Pramāṇa · Search · About · API

Taittirīya Āraṇyaka 4.20

Taittirīyāraṇyaka 4.20

Language
Sanskrit

4.20.1

bhū́r bhúvaḥ súvaḥ \
ūrdhvá ū ṣú ṇa ūtáye \
ūrdhvó naḥ pāhy ám̐hasaḥ \
vidhúṃ dadrāṇám̐ sámane bahūnā́m \
yúvānam̐ sántaṃ palitó jagāra \
devásya paśya kā́vyaṃ mahitvā́ 'dyā́ mamā́ra \
sá hyaḥ sámāna \
yád ṛté cid abhiśriṣaḥ \
purā́ jartṛ́bhya ātṛ́daḥ \
sáṃdhātā saṃdhiṃ maghávā purovásuḥ \

4.20.2

níṣkartā víhrutaṃ púnaḥ \
púnar ūrjā́ sahá ráyyā́ \
mā́ no gharma vyathitó vivyathó naḥ \
mā́ naḥ páram ádharaṃ mā́ rájo naiḥ \
mó ṣv àsmām̐s támasy antarā́ dhāḥ \
mā́ rudríyāso abhígur vṛdhā́naḥ \
mā́ naḥ krátubhir hīḍitébhir asmā́n \
dvíṣā sunīte mā́ párā dāḥ \
mā́ no rudró nírṛtir mā́ no ástā́ \
mā́ dyā́vāpṛthivī́ hīḍiṣātām \

4.20.3

úpa no mitrāvaruṇāv ihā́vatam \
anvā́dīdhyāthām ihá naḥ sakhāyā \
ādityā́nāṃ prásitir hetíḥ \
ugrā́ śatā́pāṣṭhā gha víṣā pári ṇo vṛṇaktu \
imáṃ me varuṇa tát tvā yāmi \
tváṃ no agne sá tváṃ no agne \
tvám agne ayā́si \
úd vayáṃ támasas pári \
úd u tyaṃ citrám \
váyaḥ suparṇā́ḥ \
\\ purovásur hīḍiṣātām̐ suparṇā́ḥ \\

Linked texts (2)