<!-- Pramāṇa, a library of Indian primary sources · https://indike.org/pramana/in.veda.aranyaka.taittiriya.4.6 -->

[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Āraṇyakas (forest texts)](https://indike.org/pramana/in.veda.aranyaka) › [Taittirīya Āraṇyaka](https://indike.org/pramana/in.veda.aranyaka.taittiriya) › 4.6

# Taittirīya Āraṇyaka 4.6

Taittirīyāraṇyaka 4.6

- **Language:** Sanskrit

### [4.6.1](https://indike.org/pramana/in.veda.aranyaka.taittiriya.4.6.1)

dáśa prā́cīr dáśa bhāsi dakṣiṇā́ \  
dáśa pratī́cīr dáśa bhāsy údīcīḥ \  
dáśordhvā́ bhāsi sumanasyámānaḥ \  
sá no rúcaṃ dhehy áhṛṇīyamānaḥ \  
agníṣ ṭvā vásubhiḥ purástād rocayatu gāyatréṇa chándasā \  
sá mā rucitó rocaya \  
índras tvā rudráir dakṣiṇató rocayatu tráiṣṭubhena chándasā \  
sá mā rucitó rocaya \  
váruṇas tvādityáiḥ paścā́d rocayatu jā́gatena chándasā \  
sá mā rucitó rocaya \

### [4.6.2](https://indike.org/pramana/in.veda.aranyaka.taittiriya.4.6.2)

dyutānás tvā mārutó marúdbhir uttarató rocayatv ā́nuṣṭubhena chándasā \  
sá mā rucitó rocaya \  
bṛ́haspátis tvā víśvair deváir upáriṣṭād rocayatu pā́ṅktena chándasā \  
sá mā rucitó rocaya \  
rocitás tváṃ deva gharma devéṣv ási \  
rociṣīyā́háṃ manuṣyèṣu \  
sámrāḍ gharma rucitás tváṃ devéṣv ā́yuṣmām̐s tejasvī́ brahmavarcasy àsi \  
rucitò 'haṃ manuṣyèṣv ā́yuṣmām̐s tejasvī́ brahmavarcasī́ bhūyāsam \  
rúg asi \  
rúcaṃ máyi dhehi \

### [4.6.3](https://indike.org/pramana/in.veda.aranyaka.taittiriya.4.6.3)

máyi rúk \  
dáśa purástād rocase \  
dáśa dakṣiṇā́ \  
dáśa pratyáṅ \  
dáśódaṅ \  
dáśordhvó bhāsi sumanasyámānaḥ \  
sá naḥ samrāḍ íṣam ū́rjaṃ dhehi \  
vājī́ vājíne pavasva \  
rocitó gharmó rucīyá \ \\ rocaya dhehi náva ca \\

## Commentaries (2)

- [Taittirīyāraṇyakabhāṣya (Sāyaṇa)](https://indike.org/pramana/in.veda.aranyaka.taittiriya!sayana) — Sāyaṇa, Sanskrit
- [Vedārthaprakāśa](https://indike.org/pramana/in.veda.aranyaka.taittiriya!sayana-alias-madhava) — Sāyaṇa alias Mādhava, Sanskrit

## Linked texts (4)

- [Yajurveda](https://indike.org/pramana/in.veda.samhita.yajurveda.2.25) — Sanskrit
- [Kaṭhāraṇyaka](https://indike.org/pramana/in.veda.aranyaka.katha) — Sanskrit
- [A Vedic Concordance](https://indike.org/pramana/ins.reference.bloomfield-1906.c6.208) — Maurice Bloomfield, English
- [Altindische Grammatik](https://indike.org/pramana/ins.literature.wackernagel-1896.v3.c9.138) — Jacob Wackernagel & Albert Debrunner, German

---
Source: [https://indike.org/pramana/in.veda.aranyaka.taittiriya.4.6](https://indike.org/pramana/in.veda.aranyaka.taittiriya.4.6) · Pramāṇa