Taittirīya Āraṇyaka 5.12
Taittirīyāraṇyaka 5.12
- Language
- Sanskrit
5.12.1
savitā́ bhūtvā́ prathamé 'han prá vṛjyate \
téna kā́mām̐ eti \
yád dvitī́yé 'han pravṛjyáte \
agnír bhūtvā́ devā́n eti \
yát tṛtīyé 'han pravṛjyáte \
vāyúr bhūtvā́ prāṇā́n eti \
yác caturthé 'han pravṛjyáte \
ādityó bhūtvā́ raśmī́n eti \
yát pañcamé han pravṛjyáte \
candrámā bhūtvā́ nákṣatrāṇy eti \
5.12.2
yát ṣaṣṭhé 'han pravṛjyáte \
ṛtúr bhūtvā́ saṃvatsarám eti \
yát saptamé 'han pravṛjyáte \
dhātā́ bhūtvā́ śakvarīm eti \
yád aṣṭhamé 'han pravṛjyáte \
bṛ́haspátir bhūtvā́ gāyatrī́m eti \
yán navamé 'han pravṛjyáte \
mitró bhūtvā́ trivṛ́ta imā́m̐ lokā́n eti \
yád daśamé 'han pravṛjyáte \
váruṇo bhūtvā́ virā́jam eti \
5.12.3
yád ekādaśé 'han pravṛjyáte \
índro bhūtvā́ triṣṭubham eti \
yád dvādaśé 'han pravṛjyáte \
sómo bhūtvā́ sutyā́m eti \
yát purástād upasádāṃ pravṛjyáte \
tásmād itáḥ párāṅ amū́m̐ lokām̐s tápann eti \
yád upáriṣṭād upasádāṃ pravṛjyáte \
tásmād amúto 'rvā́ṅ imā́ṅ lokā́m̐s tápann eti \
yá eváṃ véda \
áivá tapati \ \\ nákṣatrāṇy eti virā́jam eti tapati \\
1. \\ devā́ vái satrám̐
2. sāvitráṃ
3. pári.śrite
4. bráhman prá cariṣyāmo
5. 'gníṣ ṭvā
6. śíro grīvā́
7. devásya raśanā́ṃ
8. víśvā ā́śā
9. ghárma yā́ te
10. prajā́patim̐ śukráṃ
11. prajā́patiḥ sambhriyámānaḥ
12. savitā́ dvā́daśa \\ 12 \\
\\ devā́ vái satrám̐ sá khadiráḥ
páriśrite
abhipūrvám
átho rákṣasām
gráiṣmāv evá
bráhma vái devā́nām
áśvinā gharmáṃ pātam
pātam prāṇó vā́ índratamo 'gníḥ
vṛ́ṣā háriḥ
yó vái vásīyām̐saṃ yathānāmám
aṣṭóttaraśatam \\ 108 \\
śáṃ naḥ + tán no mā́ hāsīt \
Oṃ śā́ntiḥ śā́ntiḥ śā́ntiḥ \ háriḥ Oṃ \
Commentaries (1)
- Taittirīyāraṇyakabhāṣya (Sāyaṇa) — Sāyaṇa, Sanskrit
Linked texts (2)
- Kaṭhāraṇyaka — Sanskrit
- Pravargyabrāhmaṇa — Sanskrit
Discussed in (2)
- Vedic Index of Names and Subjects — Macdonell & Keith 1912, English
- A Vedic Concordance — Bloomfield 1906, English