Janmakhanda 24: atha trayoviṃśo'dhyāyaḥ
Janmakhaṇḍa 24
- Language
- Sanskrit
Contents
- 24.151 — 1 part
atha trayoviṃśo'dhyāyaḥ
24.1
nārada uvāca
kena pāpena balijo gardabhatvamavāpa ha| durvāsāḥ kena doṣeṇa śaśāpa dānaveśvaram
24.2
kena puṇyena vā nātha balijaḥ śrīhareḥ padam| sahasaṃktatvamurvitaṃ ca saṃprāpa dānavādhipaḥ
24.3
mune sarvaṃ suvistārya vada saṃdehabhañjana| aho kavimukhe kāvyaṃ nūtnaṃ nūtnaṃ pade pade
24.4
nārāyaṇa uvāca
śṛṇu vatsa pravakṣye'hamitihāsaṃ purātanam| purā śrutaṃ dharmavaktrātparvate gandhamādane
24.5
pādmakalpaṃ ca vṛttāntaṃ vicitraṃ sumanoharam| nārāyaṇakathopetaṃ karṇapīyūṣamuttamam
24.6
yatra kalpe kathā ceyaṃ tatra tvamupabarhaṇaḥ| ākalpajīvī saśrīkaḥ sundaraḥ sthirayauvanaḥ
24.7
pañcāśatkāminīnāṃ ca patiḥ śṛṅgāratatparaḥ| vareṇa brahmaṇastvaṃ ca sukaṇṭho sthirayauvanaḥ
24.8
anukṣaṇaṃ papustāste sundaraṃ mukhapaṅkajam | nimeṣarahitāḥ sarvāḥ kāmabāṇaprapīḍitāḥ
24.9
tāsāṃ prāṇaiśca ghaṭito vidhinā tvamiva śrutam | divāniśaṃ sahacarā na jīvanti tvayā vinā
24.10
puṣpodyāne ca rahasi sthāne sthāne manorame | gahvareṣu ca śailānāṃ kandareṣu nadīṣu ca
24.11
kānaneṣu ca ramyeṣu śmaśāne jantuvarjite | yathāmanorathaṃ tāśca krīḍāṃ cakrustvayā saha
24.12
tadā daivādvidheḥ śāpādbhūtvā dāsīsuto bhavān | adhunā brahmaṇaḥ putro vaiṣṇavocchiṣṭabhojanāt
24.13
asaṃkhyakalpajīvī ca vaiṣṇavapravaro mahān | jñānadṛṣṭyā sarvadarśī priyaśiṣyaśca dhūrjaṭeḥ
24.14
tasya kalpaśca vṛttāntaṃ sune matto niśāmaya | vistārya daityavṛttāntaṃ kathayāmi sudhopamam
24.15
ekadaiva baleḥ putro nāmnā sāhasiko balī | svatejasā surāñjitvā pratasthe gandhamādanam
24.16
candanokṣitasarvāṅgo ratnabhūṣaṇabhūṣitaḥ | ratnasiṃhāsanasthaśca bahusainyasamanvitaḥ
24.17
etasminnantare tena yathā yāti tilottamā | rūpeṇāpsarasāṃ śreṣṭhā nānāveṣavidhāyinī
24.18
cārucampakavarṇābhā ratnābharaṇabhūṣitā | navayauvanasaṃpannā kāmabāṇaprapīḍitā
24.19
īṣaddhāsyaprasannāsyā divyavastraṃ subibhratī | vakrabhrūbhaṅgayutā sā gajendramandagāminī
24.20
stanamūruṃ mukhenduṃ ca dṛṣṭvā sāhasiko yuvā | vāyunā suktavastrāyāstasyā mūrcchāmivāpa ha
24.21
sā dadarśa baleḥ putramatīva sumanoharam | praphullamālatīmālāṃ bibhrataṃ navayauvanam
24.22
śaratpārvaṇacandrāsyaṃ susmitaṃ sumanoharam | dṛṣṭvā taṃ vismitā kāmātkaṭākṣaṃ ca cakāra sā
24.23
krīḍāyai candralokaṃ ca gacchantī candrakāmukī | tasthau kena chalenaiva mattā śṛṅgāralālasā
24.24
daśāṃ daśāṃ ca tasyāsyaṃ prahasya vakracakṣuṣā | mukhasyā''cchādanaṃ cakre vāsasā sā punaḥ punaḥ
24.25
pulakāṅkitasarvāṅgaṃ dharmakarmasamanvitam | babhūva kāmamattāyā yonau kaṇḍūyanaṃ jalam
24.26
visasmāra śaśadharaṃ baliputramanorathā | aho ko veda bhuvane durjñeyaṃ puṃścalīmanaḥ
24.27
puṃścalyāṃ yo hi viśvasto vidhinā sa viḍambitaḥ | bahiṣkṛtaśca yaśasā dharmeṇa svakulena ca
24.28
vāñchitaṃ nūtanaṃ prāpya vinaśyati purātanam | tadā svakarmasādhyā sā ko vā tasyāḥ priyo'priyaḥ
24.29
daive karmaṇi paitrye ca putre bandhau na bhartari | dāruṇaṃ puṃścalīcittaṃ sadā śṛṅgārakarmaṇi
24.30
prāṇādhikaṃ ratijñaṃ sā'mṛtadṛṣṭyā ca puṃścalī | ratnapradaṃ ratnavijñaṃ viṣadṛṣṭyā hi paśyati
24.31
sarveṣāṃ sthalamastyeva puṃścalīnāṃ na kutracit | dāruṇā puṃścalī jātirnaraghātibhya eva ca
24.32
niṣkṛtiḥ 'sarvabhogānte sarveṣāmasti niścitam | na puṃścalīnāṃ viprendra yāvaccandradivākarau
24.33
anyāsāṃ kāminīnāṃ ca kīṭaṃ hantuṃ ca yā dayā | sā nāsti puṃścalīnāṃ tu kāntaṃ hantuṃ purātanam
24.34
kāntaṃ dṛṣṭvā hinastyeva sopāyenāvalīlayā | ratijñaṃ nūtanaṃ prāpya viṣatulyaṃ purātanam
24.35
pṛthivyāṃ yāni pāpāni puṃścalīṣveva bhārate | tiṣṭhanti tābhyo na parāḥ pāpiṣṭhāḥ santi kecana
24.36
puṃścalīparipakvānnaṃ sarvapātakamiśritam | daive karmaṇi paitrye ca na deyaṃ ca tathā jalam
24.37
annaṃ viṣṭhā jalaṃ mūtraṃ puṃścalīnāṃ ca niścitam | dattvā pitṛbhyo devebhyo bhuktvā ca narakaṃ vrajet
24.38
śatavarṣaṃ kālasūtre pacyatyeva sudāruṇe | ghorāndhakāre kṛmayastaṃ daśanti divāniśam
24.39
puṃścalyannaṃ ca yo bhuṅkte daivādyadi narādhamaḥ | saptajanmakṛtaṃ puṇyaṃ tasya naśyati niścitam
24.40
āyuḥ śrīyaśasāṃ hāniriha loke paratra ca | tasmādyatnādrakṣaṇīyaṃ pākapātraṃ kalatrakam
24.41
puṃścalīdarśane puṇyaṃ yātrāsiddhirbhaveddhruvam | sparśane ca mahāpāpaṃ tīrthasnānādviśudhyati
24.42
snānaṃ dānaṃ vrataṃ caiva japaśca devapūjanam | niṣphalaṃ puṃścalīnāṃ ca bhārate jīvanaṃ vṛthā
24.43
kathitaṃ kulaṭākhyānaṃ durjñeyaṃ ca yathāgamam | saṃvādaṃ ca tayostatra prakṛtaṃ śṛṇu nārada
24.44
sa punaścetanāṃ prāpya tāṃ dṛṣṭvaiva baleḥ sutaḥ | kāmāturaḥ pramattaśca jagāma kulaṭāntikam
24.45
uvāca kuṭilāpāṅgīṃ pīnaśroṇipayodharām | vrīḍayā vāsasā vaktramācchannaṃ kurvatīṃ mudā
24.46
sāhasika uvāca
kāsi tvaṃ kasya kanyāsi kasya kāntāsi kāmini | svayaṃ kva yāsi kaṃ subhrūḥ puṇyavantaṃ manoharam
24.47
kalpānte tapasā pūtaṃ bhoktuṃ tvāmeva sundari | yaṃ taṃ yāsi yāhi sā tvaṃ bhṛtyaṃ māṃ kartumarhasi
24.48
krīṇīhi ratipuṇyena māṃ bhṛtyaṃ ratilolupam | śṛṅgāralolupā tvaṃ ca śṛṅgāraṃ dehi kāmuki
24.49
tvayā saha samā''śleṣo vidhinā ca vinirmitaḥ | nirūpitaṃ yattenaiva vāryate kena tatpriye
24.50
vākyaṃ pīyūṣasadṛśaṃ smitaṃ vada sundari | śīghraṃ bhujalatāpāśairbandhanaṃ kuru nirjane
24.51
āsanaṃ dehi kalyāṇi svoruṃ kanakasaṃnibham | stanamaṇḍalakumbhaṃ ca 'pātrayogyaṃ pradarśaya
24.52
tīkṣṇāstreṇa kaṭākṣeṇa jarjaraṃ kuru bhāmini | kāmasarpadaṣṭaṃ pādasparśanenārujaṃ kuru
24.53
adharoṣṭhāmṛtaṃ svādu dehi me kṣudhitāya ca | pakvadāḍimabījābhaṃ dantaṃ darśaya sundaram
24.54
gambhīranābhiṃ trivalīṃ draṣṭumicchāmi sundari | nīvīpramokṣaṇaṃ kartumicchā me vartate sadā
24.55
śroṇīṃ paśyāmi lalitaṃ munimānasamohinīm| śaranmadhyāhnapadmānāṃ prabhāmocanalocanām
24.56
śaratpārvaṇacandrāsyaṃ prasannaṃ ca pradarśaya| sā ca tadvacanaṃ śrutvā tamuvāca smarāturā
dṛṣṭvā''ttaṃ kāmabāṇena mānasaṃkṣayakāminī
24.57
tilottamovāca
patistvatsadṛśo nātha kāminīnāṃ manīṣitaḥ| baliputro'si dharmiṣṭho rūpavānguṇavānyuvā
24.58
śṛṅgāranipuṇaḥ kāntaḥ kāmaśāstraviśāradaḥ| sadā manojñaḥ strīṇāṃ tvaṃ suveṣaśca svabhāvataḥ
24.59
suveśaṃ sundaraṃ śāntaṃ kāntaṃ dāntamarogiṇam| śṛṅgārarajñaṃ guṇajñaṃ tvāṃ yuvānaṃ rasikaṃ śucim
24.60
strīmanojñaṃ dayāluṃ ca baliṣṭhaṃ santamīśvaram| dātāramanuraktaṃ ca kāntamicchati kāminī
24.61
ete sarve guṇāḥ kānta santi kānte tvayi dhruvam| tvāṃ na vāñchanti yāḥ kāntāstā avijñāśca vañcitāḥ
24.62
saṃtoṣaṃ te kariṣyāmi samāgasya vidhorgṛhāt| veṣaṃ kṛtvā tu candrārthaṃ yātrādya tasya kāminī
24.63
anyāśleṣaṇamātreṇa bhavitā dharmalaṅghanā| yāśca dharmānna rakṣanti tāsāṃ ca jīvanaṃ vṛthā
24.64
candrāśleṣaṃ na jānanti yāstā mūḍhāḥ prakīrtitāḥ| tā eva mātṛgarbhasthā na prājñāḥ pauruṣaiṃ rasaiḥ
24.65
svarvaidyau madanaścandro marutvānnalakūbaraḥ | ebhirnā''liṅgitā yāstā vañcitā ratikarmabhiḥ
24.66
divāniśaṃ mānasaṃ me teṣāṃ krīḍāṃ ca cintayet | viśeṣataḥ kāmadevo nipuṇo ratikarmaṇi
24.67
candraśṛṅgāramāśleṣamālāpamasṛtādhikam | adya tasya ratidinaṃ tena taccintayaṃnmanaḥ
24.67-2
tilottamāvacaḥ śrutvā jahāsa balinandanaḥ | sakāmaśca sapulakastāmuvāca rahaḥsthale
24.68
sāhasika uvāca
brahmaṇā nirmitā tvaṃ ca kautukena tilottame | ato varā cāpsarasāṃ vidagdharasikeśvarī
24.69
sundopasundayornāśanimittena prayatnataḥ | sarvarūpaguṇādhārā vidhinā ca kṛtā purā
24.70
sarvaṃ jānāsi sarvajñe vijñe suratakarmaṇi | harṣeṇa śrotumicchāmi vada vo mānasaṃ vacaḥ
24.71
atipriyaśca ko vā ca kaḥ svabhāvo varānane | akathyaṃ gopanīyaṃ ca śrotumicchāmi sundari
24.72
gandharvāṇāṃ surāṇāṃ ca rājñāṃ puṇyavatāmapi | sarveṣāṃ prāṇatulyā tvameṣu te kaḥ paraḥ priyaḥ
24.73
asurasya vacaḥ śrutvā prahasya sā tilottamā | mukhamācchādanaṃ cakre vilokya vakracakṣuṣā
24.74
satyaṃ sāramantarasthamavyaktamatigopanam | uvāca mānasaṃ vākyamajñātaṃ viduṣāmapi
24.75
tilottamovāca
kathanīyaṃ sāhasika puṃścalīnāṃ manovacaḥ| strījātīnāṃ ca sarvāsāmupahāsakaraṃ param
24.76
sarveṣāmapi durjñeyaṃ caritaṃ yoṣitāmapi| viśeṣato'pi durjñeyaṃ puṃścalīnāṃ manovacaḥ
24.77
vedavedāṅgaśāstrāntaṃ sarvaṃ jānāti paṇḍitaḥ| kānta nāntaṃ vijānāti diśāmākāśayoṣitam
24.78
viṣādapyapriyo vṛddho ratnado'pi ca yoṣitām| yuvā sarvasvahartā cetprāṇebhyo'pi paraḥ priyaḥ
24.79
yuvānaṃ sundaraṃ dṛṣṭvā hartā bhavati puṃścalī| viśeṣataḥ suveṣaṃ ca dṛṣṭvaiva hṛtacetanā
24.80
nimeṣarahitā tasya locanābhyāṃ pibenmukham| yonau jalaṃ kṣarettasyāḥ sadyaḥ kaṇḍūyanaṃ bhavet
24.81
mano'tilolamasthairyaṃ sarvāṅgāni cakampire| jaḍībhūtaṃ śarīraṃ ca pradagdhaṃ madanānalāt
24.82
saṃprāpya taṃ cedrahasi sā''lāpaṃ kurute sphuṭam| sakaṭākṣaṃ smeravaktraṃ darśayitvā punaḥ punaḥ
24.83
tathā yadi vaśaṃ kartuṃ na śaśāka jitendriyam| svamaṅgaṃ darśayitvā tamantarvartvidaṃ sphuṭaṃ vadet
24.84
duḥsādhye nāyake duḥkhaṃ bhavedājanmajanmani| tattulyaṃ tatparaṃ prāpya taṃ vismarati puṃścalī
24.85
puṃścalīnāmapriyaḥ kaḥ kaḥ priyo vā mahītale| yo'tiśṛṅgāranipuṇaḥ sa ca prāṇādhikaḥ priyaḥ
24.86
pūrvajāraṃ patiṃ putraṃ bhrātaraṃ pitaraṃ prasūm | viśiṣṭaṃ nūtanaṃ prāpya sarvaṃ tyajati līlayā
24.87
na dānena na mānena satyena stavanena vā | nopakāreṇa prītyā vā sā sādhyā suratiṃ vinā
24.88
śayane bhojane cāpi svapne jñāne divāniśam | nityaṃ satpuruṣāśleṣaṃ smaranti kulaṭāḥ striyāḥ
24.89
śṛṅgāranipuṇānāṃ ca dhyānasādhyā ciraṃ param | dāruṇā puṃścalījātiḥ prārthayantī navaṃ navam
24.90
sarvāsāṃ kulaṭānāṃ ca caritaṃ kathitaṃ mayā | akathyaṃ gopanīyaṃ ca mama hṛdvacanaṃ śṛṇu
24.91
mama santi priyatarā gandharveṣu sureṣu ca | yuvāno ratiśūrāśca kāmaśāstraviśāradāḥ
24.92
viśeṣataḥ śaśadhare sneho me vidyate paraḥ | tato'tiriktaḥ sarvasmādapi kāmaḥ priyo mama
24.93
priyo me kāmasadṛśo na bhūto na bhaviṣyati | smarasya smaraṇāttūrṇaṃ susnigdhaṃ mānasaṃ mama
24.94
ityevaṃ kathitaṃ sarvamātmano yoṣitāmapi | ājñāṃ kuru mahārāja yāsyāmi candrasaṃnidhim
24.95
candrasthānāttava sthānaṃ samāgatya suniścitam | saṃtoṣaṃ tava daityendra kariṣyāmi na saṃśayaḥ
24.96
śrutvaivaṃ baliputraśca jahāsoccaiḥ punaḥ punaḥ | sā vakracakṣuṣā''lokya taṃ jahāsa smarāturā
24.97
chalena darśayāmāsa kaṭhinaṃ stanayoryugam | cārucampakavarṇābhaṃ vartulaṃ pīnamucchritam
24.98
śroṇī sukaṭhināṃ ramyāṃ rambhāstambhavinindinīm| sakaṭākṣaṃ smeramukhaṃ kapolaṃ pulakāñcitam
24.99
rahaḥsthānaṃ samāsādya kāmena hatacetanā| pulakāñcitasarvāṅgī locanābhyāṃ papau mukham
24.100
tasya rūpaṃ ca veṣaṃ ca darśaṃ darśaṃ punaḥ punaḥ| mukhasyā''cchādanaṃ bhāvātkurvatī sūkṣmavāsasā
24.101
atikāmāturāṃ dṛṣṭvā suprājño balinandanaḥ| papraccha kāminīṃ kāmī bhāvaṃ vijñātumutsukaḥ
24.102
sāhasika uvāca
kiṃ kariṣyasi māṃ satyaṃ vada paṅkajalocane| kāryāntaraṃ kariṣyāmi suciraṃ sthātumakṣamaḥ
24.103
kāminīṣu balātkāro na dharmo dharmiṇāṃ priye| viśeṣato'tividuṣāṃ nāsmākaṃ svakulocitaḥ
24.104
śṛṅgāraṃ dehi vā gaccha ratiṃ kartuṃ surāntike| kaḥ kṣamo vā vaśīkartuṃ puṃścalīṃ bahugāminīm
24.105
dānavasya vacaḥ śrutvā śuṣkakaṇṭhoṣṭhatālukā| ātmānamadhamaṃ manyā bhidyamānā smarāstrataḥ
24.106
tilottamovāca
kathamevaṃ brūhi(ṣi)tvaṃ me kāntaḥ prāṇādhikaḥ priyaḥ| kathaṃ vā kopayukto'si kuru kāryaṃ manīṣitam
24.107
tvāmeva vimukhaṃ kṛtvā yāsi candrāntikaṃ yadi| tavābhiśāpāttatraiva sadyo vighno bhaviṣyati
24.108
vihāraṃ kuru bhadraṃ te kariṣyati hariḥ svayam| pade pade śubhaṃ tasya yaḥ strīmānaṃ ca rakṣati
24.109
avamanya striyaṃ mūḍho yo yāti puruṣādhamaḥ| pade pade tadaśubhaṃ karoti pārvatī satī
24.110
tilottamāvacaḥ śrutvā jahāsa balinandanaḥ| kāmaśāstreṣu niṣṇātastadbhāvaṃ bubudhe sudhīḥ
24.111
bhāvaṃ vijñāya bhāvajñaḥ kāmaśāstraviśāradaḥ| kare dhṛtvā samāśliṣya cucumba mukhapaṅkajam
24.112
jagāma ca tayā sārdhaṃ gandhamādanagahvaram| dadarśa tatra gatvā ca sthānaṃ jantuvivarjitam
24.113
saṃsthāpya ratnadīpāṃśca dhūpaṃ ca sumanoharam| śayyāṃ ratikarīṃ kṛtvā suṣvāpa ca tayā saha
24.114
nānāprakāraśrṛṅgāraṃ cakāra kāmamohitaḥ| tilottamā taṃ bubudhe surādapi vicakṣaṇam
24.115
viparītaratau tuṣṭā babhūva rasikeśvarī| divāniśaṃ na bubudhe navasaṃgamamūrcchitā
24.116
tilottamā kāmabhāvādbaliputramuvāca ha| kṛtvā vakṣasi prāṇeśaṃ stanayorantare sudā
24.117
tilottamovāca
kadā drakṣyāmyahaṃ kānta mukhacandraṃ manoharam| evaṃbhūtaṃ śubhadinaṃ kadā se bhavitā punaḥ
24.118
api kiṃ rūpamāścaryaṃ guṇo vā tava dānava| dhruvaṃ śṛṅgāranipuṇastvatparo nāsti kaścana
24.119
māṃ vismarasi kālena puruṣaḥ ṣaṭpado yathā| strīṇāṃ satpuruṣāśleṣa ājīvaṃ manasi sthitaḥ
24.120
satsaṃgamaḥ śubhadine puṇyātpuṇyavatāṃ bhavet | sadvicchedo duḥkhaheturmaraṇādatiricyate
24.121
pīyūṣabhojanātsvargavāsādapi ca durlabhaḥ | satsaṃgamaḥ sukhamayopyasatsaṃgo viṣādhikaḥ
24.122
kṣaṇaṃ tiṣṭha mahārāja punarāliṅganaṃ kuru | tvayā sārdhaṃ mama prāṇā yāsyanti cetasā saha
24.123
ityevamuktvā kulaṭā kṛtvā vakṣasi sādaram | pumaṅgasaṅgotpulakā mūrcchāmāpa sukhena ca
24.124
kulaṭāliṅganālāpātso'tikāmī babhūva ha | yathā dīptaḥ kṛṣṇavartmā vardhate haviṣā'dhikam
24.125
punaścakāra śṛṅgāramasuroṣṭavidhaṃ mune | cumbanaṃ ca navavidhaṃ yathāsyāne yathocitam
24.126
nakhadantakaraiḥ krīḍāṃ cakāra vividhāṃ punaḥ | kiṃkiṇīnāṃ kaṅkaṇānāṃ babhūva śabda ulbaṇaḥ
24.127
munerdurvāsasastena dhyānabhaṅgo babhūva ha | adṛṣṭasya tayostatra valmīkācchāditasya ca
24.128
yogāsanaṃ kurvataśca gandhamādanagahvare | dhyāyataścaraṇāmbhojaṃ kṛṣṇasya paramātmanaḥ
24.129
na papāta tayordṛṣṭiḥ samīpasthe mahāmunau | kāmātmanorna hi jñānaṃ kāmena hatacetasoḥ
24.130
sahasā cetanā prāpya prajvalanbrahmatejasā | dadarśa puratastau tu munirunmīlya locane
24.131
divāniśaṃ na jānantau saṃyuktau kāmamohitau | dṛṣṭvā cukopa tejasvī rudrāṃśo bhagavānvibhuḥ
24.132
uvāca tau viharānte raktapaṅkajalocanaḥ | dhyānaprāptapadāmbhojavicchedodvignamānasaḥ
24.133
durvāsā uvāca
uttiṣṭha gardabhākāra nirlajja puruṣādhama | bhaktapradhānasya baleḥ putraḥ paśusamaprabhaḥ
24.134
devo vā mānavo vā'pi daityagandharvarākṣasāḥ | lajjāṃ kurvanti satataṃ svajātau ca paśūninā
24.135
jñānalajjāvihīnā ca kharajātirviśeṣataḥ | tasmāttvaṃ dānavaśreṣṭha kharayoniṃ vrajādhunā
24.136
tilottame tvamuttiṣṭha lajjāhīnā ca puṃścalī | etādṛśī spṛhā daitye vraja yoniṃ ca dānavīm
24.137
ityevamuktvā sa munistasthau tatra ruṣā jvalan | tau ca tuṣṭuvaturbhītāvutthāya vrīḍitau munim
24.138
sāhasika uvāca
tvaṃ brahmā tvaṃ ca viṣṇuśca tvaṃ ca sākṣānmaheśvaraḥ | hutāśanastvaṃ sūryaśca sṛṣṭisthityantakārakaḥ
24.139
kṣamāparādhaṃ bhagavankṛpāṃ kuru kṛpānidhe | mūḍhāparādhaṃ satataṃ yaḥ kṣametsa sadīśvaraḥ
24.140
ityevamuktvā daityendro rurodoccaiḥ puro muneḥ | kṛtvā tṛṇāni daśane papāta caraṇāmbuje
24.141
tilottamovāca
he nātha karuṇāsindho dīnabandho kṛpāṃ kuru | vidhisṛṣṭau ca sarveṣāṃ mūḍhā strījātireva ca
24.142
tato'timattā kulaṭā sadā kāmāturā parā | lajjā bhītiścetanā ca na santi kāmuke vibho
24.143
ityuktvā rodanaṃ kṛtvā jagāma śaraṇaṃ muneḥ | vinā vipattau keṣāṃcijjñānaṃ bhavati bhūtale
tayordṛṣṭvā ca vaikalyaṃ babhūva karuṇā muneḥ
24.144
durvāsā uvāca
atiśāpaḥ prasādo vā bhaveddaivena dānava | satkīrtirapakīrtirvā prāvatanaprabhavā dhruvam
24.145
viṣṇubhaktabaleḥ putraḥ sadvaṃśaprabhavo janaḥ | janakādviṣṇubhakto'si jānāmi tvāṃ suniścitam
24.146
janakasya svabhāvo hi janye tiṣṭhati niścitam | yathā śrīkṛṣṇapādāṅkaḥ kālīyavaṃśasastake
24.147
samprāpya gārdabhīṃ yoniṃ vatsa nirmarṇitāṃ vraja | pūrvaṃ kṛṣṇārcanaphalaṃ na hi luptaṃ satāṃ cirāt
24.148
vṛndāraṇyaṃ tālavanaṃ vraja śīghraṃ vrajāntikam | prāṇāṃstyaktvā hareścakrānmuktiṃ prāpsyasi niścitam
24.149
tilottame bhārate tvaṃ bāṇaputrī bhaviṣyasi | śrīkṛṣṇapautrāśleṣeṇa punaḥ pūtā bhaviṣyasi
24.150
ityevamuktvā sa munirvirarāma mahāmune | tau jagmuturyathāsthānaṃ praṇamya munipuṃgavam
24.151
ityuktaṃ sarvavṛttāntaṃ daityasya kharajanmanaḥ | tilottamā bāṇaputrī hyuṣāniruddhakāminī
24.151.p1
iti śrībrahmao mahāo śrīkṛṣṇajanmakhao nāradanāo tilottamāvaliputrayobrahmaśāpaprastāvo nāma trayoviṃśo'dhyāyaḥ ||23
Linked texts (2)
- Brahmavaivartapurāṇa — Vyāsa, Sanskrit
- Kṛṣṇajanmakhaṇḍa — Sanskrit