Pramāṇa · Search · About · API

Devirahasyatantra 26: atha pañcaviṃśaḥ paṭalaḥ

Devīrahasyatantra 26

Language
Sanskrit

atha pañcaviṃśaḥ paṭalaḥ

26.1

yantraśodhana-japa-pūjākālaḥ
yantraśodhanaprastāvaḥ
śrībhairava uvāca
adhunā devadeveśi yantraśodhanamuttamam
vakṣyāmi tava bhattyāhaṃ kaulikānāṃ hitāya ca

26.2

aṣṭadhā dhātuyantrollekhanam
sauvarṇaṃ rājataṃ tāmraṃ sphāṭikaṃ raudhrikaṃ tathā
kāpālikaṃ ca pāśāsaṃ śrīcakraṃ vaiṣṇavāśmikam

26.3

eteṣvaṣṭasu divyeṣu yogapīṭheṣu pārvati
vibhāvayenmahāyantraṃ daivaṃ bhaumaṃ ca bhāvikam

26.4

ūrdhvarekhamadhorekhaṃ tṛtīyaṃ gandhacitritam
trividhaṃ yantramīśāni susiddhaṃ siddhasādhyakam

26.5

dhātunirmitayantraśodhanakālakathanam
sahasrābhaṃ ca pāśāsaṃ śodhayeduttarāyaṇe
pañcame pañcame devi tataḥ siddhipradaṃ bhavet

26.6

śarāṅkuśaṃ vaiṣṇavāśmaṃ śodhayed dakṣiṇāyane
caturthe ca caturthe ca tataḥ siddhimavāpnuyāt

26.7

sauvarṇaṃ sphāṭikaṃ yantraṃ varṣānte śodhayet sudhīḥ
rājataṃ tāmrikaṃ yantraṃ ṣaṇmāsānte ca śodhayet

26.8

evaṃ mayoktakāleṣu śodhayed yantramīśvari
siddhaye kauliko devi yathāvadvarṇyate mayā

26.9

yantraśodhanamantrasya ṛṣiḥ prokto mayā śivaḥ
triṣṭup chanda iti khyātaṃ parāśaktiśca devatā

26.10

ramā bījaṃ parā śaktiḥ kāmaḥ kīlakamīśvari
śrīcakraśuddhisiddhyarthaṃ viniyogaḥ prakīrtitaḥ

26.11

munyādinā carennyāsaṃ karanyāsaṃ ṣaḍaṅgakam
tato viṣṭaraśuddhiṃ ca prāṇārpaṇavidhiṃ caret

26.12

iṣṭarṣidevatānyāsaṃ karāṅganyāsamācaret
vidhāya mātṛkānyāsaṃ layāṅganyāsaṃsaṃyutam

26.13

ardhanārīśvaranyāsaṃ ṣoḍhānyāsamataḥ param
mūlatrikhaṇḍakaṃ nyāsaṃ kṛtvā prāṇacayaṃ śive

26.14

pīṭhapūjāṃ svahṛdaye kṛtvā ṣaṭcakradīpanam
svarṇasiṃhāsane sthāpya śrīcakraṃ sveṣṭadaivatam

26.15

śodhayenmadhunā devi kuṇḍagolodbhavena vā
aṣṭagandhena vā devi pauruṣeṇa rasena vā

26.16

ibhyājyena mahādevi saṃsthāpya kulapūjite
śrīcakraṃ mūlamantreṇa pūjayet tatra kaulikaḥ

26.17

svarṇayantraśodhanamantrakathanam
vāgbhavaṃ śaktibījaṃ vākśaktiṃ cakreśvari priye
yantraṃ sauvarṇamudbhṛtya śodhaya-dvayamuddharet

26.18

ṭhadvayaṃ svarṇayantrasya mantraḥ śodhanakārakaḥ
rajatayantraśodhanamantrakathanam
tāraṃ sindhuṃ ca tāraṃ ca rājataṃ yantramuddharet

26.19

śodhaya-dvayamāpaśca yantraśodhanako manuḥ
tāmrayantraśodhanamantrakathanam
tāraṃ tārā ca tāraṃ ca vadhūṃ tāraṃ ca tārakā

26.20

tāmreśvarīti yantraṃ me śodhayāpo mahāmanuḥ
sphaṭikayantraśodhanamantrakathanam
vedādyaṃ kamalāṃ māyāṃ tāraṃ yantraṃ kulāmbike

26.21

śodhaya-dvirvanaṃ mantraḥ sphāṭikāśmaviśodhanaḥ
praṇavaṃ kūvarībījaṃ mā māyā vāyupūjitā

26.22

rudreśvari parā yantraṃ śodhayāpo manuḥ smṛtaḥ
tāraṃ vāk kāmarājaśca śaktiḥ kapālamālini

26.23

yantraṃ śodhaya ṭhadvandvaṃ kapālaśodhano manuḥ
tāraṃ gaurī ca tārtīyaṃ vāk kāmaśca citāsane

26.24

yantraṃ śodhaya ṭhadvandvaṃ manuḥ pāśāṃsaśodhanaḥ
vedādyaṃ haritaṃ vāṇī śaktiḥ kāmo ramā ramā

26.25

nitye viṣṇuśilāyantraṃ śodhayāpo manuḥ smṛtaḥ
ityevaṃ yantramīśāni ratnasiṃhāsanasthitam

26.26

mūlamantreṇa saṃsnāpya pūrvoktauṣadhavāriṇā
mantrairebhiḥ prajaptaiśca pūjayed gandhamālyakaiḥ

26.27

sampūjya devi saṃśodhya tataḥ pūjāṃ śivoditām
yathoktāṃ sādhakaḥ kuryād dravyaśodhanapūrvakam

26.28

aṣṭāṅgapūjāṃ nirmāya niśīthe japamācaret
niśīthakālanirṇayaviṣayakapraśnaḥ
śrībhairavyuvāca
bhagavan kulakauleśa bhairavāṣṭakamadhyaga
niśīthakālaṃ me brūhi saṃśayo'yaṃ mahān mama

26.29

niśītha-ardharātrikālanirṇayaḥ
śrībhairava uvāca
ardharātrastu trividho yanmuhūrtacatuṣṭayam
niśītho vārdharātraśca tṛtīyaiva mahāniśā

26.30

dvitīye ca tṛtīye ca yāme yāmalabhairavi
muhūrte dve samādāya tathā dve ca maheśvari

26.31

dve muhūrte niśīthastu parato dve muhūrtake
ardharātro muhūrte dve pūjārhaḥ parameśvari

26.32

muhūrtaiṃkaṃ samādāya parataścaikamīśvari
yāmadvayādardharātro varṇitaḥ kaulasiddhye

26.33

śive madhyamayoḥ sandhiryāmayoryā mahāniśā
tasyāṃ parāṃ japedyastu sa bhavecchivasannibhaḥ

26.34

niśīthe pūjayedyantramardharātre japenmanum
mahāniśāyāṃ prajapet parāṃ kaulikasattamaḥ

26.35

kiṃ kiṃ na sādhayelloke yanmamāpi hi durlabham
rajaḥ śukraṃ surāṃ devi māṃsaṃ mīnaṃ ca maithunam

26.36

sarvathā śodhayed devi mūlamantreṇa māntrikaḥ
pibenmadyaṃ bhajedrāmāṃ smared bhairavibhairavam

26.37

namedguruṃ japed vidyāmiti kaulamataṃ param
prātaḥkṛtyaṃ śive kṛtvā śrīcakraṃ pūjayet tataḥ

26.38

japenmantrī mahāvidyāṃ stotrapāṭhaṃ caret tataḥ
parāṃ japet sadā satyāṃ tato yāti paraṃ padam

26.39

mahāpadi mahotpāte mahāśoke mahābhaye
mahāmohe mahāsaukhye mahādāridryasaṅkaṭe

26.40

mahāraṇye mahāśūnye mahājñāne mahāraṇe
durāpadi durāśe ca durbhikṣe durnimittake

26.41

samastakleśasaṅghāte smared devi parāmbikām
vaktre sarasvatī tasya lakṣmīstasya gṛhe sadā
dhanyā ca jananī tasya yena devī samarcitā

26.42

idaṃ sāraṃ hi tantrāṇāṃ mantrāṇāṃ tattvamuttamam
mayoditaṃ tava snehānnākhyeyaṃ brahmavādibhiḥ

Linked texts (4)