Pramāṇa · Search · About · API

Prapanca 19

Prapañca 19

Language
Sanskrit

19.1

atha manmathamantravidhiṃ vidhinā kathayāmi sahomavidhiṃ sajapam
mathanasya purārapi mohakaraṃ vyathitākhilasiddhasurādigaṇam

19.2

ṛjakalāprathamā'vanibhrāntibhiryutasudhākarakhaṇḍavikāśibhiḥ | (1)
nigadito manureṣa manobhuvaḥ sakaladharmasukhārthayaśovahaḥ

19.3

ṛṣyādikāśca sammohanagāyatrīmanobhuvaḥ proktāḥ
bījena dīrghabhājā vihitānyaṅgānyamuṣya jātiyujā

19.4

aruṇamaruṇavāsomālyadāmāṅgarāgaṃ
svakarakalitapāśaṃ sāṅkuśastreṣucāpam
maṇimayamukuṭādyairdīptamākalpajātairaruṇanalinasaṃsthaṃ cintayedaṅgayonim

19.5

taraṇilakṣamamuṃ manumādarāt samabhijapya hunecca daśāṃśataḥ
tadanu kiṃśukajaiḥ prasavaiḥ śubhaistrimadhurārdratarairnijasiddhaye

19.6

mohanī kṣobhaṇī trāsī stambhanyākarṣaṇī tathā
drāviṇyāhlādinī klinnā kledinī smaraśaktayaḥ

19.7

sābhrāntidvayavāmaśrutisargāndryugakalavalaiśca sasaiḥ
śoṣaṇamohanasandīpanatāpanamādanān yajet kramaśaḥ

19.8

anaṅgarūpā sānaṅgamadanā'naṅgamanmathā
anaṅgakusumā'naṅgakusumāturasaṃjñakā

19.9

anaṅgaśiśirā'naṅgamekhalā'naṅgadīpikā
aṅgāśāpālayormadhye bāṇānaṅgāvṛtau yajet

19.10

ālikhyāt karṇikāyāmanalapurapuṭe mārabījaṃ sasādhyaṃ
tadrandhreṣvaṅgaṣaṭakaṃ bahirapi guṇaśro māragāyatrivarṇān
mālāmantraṃ dalāgreṣvapi guhamamukhaśaḥ pārthivāstiṣvanaṅgaṃ
kuryyādayantraṃ tadetadbhuvanamapi vaśet kā kathā mānaveṣu

19.11

proktātha kāmadevāya vidmahe tadanu puṣpabāṇāya
tathā dhīmahyante tanno'naṅgaḥ pracodayācca gāyatrī

19.12

natyante kāmadevāya coktā sarvvajanaṃ vadet
priyāyeti tathā sarvvajanasaṃmohanāya ca

19.13

vīpsayitvā jvalapadaṃ prajvalacca prabhāṣayet
punaḥ sarvvajanasyeti hṛdayaṃ mama cetyatha

19.14

vaśamuktā kuruṃ vīpsya kathayedvahrivallabhām
prokto madanamantro'ṣṭacatvāriṃśadbhirakṣaraiḥ

19.15

iti yantraklṛptasakalaśo bahuśaḥ katamaṃ naraṃ na parisaṃmohayati
pramadāvanīśvarasabhānagararādikamauśvarānapi vaśīkurute

19.16

vakṣye vidhānamanyanmanobhavasyātha sohanaṃ jagataḥ
yenārcitaḥ sa devo vāñchitamakhilaṃ karoti saṃttvavidām

19.17

amṛtodbhavo makaraketanaḥ saṅkalpajanmāhvayāttatarūpī
ikṣudhanurdharapuṣpaśarākhyāvaṅgāni ca vahrijāyāntāni

19.18

aruṇataravasanamālyānulepanābharaṇamickṣuśarāsanadharam
nyastaśarabījadeho dhyāyedātmānamaṅgajaṃ ruciram

19.16-2

aṅgabāṇāvṛterūrddhvaṃ pūjyāḥ ṣoḍaśa śaktayaḥ
yuvatirvipralambhā ca jyotsnā subhrūrmmadadravā

19.20

suratā vāruṇī lolā kāntiḥ saudāminī tathā
kāmacchatrā candralekhā śuko ca madanāhvayā

19.21

yoninmāyāvatī ceti śaktayaḥ syurmanobhuvaḥ
śoko moho vilāsaśca vibhramo madanāturaḥ

19.22

apatrapo yuvā kāmī cūtapuṣpo ratipriyaḥ
grīṣmastapānta ūrjeśca hemantaḥ śiśiro madaḥ

19.23

caturthyāmāvṛtau pūjyāḥ smarāriparicārakāḥ
parabhṛtsārasau caiva śukameghāvhayau tathā

19.24

apāṅgabhrūvilāsau ca hāvabhāvau smarapriyāḥ
mādhavī mālatī caiva hariṇākṣī madotkaṭā

19.25

etāścāmarahastāḥ syuḥ pūjyāḥ koṇeṣu saṃsthitāḥ
hṛllekhyā svanāmnā ca śaktyādīnāṃ samarttanam
indrādyaiḥ saptamī pūjyā smarārcāvidhiridṛśaḥ

19.26

madanavidhānamitītthaṃ proktaṃ yo'nena pūjayedvidhinā
sa tu sakalalokapūjyo bhavenmanojñaśca mandiraṃ lakṣmyāḥ

19.27

vilasadahaṅkāratanurmanaḥśivo vibhramāspadībhūtaḥ
buddhiśarīrāṃ nārīṃ naraḥ sadā cittayonimadhigacchet

19.28

iti madanayogalakṣmyā yo ramayennityaśo nijāṃ vanitām
sa tu bhuktimuktigāmī vanitājanahṛdayamohano bhavati

19.26-2

ātmānaṃ madanaṃ dhyāyedāśuśukṣaṇirūpakam
taddhojāgraṃ śivaṃ jvālālīḍhaṃ tanvotanuṃ tathā
sudhāmayīñca tadyoniṃ navanītamayīṃ smaret

19.30

saṃgacchecca śivajvālālīḍhaṃ taddhṛdayādikam
āliṅgedagnisaṃsargadrutaṃ tadrūpakāmṛtam

19.31

rasanāśikhayākarṣet tadantarasanāmṛtam
kusumāstradhiyā bāhau (1) spṛśet kararuhairapi

19.32

hāniṃ na kuryyājjauvasya mantrī viśadamānasaḥ
ratāvadho'dho madhyordhvakrameṇaiva samāhitaḥ

19.33

nijāṃ priyāṃ bhajedevaṃ sā māraśaravihvalā
chāyevānugatā tasya bhavedapi bhavāntare

19.34

sādhyākhyākāmavarṇaiḥ pratipuṭitalasatkarṇikaṃ (1) patrarājattārartvikpañcajāṣṭādaśasamiṭṭatugaṃ ḍāntagāntākṣarāḍhyam
āśāśūlāṅkitaṃ taddvipataripudale samyagālikhya seraṃ
māraṃ jamyāsya yāmāśayati vaśagatā sā bhavet sadya eva

19.35

haṃsārūḍho madanastrailokyakṣobhako bhavedāśu
dyuyuto (2) rañjanakṛt syājjīvopetastathāyuṣe śastaḥ

19.36

tārayujā tvasunāgnau hutvā sampātitena cājyena
sambhojayet patiṃ svaṃ vanitā sā nitāntarañjito bhavati

19.37

dadhyaktābhirjuhuyāllājābhiḥ kanyakāṃ samākāṅkṣan
kanyāpi varaṃ labhate vidhinā nityānuraktamamunaiva

19.38

abhinavaiḥ sumanobhiraśokajairdadhiyutairvihitā havanakriyā
paramavaśyakarī parikāṅkṣitāmabhibahedacirādiva kanyakām

19.39

abhīṣṭadāyī smaraṇādapi smarastathā japādarcanayā viśeṣataḥ
prasādato'syākhilalokavarttinaścirāya vaśyāśca bhavanti mantriṇaḥ

19.40

hṛndāmadhyagatāḥ ṣṇāyagovyarṇā yallabhadhyagāḥ
gopījanavakārāḥ syurbhāya svāhā smarādikāḥ

19.41

ṛṣiśca nārado'sya syādgāyatraṃ chanda ucyate
mantrasya devatā kṛṣṇastadaṅgavidhirucyate

19.42

mūlamantracaturvarṇaiścatuṣkeṇa dvikena ca
proktānyaṅgāni bhūyo'muṃ cintayeddevakīsūtam

19.43

avyānnīlakalāpadyutirahiripupicchollasatkeśajālī
gopīnetrotpalārādhitalalitavapurgopagovṛndavītaḥ
śrīmadvaktrāravindapratihasitaśaśāṅkākṛtiḥ pītavāsā
devo'sau veṇuvādyacchapitajanahṛtirdevakīnandano vaḥ

19.44

ayutadvitayāvadhirjapaḥ syādaruṇairamburuhairhuneddaśāṃśam
murajidvihite tu pīṭhavarye dinaśo nandasutaḥ samarcanīyaḥ

19.45

aṅgāṅgaiḍvajrādyaiḥ paripūjya ca pāyasena susitena
haiyaṅgavīnakadalīphaladadhibhiḥ prīṇayecca govindam

19.46

juhuyāddugdhahavirbhirvimalaiḥ sarpiḥ sitopalopetaiḥ
iṣṭāntuṣṭo lakṣmīṃ samāvahet sadya eva govindaḥ

19.47

bālaṃ nīlāmbudābhaṃ navamaṇiviracitkiṅkiṇījālabaddhaśroṇījaṅghāntayugmaṃ vipularunakhaprotlasatkaṇṭhabhūṣam
phullāmbhojāmravaktraṃ hataśakaṭapatatpūtanādyaṃ prasannaṃ
govindaṃ śaṅkarendrāyamaravaranataṃ (1) pūjayedvāsarādau

19.48

vandyaṃ devairmukundaṃ vikasitakaravindābha(2) mindīvarākṣaṃ
gogopīvṛndavītaṃ jitaripunivahaṃ kundamandārahāsam
nīlagrīvāyapicchākalanasuvilasatkuntalaṃ bhānumantaṃ
devaṃ pītāmbarāḍhyaṃ yajatu ca dinaśo madhyame'hno ramāyai

19.49

vikrāntyā dhvastavairivrajamajitamapāstā'vanobhāramādyairāvītaṃ nāradādyairmunibhiranudinaṃ tattvanirṇītihetoḥ
sāyāhne nirmalaṃ taṃ nirupamamajaraṃ pūjayennīlabhāsaṃ
mantro viśvodayasthityapaharaṇaparaṃ muktidaṃ vāsudevam

19.50

trikālamevaṃ paricintya śārṅgiṇaṃ prapūjayedyo manujo mahāmanāḥ
sa dharmamarthaṃ sasukhaṃ śriyaṃ parāmavāpya dehāpadi muktimāpnuyāt

19.51

grāmaṃ gacchannagaramapi vā mantrajāpī manuṣyo
deveśaṃ tanmukhamanu muhustarpayeddugdhabuddhyā
śuddhaistoyaiḥ sa tu bahurasopetamāhārajātaṃ
dadyānnityaṃ pracuradhanadhānyāṃśukānyairmuukundaḥ

19.52

bhikṣāvṛttitdinamanu tamevaṃ vicintyātmarūpaṃ
gopastrībhyo muharapaharantaṃ manobhiḥ sahaiva
līlāhṛṣṭyā lalitalalitaiśceṣṭitairdugdhasarpirdadhyannādyaṃ sa punaramitāmeti bhikṣāṃ gṛhebhyaḥ

19.53

dhyānī mantrī mantrajāpī ca nityaṃ yadyadvāñchan yatra yatra prayāti
tattallabdhvā tatra tatra prakāmaṃ prītaḥ krīḍeddevavanmānuṣeṣu

19.54

evaṃ devaṃ pūjayanmantramenaṃ japyānmantrī sarvvalokapriyaḥ syāt
iṣṭān kāmān prāpya sampannavṛttirnityaṃ śuddhaṃ tatparaṃ dhāma bhūyāt

Linked texts (9)