Janmakhanda 40: athaikonacatvāriṃśo'dhyāyaḥ
Janmakhaṇḍa 40
- Language
- Sanskrit
Contents
- 40.65 — 2 parts
athaikonacatvāriṃśo'dhyāyaḥ
40.1
śrīkṛṣṇa uvāca
iti stutvā himagirirvasataḥ śaṃkarasya ca | uvāsa purato dūre labdhājñaḥ sarvasaṃmataḥ
40.2
madhuparkādikaṃ tasmai dadau bhaktipūrvakam | munīnsaṃpūjayāmāsa tataḥ śaṃkarapārṣadān
40.3
tadā tatra samāgatya menakā strīgaṇaiḥ saha | dadarśa vaṭamūlasthaṃ śaṃkaraṃ candraśekharam
40.4
īṣaddhāsyaprasannāsyaṃ vasantaṃ vyāghracarmaṇi | madhye munigaṇānāṃ ca jvalantaṃ brahmatejasā
40.5
yathā''kāśe tārakāṇāṃ dvijarājaṃ virājitam | paramāhlādakaṃ rūpaṃ kandarpakoṭisaṃnibham
40.6
vihāya vārdhakāvasthāṃ dadhataṃ navayauvanam | atīva sundaraṃ ramyaṃ cittacoraṃ ca yoṣitām
40.7
kāmaṃ kāmāturāṇāṃ ca satīnāṃ ca sutaṃ yathā | vaiṣṇavānāṃ mahāviṣṇuṃ śaivānāṃ ca sadāśivam
40.8
śaktisvarūpaṃ śāktānāṃ saurāṇāṃ sūryarūpiṇam | kālasvarūpaṃ duṣṭānāṃ śiṣṭānāṃ paripālakam
40.9
kālakālasamaṃ mṛtyormṛtyumṛtyuṃ bhayānakam | vyāghracarmacāruvastraṃ babhūva bhasmacandanam
40.10
sarpāḥ sundaramālyāni kastūrī yā viṣaprabhā | jaṭā sulalitā cūḍā candrastvalikacandanam
40.11
sucārvī mālatīmālā gaṅgādhārā manoharā | asthimālā ratnamālā dhattūraṃ cārucampakam
40.12
ekībhūtaṃ pañcavaktraṃ netrayugmābjaśobhitam | śaratpārvaṇacandrābhāṃ pracchādya dīptamuttamam
40.13
bandhujīvavinindyaikamoṣṭhādharamanoharam | śvetaścandro vṛṣendraśca bhūtādyā nartakā iva
40.14
sadyo vyatikramaṃ sarvaṃ maheśasya maheśvari | dṛṣṭvaivaṃ śivarūpaṃ ca menā tuṣṭā babhūva ha
40.15
kāścinniseṣarahitāḥ kāmena pulakāñcitāḥ | atikāmāturāḥ satyaḥ prāpurmūrcchāṃ ca kāścana
40.16
kāścidvinindya kāntāṃśca praśaśaṃsurmaheśvaram | manorathena manasā samāśliṣyanti kāścana
40.17
kācinmānasikaṃ kāmātkurvantī cumbanaṃ mudā | dhruvaṃ kāmaṃ kariṣyāmo vayaṃ ca kāmasāgare
40.18
asmākamevaṃ bhartā cetparatra ca yato bhavet | ihaivaṃ kiṃ kariṣyāmo vayaṃ kāntai ratairalam
40.19
dṛṣṭvā tamevaṃ suciramiti jalpanti kāścana
40.20
kāściddṛṣṭvā śivaṃ kiṃcinmukhaṃ mācchādya vāsasā | sasmitā vakranayanāḥ paśyantyevaṃ punaḥ punaḥ
40.21
vayaṃ gṛhaṃ na yāsyāmo yāsyāmaḥ śivasaṃnidhim | śaratsudhāṃśuvadanaṃ drakṣyāmo'harniśaṃ mudā
40.22
saṃsāraṃ na kariṣyāmaḥ praviśāmo hutāśanam | bhavitā naḥ śivaḥ svāmītyevaṃ jalpanti kāścana
40.23
aho puṇyavatī durgā ślāghyate janma bhārate | yasyā ayaṃ śivaḥ svāmītyevaṃ jalpanti kāścana
40.24
mudā menā śivaṃ dṛṣṭvā gṛhaṃ tābhirjagāma ha | śivaṃ saṃpūjya śailendraḥ praṇamya svagṛhaṃ yayau
40.25
kṛtvā'numānaṃ rahasi girīśo menayā saha | durgāṃ prasthāpayāmāsa śivāya śivasaṃnidhim
40.26
pārvatī sakhibhiḥ sādhaṃ veṣaṃ kṛtvā manoharam | bhāvānuraktā harṣeṇa jagāma śivasaṃnidhim
40.27
dṛṣṭvā śivā śivaṃ śāntaṃ prasannavadanekṣaṇam | saptapradakṣiṇaṃ kṛtvā sasmitā praṇanāma sā
40.28
ananyabhāvaṃ guṇinamaparaṃ jñānināṃ varam | sundaraṃ labha bhartāraṃ sundarītyāśiṣaṃ dadau
40.29
bhavitā tava saubhāgyaṃ śubhe svāmini saṃtatam | putraste bhavitā sādhvi nārāyaṇasamo guṇaiḥ
40.30
bhavitā te parā pūjā trailokye jagadambike | brahmāṇḍeṣu ca sarveṣu sarveṣāṃ ca parā bhava
40.31
sapta pradakṣiṇāḥ kṛtvā yato bhaktyā tvayā natam | saptajanmani tuṣṭo'haṃ tatphalaṃ labha sundari
40.32
tīrthe kānte'bhīṣṭadeve gurau mantre tathauṣadhe | āsthā ca yādṛśī yāsāṃ siddhistāsāṃ ca tādṛśī
40.33
ityuktvā śaṃkarastūrṇaṃ brahmajyotiḥ paraṃ ca sām | dadhyau yogāsanaṃ kṛtvā yogīśo vyāghracarmaṇi
40.34
prakṣālya caraṇau devī papau taccaraṇodakam | cakāra mārjanaṃ bhaktyā vahniśaucena vāsasā
40.35
ratnasiṃhāsanaṃ ramyaṃ viśvakarmādinirmitam | apūrvaṃ kāṃsyapātrasthaṃ naivedyaṃ pradadau kila
40.36
arghyaṃ mandākinītoyasaṃyuktaṃ caraṇe dadau | sugandhicandanaṃ cārukastūrīkuṅkumānvitam
pradadau mālatīmālāṃ gale garalasundare
40.37
bhaktyā pūjāṃ cakārātha puṣpavṛṣṭiṃ ca tuṣṭaye | pīyūṣaṃ svarṇapātrasthaṃ pradadau madhuraṃ madhu
40.38
ratnapradīpaśatakaṃ samantāddhūpamuttamam | trailokyadurlabhaṃ vastraṃ svarṇayajñopavītakam
40.39
sugandhiśītatoyaṃ ca pānārthaṃ pārvatī dadau | atīva sundaraṃ ramyaṃ ratnasārendrabhūṣaṇam
40.40
durlabhāṃ kāmadhenuṃ ca svarṇaśṛṅgasaṃyutām | snānīyaṃ tīrthatoyaṃ ca tāmbūlaṃ ca manoharam
40.41
dattvā ṣoḍaśopacāraṃ praṇanāma punaḥ punaḥ | saṃpūjya śūlinaṃ bhaktyā yathau nityaṃ piturgṛham
40.42
śuśrāvāpsarasāṃ vaktrāddevīmindro maheśvaraḥ | śrutvā vārtāṃ śunāsīro nanarta harṣasaṃyutaḥ
40.43
dūtadvārā kāmadevamānināya tvarānvitaḥ | indrājñayā kāmadevaḥ prajagāmāmarāvatīm
40.44
tūrṇaṃ prasthāpayāmāsa taṃ ca yatra śivaḥ śivā | pañcasāyakasaṃyuto jagāma pañcasāyakaḥ
40.45
prasannavadanaḥ śrīmānyatra śaktiyutaḥ śivaḥ | gatvā dadarśa madanaḥ śivāyuktaṃ śivaṃ vibhum
40.46
śāntaṃ trailokyakāntaṃ ca prasannavadanekṣaṇam | kāmaḥ sthito'ntarikṣe ca dhṛtvā ca saśaraṃ dhanuḥ
40.47
cikṣepāstraṃ durnivāryamamoghaṃ śaṃkare mudā | babhūvāmoghamastraṃ ca moghaṃ tatparamātmani
40.48
ākāśa iva nirlipte nirlipte paramātmani | modhībhūte ca śastre ca bhayamāpa ca manmathaḥ
40.49
cakampa purataḥ sthitvā dṛṣṭvā mṛtyuṃjayaṃ vibhum | smasāra tridaśānkāmaḥ śakkādīnbhayavihvalaḥ
40.50
āyayurdevatāḥ sarvāḥ śaṃbhukopena vepitāḥ | cakruḥ stutiṃ ca stotreṇa śaṃkaraṃ tridaśeśvaram
40.51
kopāgnisudvigarantaṃ taṃ kapālilocanādaho | stutiṃ kurvatsu deveṣu sa vahniḥ śaṃbhusaṃbhavaḥ
40.52
jajvālordhvaśikho dīptaḥ pralayāgniśikhopamaḥ | utpatya gagane ghūrṇannipatya dharaṇītale
40.53
bhrāmaṃ bhrāmaṃ ca paritaḥ papāta madanopari | babhūva bhasmasātkāmaḥ kṣaṇena harakopataḥ
40.54
viṣaṇṇā devatāḥ sarvā natavatrā ca pārvatī | vilalāpa bahutaraṃ harasya purato ratiḥ
40.55
tuṣṭuvurdevatāḥ sarvāḥ kampitāścandraśekharam | ratimūcuḥ surāḥ sarve ruruduśca muhurmuhuḥ
40.56
kiṃcidbhasma gṛhītvā ca rakṣa mātarbhayaṃ tyaja | vayaṃ taṃ jīvayiṣyāmo labhiṣyasi priyaṃ punaḥ
40.57
harakopāpanayane suprasanne dine tathā | dṛṣṭvā ratervilāpaṃ ca mūrcchāṃ saṃprāpa pārvatī
40.58
atīndriyaṃ guṇātītaṃ tuṣṭāva candraśekharam | rudantīṃ pārvatīṃ tyaktvā svasthānaṃ prayayau śivaḥ
40.59
sadyo babhūva tatraiva pārvatīdarpamokṣaṇam | rūpayauvanayogarvaṃ tatyāja śailakanyakā
40.60
sukhaṃ darśayituṃ lajjā tadbabhūva sakhīgaṇe | surāśca ratimāśvāsya sarve jagmuḥ svamandiram
40.61
ekonacatvāriṃśo'dhyāyaḥ
praṇamya daṇḍavadbhuvaṃ śokādudvignamānasāḥ | stutvā ruditvā śokena bhayena kāmakāminī
40.62
koparaktekṣaṇaṃ rudraṃ rādhike svālayaṃ yayau | na jagāma piturgehaṃ pārvatī sā tu lajjayā
40.63
svālibhirvāryamāṇā'pi jagāma tapase vanam | prajagmuḥ sahacāriṇyastatpṛṣṭhācchokavihvalāḥ
40.64
mātṛbhirvāryamāṇā sā svarṇadītīrajaṃ vanam | suciraṃ ca tapastaptvā sā saṃprāpa trilocanam
40.65
ratiḥ saṃprāpa madanaṃ śaṃkarasya vareṇa ca | ityevaṃ kathitaṃ sarvaṃ pārvatīdarpamokṣaṇam
40.65.p1
nigūḍhacaritaṃ rādhe kiṃ bhūyaḥ śrotumicchasi
40.65.p2
iti śrībrahma0 mahā0 śrīkṛṣṇajanmakhaṃ0 nāradanā0 rādhākṛṣṇasaṃ0 pārvatīdarpabhaṅgo nāmaikonacatvāriṃśo'dhyāyaḥ ||39
Linked texts (3)
- Brahmavaivartapurāṇa — Vyāsa, Sanskrit
- Śivapurāṇa (complete text) — Sanskrit
- Kṛṣṇajanmakhaṇḍa — Sanskrit