[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Āraṇyakas (forest texts)](https://indike.org/pramana/in.veda.aranyaka) › [Taittirīya Āraṇyaka](https://indike.org/pramana/in.veda.aranyaka.taittiriya) › 4.5 # Taittirīya Āraṇyaka 4.5 Taittirīyāraṇyaka 4.5 - **Language:** Sanskrit ### [4.5.1](https://indike.org/pramana/in.veda.aranyaka.taittiriya.4.5.1) bráhman prá cariṣyāmaḥ \ hótar gharmám abhí ṣṭuhi \ yamā́ya tvā makhā́ya tvā \ sū́ryasya hárase tvā \ prāṇā́ya svā́hā vyānā́ya svā́hāpānā́ya svā́hā \ cákṣuṣe svā́hā śrótrāya svā́hā \ mánase svā́hā vācé sárasvatyai svā́hā \ dakṣāya svāhā krátave svā́hā \ ójase svā́hā bálāya svā́hā \ devás tvā savitā́ mádhvānaktu \ ### [4.5.2](https://indike.org/pramana/in.veda.aranyaka.taittiriya.4.5.2) pṛthivī́ṃ tápasas trāyasva \ arcír asi śocír asi jyótir asi tápo 'si \ sam̐ sīdasva mahām̐ asi \ śócasva devavī́tamaḥ \ ví dhūmám agne aruṣáṃ miyedhya \ sṛjá praśastadarśatám \ añjanti yáṃ pratháyanto ná víprāḥ \ vapā́vantaṃ nā́gninā tápantaḥ \ pitúr ná putrá úpasi préṣṭhaḥ \ ā́ gharmó agním ṛtáyann asādīt \ ### [4.5.3](https://indike.org/pramana/in.veda.aranyaka.taittiriya.4.5.3) anādhṛṣyā́ purástāt \ agnér ā́dhipatye \ ā́yur me dāḥ \ putrávatī dakṣiṇatáḥ \ índrasyā́dhipatye \ prajā́ṃ me dāḥ \ suṣádā paścā́t \ devásya savitúr ā́dhipatye \ prāṇáṃ me dāḥ \ ā́śrutir uttaratáḥ \ ### [4.5.4](https://indike.org/pramana/in.veda.aranyaka.taittiriya.4.5.4) mitrā́váruṇayor ā́dhipatye \ śrótraṃ me dāḥ \ vídhṛtir upáriṣṭāt \ bṛ́haspáter ā́dhipatye \ bráhma me dāḥ kṣattráṃ me dāḥ \\ téjo me dhā, várco me dhāḥ \ yáśo me dhās tápo me dhāḥ \ máno me dhāḥ \ mánor áśvāsi bhū́riputrā \ víśvābhyo mā nāṣṭrā́bhyaḥ pāhi \ ### [4.5.5](https://indike.org/pramana/in.veda.aranyaka.taittiriya.4.5.5) sū́pasádā me bhūyā mā́ mā him̐sīḥ \ tápo ṣv àgne ántarām̐ amítrān \ tápā śám̐sam ararúṣaḥ párasya \ tápā vaso cikitānó acíttān \ ví te tiṣṭhantām ajárā ayā́saḥ \ cítaḥ stha paricítaḥ \ svā́hā marúdbhiḥ pári śrayasva \ mā́ asi \ pramā́ asi \ pratimā́ asi \ ### [4.5.6](https://indike.org/pramana/in.veda.aranyaka.taittiriya.4.5.6) saṃmā́ asi \ vimā́ asi \ unmā́ asi \ antárikṣasyāntardhír asi \ dívaṃ tápasas trāyasva \ ābhír gīrbhír yád áto na ūnám \ ā́pyāyaya harivo várdhamānaḥ \ yadā́ stotṛ́bhyo máhigotrā́ rujā́si \ bhūyiṣṭhabhā́jo ádha te syāma \ śukráṃ te anyád yajatáṃ te anyát \ ### [4.5.7](https://indike.org/pramana/in.veda.aranyaka.taittiriya.4.5.7) víṣurūpe áhanī dyáur ivāsi \ víśvā hí māyā́ ávasi svadhāvaḥ \ bhadrā́ te pūṣann ihá rātír astu \ árhan bibharṣi sā́yakāni dhánva \ árhan niṣkáṃ yajatáṃ viśvárūpam \ árhann idáṃ dayase víśvam ábbhuvam \ ná vā́ ójīyo rudra tvád asti \ gāyatrám asi \ tráiṣṭubham asi \ jā́gatam asi \ mádhu mádhu mádhu \ \\ anaktv asādīd uttaratáḥ pāhi pratimā́ asi yajatáṃ te anyáj jā́gatam asy ékaṃ ca \\ ## Commentaries (2) - [Taittirīyāraṇyakabhāṣya (Sāyaṇa)](https://indike.org/pramana/in.veda.aranyaka.taittiriya!sayana) — Sāyaṇa, Sanskrit - [Vedārthaprakāśa](https://indike.org/pramana/in.veda.aranyaka.taittiriya!sayana-alias-madhava) — Sāyaṇa alias Mādhava, Sanskrit ## Linked texts (5) - [Baudhāyanaśrautasūtra](https://indike.org/pramana/in.vedanga.kalpa.srauta.baudhayana.9.6.274.5) — Baudhāyana, Sanskrit - [Yajurveda](https://indike.org/pramana/in.veda.samhita.yajurveda.2.19) — Sanskrit - [Kaṭhāraṇyaka](https://indike.org/pramana/in.veda.aranyaka.katha) — Sanskrit - [A Vedic Concordance](https://indike.org/pramana/ins.reference.bloomfield-1906.c6.690) — Maurice Bloomfield, English - [Altindische Grammatik](https://indike.org/pramana/ins.literature.wackernagel-1896.v3.c9.4655) — Jacob Wackernagel & Albert Debrunner, German --- Source: [https://indike.org/pramana/in.veda.aranyaka.taittiriya.4.5](https://indike.org/pramana/in.veda.aranyaka.taittiriya.4.5) · Pramāṇa