Pramāṇa · Search · About · API

Devirahasyatantra 7: atha ṣaṣṭhaḥ paṭalaḥ

Devīrahasyatantra 7

Language
Sanskrit

Contents

atha ṣaṣṭhaḥ paṭalaḥ

7.1

mantrasañjīvanavidhiḥ
śrībhairava uvāca
atha te varṇayiṣyāmi sañjīvanamanūn priye
eṣāmuccāramātreṇa mantraḥ siddhiprado bhavet

7.2

bālāmantrasañjīvanam
bālāyā devi tryakṣaryāḥ śaktimādau paṭhet sudhīḥ
sañjīvanākhyo mantro'yaṃ divyo mantrasya siddhaye

7.3

tripurabhairavīmantrasañjīvanam
parātrayaṃ paṭhedādau jīvanaṃ bhairavīmanoḥ
kūṭatrayāṇāṃ deveśi trikūṭāyā japet sudhīḥ

7.4

trikūṭā-(dakṣiṇakālī)-mantrasañjīvanam
dvitīyārṇatrayaṃ devi bhavet sañjīvanaṃ manoḥ
siddhavidyā mahāśyāmā sarvadoṣavivarjitā

7.5

japyā sidhyai sadā sadbhirbrahmavidbhirmumukṣubhiḥ
bhadrikāyugalaṃ devi dadyādante manoḥ śive

7.6

bhadrakālīmanoreṣa syāt sañjīvanako manuḥ
tāraṃ parāṃ paṭhedante japādau sādhakeśvari

7.7

rājamātaṅginīdevyā bhavet sañjīvanaṃ manoḥ
ūntrayaṃ paṭhedādau mūlamantrasya vai parām

7.8

mantrasya bhuvaneśvaryā bhavet sañjīvanaṃ param
kālīṃ tāraṃ paṭhedante mantrasyāsya maheśvari

7.9

ugratārāmanoreṣa syāt sañjīvanako manuḥ
vāsanāṃ mūlamantrasya japedante maheśvari

7.10

chinnamastāmanoreṣa syāt sañjīvanako manuḥ
paramādau japed devi kāmamante tathaiva ca

7.11

sumukhīmantrarājasya bhavet sañjīvanaṃ priye
tāradvayaṃ japenmantrī mantrānte māntrikeśvari

7.12

sarasvatīmantrasañjīvanam
sarasvatīmanoreṣa syāt sañjīvanako manuḥ
viśvamante japedādau ṭhadvayaṃ kālikeśvari

7.13

annapūrṇāmantrasañjīvanam
annapūrṇāmanoryena bhavet sañjīvanaṃ param
vāṇīmante japedādau kāmarājaṃ ca sādhakaḥ

7.14

mahālakṣmīmantrasañjīvanam
mahālakṣmīmanordevi bhavet sañjīvanaṃ param
kūrcamādau parāmante japet sādhakasattamaḥ

7.15

śārikāmantrasañjīvanam
śārikāmūlamantrasya bhavet sañjīvanaṃ priye
kāmarājaṃ japedādau māyābījaṃ tathāñjale

7.16

śāradāmantrasañjīvanam
śāradāmantrarājasya sañjīvanamanuḥ smṛtaḥ
manmathaṃ śaktibījaṃ ca japedādau ca sādhakaḥ

7.17

indrākṣīmantrasañjīvanam
indrākṣīmūlamantrasya sañjīvanamanuḥ paraḥ
mṛtsnābījaṃ japed devi praṇavaṃ ca vanāñjale

7.18

bagalāmukhīmantrasañjīvanam
bagalāmantrarājasya bhavet sañjīvanaṃ param
tārakaṃ mūlamantrānte triruccārya japet priye

7.19

mahāturīmantrasañjīvanam
turyamantrasya nirṇītaḥ sañjīvanamanuḥ paraḥ
vahnibījaṃ japedante śaktimādau maheśvari

7.20

mahārājñīmantrasañjīvanam
rājñīmantrasya mantro'yaṃ sañjīvanakaraḥ smṛtaḥ
kūrcamādau ca turagaṃ japedante maheśvari

7.21

jvālāmukhīmantrasañjīvanam
jvālāmukhīmanoreṣa mantraḥ sañjīvanābhidhaḥ
vāgbhavaṃ praṇavādau ca ṭhadvayānte japet parām

7.22

bhīḍāmantrasañjīvanam
eṣa sañjīvano mantro bhīḍābhagavatīmanoḥ
tāramante ramāmādau japet sādhakasattamaḥ

7.23

kālarātrimantrasañjīvanam
gaṇeśvarīkālarātryāḥ syāt sañjīvanako manuḥ
kūrcamādau harānte māṃ japet sādhakasattamaḥ

7.24

bhavānīmantrasañjīvanam
bhavānīmūlamantrasya bhavet sañjīvanaṃ param
māyāmuccārya deveśi trirādau tristathāñcale

7.25

vajrayoginīmantrasañjīvanam
sañjīvanamanurdevi syādvajrayoginīmanoḥ
maṭhamante maṭhaṃ cādau japet pārvati kaulikaḥ

7.26

dhūmravārāhīmantrasañjīvanam
mantro'yaṃ dhūmravārāhyā manoḥ sañjīvanābhidhaḥ
haritaṃ mūlamantrānte japedādau ca manmatham

7.27

siddhalakṣmīmantrasañjīvanam
siddhalakṣmīmanoreṣa syāt sañjīvanako manuḥ
kāṅkṣāmādau ramāmante japet sādhakasattamaḥ

7.28

kulavāgīśvarīmantrasaṃjīvanam
bhavet sañjīvanaṃ deva kulavāgīśvarīmanoḥ
kāmamādau mahādevi japedante ramāṃ śive

7.29

padmāvatīmantrasaṃjīvanam
padmāvatīmanoreṣa smṛtaḥ sañjīvano manuḥ
vāgurāṃ paṅkajānte ca praṇavādau parāṃ japet

7.30

kubjikāmantrasaṃjīvanam
kubjikāmūlamantrasya mantro'yaṃ jīvanābhidhaḥ
vāhlīkaṃ praṇavādau ca mūlānte tu śivaṃ japet

7.31

gaurīmantrasaṃjīvanam
gaurīmantrasya mantro'yaṃ syāt sañjīvanakābhidhaḥ
kūṭamante viśvamādau japet pārvati sādhakaḥ

7.32

khecarīmantrasaṃjīvanam
khecarīmantrarājasya bhavet sañjīvanaṃ śive
vāṇīmādau parāmante japenmāntrikasattamaḥ

7.33

nīlasarasvatīmantrasaṃjīvanam
bhavet sañjīvanaṃ devi nīlāsarasvatīmanoḥ
vāgbhavaṃ praṇavādau ca kāmamante japet śive

7.34

eṣa sañjavano mantraḥ parāśaktimanoḥ smṛtaḥ
adhunā śaivamantrāṇāṃ niṣkīlānāṃ maheśvari

7.35

vakṣye tattvaṃ rahasyaṃ te sañjīvanakaraṃ param
mūlamantrāñcale mantrī japet tāraṃ pṛthak pṛthak

7.36

sarveṣāṃ śaivamantrāṇāṃ bhavet sañjīvanaṃ priye
tathāpi kīlitānāṃ te sañjīvanamanūn bruve

7.37

yeṣāṃ sādhanamātreṇa mūlavidyāśu sidhyati
sūryanāmākṣaradvandvaṃ japedādau ca sādhakaḥ

7.38

mṛtyuñjayamanoreṣa mantraḥ sañjīvanābhidhaḥ
viśvamādau viśvamante japenmāntrikanāyakaḥ

7.39

amṛteśvaramantrasya bhavet sañjīvanaṃ param
vaṭukabhairavamantrasañjīvanam
vaṭukāyeti tārādau japet pārvati sādhakaḥ

7.40

sañjīvanamanuḥ prokto vaṭukasyaiṣa durlabhaḥ
nīlakaṇṭhamantrasañjīvanam
śivaṃ ca praṇavādau tu japet sādhakavandite

7.41

śrīnīlakaṇṭhamantrasya mantraḥ sañjīvanābhidhaḥ
sadyojātamantrasañjīvanam
parāmādau triruccārya japādau sañjapet sudhīḥ

7.42

sadyojātamanoreṣa smṛtaḥ sañjīvano manuḥ
mahāgaṇapatimantrasañjīvanam
śivamante dviruccārya japed devi japāditaḥ

7.43

mahāgaṇapatermantro manoḥ sañjīvanābhidhaḥ
aghoramantrasañjīvanam
vajrabījāni mūlādau japet pārvati sādhakaḥ

7.44

aghoradevamantrasya manuḥ sañjīvanaḥ smṛtaḥ
mahākālamantrasañjīvanam
nirdoṣo mantrarājo'yaṃ mahākālasya pārvati

7.45

asyoccāraṇamātreṇa mantrāḥ sidhyanti sarvadā
kāmeśvaramantrasañjīvanam
kūṭatrayebhyo deveśi dvitīyākṣaramuccaret

7.46

japet kāmeśamantrasya bhavet sañjīvanaṃ śive
vaiṣṇavamantrasañjīvanamantraḥ:
athāhaṃ vaiṣṇavānāṃ te manūnāṃ vacmi jīvanam

7.47

yājñaptvā sādhako devi bhavedbhairavasannibhaḥ
lakṣmīnārāyaṇamantrasañjīvanam
haritaṃ mūlamantrānte japet pārvati sādhakaḥ

7.48

lakṣmīnārāyaṇamanorbhavet sañjīvanaṃ param
rādhākṛṣṇamantrasañjīvanam
śaktimante manorādau vāgbhavaṃ sādhako japet

7.49

śrīrādhākṛṣṇamantrasya sañjīvanamanuḥ smṛtaḥ
viṣṇumantrasañjīvanam
viśrānte praṇavaṃ devi japet sādhakasattamaḥ

7.50

viṣṇumantrasya mantro'yaṃ smṛtaḥ sañjīvanābhidhaḥ
nṛbījaṃ prathamaṃ devi praṇavaṃ cāñjale japet

7.51

lakṣmīnṛsiṃhamantrasya mantraḥ sañjīvanābhidhaḥ
ramāmante triruccārya japedānandanirbhare

7.52

lakṣmīvarāhamantrasya sañjīvanamanuḥ smṛtaḥ
parāyugaṃ japedādau mantrarājasya pārvati

7.53

mantro bhārgavarāmasya manoḥ sañjīvanaḥ smṛtaḥ
mantrānte praṇavaṃ devi tārādau sakalāṃ japet

7.54

śrīsītārāmamantrasya manoḥ sañjīvano manuḥ
viśvamādau parāmante japet pārvati māntrikaḥ

7.55

janārdanamanoreṣa mantraḥ sañjīvanaḥ smṛtaḥ
paramādau parāmante satārāṃ sādhako japet

7.56

viśvaksenamanoreṣa syāt sañjīvanako manuḥ
lakṣmīvāsudevamantrasañjīvanam
ramāmādau ramāmante japādau sañjapet sudhīḥ

7.57

śrīlakṣmīvāsudevasya manoḥ sañjavano manuḥ
paṭalopasaṃhāra
itīdaṃ mantrasarvasvaṃ rahasyaṃ sāramadbhutam
tava bhaktyā mayākhyātaṃ gopanīyaṃ svayonivat

7.57.p1

iti śrīrudrayāmale tantre śrīdevīrahasye mantrasañjīvanavidhinirūpaṇaṃ nāma ṣaṣṭhaḥ paṭalaḥ ||6

Linked texts (4)