[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Āraṇyakas (forest texts)](https://indike.org/pramana/in.veda.aranyaka) › [Taittirīya Āraṇyaka](https://indike.org/pramana/in.veda.aranyaka.taittiriya) › 4.11 # Taittirīya Āraṇyaka 4.11 Taittirīyāraṇyaka 4.11 - **Language:** Sanskrit ### [4.11.1](https://indike.org/pramana/in.veda.aranyaka.taittiriya.4.11.1) ghárma yā́ te diví śúk \ yā́ gāyatré chándasi \ yā́ brāhmaṇé \ yā́ havirdhā́ne \ tā́ṃ ta eténā́vayaje svā́hā \ ghárma yā́ te 'ntárikṣE śúk \ yā́ tráiṣṭubhe chándasi \ yā́ rājanyè \ yā́gnīdhre \ tā́ṃ ta eténā́vayaje svā́hā \ ### [4.11.2](https://indike.org/pramana/in.veda.aranyaka.taittiriya.4.11.2) ghárma yā́ te pṛthivyā́m̐ śúk \ yā́ jā́gate chándasi \ yā́ váiśye \ yā́ sádasi \ tā́ṃ ta eténā́vayaje svā́hā \ ánu no 'dyā́numatiḥ \ ánv íd anumate tvám \ divás tvā paraspā́yāḥ \ antárikṣasya tanúvaḥ pāhi \ pṛthivyā́s tvā dhármaṇā \ ### [4.11.3](https://indike.org/pramana/in.veda.aranyaka.taittiriya.4.11.3) vayám ánukrāmāma suvitā́ya návyase \ bráhmaṇas tvā paraspā́yāḥ \ kṣattrásya tanúvaḥ pāhi \ viśás tvā dhármaṇā \ vayám ánukrāmāma suvitā́ya návyase \ prāṇásya tvā paraspā́yai \ cákṣuṣas tanúvaḥ pāhi \ śrótrasya tvā dhármaṇā \ vayám ánukrāmāma suvitā́ya návyase \ válgur asi śaṃyúdhāyāḥ \ ### [4.11.4](https://indike.org/pramana/in.veda.aranyaka.taittiriya.4.11.4) śíṣur jánadhāyāḥ \ śáṃ ca vákṣi pári ca vákṣi \ cátuḥsraktir nā́bhir ṛtásya \ sádo viśvā́yuḥ śárma sapráthāḥ \ ápa dvéṣo ápa hváraḥ \ anyádvratasya saścima \ ghármaitát té 'nnam etát púrīṣam \ téna várdhasva cā́ ca pyāyasva \ vardhiṣīmáhi ca vayám \ ā́ ca pyāsiṣīmáhi \ ### [4.11.5](https://indike.org/pramana/in.veda.aranyaka.taittiriya.4.11.5) rántir nā́māsi divyó gandharváḥ \ tásya te padvád dhavirdhā́nam \ agnír ádhyakṣaḥ \ rudró 'dhipatiḥ \ sám ahám ā́yuṣā \ sáṃ prāṇéna \ sáṃ várcasā \ sáṃ páyasā \ sáṃ gaupatyéna \ sám̐ rāyáspóṣeṇa \ ### [4.11.6](https://indike.org/pramana/in.veda.aranyaka.taittiriya.4.11.6) vyàsau \ yò 'smā́n dvéṣṭi \ yáṃ ca vayáṃ dviṣmáḥ \ ácikradad vṛ́ṣā háriḥ \ mahā́n mitró ná darśatáḥ \ sam̐ sūryeṇa rocate \ cíd asi samudráyoniḥ \ índur dákṣaḥ śyená ṛtā́vā \ híraṇyapakṣaḥ śakunó bhuraṇyúḥ \ mahā́nt sadhásthe dhruvá ā́ níṣattaḥ \ ā́níṣattaḥ; níṣattaḥ), ### [4.11.7](https://indike.org/pramana/in.veda.aranyaka.taittiriya.4.11.7) námas te astu mā́ mā him̐sīḥ \ viśvā́vasum̐ somagandharvám \ ā́po dadṛśúṣīḥ \ tád ṛténā vyā̀yan \ tád anvávait \ índro rārahāṇá āsām \ pári sū́ryasya paridhī́m̐r apaśyat \ viśvā́vasur abhí tán no gṛṇātu \ divyó gandharvó rájaso vimā́naḥ \ yád vā ghā satyám utá yán ná vidmá \ ### [4.11.8](https://indike.org/pramana/in.veda.aranyaka.taittiriya.4.11.8) dhíyo hinvānó dhíya ín no avyāt \ sásnim avindac cáraṇe nadī́nām \ ápāvṛṇod dúro áśmavrajānām \ prā́sāṃ gandharvó amṛ́tāni vocat \ índro dákṣaṃ pári jānād ahī́nam \ etát tváṃ déva gharma devó devā́n úpāgāḥ \ idám aháṃ manuṣyò manuṣyā̀n \ sómapīthā́nu méhi \ sahá prajáyā sahá rāyáspóṣeṇa \ sumitrā́ na ā́pa óṣadhayaḥ santu \ ### [4.11.9](https://indike.org/pramana/in.veda.aranyaka.taittiriya.4.11.9) durmitrā́s tásmai bhūyāsuḥ \ yò 'smā́n dvéṣṭi \ yáṃ ca vayáṃ dviṣmáḥ \ úd vayáṃ támasas pári \ úd u tyáṃ citrám \ imám ū ṣú tyám asmábhyam̐ saním \ gāyatráṃ návīyām̐sam \ ágne devéṣu prá vocaḥ \\ yā́gnīdhre tā́ṃ ta eténā́vayaje svā́hā dhármaṇā śaṃyúdhāyāḥ pyāsiṣīmáhi póṣeṇa níṣatto vidmá santv aṣṭáu ca \\ ## Linked texts (3) - [Baudhāyanaśrautasūtra](https://indike.org/pramana/in.vedanga.kalpa.srauta.baudhayana.9.13.284.18) — Baudhāyana, Sanskrit - [Mādhyandina](https://indike.org/pramana/in.veda.samhita.suklayajur*vajasaneyi*madhyandina.38.19) — Sanskrit - [Kaṭhāraṇyaka](https://indike.org/pramana/in.veda.aranyaka.katha) — Sanskrit --- Source: [https://indike.org/pramana/in.veda.aranyaka.taittiriya.4.11](https://indike.org/pramana/in.veda.aranyaka.taittiriya.4.11) · Pramāṇa