Pramāṇa · Search · About · API

Taittirīya Āraṇyaka 4.6

Taittirīyāraṇyaka 4.6

Language
Sanskrit

4.6.1

dáśa prā́cīr dáśa bhāsi dakṣiṇā́ \
dáśa pratī́cīr dáśa bhāsy údīcīḥ \
dáśordhvā́ bhāsi sumanasyámānaḥ \
sá no rúcaṃ dhehy áhṛṇīyamānaḥ \
agníṣ ṭvā vásubhiḥ purástād rocayatu gāyatréṇa chándasā \
sá mā rucitó rocaya \
índras tvā rudráir dakṣiṇató rocayatu tráiṣṭubhena chándasā \
sá mā rucitó rocaya \
váruṇas tvādityáiḥ paścā́d rocayatu jā́gatena chándasā \
sá mā rucitó rocaya \

4.6.2

dyutānás tvā mārutó marúdbhir uttarató rocayatv ā́nuṣṭubhena chándasā \
sá mā rucitó rocaya \
bṛ́haspátis tvā víśvair deváir upáriṣṭād rocayatu pā́ṅktena chándasā \
sá mā rucitó rocaya \
rocitás tváṃ deva gharma devéṣv ási \
rociṣīyā́háṃ manuṣyèṣu \
sámrāḍ gharma rucitás tváṃ devéṣv ā́yuṣmām̐s tejasvī́ brahmavarcasy àsi \
rucitò 'haṃ manuṣyèṣv ā́yuṣmām̐s tejasvī́ brahmavarcasī́ bhūyāsam \
rúg asi \
rúcaṃ máyi dhehi \

4.6.3

máyi rúk \
dáśa purástād rocase \
dáśa dakṣiṇā́ \
dáśa pratyáṅ \
dáśódaṅ \
dáśordhvó bhāsi sumanasyámānaḥ \
sá naḥ samrāḍ íṣam ū́rjaṃ dhehi \
vājī́ vājíne pavasva \
rocitó gharmó rucīyá \ \\ rocaya dhehi náva ca \\

Linked texts (1)