Taittirīya Āraṇyaka 5.10

Taittirīyāraṇyaka 5.10

Language: Sanskrit

5.10.1

prajā́patiṃ vái devā́ḥ śukráṃ páyo 'duhran \
tád ebhyo ná vy àbhavat \
tád agnír vy àkarot \
tā́ni śúkriyāṇi sā́māny abhavan \
téṣāṃ yó ráso 'tyákṣarat \
tā́ni śukrayajū́m̐ṣy abhavan \
śúkriyāṇāṃ vā́ etā́ni śúkriyāṇi \
sāmapayasáṃ vā́ etáyor anyát \
devā́nām anyát páyaḥ \
yád góḥ páyaḥ \

5.10.2

tát sā́mnaḥ páyaḥ \
yád ajā́yai páyaḥ \
tád devā́nāṃ páyaḥ \
tásmād yátraitáir yájurbhiś cáranti \
tát páyasā caranti \
prajā́patim evá tád devā́n páyasānnā́dyena sám ardhayanti \
eṣá ha tvái sākṣā́t pravargyàṃ bhakṣayati \ tvái
yásyaiváṃ vidúṣaḥ pravargyàḥ pravṛjyáte \
uttaravedyā́m úd vāsayet téjaskāmasya \
téjo vā́ uttaravedíḥ \

5.10.3

téjaḥ pravargyàḥ \
téjasaivá téjaḥ sám ardhayati \
uttaravedyā́m úd vāsayet ánnakāmasya \
śíro vā́ etád yajñásya \
yát pravargyàḥ \
múkham uttaravedíḥ \
śīrṣṇáivá múkham̐ sáṃ dadhāty annā́dyāya \
annāda evá bhavati \
yátra khálu vā́ etám údvāsitaṃ váyām̐si paryā́sate \
pári vái tā́ṃ sámāṃ prajā́ váyām̐sy āsate \

5.10.4

tásmād uttaravedyā́m evód vāsayet \
prajā́nāṃ gopīthā́ya \
puró vā paścā́d vód vāsayet \
purástād vā́ etáj jyótir úd eti \
tát paścā́n ní mrocati \
svā́m eváinaṃ yónim ánū́d vāsayati \
apā́ṃ mádhya úd vāsayet \
apā́ṃ vā́ etán mádhyāj jyótir ajāyata \
jyótiḥ pravargyàḥ \
sva eváinaṃ yónau práti ṣṭhāpayati \

5.10.5

yáṃ dviṣyā́t \
yátra sá syāt \
tásyāṃ diśy úd vāsayet \
eṣá vā́ agnír vaiśvānaráḥ \
yát pravargyàḥ \
agnínaiváinaṃ vaiśvānaréṇābhi prá vartayati \
áudumbaryām̐ śā́khāyām úd vāsayet \
ū́rg vā́ udumbáraḥ \
ánnaṃ prāṇáḥ \
śúg gharmáḥ \

5.10.6

idám ahám amúṣYāmuṣyāyaṇásya śucā́ prāṇám ápi dahāmī́ty āha \
śucáivā́sya prāṇám ápi dahati \
tājág ā́rtim ā́rcchati \
yátra darbhā́ upadī́kasantatāḥ syúḥ \
tád úd vāsayed vṛ́ṣṭikāmasya \
etā́ vā́ apā́m anūjjaā́varyo nā́ma \
yád darbhā́ḥ \
asáu khálu vā́ ādityá itó vṛ́ṣṭim úd īrayati \
asā́v evā́smā ādityó vṛ́ṣṭiṃ ní yacchati \
tā́ ā́po níyatā dhánvanā yanti \ \\ góḥ páya uttaravedír āsate sthāpayati gharmó yanti \\