Janmakhanda 11

Janmakhaṇḍa 11

Language: Sanskrit

11.35 — 1 part

11.1

prathaikādaśo'dhyāyaḥ
nārāyaṇa uvāca
ekadā gokule sādhvī yaśodā nandagehinī| gṛhakarmaṇi saṃsaktā kṛtvā bālaṃ svakṣasi

11.2

vātyārūpaṃ tṛṇāvartamāgacchantaṃ ca gokulam| śrīharirmanasā jñātvā bhārayukto babhūva ha

11.3

bhārākrāntā yaśodā ca tatyāja bālakaṃ tadā| śayane kārayitvā ca jagāma yamunāṃ mune

11.4

etasminnantare tatra vātyārūpadharo'suraḥ| ādāya taṃ bhrāmayitvā gatvā ca śatayojanam

11.5

babhañja vṛkṣaśākhāśca hatvandhībhūtaṃ ca gokulam| cakāra sadyo māyāvī punastatra papāta ha

11.6

asuro'pi harisparśājjagāma harimandiram| sundaraṃ rathamāruhya kṛtvā karmakṣayaṃ svakam

11.7

pāṇḍacadeśo druvo rājā śāpāddurvāsaso'suraḥ| śrīkṛṣṇacaraṇasparśādgolokaṃ sa jagāma ha

11.8

vātyārūpe gate gopā gopyaśca bhayavihvalāḥ| na dṛṣṭvā bālakaṃ tatra śayānaṃ śayane mune

11.9

sarve nijaghnuḥ svaṃ vakṣaḥsthalaṃ śokākulā bhayāt| kecinmūrcchāmavāpuśca ruruduścāpi kecana

11.10

anveṣaṇaṃ prakurvanto dadṛśurbālakaṃ vraje| dhūlidhūsarasarvāṅgaṃ puṣpodyānāntarasthitam

11.11

bāhyaikadeśe sarasastīre nīrasamanvite| paśyantaṃ gaganaṃ śaśvad(dru)dantaṃ bhayakātaram

11.12

gṛhītvā bālakaṃ nandaḥ kṛtvā vakṣasi satvaram| darśaṃ darśaṃ mukhaṃ tasya ruroda ca śucā'nvitaḥ

11.13

yaśodā rohiṇī śīghraṃ dṛṣṭvā bālaṃ ruroda ca| kṛtvā vakṣasi tadvadavaktraṃ cucumba ca muhurmuhuḥ

11.14

maṅgalaṃ kārayāmāsa snāpayāmāsa bālakam| stanaṃ dadau yaśodā ca prasannavadanekṣaṇā

11.15

nārada uvāca
kathaṃ śaśāpa durvāsāḥ pāṇḍacadeśodbhavaṃ nṛpam| suvicārya vada brahmannitihāsaṃ purātanam

11.16

nārāyaṇa uvāca
pāṇḍacadeśādhipo rājā sahasrākṣaḥ pratāpavān| strīsahasraṃ samādāya kāmabāṇaprapīḍitaḥ

11.17

manohare nirjane ca parvate gandhamādane| vijahāra nadītīre puṣpodyāne manorame

11.18

nānāprakāraśṛṅgāraṃ viparītādikaṃ nṛpaḥ| nakhadantakṣatāṅgaṃ ca kāminīnāṃ cakāra saḥ

11.19

kṛtvā mūrtisahasraṃ ca yogīndro nṛpatīśvaraḥ| kṛtvā sthalavihāraṃ ca jalakrīḍāṃ cakāra ha

11.20

nāryo divasanāḥ sarvā nagnāśca nṛpayoṣitaḥ| vijahruśca puṣpabhadrānadītīre manohare

11.21

etasminnantare tatra samāyāto mahāmuniḥ| śiṣyalakṣaiḥ parivṛto gacchanvai śaṃkaraṃ prati

11.22

dṛṣṭvā muniṃ mahāmatto nottasthau na nanāma ha| vācā hastena rājā ca saṃbhāṣāṃ na cakāra ha

11.23

dṛṣṭvā cukopa nṛpatiṃ śaśāpa sphuritādharaḥ| asuro bhava pāpiṣṭha yogādbhraṣṭo bhuvaṃ vraja

11.24

bhārate lakṣavarṣaṃ ca sthātavyaṃ te narādhama| tato haripadasparśādgolokaṃ yāsyasi dhruvam

11.25

sthāne sthāne he mahiṣyo janiṃ labhata bhārate| rājendragehe rājendrāṅgaviṣyatha manoharā

11.26

ityuktvā tu munīndrastu jagāma śaṃkarālayam| hāhāśabdaṃ vicakruśca śiṣyasaṃghāḥ kṛpālavaḥ

11.27

gate munīndre rājendro ruroda ca sarittaṭe| rurudū ramaṇīyāśca ramaṇyo virahāturāḥ

11.28

he nātha ramaṇaśreṣṭhetyuccārya ca punaḥ punaḥ| tvāṃ vinā vā kva yāsyāmo vayaṃ tvaṃ vā kva yāsyasi

11.29

vayaṃ no vihariṣyāmastvayā sādhaṃ sunirjane| na kariṣyasi rājyaṃ tvaṃ na yāsyāmo gṛhaṃ vayam

11.30

śaraccandraprabhāsuṣṭaṃ na drakṣyāmo mukhaṃ tava| prasāritābhyāṃ bāhubhyāṃ nā''liṅgayiṣyāma .ityataḥ

11.31

ityuktvā ruruduḥ sarvāḥ puraskṛtya narādhipam| mūrcchamivāpuścaraṇaṃ dhṛtvā rājñaḥ sarittaṭe

11.32

rājā'gnikuṇḍamādhāya nārībhiḥ saha nārada| smṛtvā haripadāmbhojaṃ jvaladagniṃ viveśa ha

11.33

hāhākāraṃ surāḥ sarve vicakrurgagane sthitāḥ| ityūcurmunayaścaivaṃ daivaṃ ca balavattaram

11.34

sa ca rājā tṛṇāvarto jagāma harimandiram| mahiṣyo bhārate varṣe lebhire janma vāñchitam

11.35

ityevaṃ kathitaṃ sarvaṃ harermāhātmyasuttamam| mokṣaṇaṃ nṛpateścaiva munīndraśāpahetukam

11.35.p1

iti śrībrahma0 mahā0 śrīkṛṣṇajanmakhe nāradanā0 tṛṇāvartavadho nāmaikādaśo'dhyāyaḥ ||11