[Pramāṇa](https://indike.org/pramana/) › [Indian literature](https://indike.org/pramana/in) › [Sangam Literature](https://indike.org/pramana/in.sangam) › [The Five Great Epics](https://indike.org/pramana/in.sangam.five_great_epics) › [Maṇimēkalai's Renunciation](https://indike.org/pramana/in.sangam.five_great_epics.manimekalai) › 10 # Maṇimēkalai's Renunciation 10: மந்திரம் கொடுத்த காதை Maṇimēkalai 10 - **Language:** Tamil ### மந்திரம் கொடுத்த காதை ### [10.1](https://indike.org/pramana/in.sangam.five_great_epics.manimekalai.10.1) 'அறவோன் ஆசனத்து ஆய் இழை அறிந்த பிறவியள் ஆயினள் பெற்றியும் ஐது' என விரை மலர் ஏந்தி விசும்பூடு இழிந்து பொரு அறு பூங் கொடி பூமியில் பொலிந்தென வந்து தோன்றிய மணிமேகலா தெய்வம் ### [10.6](https://indike.org/pramana/in.sangam.five_great_epics.manimekalai.10.6) முந்தைப் பிறப்பு எய்தி நின்றோள் கேட்ப 'உயிர்கள் எல்லாம் உணர்வு பாழாகி பொருள் வழங்கு செவித் துளை தூர்ந்து அறிவு இழந்த வறம் தலை உலகத்து அறம் பாடு சிறக்கச் சுடர் வழக்கு அற்றுத் தடுமாறுகாலை ஓர் ### [10.11](https://indike.org/pramana/in.sangam.five_great_epics.manimekalai.10.11) இள வள ஞாயிறு தோன்றியதென்ன நீயோ தோன்றினை நின் அடி பணிந்தேன் நீயே ஆகி நிற்கு அமைந்த இவ் ஆசனம் நாமிசை வைத்தேன் தலைமிசைக் கொண்டேன் பூமிசை ஏற்றினேன் புலம்பு அறுக" என்றே ### [10.16](https://indike.org/pramana/in.sangam.five_great_epics.manimekalai.10.16) வலம் கொண்டு ஆசனம் வணங்குவோள் முன்னர்ப் பொலம் கொடி நிலமிசைச் சேர்ந்தெனப் பொருந்தி 'உன் திருவருளால் என் பிறப்பு உணர்ந்தேன் என் பெருங் கணவன் யாங்கு உளன்?' என்றலும் 'இலக்குமி கேளாய் இராகுலன் தன்னொடு ### [10.21](https://indike.org/pramana/in.sangam.five_great_epics.manimekalai.10.21) புலத்தகை எய்தினை பூம்பொழில் அகவயின் இடங்கழி காமமொடு அடங்கானாய் அவன் மடந்தை மெல் இயல் மலர் அடி வணங்குழி சாதுசக்கரன் மீவிசும்பு திரிவோன் தெரு மரல் ஒழித்து ஆங்கு இரத்தினத் தீவத்துத் ### [10.26](https://indike.org/pramana/in.sangam.five_great_epics.manimekalai.10.26) தரும சக்கரம் உருட்டினன் வருவோன் வெங்கதிர் அமயத்து வியன் பொழில் அகவயின் வந்து தோன்றலும் மயங்கினை கலங்கி மெல் இயல்! கண்டனை மெய்ந் நடுக்குற்றனை நல்கூர் நுசுப்பினை நாணினை இறைஞ்ச ### [10.31](https://indike.org/pramana/in.sangam.five_great_epics.manimekalai.10.31) இராகுலன் "வந்தோன் யார்?" என வெகுளலும் விரா மலர்க் கூந்தல்! அவன் வாய் புதையா "வானூடு இழிந்தோன் மலர் அடி வணங்காது நா நல்கூர்ந்தனை" என்று அவன் தன்னொடு பகை அறு பாத்தியன் பாதம் பணிந்து ஆங்கு ### [10.36](https://indike.org/pramana/in.sangam.five_great_epics.manimekalai.10.36) "அமர! கேள் நின் தமர் அலம் ஆயினும் அம் தீம் தண்ணீர் அமுதொடு கொணர்கேம் உண்டி யாம் உன் குறிப்பினம்" என்றலும் "எம் அனை! உண்கேன் ஈங்குக் கொணர்க" என அந் நாள் அவன் உண்டருளிய அவ் அறம் 1 ### [10.41](https://indike.org/pramana/in.sangam.five_great_epics.manimekalai.10.41) நின்னாங்கு ஒழியாது நின் பிறப்பு அறுத்திடும் உவவன மருங்கில் உன்பால் தோன்றிய உதயகுமரன் அவன் உன் இராகுலன் ஆங்கு அவன் அன்றியும் அவன்பால் உள்ளம் நீங்காத் தன்மை நினக்கும் உண்டு ஆகலின் ### [10.46](https://indike.org/pramana/in.sangam.five_great_epics.manimekalai.10.46) கந்தசாலியின் கழி பெரு வித்து ஓர் வெந்து உகு வெங் களர் வீழ்வது போன்ம் என அறத்தின் வித்து ஆங்கு ஆகிய உன்னை ஓர் திறப்படற்கு ஏதுவா சேயிழை! செய்தேன் இன்னும் கேளாய் இலக்குமி! நீ நின் ### [10.51](https://indike.org/pramana/in.sangam.five_great_epics.manimekalai.10.51) தவ்வையர் ஆவோர் தாரையும் வீரையும் ஆங்கு அவர் தம்மை அங்க நாட்டு அகவயின் கச்சயம் ஆளும் கழல் கால் வேந்தன் துச்சயன் என்போன் ஒருவன் கொண்டனன் அவருடன் ஆங்கு அவன் அகல் மலை ஆடி ### [10.56](https://indike.org/pramana/in.sangam.five_great_epics.manimekalai.10.56) கங்கைப் பேர் யாற்று அடைகரை இருந்துழி மற வணம் நீத்த மாசு அறு கேள்வி அறவணன் ஆங்கு அவன்பால் சென்றோனை "ஈங்கு வந்தீர் யார்?" என்று எழுந்து அவன் பாங்கு உளி மாதவன் பாதம் பணிதலும் ### [10.61](https://indike.org/pramana/in.sangam.five_great_epics.manimekalai.10.61) "ஆதி முதல்வன் அற ஆழி ஆள்வோன் மா துயர் எவ்வம் மக்களை நீக்கி விலங்கும் தம்முள் வெரூஉம் பகை நீக்கி உடங்கு உயிர் வாழ்க என்று உள்ளம் கசிந்து உக தொன்று காலத்து நின்று அறம் உரைத்த ### [10.66](https://indike.org/pramana/in.sangam.five_great_epics.manimekalai.10.66) குன்ற மருங்கில் குற்றம் கெடுக்கும் பாத பங்கயம் கிடத்தலின் ஈங்கு இது பாதபங்கய மலை எனும் பெயர்த்து ஆயது தொழுது வலம் கொள்ள வந்தேன் ஈங்கு இப் பழுது இல் காட்சியீர்! நீயிரும் தொழும்" என ### [10.71](https://indike.org/pramana/in.sangam.five_great_epics.manimekalai.10.71) அன்று அவன் உரைத்த அவ் உரை பிழையாது சென்று கைதொழுது சிறப்புச் செய்தலின் மாதவி ஆகியும் சுதமதி ஆகியும் கோதை அம் சாயல்! நின்னொடு கூடினர் அறிபிறப்பு உற்றனை அறம் பாடு அறிந்தனை ### [10.76](https://indike.org/pramana/in.sangam.five_great_epics.manimekalai.10.76) பிற அறம் உரைப்போர் பெற்றியும் கேட்குவை பல் வேறு சமயப் படிற்று உரை எல்லாம் அல்லி அம் கோதை! கேட்குறும் அந் நாள் இளையள் வளையோள் என்று உனக்கு யாவரும் விளை பொருள் உரையார் வேற்று உரு எய்தவும் ### [10.81](https://indike.org/pramana/in.sangam.five_great_epics.manimekalai.10.81) அந்தரம் திரியவும் ஆக்கும் இவ் அருந் திறல் மந்திரம் கொள்க' என வாய்மையின் ஓதி 'மதி நாள் முற்றிய மங்கலத் திருநாள் பொது அறிவு இகழ்ந்து புலம் உறு மாதவன் திருவறம் எய்துதல் சித்தம் என்று உணர் நீ ### [10.86](https://indike.org/pramana/in.sangam.five_great_epics.manimekalai.10.86) மன் பெரும் பீடிகை வணங்கினை ஏத்தி நின் 'பதிப் புகுவாய்' என்று எழுந்து ஓங்கி 'மறந்ததும் உண்டு' என மறித்து ஆங்கு இழிந்து 'சிறந்த கொள்கைச் சேயிழை! கேளாய் மக்கள் யாக்கை உணவின் பிண்டம் ### [10.91](https://indike.org/pramana/in.sangam.five_great_epics.manimekalai.10.91) இப் பெரு மந்திரம் இரும் பசி அறுக்கும்' என்று ஆங்கு அது கொடுத்து ஆங்கு அந்தரம் எழுந்து நீங்கியது ஆங்கு நெடுந் தெய்வம் தான் என் ## Commentaries (1) - [Maṇimēkalai urai](https://indike.org/pramana/in.sangam.five_great_epics.manimekalai!urai.11.1) — Tamil --- Source: [https://indike.org/pramana/in.sangam.five_great_epics.manimekalai.10](https://indike.org/pramana/in.sangam.five_great_epics.manimekalai.10) · Pramāṇa