Pramāṇa · Search · About · API

Taittirīya Āraṇyaka 4.7

Taittirīyāraṇyaka 4.7

Language
Sanskrit

4.7.1

ápaśyaṃ gopā́m ánipadyamānam \
ā́ ca párā ca pathíbhiś cárantam \
sá sadhrī́cīḥ sá víṣūcīr vásānaḥ \
ā́ varīvarti bhúvaneṣv antáḥ \
átra prāvī́ḥ \
mádhumā́dhvībhyāṃ mádhu-mā́dhūcībhyām \
ánu vāṃ devávītaye \
sám agnír agnínāgata \
sáṃ devéna savitrā́ \
sam̐ sūryeṇa rocate \

4.7.2

svā́hā sám agnís tápasāgata \
sáṃ devéna savitrā́ \
sáṃ sū́ryeṇārociṣṭa \
dhartā́ divó víbhāsi rájasaḥ \
pṛthivyā́ dhartā́ \
urór antárikṣasya dhartā́ \
dhartā́ devó devā́nām \
ámartyas tapojā́ḥ \
hṛdé tvā mánase tvā \
divé tvā sū́ryāya tvā \

4.7.3

ūrdhvám imám adhvaráṃ kṛdhi \
diví devéṣu hótrā yaccha \
víśvāsāṃ bhuvāṃ pate \
víśvasya bhuvanas pate \
víśvasya manasas pate \
víśvasya vacasas pate \
víśvasya tapasas pate \
víśvasya brahmaṇas pate \
devaśrū́s tváṃ deva gharma devā́n pāhi \
tapojā́ṃ vā́cam asmé níyaccha devāyúvam \

4.7.4

gárbho devā́nām \
pitā́ matīnā́m \
pátiḥ prajā́nām \
mátiḥ kavīnā́m \
sáṃ devó devéna savitrā́yatiṣṭa \
sam̐ sūryeṇārukta \
āyurdás tvám asmábhyaṃ gharma varcodā́ asi \
pitā́ no 'si pitā́ no bodha \
āyurdhā́s tanūdhā́ḥ payodhā́ḥ \
varcodā́ varivodā́ draviṇodā́ḥ \

4.7.5

antarikṣapra urór várīyān \
aśīmáhi tvā mā́ mā him̐sīḥ \
tvám agne gṛhápatir viśā́m asi \
víśvāsāṃ mā́nuṣīṇām \
śatáṃ pūrbhír yaviṣṭha pāhy am̐hasaḥ \
sameddhā́ram̐ śatám̐ hímāḥ \
tandrāvíṇam̐ hārdivānám \
iháivá rātáyaḥ santu \
tváṣṭīmatī te sapeya \
surétā réto dádhānā \ (7.5aa)
vīráṃ videya táva saṃdṛ́śi \ (7.5bb)
mā́ham̐ rāyáspóṣeṇa ví yoṣam \
\\ rocate sū́ryāya tvā devāyúvaṃ draviṇodā́ dádhānā dvé ca \\

Commentaries (2)

Linked texts (6)