Pramāṇa · Search · About · API

Taittirīya Āraṇyaka 4.8

Taittirīyāraṇyaka 4.8

Language
Sanskrit

4.8.1

devásya tvā savitúḥ prasavé \
aśvínor bāhúbhyām \
pūṣṇó hástābhyām ā́dade \
ádityai rā́snāsi \
íḍa éhi \
ádita éhi \
sárasvaty éhi \
ásāv éhi \
ásāv éhi \
ásāv éhi \

4.8.2

ádityā uṣṇī́ṣam asi \
vāyúr asyaiḍáḥ \
pūṣā́ tvopā́vasṛjatu \
aśvíbhāṃ prá dāpaya \
yás te stánaḥ śaśayó yó mayobhū́ḥ \
yéna víśvā púṣyasi vā́ryaṇi \
yó ratnadhā́ vasuvíd yáḥ sudátraḥ \
sárasvati tám ihá dhā́tave kaḥ \
úsra gharmám̐ śim̐ṣa \
úsra gharmáṃ pāhi \

4.8.3

gharmā́ya śim̐ṣa \
bṛ́haspátis tvópa sīdatu \
dā́navaḥ stha péravaḥ \
viṣvagvṛ́to lóhitena \
aśvíbhyāṃ pinvasva \
sárasvatyai pinvasva \
pūṣṇé pinvasva \
bṛ́haspátaye pinvasva \
índrāya pinvasva \
índrāya pinvasva \

4.8.4

gāyatrò 'si \
tráiṣṭubho 'si \
jā́gatam asi \
sahórjo bhāgénópa méhi \
índrāśvinā mádhunaḥ sāraghásya \
gharmáṃ pāta vasavo yájatā vaṭ \
svā́hā tvā sū́ryasya raśmaye vṛṣṭivánaye juhomi \
mádhu havír asi \
sū́ryasya tápas tapa \
dyā́vāpṛthivī́bhyāṃ tvā pári gṛhṇāmi \

4.8.5

antárikṣeṇa tvópa yacchāmi \
devā́nāṃ tvā pitṛṇā́m ánumato bhártum̐ śakeyam \
téjo 'si \
téjo 'nupréhi \
divispṛ́ṅ mā́ mā him̐sīḥ \
antarikṣaspṛ́ṅ mā́ mā him̐sīḥ \
pṛthivispṛ́ṅ mā́ mā him̐sīḥ \
súvar asi súvar me yaccha \
dívaṃ yaccha divó mā pāhi \ \\ éhi pāhi pinvasva gṛhṇāmi náva ca \\

4.9.2

bṛ́haspátaye tvā viśvádevyāvate svā́hā \
savitré tvarbhumáte vibhumáte prabhumáte vā́javate svā́hā \
yamā́ya tvā́ṅgirasvate pitṛmáte svā́hā \
víśvā ā́śā dakṣiṇasát \
víśvān devā́n ayāḍ ihá \
svā́hākṛtasya gharmásya \
mádhoḥ pibatam aśvinā \
svā́hāgnáye yajñíyāya \
śáṃ yájurbhiḥ \
áśvinā gharmáṃ pātam̐ hārdivānám \

4.9.3

áhardivā́bhir ūtíbhiḥ \
ánu vāṃ dyā́vāpṛthivī́ mam̐sātām \
svā́hendrāya \
svā́hendrā váṭ \
gharmám apātam aśvinā hārdivānám \
áhardivā́bhir ūtíbhiḥ \
ánu vāṃ dyā́vāpṛthivī́ amam̐sātām \
táṃ prāvyàṃ yathāváṭ \
námo divé \
námaḥ pṛthivyái \

4.9.4

diví dhā imáṃ yajñám \
yajñám imáṃ diví dhāḥ \
dívaṃ gaccha \
antárikaṃ gaccha \
pṛthivī́ṃ gaccha \
páñca pradíśo gaccha \
devā́n gharmapā́n gaccha \
pit.ṝn gharmapā́n gaccha \ \\ ādityávate svā́hā hārdivānáṃ pṛthivyā́ aṣṭáu ca \\

Commentaries (2)

Linked texts (5)