[Pramāṇa](https://indike.org/pramana/) › [Indian literature](https://indike.org/pramana/in) › [Sangam Literature](https://indike.org/pramana/in.sangam) › [The Eight Anthologies](https://indike.org/pramana/in.sangam.eight_anthologies) › [Puṟanāṉūṟu](https://indike.org/pramana/in.sangam.eight_anthologies.purananuru) › [Purananuru palaiya urai](https://indike.org/pramana/in.sangam.eight_anthologies.purananuru!old-urai) › 1 # Purananuru 1 Puṟanāṉūṟu paḻaiya urai 1 - **Language:** Tamil ### [1.p1](https://indike.org/pramana/in.sangam.eight_anthologies.purananuru!old-urai.1.p1) கண்ணி கார்நறுங் கொன்றை காமர் வண்ண மார்பிற் றாருங் கொன்றை ஊர்தி வால்வெள் ளேறே சிறந்த சீர்கெழு கொடியு மவ்வே றென்ப ### [1.p2](https://indike.org/pramana/in.sangam.eight_anthologies.purananuru!old-urai.1.p2) 5 கறைமிட றணியலு மணிந்தன் றக்கறை மறைநவி லந்தணர் நுவலவும் படுமே பெண்ணுரு வொருதிற னாகின் றவ்வுருத் தன்னு ளடக்கிக் கரக்கினுங் கரக்கும் பிறைநுதல் வண்ண மாகின் றப்பிறை ### [1.p3](https://indike.org/pramana/in.sangam.eight_anthologies.purananuru!old-urai.1.p3) 10 பதினெண் கணனு மேத்தவும் படுமே எல்லா வுயிர்க்கு மேம மாகிய நீரற வறியாக் கரகத்துத் தாழ்சடைப் பொலிந்த வருந்தவத் தோற்கே. ### [1.p4](https://indike.org/pramana/in.sangam.eight_anthologies.purananuru!old-urai.1.p4) கடவுள் வாழ்த்து. பாரதம்பாடிய பெருந்தேவனார் பாடியது. ### [1.p5](https://indike.org/pramana/in.sangam.eight_anthologies.purananuru!old-urai.1.p5) இதன் பொருள் - திருமுடிமேற் சூடப்படுங்(பி - ம்.. சூட்டிய) கண்ணி கார்காலத்து மலரும் நறியகொன்றைப்பூ; அழகிய நிறத்தையுடைய திருமார்பின்மாலையும் அக் கொன்றைப்பூ; ஏறப்படுவது தூய வெளியஆனேறு; மிக்க பெருமை பொருந்திய கொடியும் அவ்வானேறென்றுசொல்லுவர்; நஞ்சினது கறுப்பு, திருமிடற்றை அழகு செய்தலும்செய்தது; அக்கறுப்பு, தான் மறுவாயும் வானோரை உய்யக்கொண்டமையின்,வேதத்தைப் பயிலும் அந்தணராற் புகழவும்படும்; பெண்வடிவு ஒருபக்கமாயிற்று; ஆய அவ்வடிவுதான், தன்னுள்ளேஒடுக்கி மறைக்கினும் ### [1.p6](https://indike.org/pramana/in.sangam.eight_anthologies.purananuru!old-urai.1.p6) மறைக்கப்படும்; பிறை, திருநுதற்கு(பி - ம். திருநுதலது) அழகாயது. அப்பிறைதான் பெரியோன்சூடுதலால், பதினெண் கணங்களாலும் புகழவும்படும்; எவ்வகைப்பட்டஉயிர்களுக்கும் காவலாகிய, நீர் தொலைவறியாக் குண்டிகையானும்தாழ்ந்த திருச்சடையானும் சிறந்த செய்தற்கரியதவத்தையுடையோனுக்கு - என்றவாறு. ### [1.p7](https://indike.org/pramana/in.sangam.eight_anthologies.purananuru!old-urai.1.p7) தன்னுளடக்கிக் கரக்கினும் கரக்குமென்பதற்கு அவ்வடிவுதான்எல்லாப் பொருளையும் தன்னுள்ளேயடக்கி அவ்விறைவன்கூற்றிலே மறையினும் மறையுமென்று உரைப்பினும்அமையும். ### [1.p8](https://indike.org/pramana/in.sangam.eight_anthologies.purananuru!old-urai.1.p8) நீரறவறியாக் கரகம் - கங்கையென்பாருமுளர். ### [1.p9](https://indike.org/pramana/in.sangam.eight_anthologies.purananuru!old-urai.1.p9) அக்கறை, அவ்வுரு, அப்பிறை என நின்றஎழுவாய்கட்கு நுவலவும்படும், கரக்கினுங்கரக்கும்,ஏத்தவும்படும் என நின்ற பயனிலைகளை நிரலேகொடுக்க. இவ்வெழுவாய்களையும் பிறவற்றையும் அருந்தவத்தோற்கென்னும்நான்காவதனோடு முடிக்க. ### [1.p10](https://indike.org/pramana/in.sangam.eight_anthologies.purananuru!old-urai.1.p10) ஏமமாகிய (11) அருந்தவத்தோ (13) னென்க;¹ ஏமமாகிய நீரெனினும் அமையும். ### [1.p11](https://indike.org/pramana/in.sangam.eight_anthologies.purananuru!old-urai.1.p11) அணியலுமணிந்தன்றென்பது, “உண்ணலு முண்ணேன்” (கலித்.23) என்பது போல நின்றது. ### [1.p12](https://indike.org/pramana/in.sangam.eight_anthologies.purananuru!old-urai.1.p12) பதினெண்கணங்களாவார் : தேவரும் அசுரரும் முனிவரும்கின்னரரும் கிம்புருடரும் கருடரும் இயக்கரும் இராக்கதரும்கந்தருவரும் சித்தரும் சாரணரும் வித்தியாதரரும் நாகரும்பூதமும் வேதாளமும் தாராகணமும் ஆகாசவாசிகளும் போகபூமியோருமென இவர்; ² பிறவாறும் உரைப்பர். ### [1.p13](https://indike.org/pramana/in.sangam.eight_anthologies.purananuru!old-urai.1.p13) இப்பெரியோனை மனமொழி மெய்களான்வணங்க அறமுதல் நான்கும் பயக்கு மென்பது கருத்தாகக்கொள்க. ### [1.p14](https://indike.org/pramana/in.sangam.eight_anthologies.purananuru!old-urai.1.p14) (குறிப்புரை) 1. கண்ணி - ஆடவர் தலையிற்சூடுதற்குரிய மாலை; “பெருந்தண் கண்ணி மிலைந்த சென்னியன்”(முருகு. 44); கார் நறுங் கொன்றை: “காரினார் மலர்க்கொன்றைதாங்கு கடவுள்”, “கார்க் கொன்றை மாலை கலந்ததுண்டோ” (தே.) ; கொன்றைமாலை சிவபெருமானதுஅடையாள மாலை என்பர்; கலித். 150 : 1.; சீவக. 208, ந. ### [1.p15](https://indike.org/pramana/in.sangam.eight_anthologies.purananuru!old-urai.1.p15) 2. தார் - மார்பிலணியுமாலை; “மார்பொடு விளங்கவொருகை, தாரொடு பொலிய வொருகை” (முருகு. 112 - 3);“பொலந்தார் மார்பினெடியோன்” (மதுரைக்.61); “புனைதார்ப் பொலிந்த வண்டுபடுமார்பின்”(மலைபடு. 56) ### [1.p16](https://indike.org/pramana/in.sangam.eight_anthologies.purananuru!old-urai.1.p16) 1 - 2. “கார்விரி, கொன்றைப்பொன்னேர் புதுமலர்த், தாரன் மாலையன் மலைந்த கண்ணியன்”(அகநா. கடவுள்.) ### [1.p17](https://indike.org/pramana/in.sangam.eight_anthologies.purananuru!old-urai.1.p17) 3. “ஒன்றானுங் குறைவில்லை யூர்திவெள்ளேறு”(தே.); “வால் வெண் சுண்ணம்” (மணி. 4 : 18); “வால்வெண்டோடு - இளைய வெள்ளிய தோடெனினுமமையும்; ‘ஊர்திவால்வெள்ளேறே‘(சிலப். 16 : 35, அடியார்.) என்றாராகலின்” ### [1.p18](https://indike.org/pramana/in.sangam.eight_anthologies.purananuru!old-urai.1.p18) 1 - 3. “கண்ணி.....ஏறே யென்புழிக் கொன்றையையும்ஏற்றையும் இடைவந்த சொற்கள் விசேடித்து வந்தன”(தொல். எச்ச. சூ. 59, ந.) ### [1.p19](https://indike.org/pramana/in.sangam.eight_anthologies.purananuru!old-urai.1.p19) 3 - 4. புறநா. 56 : 1 - 2. ### [1.p20](https://indike.org/pramana/in.sangam.eight_anthologies.purananuru!old-urai.1.p20) 5. “இயங்கலு மியங்கு மயங்கலுமயங்கும்” (சிலப். 22 : 154); “சுழலலுஞ் சுழலுமோடலு மோடும்........நீடலு நீடும்”, “தமபெரும்பற்று நீங்கலு நீங்கார்” (மணி. 3 : 111 - 3, 8 : 57);“முரிமுரிந்தவென்பதனை, ‘அணியலு மணிந்தன்று’என்றாற்போலக் கொள்க” (சீவக. 2310, ந.); “கறைமிடறணியலு மணிந்தன்றென்புழிக் கறைமிடற்றை அழகு பெறுதலையுஞ்செய்ததென.........முழுதும் காரியவாசகமாயே நின்றவாறுகாண்க” (தொல். வேற்றுமைமயங்கு. சூ. 29, ந.); வேற்றுமைக்கண்றகரம் மிகாமைக்கு இவ்வடி மேற்கோள் (நன். மயிலை.சூ. 182; நன். வி. சூ. 183; இ - வி. சூ. 102, உரை); “விடமும்வந் தீசன் கோல மிடற்றினினீல வண்ண, வடிவுபெற்றணிய தாகி வயங்கிற்றுப் பெரிது மென்றால்,கொடியரும் பெருமை யோரைக் கூடின்வெங் கோது நீங்கி,ஒடிவறு நலம்பெற் றுய்த லுரைப்பதெ னுலகி னம்மா”(பாகவதம், 8 : கடல்கடைந்த. 24); “அணியலுமணிந்தன்று;ஒரு பொருட் பன்மொழி” (நன். மயிலை. சூ. 397); கறைமறுவெனப்படுதல்: “விண்ணினார் புகழ்தற் கொத்தவிழுமியோ னெற்றி போழ்ந்த, கண்ணினான் கண்டந்தன்மேற் கறையையார் கறையன் றென்பார்” (குண்டல.);“பாவகத்தைப் பாவித்தலென்பது, ‘கறைமிட றணியலுமணிந்தன்று‘ என்றது போலக் கொள்க” (சிவஞானபோதம்,பொதுவியல்பு, சூ. 6, மேற்.); கறை அழகு செய்யு மென்பதை,“கடுக்கவின்பெறு கண்டனும்” (திருவிளை. நகரப்.)என்பதனால் உணர்க. ### [1.p21](https://indike.org/pramana/in.sangam.eight_anthologies.purananuru!old-urai.1.p21) 6. நவிலல் - கூறியடிப்படல்; “நாவிடைநன்னூ னன்கன நவிற்றி” (மணி. 13 : 24) ### [1.p22](https://indike.org/pramana/in.sangam.eight_anthologies.purananuru!old-urai.1.p22) 9. (புறநா. 55 : 4 - 5); “பிறைநெற்றியோடுற்ற முக்கண்ணினார்”, “பிறை தாங்கு நெற்றியர்”,“பிறைசேர் நுதலிடைக் கண்ணமர்ந் தவனே” (தே.) ### [1.p23](https://indike.org/pramana/in.sangam.eight_anthologies.purananuru!old-urai.1.p23) 7 - 9. ஆகின்று - ஆயிற்று; புறநா. 148 :7. ### [1.p24](https://indike.org/pramana/in.sangam.eight_anthologies.purananuru!old-urai.1.p24) 10. பதினெண்கணன் : “ஒன்பதிற்றிரட்டி யுயர்நிலை பெறீஇயர்” (முருகு. 168) ### [1.p25](https://indike.org/pramana/in.sangam.eight_anthologies.purananuru!old-urai.1.p25) 9 - 10. பிறை தொழுதேத்தப்படுதல்:“தொழுதுகாண் பிறையிற்றோன்றி” (குறுந். 178);“ஒள்ளிழை மகளி ருயர்பிறை தொழூஉம், புல்லென்மாலை” (அகநா. 239); “குழவித் திங்க ளிமையவ ரேத்த,அழகொடு முடித்த வருமைத்து” (சிலப். 2 : 38 - 9); “அப்பிறை,பதினெண் கணனு மேத்தவும் படுமே யென்றார் புறப்பாட்டினும்”(சிலப். 2 : 38 - 9, அடியார்.); வி. பா. குருகுலச். 6. ### [1.p26](https://indike.org/pramana/in.sangam.eight_anthologies.purananuru!old-urai.1.p26) 11 - 2. ஆசிரியப்பாவில் ஈற்றயலடிமுச்சீர்த்தாய் வந்ததற்கு இவ்வடி மேற்கோள்; தொல்.செய். சூ. 68, பேர். ### [1.p27](https://indike.org/pramana/in.sangam.eight_anthologies.purananuru!old-urai.1.p27) 13. அருந்தவத்தோன் : “அருந்தவமுதல்வன்” (கலித். 100 : 7); “நற்றவனைப் புற்றரவநாணி னானை”, “நற்றவனை நான்மறைகளாயி னானை”,“நற்றவாவுனை நான்மறக்கினுஞ் சொல்லுநா நமச்சிவாயவே”,“நற்றவன் காண்”, “மாதொர் கூறுடை நற்றவனை”(தே.); “அருந்தவ னதிசயித்து” (திருவால. 61 : 6). ### [1.p28](https://indike.org/pramana/in.sangam.eight_anthologies.purananuru!old-urai.1.p28) 1. ‘ஏமமாகிய நீர்’ என்றது “நீரின்றமையாதுலகு”(குறள், 20) என்பது கருதி. ### [1.p29](https://indike.org/pramana/in.sangam.eight_anthologies.purananuru!old-urai.1.p29) 2. முருகு. 168, ந.; பிங்கலம், 92; தக்க.136, உரை. --- Source: [https://indike.org/pramana/in.sangam.eight_anthologies.purananuru!old-urai.1](https://indike.org/pramana/in.sangam.eight_anthologies.purananuru!old-urai.1) · Pramāṇa