Janmakhanda 41: atha catvāriṃśo'dhyāyaḥ
Janmakhaṇḍa 41
- Language
- Sanskrit
Contents
- 41.153 — 1 part
atha catvāriṃśo'dhyāyaḥ
41.1
rādhikovāca
aho vicitraṃ caritamapūrvaṃ kiṃ śrutaṃ vibho | sundaraṃ śrutipīyūṣaṃ nigūḍhaṃ jñānakāraṇam
41.2
na viśeṣaṃ samāsaṃ ca śrutaṃ na vyāsamīpsitam | adhunā śrotumicchāmi vistīrṇaṃ kathaya prabho
41.3
kiṃ kiṃ tapaḥ kaṭhoraṃ ca cakāra pārvatī svayam | kaṃ kaṃ varaṃ vā saṃprāpya kathamāpa maheśvaram
41.4
ratiḥ kena prakāreṇa jīvayāmāsa manmatham | pārvatīśivayoḥ kṛṣṇa vivāhaṃ varṇaya prabho
41.5
tayo rahasi saṃbhogaṃ pāpināṃ pāpamocanam | kathyatāṃ karuṇāsindho duḥkhināṃ duḥkhamocanam
41.6
dampatīvirahotthitaśca karṇajvālā ca yoṣitaḥ | śrotuṃ kautūhalaṃ kṛṣṇa punaḥ saṃmelanaṃ tayoḥ
41.7
agnijvālā viṣajvālā kṣamā soḍhuṃ ca yoṣitaḥ | dampatīvirahajvālā na śrotuṃ ca kṣaṇaṃ kṣamā
41.8
rādhikāvacanaṃ śrutvā vismitaścakitānarnaḥ | vistīrṇaṃ vaktumārebhe hṛdayena vidūyatā
41.9
dampatīvirahotthitā ca yā rādhā śrotumakṣamā | vicchede śatavarṣīye kimasyā bhavitā sama
41.10
ityevaṃ mānase kṛtvā māyeśo māyayā'nvitaḥ | kṛpāsindhuśca kṛpayā kathāṃ kathitumudyataḥ
41.11
śrīkṛṣṇa uvāca
prāṇādhike rādhike tvaṃ śrūyatāṃ prāṇavallabhe | prāṇādhidevi prāṇeśi prāṇādhāre manohare
41.12
vaṭamūlādgate rudre pārvatī tapase yayau | punaḥ punaḥ svamātrā ca pitrā ca vinivāritā
41.13
gatvā sā svarṇadītīraṃ snātvā triṣavaṇaṃ sudā | saṃdeśe ca mayā dattaṃ jajāpa taṃ manuṃ mudā
41.14
varṣasekaṃ ca saṃpūrṇamanāhārā svabhaktitaḥ | taptvā tapaḥ kaṭhoraṃ ca cakāra jagadambikā
41.15
grīṣme ca parito vahniṃ prajvalantaṃ divāniśam | kṛtvā pratasthau tanmadhye saṃtataṃ japatī manum
41.16
śaśvatśmaśāne varṣāsu kṛtvā yogāsanaṃ śivā | śilāṃ dṛṣṭvā ca saṃsiktāṃ babhūva jaladhārayā
41.17
śīte jalāntare śaśvatpratasthau bhaktipūrvakam | anāhārā śaradvodranīhārāsu niśāsuṃ ca
41.18
evaṃ kṛtvā paraṃ varṣamaprāpya śaṃkaraṃ satī | śucā kṛtvāgnikuṇḍaṃ ca praveṣṭuṃ sā samudyatā
41.19
tāmagnikuṇḍaṃ viśatīṃ tapasā'tikṛśāṃ satīm | dṛṣṭvā śivaḥ kṛpāsindhuḥ kṛpayā tāṃ jagāma ha
41.20
atīva vāmano bālo viprarūpī svatejasā | prajvalanmanasā hṛṣṭo daṇḍī chatrī jaṭādharaḥ
41.21
śuklayajñopavītī ca śuklavāsāśca sasmitaḥ| śvetābjabījamālāṃ ca bibhrattilakamujjvalam
41.22
nirjane bālakaṃ dṛṣṭvā snigdhā sāpi jagāda ha| tattejasārdati pracchannā tatyāja ca tapaḥ svayam
41.23
ko bhavāniti papraccha taṃ śiśuṃ purataḥ sthitam| manasā''liṅganaṃ kartumicchantī paramādaram
41.24
śrutvā śailasutāpraśnaṃ prahasya parameśvaraḥ| uvācātīva madhuraṃ karṇapīyūṣamīśvaram
41.25
śaṃkara uvāca
icchāgāmī baṭurahaṃ tapasvī viprabālakaḥ| kā tvaṃ kāntā'tikāntāre tapaścarasi sundari
41.26
vada kasya kule jātā kasya kanyā ca kā bhidhā| tapasaḥ phaladātrī tvaṃ kasmādghetostapastava
41.27
aho vā tapasāṃ rāśiḥ svayaṃ mūrtimatī satī| tapo vā lokaśikṣārthaṃ karoṣi kamalekṣaṇe
41.28
svayaṃ tejaḥsvarūpā vā mūlaprakṛtirīśvarī| vidhāya bhaktadhyānārthaṃ vigrahaṃ bhārate januḥ
41.29
kiṃvā triloke lakṣmīstvaṃ saṃpadūpā sanātanī| rakṣāṃ vidhātuṃ jagatāmāgatā dhāturantike
41.30
kiṃvā'mbikā tvaṃ devānāṃ svayaṃ mūrtimatī satī| sāvitrī bhārate janma svecchayā labdhumāgatā
41.31
rāgādhiṣṭhātṛdevī vā svayaṃ sākṣātsarasvatī| sarvavidyāḥ prakaṭituṃ svecchayā janma bhārate
41.32
etāsu madhye kā vā tvaṃ nāhaṃ tarkitumīśvaraḥ| yā sā bhavati kalyāṇi parituṣṭā ca māṃ bhava
41.33
sati tvayi prasannāyāṃ prasannaḥ parameśvaraḥ| parituṣṭāyāṃ tuṣṭāyāṃ tuṣṭo nārāyaṇaḥ svayam
41.34
tuṣṭe nārāyaṇe deve śaśvattuṣṭaṃ jagattrayam| tarumūleṣu sikteṣu śākhāḥ siktā yathā priye
41.35
śiśostadvacanaṃ śrutvā prahasya parameśvarī| uvāca vacanaṃ cāru karṇapīyūṣamīśvarī
41.36
pārvatyuvāca
nāhaṃ vedaprasūrlakṣmīrvāgadhiṣṭhātṛdevatā| janma me bhārate varṣe sāmprataṃ śailakanyakā
41.37
pūrvaṃ janma dakṣagehe satī śaṃkarakāminī| yogena tyaktadehā'haṃ tātabhartṛ vinindayā
41.38
atra janmani puṇyena saṃprāpte śaṃkare dvija| māṃ tyaktvā bhasmasātkṛtvā manmathaṃ sa jagāma ha
41.39
prayāte śaṃkare tāpādrīḍayā'haṃ piturgṛhāt| āgamattapase cittaṃ samedaṃ svarṇadītaṭe
41.40
tapaḥ kṛtvā kaṭhoraṃ ca suciraṃ prāṇavallabham| aprāpyāgni praveṣṭuṃ ca tvāṃ ca dṛṣṭvā kṣaṇaṃ sthitā
41.41
gaccha tvaṃ praviśāmyagnau pralayāgniśikhopame| kṛtvā svakāmanāṃ vipra haraprāptimanīṣitām
41.42
yatra yatra janurlabdhvā labhiṣyasi śivaṃ param| prāṇādhikaṃ priyaṃ kāntaṃ vibhuṃ janmani janmani
41.43
sarvā hi svapriyaṃ labdhuṃ labhanti janma vāñchitam| tajjanma patilābhārthaṃ sarvāsāṃ ca śrutau śrutam
41.44
prāktanīyo hi yo bhartā sa tāsāṃ pratijanmani| yā strī yeṣāṃ suniyatā sā teṣāṃ janmajanmani
41.45
taddehisiha na prāpya kṛtvā ghorataraṃ tapaḥ| kṛtvā'gnikuṇḍe kāmyaṃ ca labhiṣyāmi paratra tam
41.46
ityuktvā pārvaṃtī tatra tatpuraḥ praviveśa ha| niṣidhyamānā purato brāhmaṇena punaḥ punaḥ
41.47
vahnipraveśaṃ kurvantyāḥ pārvatyāḥ parameśvari| babhūva tapasā sadyo vahniścandanavaddhruvam
41.48
kṣaṇaṃ tadantare sthitvā cotpatantīṃ śivāṃ śivaḥ| punaḥ prapaccha sahasā vṛndāvanavinodini
41.49
mahādeva uvāca
aho tapaste kiṃ bhadre na buddhaṃ kiṃcideva hi| na dagdho vahninā deho na ca prāpto manīṣitaḥ
41.50
śivaṃ kalyāṇarūpaṃ ca bhartāraṃ kartumicchasi| avigrahaṃ patiṃ kṛtvā kiṃ vā te vāñchitaṃ bhavet
41.51
saṃhartāraṃ ca bhartāraṃ yadīcchasi śucismite| kāntamicchati kā vā strī sarvasaṃhārakāraṇam
41.52
mokṣaṃ vāñchasi ceddevi kṛtvā kāntaṃ svarūpiṇam| sarvamuktipradā tvaṃ ca tapasyā viphalā tava
41.53
śivaśca maṅgale mokṣe saṃhartā na ca dṛśyate| śivaśabdasya cānyo'rtho na hi vede nirūpitaḥ
41.54
taṃ ca saṃhārakartāraṃ yadi vāñchasi sundari| labhiṣyase rataṃ rudraṃ sarvalokabhayaṃkaram
41.55
na bhaviṣyati mokṣaste svābhīṣṭaṃ devasevanam | harismṛtiramoghā ca sarvamaṅgaladā sadā
41.56
śīghraṃ pitṛgṛhaṃ gaccha tatra drakṣyasi śaṃkaram | samā''śiṣā svatapasāṃ phalena ca sudurlabham
41.57
ityuktvā pārvatī viprastatraivāntaradhīyata | durgā yayau piturgehaṃ mahādeveti vādinī
41.58
pārvatyāgamanaṃ śrutvā menakā ca himālayaḥ | divyaṃ yānaṃ puraskṛtya prayayau harṣavihvalaḥ
41.59
saṃsthāpya maṅgalaghaṭānrājavarmani rādhike | candanāgurukastūrīphalaśākhāsamanvitān
41.60
paṭṭasūtrasaṃnibaddha rasālapallavānvitaiḥ | paritaḥ parito rambhāstambhavṛndasamanvitaiḥ
41.61
patiputravatīyovitsamūhairdīpahastakaiḥ | pūrṇairlājādhānyadūrvāphalapuṣpasamanvitaiḥ
41.62
supuṇyairbrāhmaṇaiścāpi munibhirbrahmacāribhiḥ | naṭībhirnartakībhiśca gajendraiḥ pariśobhite
41.63
purohitaiśca saṃyutaiḥ kurvadbhirmaṅgaladhvanim | sucārumālatīmālāhastaiḥ śastaiḥ praśaṃsitaiḥ
41.64
nānāprakāravādyaiśca śaṅkhadhvanisunāditaiḥ | sindūrareṇubhiścārucandanadravapaṅkalam
41.65
praviśya nagaraṃ durgā dadarśa pitarau puraḥ | suprasannau pradhāvantau harṣāśrupulakānvitau
41.66
prasannavadanā devī cā''libhiḥ praṇanāma tau | saṃyujyāthā''śiṣaṃ tau ca cakratustāṃ ca vakṣasi
41.67
he vatse vatsetyuccārya rudantau premavihvalau | tadā tāṃ ca rathe kṛtvā jagmaturnijamandiram
41.68
striyo nirmañchanaṃ cakrurviprā yuyujurāśiṣam | brāhmaṇebhyaśca bandibhyaḥ parvatendro dhanaṃ dadau
41.69
maṅgalaṃ kārayāmāsa pāṭhayāmāsa chāndasam | evaṃ svakanyayā sārdhaṃ tasthatustau svamandire
41.70
sukhena vasatau tau hi harṣanirbharamānasau | ekadā ca tapaḥ kartuṃ jagāma svarṇadīṃ giriḥ
41.71
menakā kanyayā sārdhaṃsuvāsa prāṅgaṇe mudā | etasminnantare bhikṣurnartakaśca sugāyanaḥ
41.72
sahasaika ājagāma menakāsaṃnidhiṃ mudā | śṛṅgavādyaṃ vāmahaste ḍamaruṃ dakṣiṇe tathā
41.73
kṛtvā vibhūtigātro'tivṛddho'tīva jarāturaḥ | pṛṣṭhakantho raktavāsāḥ sukaṇṭho'timanoharaḥ
41.74
jagau mama guṇākhyānaṃ kṛtvā nṛtyaṃ manoharam | vādayāmāsa śṛṅgaṃ ca kṣaṇaṃ ḍamarukaṃ tathā
41.75
ājagmurnagarā bālā bālikā harṣavihvalāḥ | vṛddhā yuvāno yuvatīsamūho vṛddhayoṣitaḥ
41.76
śrutvā tu sundaraṃ gītaṃ sutānasvarasaṃyutam | sahasā mumuhuḥ sarve te mūrcchāmavāpnuvan
41.77
mūrccho saṃprāpa sā durgā dadarśa hṛdi śaṃkaram | triśūlapaṭṭiśakaraṃ vyāghracarmāmbaraṃ param
41.78
vibhūtibhūṣaṇaṃ ramyasasthimālaṃ sunirmalam | īṣaddhāsyaprasannāsyaṃ suprasannaṃ trilocanam
41.79
mālāhastaṃ pañcavaktraṃ nāgayajñopavītakam | varaṃ vṛṇityuktavantaṃ sundaraṃ candraśekharam
41.80
hṛdayasthaṃ haraṃ dṛṣṭvā manasā taṃ nanāma sā | varaṃ vavre mānase sā tvaṃ patirme bhaveti ca
41.81
evaṃ dattvā śivastasyai cāntardhānaṃ cakāra saḥ| na dṛṣṭvā hṛdi taṃ durgāṃ saṃprāpya cetanāṃ punaḥ
41.82
dadarśa cakṣurunmīlya bhikṣukaṃ gāyakaṃ puraḥ| nṛtyasaṃgītataḥ sā tu bhikṣukasya ca menakā
41.83
dātuṃ yayau sā ratnāni svarṇapātrasthitāni ca| bhikṣāṃ yayāce bhikṣustāṃ durgāṃ nānyāṃ gṛhītavān
41.84
punaśca nartanaṃ kartumudyataḥ kautukena ca| menā tadvacanaṃ śrutvā cukopa vismayaṃ yayau
41.85
bhikṣukaṃ bhartsayāmāsa bahiḥ kartumuvāca tam| patnī trilokanāthasya śivasya paramātmanaḥ
41.86
yācñāmimāṃ prakurvantaṃ dūraṃ kuru kubhāṣiṇam| etasminnantare taptvā giriḥ svālayamāyayau
41.87
dadarśa purato bhikṣuṃ prāṅgaṇasthaṃ manoharam| kṛtvā nārāyaṇārcāṃ ca gaṅgātīre manohare
41.88
tanmūrtidhyānaviśleṣaśokādudvignamānasaḥ| śrutvā menāmukhādvātāṃ jahāsa ca cukopa saḥ
41.89
ājñāṃ cakāra svacaraṃ bahiḥ kartuṃ ca bhikṣukam| ākāśamiva duḥsparśaṃ prajvalantaṃ svatejasā
41.90
na śaśāka bahiḥ kartuṃ samīpaṃ gantumakṣamaḥ| dadarśa bhikṣukaṃ śailaḥ kṣaṇaṃ cārucaturbhujam
41.91
kirīṭinaṃ kuṇḍalinaṃ pītāmbaradharaṃ param| suveṣaṃ sundaraṃ śyāmamīṣaddhāsyaṃ manoharam
41.92
candanokṣitasarvāṅgaṃ bhaktānugrahakārakam| yadyatpuṣpaṃ pradattaṃ ca pūjākāle gadābhṛte
41.93
gātre śirasi tatsarvaṃ bhikṣukasya dadarśa ha | dhūpaḥ pradīpo yo datto naivedyaṃ vā manoharam
41.94
dadarśa śailastatsarvaṃ bhikṣukasya puraḥ sthitam | kṣaṇaṃ dadarśa dvibhujaṃ vinodamuralīkaram
41.95
gopaveṣaṃ kiśoraṃ ca sasmitaṃ śyāmasundaram | mayūrapicchacūḍaṃ ca ratnālaṃkārabhūṣitam
41.96
candanokṣitasarvāṅgaṃ vanamālāvibhūṣitam | kṣaṇaṃ dadarśa svacchaṃ ca śaṃkaraṃ candraśekharam
41.97
triśūlapaṭṭiśakaraṃ vyāghracarmāmbaraṃ param | vibhūtigātrasamalamasthimālāvibhūṣitam
41.98
nāgayajñopavītaṃ ca taptasvarṇajaṭādharam | ḍamarubhṛṅgahastaṃ ca supraśastaṃ manoharam
41.99
prajapantaṃ harernāma śvetābjabījamālayā | īṣaddhāsyaprasannāsyaṃ bhaktānugrahakārakam
41.100
svatejasā prajvalantaṃ pañcavaktraṃ trilocanam | kṣaṇaṃ dadarśa jagatāṃ sraṣṭāraṃ ca caturmukham
41.101
japantaṃ śrīharernāma svacchasphaṭikamālayā | kṣaṇaṃ sūryasvarūpaṃ ca dadarśa triguṇātmakam
41.102
dadarśa tamatīvraṃ tu jvalantaṃ brahmatejasā | kṣaṇamagnisvarūpaṃ ca jvalantamatitejasā
41.103
kṣaṇamāhlādajanakaṃ candrarūpaṃ dadarśa ha | kṣaṇaṃ tejaḥsvarūpaṃ ca nirākāraṃ nirañjanam
41.104
nirliptaṃ ca nirīhaṃ ca paramātmasvarūpiṇam | evaṃ svecchāmayaṃ dṛṣṭvā nānārūpadharaṃ param
41.105
harṣāśrupulakaḥ śailo daṇḍavatpraṇanāma tam | bhaktyā pradakṣiṇīkṛtya praṇamya ca punaḥ punaḥ
41.106
samutpatya harṣayukto dadarśa punareva tam| vāstavaṃ bhikṣukaṃ dṛṣṭvā śailendro viṣṇumāyayā
41.107
visasmāra ca tatsarvaṃ nānārūpadharaṃ param| bhikṣāṃ yayāce bhikṣustaṃ bhikṣāsthālīsvapārśvakaḥ
41.108
raktatāmbaraḥ śṛṅgavādyavicitraḍamaruḥ kare| ādātumutsuko durgāṃ nānyāṃ bhikṣuḥ kadācana
41.109
na svīcakāra śailendro mohito viṣṇumāyayā| bhikṣuḥ kiṃcitra jagrāha tatraivāntaradhīyata
41.110
tadā babhūva jñānaṃ ca menakāśailayoḥ priye| aho dṛṣṭo jagannātha āvābhyāṃ svapnavahnine
41.111
āvāṃ śivo vañcayitvā svasthānaṃ gatavānvibhuḥ| tayorbhaktiṃ śive dṛṣṭvā sarve devāśca cintitāḥ
41.112
cakruḥ śakrādayo yuktiṃ sumero rakṣaṇe bharāt| ekāntabhaktyā śailaścetkanyāṃ tasmai pradāsyati
41.113
dhruvaṃ nirvāṇitāṃ sadyaḥ saṃprāpnotyeva bhārate| anantaratnādhāraścetpṛthvī tyaktvā prayāsyati
41.114
ratnagarbhābhidhā bhūrmemithyaiva bhavitā dhruvam| sthāvaratvaṃ parityajya divyarūpaṃ vidhāya saḥ
41.115
kanyāṃ śūlabhṛte dattvā viṣṇulokaṃ gamiṣyati| nārāyaṇasya sārūpyaṃ bhaviṣyatyeva līlayā
41.116
samprāpya pārṣadatvaṃ ca haridāso bhaviṣyati| daśavāpīsamā kanyā dīyate brāhmaṇāya tām
41.117
vedajñāya pavitrāya cāpratigrahaśāline | saṃdhyāyajñavedapāṭhakāriṇe satyavādine
41.118
asme pradattā kanyā ca daśavāpīphalapradā | trisaṃdhyaṃ kāriṇe satyavādine gṛhaśāline
41.119
vedajñāya suviprāya dattvā suphaladāyinī | pratigrahagṛhītāya saṃdhyāhīnāya nityaśaḥ
41.120
mūrkhāya dattā kanyā sā tvardhāṃśaphaladāyinī | paradāragṛhītāya yājakāya dvijātaye
41.121
śaṭhāya saṃdhyāhīnāya vāpyaikaphaladā sutā | sarvasaṃdhyāsvagāyatrīvihīnāya śaṭhāya ca
41.122
vaiśyodbhavāya dattā yā vāpyardhaphaladā smṛtā | pāpine śūdrajātāya viprakṣatrodbhavāya ca
41.123
dattvā cāṇḍālatulyāya kanyā sā narakapradā | viṣṇubhaktāya viduṣe viprāya satyavādine
41.124
jitendriyāya dattā yā viṃśadvāpīphalapradā | ṣaṣṭivarṣasahastrāṇi divyarūpaṃ vidhāya ca
41.125
evaṃbhūtāya dattā cenmodate viṣṇumandire | dattvā kanyāṃ suśīlāṃ ca harāya haraye'thavā
41.126
nārāyaṇasvarūpaṃ ca bhavedeva śrutau śrutam | viṣṇubhakto yadā kanyāṃ dadāti viṣṇuprītaye
41.127
sa labheddharidāsyaṃ ca dhruvaṃ viprodbhavāya ca | ityālocya surāḥ sarve kṛtvā ca mantraṇāṃ priye
41.128
guruṃ prasthāpituṃ jagmurhimālayagṛhaṃ prati | gatvā praṇamya ca guruṃ sarve cakrurnivedanam
41.129
himālayagṛhaṃ gatvā kuru nindāṃ ca śūlinaḥ | pinākinaṃ vinā durgā varaṃ nānyaṃ variṣyati
41.130
anicchayā sutāṃ dattvā phalaṃ pūrṇaṃ na labhyate | kālena yātu śailendraścedānīṃ bhuvi tiṣṭhatu
41.131
anantaratnādhāraṃ ca tvameva rakṣa bhārate | devānāṃ vacanaṃ śrutvā pradadau karṇayoḥ karau
41.132
na svīcakāra svaguruḥ smarannārāyaṇeti ca | uvāca devavargāṃśca saṃbhartsyaṃ ca punaḥ punaḥ
vedavedāṅgavijñātā mahābhakto harau hare
41.133
bṛhaspatiruvāca
śrūyatāṃ sadvacaḥ satyaṃ he devāḥ svārthasādhakāḥ
nītisāraṃ ca vedoktaṃ pariṇāmasukhāvaham | harakeśavayorbhaktaṃ ye ca nindanti pāpinaḥ
41.134
bhūdevānbrāhmaṇāṃścaiva svaguruṃ ca pativratāḥ | patibhikṣubrahmacārisṛṣṭibījānsurāṃstathā
41.135
pacyante kālasūtre te yāvaccandradivākarau | śleṣmamūtrapūrīṣeṣu śerate te divāniśam
41.136
bhakṣitāḥ kīṭanikaraiḥ śabdaṃ kurvanti kātarāḥ | ye nindanti ca brahmāṇaṃ sraṣṭāraṃ jagatāṃ gurum
41.137
śivaṃ surāṇāṃ pravaraṃ durgāṃ lakṣmīṃ sarasvatīm | gītāṃ ca tulasīṃ gaṅgāṃ vedāṃśca vedamātaram
41.138
vrataṃ tapasyāṃ pūjāṃ ca mantraṃ mantrapradaṃ gurum | te pacyante'ndhakūpe vai cā''yuṣo'rdhaṃ vidheraho
41.139
bhakṣitāḥ sarpasaṃghaiśca śabdaṃ kurvanti saṃtatam | ye nindanti hṛṣīkeśaṃ devasāmyaṃ vidhāya ca
41.140
viṣṇubhaktipradaṃ caiva purāṇaṃ ca śruteḥ param | rādhāṃ tadaṅgajā gopīrbrāhmaṇāṃśca sadārcitān
41.141
te pacyante'dhvaṭe devā vidhāturāyuṣā samam | adhomukhā ūrdhvajaṅghāḥ sarpasaṃghaiśca veṣṭitāḥ
41.142
bhakṣitā vikṛtākāraiḥ kīṭaiḥ sarpasamākṛtaiḥ | atīva kātarā bhītāḥ śabdaṃ kurvanti saṃtatam
41.143
śleṣmasamūtrapurīṣāṇi dhruvaṃ bhakṣanti kṣobhitāḥ | ulkāṃ dadhati ruṣṭāśca tanmukhe yamakiṃkarāḥ
41.144
trisaṃdhyaṃ tarjanaṃ kṛtvā kurvanti daṇḍatāḍanam | kurvanti mūtrapānaṃ ca prahāraistṛṣitāmbhiyā
41.145
tadā kalpāntare sraṣṭuṃ sṛṣṭiṃ ca prathame punaḥ | teṣāṃ bhavetpratīkāra ityāha kamalodbhavaḥ
41.146
kṛtvā hi śivanindāṃ ca yāsyanti narakaṃ surāḥ | imamevopakāraṃ ca kartumicchatha putrakāḥ
41.147
brahmaṇā prerito dakṣo dattvā śūlabhṛte sutām | na pāpaṃ paramaiśvaryaṃ samprāpa haranindakaḥ
41.148
anicchayā sutāṃ dattvā turyapuṇyaṃ lalābha saḥ | aho vihāya sārūpyaṃ tucchaṃ svargaṃ lalābha saḥ
41.149
kaścinmadhye ca yuṣmākaṃ gatvā śailagṛhaṃ surāḥ | sampādayatvabhimataṃ śailendrasya prayatnataḥ
41.150
anicchayā sutāṃ dattvā sukhaṃ tiṣṭhatu bhārate| tasmai bhaktyā sutāṃ dattvā mokṣaṃ prāpsyati niścitam
41.151
paścātsaptarṣayaḥ sarve gṛhītvā tāmarundhatīm| dhruvaṃ tasya gṛhaṃ gatvā bodhayiṣyanti parvatam
41.152
vinā pinākinaṃ durgā varaṃ nānyaṃ variṣyati| anicchayā sutāṃ tasmai pradāsyati sutājñayā
41.153
ityevaṃ kathitaṃ sarvaṃ devā gacchantu mandiram| ityuktvā vākpatiḥ śīghraṃ tapase svarṇadīṃ gataḥ
41.153.p1
iti śrībrahmao mahāo śrīkṛṣṇajanmakhao nāradanā0 catvāriṃśo'dhyāyaḥ ||40
Linked texts (5)
- Brahmavaivartapurāṇa — Vyāsa, Sanskrit
- Śivapurāṇa (complete text) — Sanskrit
- Devībhāgavatapurāṇa — Sanskrit
- Kṛṣṇajanmakhaṇḍa — Sanskrit
- Bhagavatībhāgavatapurāṇa — Sanskrit