Janmakhanda 55: atha catuḥpañcāśattamo'dhyāyaḥ
Janmakhaṇḍa 55
- Language
- Sanskrit
Contents
- 55.30 — 1 part
atha catuḥpañcāśattamo'dhyāyaḥ
55.1
nārada uvāca
ataḥ paraṃ kiṃ rahasyaṃ babhūva munisattama | kathaṃ jagāma bhagavānmathurāṃ nandamandirāt
55.2
nando dadhāra prāṇāṃśca vicchedena hareḥ katham | gopāṅganā yaśodā vā kṛṣṇaikatānamānasāḥ
55.3
cakṣurnimeṣavicchedādyā rādhā na hi jīvati | kathaṃ dadhāra sā devī prāṇānprāṇeśvaraṃ vinā
55.4
ye ye tatsaṅgino gopāḥ śayanāsanabhogataḥ | kathaṃ visasmaruste ca tādṛśaṃ bāndhavaṃ vraje
55.5
śrīkṛṣṇo mathurāṃ gatvā kiṃ kiṃ karma cakāra saḥ | svargārohaṇaparyantaṃ tadbrūvānvaktumarhati
55.6
nārāyaṇa uvāca
kaṃsaścakāra yajñaṃ ca samāhūto dhanurmakham | jagāma tatra bhagavāntena rājñā nimantritaḥ
55.7
rājā prasthāpayāmāsa cākrūraṃ bhagavatpriyam | akrūraḥ prerito rājñā gatvā ca nandamandiram
55.8
śrīkṛṣṇaṃ ca gṛhītvā sa sagaṇaṃ mathurāṃ gataḥ | kṛṣṇaśca mathurāṃ gatvā jaghāna nṛpatiṃ mune
55.9
catuḥpañcāśattamo'dhyāyaḥ
jaghāna rajakaṃ caiva cāṇūraṃ muṣṭikaṃ gajam | cakāra pitroruddhāraṃ bāndhavānāṃ ca bāndhavaḥ
55.10
kubjayā saha śṛṅgāraṃ kṛtvā ca kautukena ca | tāṃ ca prasthāpayāmāsa golokaṃ gopikāpatiḥ
55.11
cakāra kṛpayā kṛṣṇo mālākārasya mokṣaṇam | kṛpayā coddhavadvārā bodhayāmāsa gopikāḥ
55.12
tadopanīto bhagavānavantīnagaraṃ yayau | cakāra vidyāgrahaṇaṃ muneḥ sāndīpanerguroḥ
55.13
tato jitvā jarāsaṃdhaṃ nihatya yavaneśvaram | ugrasenaṃ ca nṛpatiṃ cakāra vidhipūrvakam
55.14
gatvā samudranikaṭe nirmāya dvārakāṃ purīm | jahāra rukmiṇīṃ devīṃ jitvā nṛpatisaṃghakam
55.15
kālindīṃ lakṣmaṇāṃ śaibyāṃ satyāṃ jāmbavatīṃ satīm | mitravindāṃ nāgnajitīṃ samudvāhaṃ cakāra saḥ
55.16
nihatya narakaṃ bhūpaṃ raṇena dāruṇena ca | patnīḥ ṣoḍaśasāhasraṃ vihāraṃ ca cakāra saḥ
55.17
jahāra pārijātaṃ ca jitvā śakraṃ ca līlayā | ciccheda bāṇahastāṃśca jitvā ca candraśekharam
55.18
pautrasya mokṣaṇaṃ kṛtvā punarāgatya dvārakām | ātmānaṃ darśayāmāsa lokāṃśca pratimandiram
55.19
yāge ca vasudevasya tīrthayātrāprasaṅgataḥ | prāṇādhiṣṭhātṛdevīṃ ca dadarśa tatra rādhikām
55.20
pūrṇe ca śatavarṣe ca sudāmnaḥ śāpamokṣaṇe | punaryayau tathā sārdhaṃ puṇyaṃ vṛndāvanaṃ vanam
55.21
punaścaturdaśābdaṃ ca tayā sārdhaṃ jagatpatiḥ | cakāra rāsaṃ rāse ca puṇyakṣetre ca bhārate
55.22
pūrṇamekādaśābdaṃ ca nivṛtya nandamandire | mathurāyāṃ dvārakāyāṃ pūrṇasamvatsaraṃ vibhuḥ
55.23
cakāra bhāraharaṇaṃ pṛthivyāṃ pṛthuvikramaḥ | pañcaviṃśativarṣe ca śatavarṣādhikaṃ mune
55.24
tiṣṭhañjagāma golokaṃ pṛthivyāṃ ca purātanaḥ | yaśodāyai ca nandāya vṛṣabhānāya dhīmate
55.25
rādhāmātre kalāvatyai dadau sāmīpyamokṣaṇam | kṛṣṇena sākaṃ gopī ca rādhikā ca kutūhalāt
55.26
nibadhya dharmasetuṃ ca vedoktaṃ ca yuge yuge | ityevaṃ kathitaṃ sarvaṃ samāsena mahāmune
55.27
śrīkṛṣṇacaritaṃ ramyaṃ caturvargaphalapradam | brahmādistambaparyantaṃ sarvaṃ naśvarameva ca
55.28
bhaja taṃ paramānandaṃ sānandanandanam | svecchāmayaṃ paraṃ brahma paramātmānamīśvaram
55.29
paramavyayamavyaktaṃ bhaktānugrahavigraham | satyaṃ nityaṃ svatantraṃ ca sarveśaṃ prakṛteḥ param
55.30
nirguṇaṃ ca nirīhaṃ ca nirākāraṃ nirañjanam
55.30.p1
iti śrībrahma0 mahā0 śrīkṛṣṇajanmakhaṃ0 nāradanārā0 śrīkṛṣṇarādhikāsaṃvādo nāma catuḥpañcāśattamo'dhyāyaḥ
Linked texts (2)
- Brahmavaivartapurāṇa — Vyāsa, Sanskrit
- Kṛṣṇajanmakhaṇḍa — Sanskrit