<!-- Pramāṇa, a library of Indian primary sources · https://indike.org/pramana/in.veda.aranyaka.taittiriya.4.2 -->

[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Āraṇyakas (forest texts)](https://indike.org/pramana/in.veda.aranyaka) › [Taittirīya Āraṇyaka](https://indike.org/pramana/in.veda.aranyaka.taittiriya) › 4.2

# Taittirīya Āraṇyaka 4.2

Taittirīyāraṇyaka 4.2

- **Language:** Sanskrit

### [4.2.1](https://indike.org/pramana/in.veda.aranyaka.taittiriya.4.2.1)

yuñjáte mána utá yuñjate dhíyaḥ \  
víprā víprasya bṛható vipaścítaḥ \  
ví hótrā dadhe vayunāvíd éka ít \  
mahī́ devásya savitúḥ páriṣṭutiḥ \  
devásya tvā savitúḥ prasavé \  
aśvínor bāhúbhyām \  
pūṣṇó hástābhyām ā́ dade \  
ábhrir asi nā́rir asi \  
adhvarakṛ́d devébhyaḥ \  
út tiṣṭha brahmaṇaspate \

### [4.2.2](https://indike.org/pramana/in.veda.aranyaka.taittiriya.4.2.2)

devayántas tvemahe \  
úpa prá yantu marútaḥ sudā́navaḥ \  
índra prāśū́r bhavā sácā \  
práitu bráhmaṇaspátiḥ \  
prá devy ètu sūnṛ́tā \  
ácchā vīráṃ náryàṃ paṅktírādhasaṃ \  
devā yajñáṃ nayantu naḥ \  
dévī dyāvāpṛthivī ánu me mam̐sāthām \  
ṛdhyā́sam adya \  
makhásya śíraḥ \

### [4.2.3](https://indike.org/pramana/in.veda.aranyaka.taittiriya.4.2.3)

makhā́ya tvā \  
makhásya tvā śīrṣṇé \  
íyaty ágra āsīḥ \  
ṛdhyā́sam adya \  
makhásya śíraḥ \  
makhā́ya tvā \  
makhásya tvā śīrṣṇé \  
dévīr vamrīr asyá bhūtásya prathamajā ṛtāvarīḥ \  
ṛdhyā́sam adya \  
makhásya śíraḥ \

### [4.2.4](https://indike.org/pramana/in.veda.aranyaka.taittiriya.4.2.4)

makhā́ya tvā \  
makhásya tvā śīrṣṇé \  
índrasyáujosi \  
ṛdhyā́sam adya \  
makhásya śíraḥ \  
makhā́ya tvā \  
makhásya tvā śīrṣṇé \  
agnijā́ asi prajā́pate rétaḥ \  
ṛdhyā́sam adya \  
makhásya śíraḥ \

### [4.2.5](https://indike.org/pramana/in.veda.aranyaka.taittiriya.4.2.5)

makhā́ya tvā \  
makhásya tvā śīrṣṇé \  
ā́yur dhehi prāṇáṃ dhehi \  
apānáṃ dhehi vyānáṃ dhehi \  
cákṣur dhehi śrótraṃ dhehi \  
máno dhehi vā́caṃ dhehi \  
ātmā́naṃ dhehi pratiṣṭhā́ṃ dhehi \  
mā́ṃ dhehi máyi dhehi \  
mádhu tvā madhulā́ karotu \  
makhásya śíro 'si \

### [4.2.6](https://indike.org/pramana/in.veda.aranyaka.taittiriya.4.2.6)

yajñásya padé sthaḥ \  
gāyatréṇa tvā chándasā karomi \  
tráiṣṭubhena tvā chándasā karomi \  
jā́gatena tvā chándasā karomi \  
makhásya rā́snāsi \  
áditis te bílaṃ gṛhṇātu \  
pā́ṅktena chándasā \  
sū́ryasya hárasā śrāya \  
makhò 'si \ \\ pate śíraḥ ṛtāvarīr ṛdhyā́sam adyá makhásya śíraḥ śíraḥ śíro 'si náva ca \\ \\ íyati devī́r índrasyáujo 'sy agnijā́ asyā́yur dhehi prāṇáṃ páñca \\ íyati

## Commentaries (2)

- [Taittirīyāraṇyakabhāṣya (Sāyaṇa)](https://indike.org/pramana/in.veda.aranyaka.taittiriya!sayana) — Sāyaṇa, Sanskrit
- [Vedārthaprakāśa](https://indike.org/pramana/in.veda.aranyaka.taittiriya!sayana-alias-madhava) — Sāyaṇa alias Mādhava, Sanskrit

## Linked texts (4)

- [Baudhāyanaśrautasūtra](https://indike.org/pramana/in.vedanga.kalpa.srauta.baudhayana.9.2.266.9) — Baudhāyana, Sanskrit
- [Yajurveda](https://indike.org/pramana/in.veda.samhita.yajurveda.2.10) — Sanskrit
- [Kaṭhāraṇyaka](https://indike.org/pramana/in.veda.aranyaka.katha) — Sanskrit
- [A Vedic Concordance](https://indike.org/pramana/ins.reference.bloomfield-1906.c6.646) — Maurice Bloomfield, English

---
Source: [https://indike.org/pramana/in.veda.aranyaka.taittiriya.4.2](https://indike.org/pramana/in.veda.aranyaka.taittiriya.4.2) · Pramāṇa