Pramāṇa · Search · About · API

Janmakhanda 45: atha catuścatvāriṃśo'dhyāyaḥ

Janmakhaṇḍa 45

Language
Sanskrit

Contents

atha catuścatvāriṃśo'dhyāyaḥ

45.1

śrīkṛṣṇa uvāca
vasiṣṭhasya vacaḥ śrutvā sagaṇo'pi himālayaḥ | vismito bhāryayā sārdhaṃ jahāsa pārvatī svayam

45.2

arundhatī ca tāṃ menāṃ bodhayāmāsa kātarām | nirāhārāṃ ca rudatīṃ jahau śokaṃ mudā ca sā

45.3

arundhatīṃ bhojayitvā bubhuje bhogamuttamam | sarvaṃ prahṛṣṭamanasā maṅgalaṃ ca cakāra ha

45.4

śailaḥ saṃbhṛtasaṃbhāro vasiṣṭhasyājñayā priye | patraṃ prasthāpayāmāsa nānāsthānaṃ tvarānvitaḥ

45.5

tataḥ prasthāpayāmāsa śivaṃ maṅgalapatrikām | nānāprakāradravyāṇi vāhyāni ca cakāra ha

45.6

adhyāya 44
tandulānāṃ ca śailānvai pṛthukānāṃ ca sundari | tailānāṃ ca ghṛtānāṃ ca dadhanāṃ vāpīścakāra ha

45.7

guḍānāmāsavānāṃ ca kṣīrāṇāṃ ca tathaiva ca | atho haiyaṅgavīnānāṃ lavaṇānāṃ paraṃ mudā

45.8

laḍḍukānāṃ śarkarāṇāṃ svastikānāṃ tathaiva ca | yavacūrṇādipiṣṭānāṃ ghṛtapakvāni tāni ca

45.9

nānāprakāravastrāṇi vahniśaucāni yāni ca | mahāratnapravālāni suvarṇarajatāni ca

45.10

dravyāṇyetāni śailendraḥ kṛtvā tu vidhipūrvakam | maṅgalaṃ kartumārebhe tatraiva maṅgale dine

45.11

saṃskāraṃ kārayāmāsuḥ pārvatīṃ parvatastriyaḥ | snāpayitvā vastrayugaṃ dhārayāmāsurāśu tāḥ

45.12

kārayitvā suveṣāṃ ca ratnabhūṣaṇabhūṣitām | darpaṇaṃ dhārayāmāsurdūrvākṣatasamanvitam

45.13

dadyuścālaktakaṃ cāru pādāṅguliṣu pādayoḥ | gaṇḍe patrāvalīṃ ramyāṃ netre kajjalamujvalam

45.14

kabarīṃ kārayāmāsurmālatīmālyaveṣṭitām | paṭṭasūtrapinaddhāṃ tāṃ vāmavaktrāṃ manoharām

45.15

etasminnantare rādhe samājagmuḥ sureśvarāḥ | nītvā trinetraṃ tatraiva ratnayānasthamīśvaram

45.16

śailaḥ saṃbhūtasaṃbhārānsaṃbhāṣayitumīśvarān | śailānprasthāpayāmāsa brāhmaṇānapi pūjitān

45.17

prāṅgaṇaṃ kārayāmāsa rambhāstambhaiḥ samanvitam | paṭṭasūtrasaṃnibaddharasālapallavānvitaiḥ

45.18

phalapallavasaṃyuktaiḥ kalaśairjalasaṃyutaiḥ | candanāgurukastūrīsucārukusumānvitaiḥ

45.19

mālatīmālyasaṃyutaiḥ saṃyutaṃ sumanoharam | deveśvarānpuro dṛṣṭvā praṇanāma himālayaḥ

45.20

ratnasiṃhāsanaṃ dātuṃ prerayāmāsa kiṃkarān | nārāyaṇo hi bhagavānuvāsa pārṣadaiḥ saha

45.21

vinatānandanāttūrṇamavaruhya caturbhujaḥ | caturbhujaiśca pārṣadaiśca ratnabhūṣaṇabhūṣitaiḥ

45.22

ratnamuṣṭinibaddhaiśca sevitaḥ śvetacāmaraiḥ | ṛṣiśreṣṭhaiḥ suraśreṣṭhaiḥ stūyamānaśca saṃsadi

45.23

īṣaddhāsyaprasannāsyo bhaktānugrahakārakaḥ | uvāsa ca tadabhyāśe brahmā devagaṇaiḥ saha

45.24

ṛṣayo munayaścaiva samūsumaṃgale sthale | etasminnantare śaṃbhuravaruhya rathādaho

45.25

ratnāsane samuttiṣṭhandadarśa parvatālayam | samājagmuḥ śivaṃ draṣṭuṃ śailendranagarastriyaḥ

45.26

vṛddhā bālā yuvatyaśca vastrābharaṇabhūṣitāḥ | kāścitkajjalahastāśca vastrahastāśca kāścana

45.27

kāścitsindūrahastāśca kāścitkaṅkatikākarāḥ | veṣārdhabhūṣitāḥ kāścitkāścinnaivārdhabhūṣitāḥ

45.28

kāścinnirbhūṣitāḥ kāścitsarvābharaṇabhūṣitāḥ | sarvā āgatya saṃtasthuḥ sasmitāḥ parvatālaye

45.29

ṛṣikanyā devakanyā nāgakanyā manoharāḥ | gandharvaśailakanyāśca rājakanyāḥ samāgatāḥ

45.30

sarvā apsaraso divyā rambhādyāḥ samupasthitāḥ | menā kanyāgaṇaiḥ sādhaṃ dadarśa śaṃkaraṃ varam

45.31

cārucampakavarṇābhamekavaktraṃ trilocanam | īṣaddhāsyaprasannāsyaṃ ratnābharaṇabhūṣitam

45.32

candanāgurukastūrīcārukuṅkumabhūṣitam | mālatīmālyasaṃyuktaṃ sadratnamukuṭojjvalam

45.33

vahniśaucenātulena cātisūkṣmeṇa cāruṇā| asūlyavastrayugena vicitreṇātibhūṣitam

45.34

ratnadarpaṇahastaṃ ca kajjalojjvalalocanam| sarvayā prabhayā''cchannamatīva sumanoharam

45.35

atīva taruṇaṃ ramyairbhūṣitāṅgaiśca bhūṣitam| bibhrataṃ rūpamatulaṃ paraṃ nārāyaṇājñayā

45.36

yogasvarūpaṃ yogeśaṃ yogīndrāṇāṃ gurorgurum| svecchāmayaṃ guṇātītaṃ brahmajyotiḥ sanātanam

45.37

guṇabhedādrūpabhedaṃ dhatte'nantamarūpakam| tāraṇaṃ taṃ bhavasthānāṃ sṛṣṭisthityantakāraṇam

45.38

sarvādhāraṃ sarvabījaṃ sarveśaṃ sarvajīvanam| sākṣirūpaṃ nirīhaṃ ca paramānandamakṣaram

45.39

ādyantamadhyarahitaṃ sarvādiṃ sarvarūpakam| dṛṣṭvā jāmātaraṃ menā jahau śokaṃ mudānvitā

45.40

praśaśaṃsuryuvatyaśca dhanyā dhanyā satīti tāḥ| durgā bhāgyavatītyevamūcuḥ kāścana kanyakāḥ

45.41

kāmena kāścitkāminyo maunībhūtāśca stambhitāḥ| na dṛṣṭo vara ityevamasmābhirjinagocare

45.42

kāścinnimeṣarahitā mūrcchitā puśca kāścana| nininduḥ svapatiṃ kāścitsvecchāṃ cakruśca kāścana

45.43

kāścidbhāvena ruruduḥ pulakāñcitavigrahāḥ| jagurgandharvapatayo nanṛtuścāpsarogaṇāḥ

45.44

dṛṣṭvā śaṃkararūpaṃ ca prahṛṣṭāḥ sarvadevatāḥ| nānāprakāravādyāni cārūṇi madhurāṇi ca

45.45

vādakā vādayāmāsurnānāśilpena tatra vai| etasminnantare durgāṃ śailāntaḥpuracārikā

45.46

bahiścakāra sadratnāsanasthāṃ vastraveṣṭitām | kastūrībindubhiḥ sāndrasindūrabindubhūṣitām

45.47

cārucandanacandrābhāṃ nasabhālasthalojjvalām | ratnendrasārahāreṇa vakṣaḥsthalavibhūṣitām

45.48

trinetradattanetrāṃ tāmanyavāritalocanām | atīvahāsyayuktāsyāṃ sakaṭākṣāṃ manoharām

45.49

ratnakeyūravalayaratnakaṅkaṇamaṇḍitām | ratnapāśakasaṃsaktāṃ vadananmañjīrarañjitām

45.50

amūlyātulyacitrāḍhyavastrayugmasuśobhitām | sadratnakuṇḍalābhyāṃ ca cārugaṇḍasthalojjvalām

45.51

maṇisāraprabhāmuṣṭadantarājivirājitām | ratnadarpaṇahastāṃ ca krīḍāpadmaṃ vighūrṇatīm

45.52

candanāgurukastūrīkuṅkumenāṅgacarcitām | muditā dadṛśuḥ sarve jagadādyāṃ jagatprasūm

45.53

trinetro netrakoṇena tāṃ dadarśa mudānvitaḥ | sarvāṃ satyākṛtiṃ dṛṣṭvā vijahau virahajvaram

45.54

śivaḥ sarvaṃ visasmāra durgāsaṃnyastamānasaḥ | pulakāñcitasarvāṅgo harṣāśruyuktalocanaḥ

45.55

etasminnantare śailaḥ prahṛṣṭaḥ sapurohitaḥ | taṃ varaṃ varayāmāsa vastracandanabhūṣaṇaiḥ

45.56

bhaktyā pādyādibhirmālyairdivyagandhamanoharaiḥ | tataḥ śīghraṃ vedamantraiḥ saṃpradānaṃ cakrāra tām

45.57

yautukāni dadau tasmai ratnāni vividhāni ca | cāruratnavikārāṇi pātrāṇi sundarāṇi ca

45.58

gavāṃ lakṣaṃ gajendrāṇāṃ sahasrāṇi ca rādhike | ratnakambalayuktāni sāṅkuśāni mudānvitaḥ

45.59

triśallakṣaṃ hayānāṃ ca sajjitānāmakātaraḥ | dāsīnāmanuraktānāṃ lakṣaṃ sadratnabhūṣitam

45.60

śataṃ dvijabaṭūnāṃ ca pārvatībhrātṛtulyakam | rathānāṃ ca śataṃ ramyaṃ ratnendrasāranirmitam

45.61

pārvatīṃ vastusahitāṃ svastītyuccārya śaṃkaraḥ | jagrāhā''nandamanasā yatnācchailasamarpitām

45.62

himālayaḥ sutāṃ dattvā parihāraṃ cakāra tam | mādhyaṃdinoktastotreṇa tuṣṭāva saṃpuṭāñjaliḥ

45.63

himālaya uvāca
prasīda dakṣayajñaghna narakārṇavatāraka | sarvātmarūpa sarveśa paramānandavigraha

45.64

guṇārṇava guṇātīta guṇayukta guṇeśvara | guṇabīja mahābhāga prasīda guṇināṃ vara

45.65

yogādhāra yogarūpa yogajña yogakāraṇa | yogīśa yogināṃ bīja prasīda yogināṃ guro

45.66

pralaya pralayādhaik bhavapralayakāraṇa | pralayānte sṛṣṭibīja prasīda paripālaka

45.67

saṃhārakāle ghore ca sṛṣṭisaṃhārakāraṇa | durnivārya durārādhya cā''śutoṣa prasīda me

45.68

kālasvarūpa kāleśa kāle ca phaladāyaka | kālabījaika kālaghna prasīda kālapālaka

45.69

śivasvarūpa śivada śivabīja śivāśraya | śivabhūta śivaprāṇa prasīda paramāśraya

45.70

ityevaṃ stavanaṃ kṛtvā virarāma himālayaḥ | praśaśaṃsuḥ surāḥ sarve munayaśca girīśvaram

45.71

himālayakṛtaṃ stotraṃ saṃyato yaḥ paṭhennaraḥ | pradadāti śivastasmai vāñchitaṃ rādhike dhruvam

45.71.p1

iti śrībrahma0 mahā0 śrīkṛṣṇajanmakhe0 nāradanāo pārvatīsaṃpradāne catuścatvāriṃśo'dhyāyaḥ ||44

Linked texts (5)