Pramāṇa · Search · About · API

Devirahasyatantra 32

Devīrahasyatantra 32

Language
Sanskrit

Contents

32.1

kailāsaśikharāsīnaṃ bhairavīpatimīśvaram
bhairavaṃ candramukuṭaṃ gaṇagandharvasevitam

32.2

pannagābharaṇopetaṃ jaṭāmukuṭamaṇḍitam
bhasmāṅgarāgadhavalaṃ sarpagonasakaṅkaṇam

32.3

siṃhacarmaparīdhānaṃ gajacarmottarīyakam
kapālakhaṭvāṅgadharaṃ ghaṇṭāḍamarudhāriṇam

32.4

triśūlabāṇāsikaraṃ varābhayakaraṃ śivam
muṇḍamālādharaṃ kāmakālānyakabhayaṅkaram

32.5

brahmopendrendranamitaṃ candrakoṭisuśītalam
yakṣeśakinnaropetaṃ surāsuranamaskṛtam

32.6

rakṣomārīmahāpreta-bhūtavetālasaṃkulam
sādhyasiddhapiśācaugha-bhairavapraṇataṃ prabhum

32.7

brahmarṣisevitaṃ devaṃ pārvatīsahitaṃ vibhum
gaṅgādharaṃ prasannāsyaṃ hasitānanapaṅkajam

32.8

nandirudrārcitaṃ śambhuṃ dṛṣṭvā provāca bhairavī
śrīdevyuvāca
bhagavan devadeveśa bhaktānāmabhayaprada
tvaṃ śivaḥ parameśānastvaṃ viṣṇustvaṃ prajāpatiḥ

32.9

sattvāśrito rajorūpastāmaso lokanāśanaḥ
nirguṇo bhairavādhyakṣaḥ kāraṇānāṃ ca kāraṇam

32.10

vedamūlo vedagamyo jagatrātā jagatpatiḥ
tvaṃ me prāṇādhiko deva krītāsmi tava kiṅkarī

32.11

purā pṛṣṭo'si bhagavan mayā tvaṃ bhaktipūrvakam
adya tadvada tattvaṃ me yadyahaṃ va vallabhā

32.12

śrībhairava uvāca
kiṃ vakṣyāmi śive tattvaṃ yat tavāsti sudurlabham
vismṛtaṃ vada me śīghraṃ vakṣye prāṇādhikāsi me

32.13

śrīdevyuvāca
devadeva mahādeva daityanāyakapūjita
sakalāgamasārajña kaulikānāṃ hitecchayā

32.14

vada śīghraṃ dayāsindho pañcāṅgaṃ pūrvasūcitam
devadevasya sūryasya sarvatattvottamottamam

32.15

śrībhairava uvāca
etad guhyatamaṃ devi pañcāṅgaṃ dvādaśātmanaḥ
sarvāgamarahasyaṃ te vakṣye snehena pārvati

32.16

paṭalaṃ nityapūjāyāḥ paddhatiṃ kavacaṃ param
mantranāmasahasraṃ ca stotraṃ mūlātmakaṃ priye

32.17

pañcāṅgamidamīśāni devadevasya bhāsvataḥ
sarvasāramayaṃ divyaṃ rahasyaṃ mama durlabham

32.18

sūryapaṭalam
adātavyamabhaktebhyo bhaktebhyo bhogadāyakam
athāhaṃ paṭalaṃ vakṣye mūlamantramayaṃ priye

32.19

yasya śravaṇamātreṇa sarvarogaiḥ pramucyate
yo devadevo bhagavān bhāskarastejasāṃ nidhiḥ

32.20

pratyakṣadevo vedānāṃ kartā sākṣī ca karmaṇām
saviteti ca vedeṣu paramātmā jagatpatiḥ

32.21

gāyatrīvallabhaḥ sūryaḥ sṛṣṭisthitilayeśvaraḥ
kālātmā ca paraṃ dhāma paraṃ brahmeti gīyate

32.22

tasyādidevadevasya sūryasya savituḥ śive
mantroddhāraṃ paraṃ vakṣye sarvasiddhimayaṃ kalau

32.23

sūryamantroddhāraḥ:
tāraṃ ḍimbaṃ bhūtiśaktī ca sūryaṃ ḍe'ntaṃ madhye viśvamante bhavāni
mantroddhāraḥ saviturvarṇitaste durgākṣaro bhogamokṣaikakahetuḥ

32.24

nāsya vighno na vā doṣo na sādhyāribhayaṃ śive
na śaucaniyamo vāpi viparyayabhayaṃ na hi

32.25

aṣṭasiddhiprado mantraḥ sarvarogaharaḥ paraḥ
sarvārthasādhako devi na deyo yasya kasyacit

32.26

varṇalakṣaṃ japenmantraṃ sādhakaḥ sāṅgamīśvari
kiṃ kiṃ na labhate mantrī vāñchitaṃ sūryamudraṇāt

32.27

lakṣamekaṃ japenmantraṃ daśāṃśaṃ sādhako hunet
tarpayet taddaśāṃśena mārjayet taddaśāṃśataḥ

32.28

bhojayet taddaśāṃśena mantraḥ kalpadrumo bhavet
vaṭe'raṇye śmaśāne ca śūnyāgāre catuṣpathe

32.29

ardharātre'tha madhyāhne puraścaraṇamācaret
sūryoparāgasamaye grāsāvadhi vimuktitaḥ

32.30

yajjapet tadvavet siddhaṃ bhogamokṣaikakāraṇam
mantrasyāsya mahādevi ṛṣirbrahmā samīritaḥ

32.31

gāyatryaṃ chanda ityuktaṃ savitā devatā smṛtaḥ
vyoṣaṃ bījaṃ parā śaktistāraṃ kīlakamīśvari

32.32

dharmārthakāmamokṣārthe viniyoga iti smṛtaḥ
māyābījena ṣaḍdīrghabhāginā nyāsamācaret

32.33

karanyāsaṣaḍaṅgāni yathāvadanupūrvaśaḥ
utkīlanādimantrāḥ
kolatrayaṃ paṭhed devi japādau sādhakottamaḥ

32.34

utkīlanaṃ bhaved devi mantrarājasya pārvati
śaratrayaṃ paṭhenmadhye mūlamantrasya sādhakaḥ

32.35

sañjīvanamanuḥ prokto mantrasyāsya maheśvari
mātṛkāśodhitaṃ mantraṃ kṛtvā pārvati sādhakaḥ

32.36

nistauṭilyo bhavenmantraḥ sarvasiddhipradāyakaḥ
vedādidimbakāntyacchaṃ śaktirmadhye paṭhecchive

32.37

śivaśāpaṃ mocaya dviḥ punarjayā vibhāvasoḥ
iyaṃ śāpaharī vidyā japyā sādhakasattamaiḥ

32.38

daśadhā saviturdevi yena mantrī śivaṃ bhajet
siddhaṃ mantraṃ japed devi yathāśaktyākṣamālayā

32.39

sarvarogairvimukto hi bhogamokṣaphalaṃ labhet
jagadante paṭhed devi śaradvāraṃ ca kaulikaḥ

32.40

saṃpuṭākhyo'styayaṃ mantro mantrarakṣāmaṇiḥ paraḥ
gurūpadeśato jñeyaḥ sūryāstramanuruttamaḥ

32.41

yaṃ japvā saviturmantro bhavet kalpadrumo'cirāt
tāraṃ vyoṣaṃ ca sūryāya vidmahe tadanantaram

32.42

māyāṃ śaktiṃ samuccārya jyotīrūpāya dhīmahi
tannaḥ śivaśca śaktiśca paramātmā pracodayāt

32.43

varṇitā sūryagāyatrī sarvatantreṣu gopitā
daśadhā sādhakairjapyā sandhyāsvarcāsu tarpaṇe

32.44

sūryadhyānam
dhyānamasya pravakṣyāmi sarvadevarahasyakam
sarvarogāpahaṃ devi bhogamokṣaphalapradam

32.45

kalpāntānalakoṭibhāsvaramukhaṃ sindūradhūlījapāvarṇaṃ ratnakirīṭinaṃ dvinayanaṃ śvetābjamadhyāsanam
nānābhūṣaṇabhūṣitaṃ smitamukhaṃ raktāmbaraṃ cinmayaṃ
sūryaṃ svarṇasarojaratnakalaśau dorbhyāṃ dadhānaṃ bhaje

32.46

sūryayantroddhāraḥ
yantroddhāraṃ pravakṣyāmi sarvāśāparipūrakam
sarvasaṃmohanaṃ divyaṃ sarvasiddhimayaṃ śive

32.47

bindutrikoṇavasukoṇasuvṛttarūpaṃ divyāṣṭapatravilasadhanāraṇāḍhyam
rekhātrayāñcitadharāsadanaṃ ca devi śrīcakrametaduditaṃ saviturvareṇyam

32.48

layāṅgamasya yantrasya vakṣye pārvati sādharam
yasya śravaṇamātreṇa koṭipūjāphalaṃ labhet

32.49

śakrāgniyamamāsāda-varuṇānilavittadāḥ
seśāḥ pūjyā bahidvari yantrarājasya sādhakaiḥ

32.50

gaṇeśaśruṇḍavetālo lolākṣo vikarālakaḥ
antardvāsthāḥ śive pūjyā vāmāvartena sādhakaiḥ

32.51

divyasiddhamanuṣyākhyaṃ gurupaṅktitrayaṃ śive
vṛttatraye'rcayenmantrī gandhapuṣpākṣatādibhiḥ

32.52

candraṃ bhaumaṃ budhaṃ jīvaṃ śukraṃ sauraṃ tamastathā
ketuṃ vasudale devi vāmāvṛttyārcayet sudhīḥ

32.53

dīptāṃ sūkṣmāṃ jayāṃ bhadrāṃ vimalāṃ nirmalāṃ tataḥ
vidyutāṃ sarvatovaktrāṃ grahairvasudale'rcayet

32.54

sūryaṃ divākaraṃ bhānuṃ bhāskaraṃ ravimīśvari
tvaṣṭāraṃ tapanaṃ dharmaṃ vasukoṇe samarcayet

32.55

haṃsaṃ gṛhapatiṃ devi trikoṇe ca trayītanum
śrībindumaṇḍale devi savitāraṃ samarcayet

32.56

kalāḥ samarcayed devi vasukoṇe trikoṇake
tapinīṃ tāpinīṃ caiva bodhinīṃ caiva rodhinīm

32.57

kelinīṃ śoṣiṇīṃ caiva vareṇyākarṣiṇīyutām
etāḥ saṃpūjya vasvaśre kaulikaḥ kulasiddhaye

32.58

māyāṃ viśvāvatīṃ hemaprabhāṃ tryaśre samarcayet
visphurāṃ savitāraṃ ca bindubimbe samarcayet

32.59

kamalaiḥ kevalaṃ devaṃ pūjayedāyudhāni ca
suvarṇapadmaṃ saṃpūjya ratnāḍhyakalaśaṃ śive

32.60

mūlena vidhivad devaṃ namet kaivalyasiddhaye
layāṅgametadākhyātaṃ sarvatantreṣu gopitam

32.61

padmamudrānirṇayaḥ
mudrāṃ padmābhidhāṃ devi darśayedarcanāvidhau
aṅguṣṭhau vimukhau madhye saṃyojya tarjanīdvayam

32.62

kaniṣṭhike ca saṃyojya madhyamānāmikāḥ pṛthak
padmamudreyamākhyātā bimbamudrāṃ śṛṇu priye

32.63

bimbamudrānirṇayaḥ
aṅguṣṭhau sammukhau kṛtvā sammukhīraṅgulīścaret
ūrdhvaṃ karayugaṃ kṛtvā bimbamudreyamīritā

32.64

bhāskarīmudrānirṇayaḥ
adhomerurvamamadhyā tadūrdhve savyamadhyamā
tathaiva kaulikaḥ kuryādāmataḥ savyato'ṅgulīḥ

32.65

iyaṃ tu bhāskarīmudrā trailokyavaśakāriṇī
sarvarogāpahā khyātā darśanīyārcanāvidhau

32.66

aṅguṣṭhayośca candrārau jñejyāvanāmayostathā
sitāsitau ca tarjanyoḥ rāhuketū pralambayoḥ

32.67

madhye tu bhāskaraṃ devaṃ dhyātvā mudrāṃ pradarśayet
āvāhane ca gandhādau naivedye ca visarjane

32.68

khaśolkāmudrānirṇayaḥ
dhūpadīpādinaivedyaṃ deyaṃ sarvaṃ khaśolkayā
khaśolkākhyā mahāmudrā ( sarvarogāpahāriṇī

32.69

sarvārthasādhanakarī duḥkhadāridryanāśinī
baddhvā muṣṭiyugaṃ devi parva parvaṇi yojayet

32.70

aṅguṣṭhayoniṃ baddhvordhveṃ sarvayonyuttamottamām
khaśolkākhyā mahāmudrā) śatruvargavimardinī

32.71

raviṃ dṛṣṭvā praṇamyādau darśanīyā maheśvari
mahāmudrā mahāgopyā mahāmārtaṇḍavallabhā

32.72

imāṃ yo bhānavīṃ mudrāṃ darśayet pūjane sudhīḥ
śatavarṣasahasrāṇāṃ pūjāphalamavāpnuyāt

32.73

aṣṭau prayogāḥ
prayogānaṣṭa vakṣye'haṃ śṛṇu pārvati sādaram
yeṣāṃ sādhanamātreṇa mantraḥ siddhiprado bhavet

32.74

stambhanaṃ mohanaṃ caiva māraṇākarṣaṇau tataḥ
vaśīkaraṇavidveṣau śāntikī pauṣṭikī kriyā

32.75

eteṣāṃ sādhanaṃ vakṣye sādhakānāṃ hitecchayā
aprakāśyamadātavyaṃ kalau rogāpahaṃ śive

32.76

stambhanaprayogaḥ
ravau prabhāte śayanādutthāyāvaśyakaṃ caret
snātvā japenmahādevi sūryāgre sādhako'yutam

32.77

huned daśāṃśato devi padmapadmākṣaśarkarāḥ
sarpiṣā stambhanaṃ sadyo vāditaskarapāthasām

32.78

sammohanaprayogaḥ
ravau madhyāhnavelāyāṃ japedayutasaṃkhyayā
huned daśāṃśamīśāni ghṛtapadmākṣanāgarān

32.79

tarpayet payasā sadyo mohanaṃ dyusadāmapi
māraṇaprayogaḥ:
ravau sāyaṃ japenmūlaṃ nadītīrasthito rahaḥ

32.80

ayutaṃ taddaśāṃśena hunet padmākṣaparpaṭān
ghṛtena dadhnā santarpya māraṇaṃ dviṣatāṃ bhavet

32.81

ākarṣaṇaprayogaḥ:
ravau niśīthe saṃjapya mūlamantrāyutaṃ śive
huned daśāṃśamambhojaśaṭīghṛtakulatthakaiḥ

32.82

ākarṣaṇaṃ bhavet sadyo devi nākastriyāmapi
vaśīkaraṇaprayogaḥ:
ravau brāhme muhūrte tu snātvā tatra japejjale

32.83

ayutaṃ mūlavidyāyāṃ daśāṃśaṃ juhuyāt sudhīḥ
ghṛtamatsyaṇḍakarpūra-padmapadmākṣakesarān

32.84

indro'pi vaśatāṃ yāti kiṃ punaḥ kṣudrabhūmipaḥ
vidveṣaṇaprayogaḥ:
sūryodaye japeddvidyāṃ sādhako'yutasaṃkhyayā

32.85

juhuyāt sarpirambhoja-mustāparpaṭaśarkarāḥ
viṣeṇa tarpayed devaṃ bhavedvidveṣaṇaṃ dviṣām

32.86

śāntiprayogaḥ
ravāvardhodite devi kūpabhūmau japenmanum
ayutaṃ taddaśāṃśena huned ghṛtayavākaṇāḥ

32.87

ambhojakesaraṃ śuṇṭhīṃ śāntirbhavati tatkṣaṇāt
ativṛṣṭeranāvṛṣṭeḥ rājabhītermaheśvari

32.88

puṣṭiprayogaḥ
ravāvastaṅgate'pyardhe japedvānīramūlake
mantrāyutaṃ mahādevi juhuyād ghṛtagopayaḥ

32.89

padmapadmākṣakiñjalka-matsyaṇḍārkadalāni ca
daśāṃśaṃ tarpayed dadhnā kṣīreṇa sitayā sudhīḥ

32.90

mahāpuṣṭirbhavelloke devānāmapi durlabhā
paṭalopasaṃhāraḥ
ityeṣa paṭalo guhyaḥ savituścātivallabhaḥ
sarvamantramayo divyo gopanīyo mumukṣubhiḥ

32.90.p1

iti śrīrudrayāmale tantre śrīdevīrahasye sūryapaṭalanirūpaṇamekatriṃśa: paṭalaḥ ||31

Linked texts (4)