya praṇamettataḥ
oṃ viṣṇu yoniḥ kalpayatu tvaṣṭā rūpāṇi piṃśatu
āsiṃcatu prajāpatirdhātā garbhaṃ dadhātu vai
garbhaṃ dehi sinīvālī garbhaṃ dehi sarasvati
garbhaṃ dehi aśvinau devāvādhattāṃ puṣkarasrajā||146-147
sarveṣu devadravyeṣu samānīteṣu kaulikaiḥ
23.149
ṛcametāṃ japet samyaṅ mantramenaṃ samuddharet
glūṃmlūṃslūṃplūṃnlūṃ deveśi svāntaṃ khaṃ kāmakālikam
23.150
amṛte'pyamṛtodbhūte'pyamṛteśvari cāmṛtam
srāvaya-dvayamuddhṛtya ṭhadvayaṃ ca samuddharet
23.151
oṃ glūṃ mlūṃ slūṃ plūṃ nlūṃ aṃ āṃ klīṃ krīṃ amṛte amṛtodbhūte amṛteśvari amṛtaṃ sāvaya srāvaya svāhā ||148-150
iyaṃ śāpaharī vidyā makārāṇāṃ maheśvari
pañcānāṃ pañcakalpānāṃ smaraṇīyārcanāvidhau
23.152
bhairavayāgakathanam
saṃśodhya śivadravyāṇi mantrairmudrābhireva ca
ṝgbhiḥ krameṇa mūlena plā(pā)vayecca yathākramam
23.153
ānandarasasampūrṇaiḥ kalaśāmṛtabindubhiḥ
evaṃ saṃśodhya dravyāṇi paramāṇi kuleśvari
23.154
bhairavaṃ bhairavīṃ devīṃ yajed vīrasamāgame
ayaṣṭvā bhairavaṃ devamakṛtvā devatārcanam
23.155
paśupānavidhau pītvā vīro'pi narakaṃ vrajet
evaṃ saṃskṛtya deveśi gurubhaktipuraḥsaram
23.156
yaḥ pibet paramaṃ pānaṃ śivasāyujyamāpnuyāt
itīdaṃ paramaṃ guhyaṃ rahasyānāṃ rahasyakam
aṣṭasiddhimayaṃ tattvaṃ gopanīyaṃ svayonivat
23.22-2
iti śrīrudrayāmale tantre śrīdevīrahasye surāśodhanavidhinirūpaṇaṃ
nāma drāviṃśa: paṭala:
Linked texts (8)
- Devīrahasya — Sanskrit
- Śrīvidyānityapaddhati — Sanskrit
- Vārāhītantra — Sanskrit
- Hāhārāvatantra — Sanskrit
- Tattvacintāmaṇi — Sanskrit
- Devīrahasya — Sanskrit
- Pūrvārddhadevirahasya — Sanskrit
- Devīrahasyapurāṇa — Sanskrit