<!-- Pramāṇa, a library of Indian primary sources · https://indike.org/pramana/in.veda.aranyaka.taittiriya.4.10 -->

[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Āraṇyakas (forest texts)](https://indike.org/pramana/in.veda.aranyaka) › [Taittirīya Āraṇyaka](https://indike.org/pramana/in.veda.aranyaka.taittiriya) › 4.10

# Taittirīya Āraṇyaka 4.10

Taittirīyāraṇyaka 4.10

- **Language:** Sanskrit

### [4.10.1](https://indike.org/pramana/in.veda.aranyaka.taittiriya.4.10.1)

iṣé pīpihi \  
ūrjé pīpihi \  
bráhmaṇe pīpihi \  
kṣatrā́ya pīpihi \  
adbhyáḥ pīpihi \  
óṣadhībhyaḥ pīpihi \  
vánaspátibhyaḥ pīpihi \  
dyā́vāpṛthivī́bhyāṃ pīpihi \  
subhūtā́ya pīpihi \  
brahmavarcasā́ya pīpihi \

### [4.10.2](https://indike.org/pramana/in.veda.aranyaka.taittiriya.4.10.2)

yájamānāya pīpihi \  
máhyaṃ jyáiṣṭhāya pīpihi \  
tvíṣyai tvā \  
dyumnā́ya tvā \  
indriyā́ya tvā bhū́tyai tvā \  
dhármāsi sudhármā́meny asmé \  
bráhmāṇi dhāraya \  
kṣattrāṇi dhāraya \  
víśaṃ dhāraya \  
nét tvā vā́taḥ skandáyāt \

### [4.10.3](https://indike.org/pramana/in.veda.aranyaka.taittiriya.4.10.3)

amúṣya tvā prāṇé sādayāmi \  
amúnā sahá nirartháṃ gaccha \  
yò 'smā́n dvéṣṭi \  
yáṃ ca vayáṃ dviṣmáḥ \  
pūṣṇé śárase svā́hā \  
grā́vabhyaḥ svā́hā \  
pratirébhyaḥ svā́hā \  
dyā́vāpṛthivī́bhyām̐ svā́hā \  
pitṛ́bhyo gharmapébhyaḥ svā́hā \  
rudrā́ya rudráhotre svā́hā \

### [4.10.4](https://indike.org/pramana/in.veda.aranyaka.taittiriya.4.10.4)

áhar jyótiḥ ketúnā juṣatām \  
sujyotír jyótiṣām̐ svā́hā \  
rā́trir jyótiḥ ketúnā juṣatām \  
sujyotír jyótiṣām̐ svā́hā \  
ápīparo mā 'hno rā́triyai mā pāhi \  
eṣā́ te agne samít \  
táyā sámidhyasva \  
ā́yur me dāḥ \  
várcasā māñjīḥ \  
ápīparo mā rā́triyā áhno mā pāhi \

### [4.10.5](https://indike.org/pramana/in.veda.aranyaka.taittiriya.4.10.5)

eṣā́ te agne samít \  
táyā sámidhyasva \  
ā́yur me dāḥ \  
várcasā māñjīḥ \  
agnír jyótir jyótir agníḥ svā́hā \  
sū́ryo jyótir jyótiḥ sū́ryaḥ svā́hā \  
bhū́ḥ svā́hā \  
hutám̐ havíḥ \  
mádhu havíḥ \  
índratame 'gnáu \  
pitā́ nò 'si mā́ mā him̐sīḥ \  
aśyā́ma te deva gharma \  
mádhumato vā́javataḥ pitumátaḥ \  
áṅgirasvataḥ svadhāvínaḥ \  
aśīmáhi tvā mā́ mā him̐sīḥ \  
svā́hā tvā sū́ryasya raśmíbhyaḥ \  
svā́hā tvā nákṣatrebhyaḥ \ \\ brahmavarcasā́ya pīpihi skandáyād rudrā́ya rudráhotre svā́hā́ 'hno mā pāhy agnáu saptá ca \\

## Commentaries (2)

- [Taittirīyāraṇyakabhāṣya (Sāyaṇa)](https://indike.org/pramana/in.veda.aranyaka.taittiriya!sayana) — Sāyaṇa, Sanskrit
- [Vedārthaprakāśa](https://indike.org/pramana/in.veda.aranyaka.taittiriya!sayana-alias-madhava) — Sāyaṇa alias Mādhava, Sanskrit

## Linked texts (4)

- [Baudhāyanaśrautasūtra](https://indike.org/pramana/in.vedanga.kalpa.srauta.baudhayana.9.10.279.22) — Baudhāyana, Sanskrit
- [Yajurveda](https://indike.org/pramana/in.veda.samhita.yajurveda.2.36) — Sanskrit
- [Kaṭhāraṇyaka](https://indike.org/pramana/in.veda.aranyaka.katha) — Sanskrit
- [A Vedic Concordance](https://indike.org/pramana/ins.reference.bloomfield-1906.c6.551) — Maurice Bloomfield, English

---
Source: [https://indike.org/pramana/in.veda.aranyaka.taittiriya.4.10](https://indike.org/pramana/in.veda.aranyaka.taittiriya.4.10) · Pramāṇa