Pramāṇa · Search · About · API

Taittirīya Āraṇyaka 4.11

Taittirīyāraṇyaka 4.11

Language
Sanskrit

4.11.1

ghárma yā́ te diví śúk \
yā́ gāyatré chándasi \
yā́ brāhmaṇé \
yā́ havirdhā́ne \
tā́ṃ ta eténā́vayaje svā́hā \
ghárma yā́ te 'ntárikṣE śúk \
yā́ tráiṣṭubhe chándasi \
yā́ rājanyè \
yā́gnīdhre \
tā́ṃ ta eténā́vayaje svā́hā \

4.11.2

ghárma yā́ te pṛthivyā́m̐ śúk \
yā́ jā́gate chándasi \
yā́ váiśye \
yā́ sádasi \
tā́ṃ ta eténā́vayaje svā́hā \
ánu no 'dyā́numatiḥ \
ánv íd anumate tvám \
divás tvā paraspā́yāḥ \
antárikṣasya tanúvaḥ pāhi \
pṛthivyā́s tvā dhármaṇā \

4.11.3

vayám ánukrāmāma suvitā́ya návyase \
bráhmaṇas tvā paraspā́yāḥ \
kṣattrásya tanúvaḥ pāhi \
viśás tvā dhármaṇā \
vayám ánukrāmāma suvitā́ya návyase \
prāṇásya tvā paraspā́yai \
cákṣuṣas tanúvaḥ pāhi \
śrótrasya tvā dhármaṇā \
vayám ánukrāmāma suvitā́ya návyase \
válgur asi śaṃyúdhāyāḥ \

4.11.4

śíṣur jánadhāyāḥ \
śáṃ ca vákṣi pári ca vákṣi \
cátuḥsraktir nā́bhir ṛtásya \
sádo viśvā́yuḥ śárma sapráthāḥ \
ápa dvéṣo ápa hváraḥ \
anyádvratasya saścima \
ghármaitát té 'nnam etát púrīṣam \
téna várdhasva cā́ ca pyāyasva \
vardhiṣīmáhi ca vayám \
ā́ ca pyāsiṣīmáhi \

4.11.5

rántir nā́māsi divyó gandharváḥ \
tásya te padvád dhavirdhā́nam \
agnír ádhyakṣaḥ \
rudró 'dhipatiḥ \
sám ahám ā́yuṣā \
sáṃ prāṇéna \
sáṃ várcasā \
sáṃ páyasā \
sáṃ gaupatyéna \
sám̐ rāyáspóṣeṇa \

4.11.6

vyàsau \
yò 'smā́n dvéṣṭi \
yáṃ ca vayáṃ dviṣmáḥ \
ácikradad vṛ́ṣā háriḥ \
mahā́n mitró ná darśatáḥ \
sam̐ sūryeṇa rocate \
cíd asi samudráyoniḥ \
índur dákṣaḥ śyená ṛtā́vā \
híraṇyapakṣaḥ śakunó bhuraṇyúḥ \
mahā́nt sadhásthe dhruvá ā́ níṣattaḥ \ ā́níṣattaḥ; níṣattaḥ),

4.11.7

námas te astu mā́ mā him̐sīḥ \
viśvā́vasum̐ somagandharvám \
ā́po dadṛśúṣīḥ \
tád ṛténā vyā̀yan \
tád anvávait \
índro rārahāṇá āsām \
pári sū́ryasya paridhī́m̐r apaśyat \
viśvā́vasur abhí tán no gṛṇātu \
divyó gandharvó rájaso vimā́naḥ \
yád vā ghā satyám utá yán ná vidmá \

4.11.8

dhíyo hinvānó dhíya ín no avyāt \
sásnim avindac cáraṇe nadī́nām \
ápāvṛṇod dúro áśmavrajānām \
prā́sāṃ gandharvó amṛ́tāni vocat \
índro dákṣaṃ pári jānād ahī́nam \
etát tváṃ déva gharma devó devā́n úpāgāḥ \
idám aháṃ manuṣyò manuṣyā̀n \
sómapīthā́nu méhi \
sahá prajáyā sahá rāyáspóṣeṇa \
sumitrā́ na ā́pa óṣadhayaḥ santu \

4.11.9

durmitrā́s tásmai bhūyāsuḥ \
yò 'smā́n dvéṣṭi \
yáṃ ca vayáṃ dviṣmáḥ \
úd vayáṃ támasas pári \
úd u tyáṃ citrám \
imám ū ṣú tyám asmábhyam̐ saním \
gāyatráṃ návīyām̐sam \
ágne devéṣu prá vocaḥ \\ yā́gnīdhre tā́ṃ ta eténā́vayaje svā́hā dhármaṇā śaṃyúdhāyāḥ pyāsiṣīmáhi póṣeṇa níṣatto vidmá santv aṣṭáu ca \\

Linked texts (3)