Pramāṇa · Search · About · API

Devirahasyatantra 54

Devīrahasyatantra 54

Language
Sanskrit

Contents

54.1

adhunā devi vakṣyāmi durgāstotraṃ manoharam
mūlamantramayaṃ divyaṃ sarvasārasvatapradam

54.2

duḥkhārtiśamanaṃ puṇyaṃ sādhakānāṃ jayapradam
durgāyā aṅgabhūtaṃ tu stotrarājaṃ parātparam

54.3

śrīdurgāstotrarājasya ṛṣirdevo maheśvaraḥ
chando'nuṣṭub devatā ca śrīdurgāṣṭākṣarā śive

54.4

duṃ bījaṃ ca parā śaktirviśvaṃ kīlakamadrije
dharmārthakāmamokṣārthe viniyogaḥ prakīrtitaḥ

54.5

dhyānam
dūrvānibhāṃ trinayanāṃ vilasatkirīṭāṃ
śaṅkhābjakhaḍgaśarakheṭakaśūlacāpān
santarjanīṃ ca dadhatīṃ mahiṣāsanasthāṃ
durgāṃ navārakulapīṭhagatāṃ bhaje'ham

54.6

stotram
tāraṃ hāraṃ mantramālāsu bījaṃ dhyāyedantaryo'mba lambālakāntaḥ
tasya smāraṃ smāramaṅghridvayīṃ drāg rambhāyāti svargatā kāmavaśyā

54.7

māyāṃ japedyastava mantramadhye durge sadā durgatikhedakhinnaḥ
bhavet sa bhūmau nṛpamaulimālāmāṇikyanirghṛṣṭapadāravinda

54.8

cākrikaṃ yadi japettvāmbike cakramadhyagata īśvareśvari
sādhako bhavati cakravartināṃ nāyako nayavilāsakovidaḥ

54.9

cakribījamaparaṃ smarecchive yo'rivargavihitāihatavyathaḥ
ājimaṇḍalagato jayedripūn vājivāraṇarathāśrito naraḥ

54.10

dūrvabījaṃ yo japet pretabhūmau sāyaṃ māyābhasmanā liptakāyaḥ
gīrvāṇānāṃ nāyako devi mantrī bhūtvā rājyaṃ prājyamāḍhyaṃ karoti

54.11

vāyavyabījaṃ yadi sādhako japet priyākucadvandvavimardanakṣamaḥ
samastakāntājananetravāgurāvilāsahaṃso bhavitā sa pārvati

54.12

viśvaṃ viśveśvari yadi japet kāmakelīkalānte
rātrau mātrākṣaravilasitanyāsa īśānivāsaḥ
tasya smerānanasarasijā bhrājamānāṅgalakṣmīvaśyāvaśyaṃ surapuravadhūmaulimālaurvaśī sā

54.13

bhūgehāṅgitavahnivṛttavilasannāgāravṛttāṅgitadvayagnyārollasitāgnikoṇavilasacchrībindupīṭhasthitām
dhyāyeccetasi śarvapatni bhavatīṃ mādhvīrasāghūrṇitāṃ
yo mantrī sa bhaviṣyati smarasamaḥ strīṇāṃ dharaṇyāṃ divi

54.14

durgāstavaṃ manumayaṃ manurājamaulimāṇikyamuttamaśivāṅgarahasyabhūtam
prātaḥ paṭhedyadi japāvasare'rcanāyāṃ bhūmau bhavetsa nṛpatirdivi devanāthaḥ

54.15

phalaśrutiḥ
iti stotraṃ mahāpuṇyaṃ pañcāṅgaikaśiromaṇim
yaḥ paṭhedardharātre tu tasya vaśyaṃ jagattrayam

54.16

idaṃ pañcāṅgamakhilaṃ śrīdurgāyā rahasyakam
sarvasiddhipradaṃ guhyaṃ sarvāśāparipūrakam

54.17

guhyaṃ mantrarahasyaṃ tu tava bhaktyā prakāśitam
abhaktāyāpradātavyamityājñā pārameśvarī

54.18

śrīdevyuvāca
bhagavan bhavatānena kathanena maheśvara
śrīpañcāṅgasya durgāyā hyadya krītāsmyahaṃ param

54.19

śrībhairava uvāca
idaṃ rahasyaṃ paramaṃ durgāsarvasvamuttamam
pañcāṅgaṃ varṇitaṃ gopyaṃ gopanīyaṃ svayonivat

54.19.p1

iti śrīrudrayāmale tantre śrīdevīrahasye durgāstotranirūpaṇaṃ nāma pañcāśattamaḥ paṭalaḥ||50

Linked texts (5)